Khoom Nce Nqi Thoob Ntiaj Teb—Phau Vajlugkub Hais Li Cas?

Tus coj lub koom haum World Bank Group tau tshaj tawm rau lub 6 Hli xyoo 2022 tias, “Kev lag luam thoob ntiaj teb yuav rov qab poob. Zaum no muaj ob qho teeb meem thooj txhij ua ke, txhua yam nce nqi thiab kev lag luam los mus tsis zoo.”

Lub koom haum International Monetary Fund hais tias, “Roj thiab zaub mov nce nqi ceev heev. Cov pluag hauv tej teb chaws txom nyem yog cov uas raug sab tshaj.”

Phau Vajlugkub qhia tias vim li cas yuav nyuaj khwv noj khwv haus ua luaj li lawm, dab tsi thiaj yuav pab tau peb, thiab puas yuav muaj ib hnub kho tau.

Nyob rau “tiam kawg” txhua yam nce nqi

• Phau Vajlugkub hais tias peb nyob rau “tiam kawg” lawm.—2 Timaute 3:1.

• Yexus hais tias nyob rau lub sij hawm no, “yuav muaj tej yam txaus ntshai heev.” (Lukas 21:11) Thaum txhua yam pib nce nqi tib neeg yeej ntshai kawg li. Lawv txhawj txog lawv lub neej yav tom ntej thiab txhawj tias xyov lawv puas khwv txaus lawv tsev neeg noj.

• Phau Tshwmsim qhia tias nyob rau lub caij no zaub mov yuav nce nqi. Tshwmsim 6:6 hais tias, “Kuv hnov ib lub suab . . . hais tias, ‘Cov neeg uas ua luag zog, yog yuav txhuv mas ib hnub twg ib taig txhuv, yog yuav pias ces ib hnub peb taig pias.’”

Yog xav paub ntxiv txog “tiam kawg” thiab cov lus faj lem hauv phau Tshwmsim, mus saib zaj yeeb yaj kiab Txij Xyoo 1914 Los Lub Qab Ntuj No Tsis Zoo Li Qub Lawm, thiab nyeem zaj “The Four Horsemen—Who Are They?”

Dab tsi thiaj yuav kho tau 

• “Cov neeg ua tsev yuav tau nyob hauv tej tsev ntawd, tsis yog lwm tus yuav tau nyob. Lawv yuav cog txiv hmab thiab yuav tau haus tej cawv txiv hmab ntawd, tsis yog lwm tus yuav tau haus.”—Yaxayas 65:21, 22.

• “Thov kom lub [ntiaj teb] muaj nplej ntsu nplua mias, thov kom muaj qoobloo puv nkaus saum tej pov roob.”—Phau Ntawv Nkauj 72:16.

• “[Yehauvas] hais tias, ‘Kuv yuav los tamsim no ntag, rau qhov cov neeg txomnyem raug tsimtxom hnyav heev thiab cov neeg nyuaj siab quaj tu siab kawg li.’”—Phau Ntawv Nkauj 12:5.a

Tshuav tsis ntev Vajtswv yuav kho kom txhua leej txhua tus thoob ntiaj teb muaj txaus noj txaus hnav. Yog xav paub seb nws yuav kho li cas mus nyeem zaj, “Is a Fair Economic System Possible?”

Phau Vajlugkub yeej pab tau koj tam sim no thiab. Yuav pab tau koj li cas? Phau Vajlugkub yuav tsav tswv yim rau koj xwv koj thiaj paub txuag nyiaj txiag. (Pajlug 23:4, 5; Tej Lus Qhia 7:12) Yog xav paub ntxiv mus nyeem zaj, “Ceev Rawv Tej Yam Tseem Ceeb” thiab zaj “How to Live on Less.”