Ua Cas Lub Ntiajteb Tsis Muaj Kev Thaj Yeeb Li?
Phau Vajlugkub qhia li no
Txawm tibneeg xav kho lub ntiajteb npaum li cas los yeej kho tsis tau kom muaj kev thaj yeeb li. Yog vim li cas? Twb yog vim li no:
Vim “tsis yog neeg coj tau neeg tshais kauj ruam.” (Yelemis 10:23, Vajtswv Txojlus Txhais Tshiab Xyoo 2004) Vajtswv tsis tau tsim kom tibneeg txawj kav lossis muaj cai kav lawv tus kheej, yog li ntawd neeg thiaj tsis paub yuav ua li cas lub ntiajteb thiaj muaj kev thaj yeeb tiag.
Txawm tej nom tswv xav kho lub ntiajteb no los, lawv yeej tsis muaj peev xwm tshem tau kev tsov kev rog li. Phau Vajlugkub hais tias: “Tsis txhob tso siab rau tej nomtswv, lawv yog neeg xwb, lawv yeej pab tsis tau nej dim kev ploj kev tuag li. Thaum lawv tuag, lawv yuav rov mus ua av; lawv tej tswvyim yuav kawg rau hnub ntawd.”—Phau Ntawv Nkauj 146:3, 4.
Vim peb nyob rau “lub sijhawm uas ntiajteb yuav kawg yuav muaj kev ntxhov siab heev. Rau qhov tej neeg nyias yuav . . . ua neeg tsivtsaim thiab tsis nyiam ua zoo; lawv yuav ua neeg ntxeev siab, ua neeg siab heev, thiab lawv saib lawv tsimtxiaj dua lwm tus.” (2 Timautes 3:1–4) Twb yog vim li no, tibneeg thiaj kho tsis tau lub ntiajteb kom muaj kev thaj yeeb.
Dab Ntxwg Nyoog uas yog Vajtswv tus yeeb ncuab raug ntiab los hauv ntiajteb, nws tas zog haub ntxias tibneeg ua nruj ua tsiv ib yam li nws. Phau Vajlugkub ceeb toom tias: “Ntiajteb thiab hiavtxwv yuav raug kev txomnyem heev, rau qhov dab Ntxwgnyoog twb los rau ntawm neb lawm. Dab Ntxwgnyoog chim kawg li, rau qhov nws paub hais tias nws yuav tsis tau nyob ntev lawm.” (Tshwmsim 12:12) Yog dab Ntxwg Nyoog tseem yog “tus uas kav lub ntiajteb no,” ces peb yuav tsis muaj kev thaj yeeb nyab xeeb kiag li.—Yauhas 12:31.
Tsuas yog Vajtswv lub Nceeg Vaj xwb thiaj kho tau lub ntiajteb no. Rau qhov “lub tebchaws [Nceeg Vaj] ntawd yuav ua rau tej tebchaws [uas tawm tsam Vajtswv] tawg ntsoog ntxaws ua tej dwb daim yaj tag, thiab lub tebchaws ntawd yuav nyob ruaj khov mus ib txhis.” (Daniyees 2:44, TT) Vajtswv lub Nceeg Vaj yuav ua kom peb tau nyob mus ib txhis hauv ib lub ntiajteb uas muaj kev thaj yeeb li peb lub siab ntshaw, qhov no mas neeg tej tseem fwv yeej ua tsis tau hlo li.—Phau Ntawv Nkauj 145:16.