Vim Li Cas Tib Neeg Tsis Muaj Kev Thaj Yeeb?​—⁠Phau Vajlugkub Hais Li Cas?

Tej nom tej tswv thiab tej koom haum uas saib xyuas tib neeg thoob ntiaj teb, ua tsis tau kom muaj kev thaj yeeb. Niaj hnub nim no, tseem muaj kev ua nruj ua tsiv heev tshaj thaum muaj Ntsuj Rog Thoob Qab Ntuj Zaum 2. Muaj yuav luag txog ob txhiab plhom cov tib neeg uas nyob rau tej thaj chaw uas muaj kev ua nruj ua tsiv thiab ua tsov ua rog.

Vim li cas tib neeg ua tsis tau kom muaj kev thaj yeeb? Phau Vajlugkub hais li cas?

Peb yam uas ua rau tib neeg tsis muaj kev thaj yeeb

1. 1. Tib neeg muaj tus cwj pwm uas ua rau muaj tsis tau kev sib haum xeeb. Phau Vajlugkub twb qhia tseg lawm tias, ‘tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khav theeb, yuav muab hlob, . . . yuav saib tsis taus Vajtswv txoj kev cai, . . . tsis zam txim rau lwm tus, . . . tsis tswj lawv lub siab, ua neeg tsiv tsaim, . . . ua neeg siab heev, thiab lawv saib lawv tsim txiaj dua lwm tus.’​—2 Timautes 3:2-4.

2. 2. Tsis muaj ib tug neeg los sis ib pab ib pawg neeg twg, yuav kho tau tib neeg tej teeb meem. Yuav tsum muaj Vajtswv Yehauvasa ua tus pab mas thiaj yuav kho tau. Rau qhov phau Vajlugkub qhia tias ‘tsis muaj leej twg nws rov tswj nws lub neej.’​—Yelemis 10:23.

3. 3. Tag nrho noob neej nyob hauv qab Xatas, uas yog Dab Ntxwg Nyoog, ‘tus uas dag ntxias neeg ntiaj teb’ txoj kev kav. (Tshwmsim 12:9) Yog hais tias Dab Ntxwg Nyoog tseem ‘kav cov neeg uas nyob hauv ntiaj teb no,’ ces yeej yuav muaj kev ua tsov ua rog thiab kev ua nruj ua tsiv.​—1 Yauhas 5:19.

Leej twg thiaj yuav ua kom muaj tau kev thaj yeeb?

Phau Vajlugkub qhia tias, tsis yog tib neeg ua tau kom muaj kev thaj yeeb, tiam sis yuav tsum yog Vajtswv xwb thiaj ua tau.

• ‘Kuv tib leeg thiaj paub tej uas kuv npaj yuav ua rau nej, kuv yuav pab kom nej vam meej tsis yog ua kom nej puas tsuaj, nej thiaj muaj kev cia siab rau yav tom ntej.’​—Yelemis 29:11.

Vajtswv yuav ua kom muaj tiav raws li nqe Vajlugkub no hais li cas? “Tus Vajtswv uas pub peb muaj lub siab tus yuav muab Xatas nias nthi rau nej tsuj.” (Loos 16:20) Vajtswv yuav siv ib lub tseem fwv saum ntuj ceeb tsheej uas phau Vajlugkub qhia tias yog “Vajtswv txoj kev kav,” los ua kom muaj kev thaj yeeb nyob thoob plaws lub ntiaj teb. (Lukas 4:43) Thaum Yexus Khetos uas yog tus Vaj Ntxwv ntawm Vajtswv lub Nceeg Vaj kav lawm, nws yuav cob qhia kom tib neeg paub ua neej nyob sib haum xeeb thiab muaj kev thaj yeeb.​—Yaxayas 9:6, 7.

• Yog xav kawm ntxiv, mus nyeem zaj “Vajtswv Lub Nceeg Vaj Yuav Ua Dabtsi?”