Kev Vam Kev Cia Siab​—Puas Pab Tau Peb Tiag?

THAUM DANIYEES MUAJ 10 xyoo xwb nws twb tau ntoog nws tus mob kheeb xawm tau ib lub xyoos lawm. Cov kws kho mob, nws tsev neeg, thiab cov neeg uas hlub tshua txog nws tag kev cia siab tias xyov nws puas yuav zoo tau. Tiam sis Daniyees tseem muaj kev cia siab. Nws xav tias thaum nws loj hlob tuaj nws yuav kawm mus ua ib tug kws tshawb fawb thiab nrhiav kev los kho kheeb xawm. Thaum nws hnov tias tus kws kho mob tshwj xeeb txog nws tus kheeb xawm yuav tuaj saib nws ua rau nws muaj kev cia siab thiab zoo siab kawg. Tiam sis thaum txog hnub ntawd, tus kws kho mob tuaj tsis tau vim muaj huab cua tsis zoo. Daniyees thiaj li pib nyuaj siab thiab tag kev cia siab. Zaum no ua rau nws qaug zog heev. Ces ob peb hnub tom qab xwb nws tau tag sim neej lawm.

Daniyees lub neej yog qhia los ntawm ib tug neeg ua hauj lwm hauv tsev kho mob. Tus neeg no kawm feem xyuam txog kev cia siab thiab qhov uas tsis muaj kev cia siab seb puas pab tau tib neeg noj qab nyob zoo tiag. Muab xav li no, muaj ib tug neeg laus uas tab tom ua nruj nriaj txoj sia yuav tu tsis tu vim nws pheej tos ntsoov ib tug uas nws hlub tshua los sis ib yam dab tsi uas nws lub siab khuam rawv rau. Tiam sis tom qab nws pom tus neeg ntawd los sis tau yam uas nws xav tau lawm nws txoj sia txawm tu nrho. Ua cas ho muaj tau li no? Kev vam kev ciab siab puas pab ib tug neeg txoj sia nyob ntev zog?

Cov kws tshawb fawb txog kev kho mob coob zuj zus qhia tias kev cia siab thiab qhov xav txog yam zoo yeej pab tau tib neeg lub neej kom noj qab nyob zoo. Tiam sis muaj ib txhia tsis xav li ntawd. Lawv hais tias tsis muaj pov thawj qhia tias kev vam kev cia siab pab tau kom noj qab nyob zoo tiag. Lawv xav tias tus mob zoo tsis taus los ntawm muaj kev vam kev cia siab.

Peb paub tias qhov uas tib neeg xav li no yeej ib txwm muaj puag thaum ub los lawm. Ntau txhiab xyoo dhau los, tus tshawb txuj Elixitatau (Aristotle) uas yog neeg Kili tau hais li no: “Kev vam kev cia siab tsuas yog npau suav xwb.” Tsis tas li ntawd, tom qab no Benjamin Franklin uas yog ib tug nom hauv teb chaws Amelikas tau hais tias: “Kev vam kev cia siab yeej pab tsis tau peb li.”

Yog li qhov tseeb txog kev vam kev cia siab yog li cas tiag? Puas yog lam hais kom peb zoo siab xwb? Los sis peb yeej ntseeg tau tias kev vam kev cia siab pab tau txhua tus muaj kev zoo siab thiab noj qab nyob zoo?

Vim Li Cas Peb Yuav Tsum Muaj Kev Vam Kev Cia Siab?

YOG tus me tub Daniyees uas mob kheeb xawm uas peb nyuam qhuav tham tag hauv zaj ua ntej tuav rawv nws txoj kev cia siab, nws tus kheeb xawm puas yuav zoo tau? Nws puas tseem muaj txoj sia nyob txog niaj hnub no? Txawm cov neeg uas xav tias kev cia siab yeej pab tau los, lawv yuav tsis hais tias kho tau tus mob zoo. Yog li no tseem ceeb rau peb paub tias txawm peb muaj kev vam kev cia siab los, qhov no yuav kho tsis tau tej kab mob kev nkeeg uas peb muaj.

Ib tug kws kho mob hu uas Nathan Cherney tham hauv ib tshooj TV thiab nws qhia tias thaum hais txog kev cia siab rau ib tug neeg mob, tsis txhob hais ntau tshaj li qhov tsim nyog hais. Nws hais tias, “Peb pom muaj tej tug txiv cem lawv tus poj niam tias tus poj niam tsis siv zog xav rau qhov zoo.” Nws kuj hais ntxiv tias, “Txoj kev xav no yuam kev lawm, yuav ua rau tus mob xav tias yog nws xav qhov zoo xwb ces nws yuav tswj tau tus mob, tiam sis yog tus neeg mob ho tsis zoo ces lwm tus ho xav tias tej zaum nws tsis kub siab xav rau qhov zoo. Qhov no tsis ncaj ncees rau tus neeg mob lawm.”

Qhov tseeb, thaum ib tug uas muaj mob loj nws twb siv tag nrho nws lub dag lub zog nyiaj tus mob lawm. Yog li no tsis tsim nyog nws tsev neeg ua nyuaj rau nws thiab hais tej yam ua rau nws ntxhov siab. Tiam sis tej no puas txhais tias kev vam kev cia siab pab tsis tau peb?

Tsis yog li ntawd. Tus kws kho mob Nathan Cherney kuj yog ib tug saib xyuas cov neeg mob hnyav zoo tsis taus lawm thiab nws pab lawv kom tsis txhob mob meem txom ntsuav mus txog thaum txoj sia tu. Cov kws kho mob no pom tias yog lawv pab cov tib neeg uas muaj mob loj kom tsis txhob hnov mob heev, kuj yuav ua rau lawv nyob kaj siab zog. Twb muaj pov thawj qhia lawm tias yog ib tug neeg muaj kev vam kev cia siab yuav pab tau nws dua.

Kev Vam Kev Cia Siab Pab Tau Peb

Tus sau ntawv xov xwm uas yog ib tug kws kho mob hu ua Ken Walker hais tias, “Kev vam kev cia siab pab tau peb.” Nws tau tshuaj xyuas ntau yam kev tshawb fawb ua los qhia seb muaj nqis npaum li cas yog muaj kev txhawb siab rau ib tug neeg mob uas tsis zoo lawm. Muaj coob leej xav tias txoj kev txhawb siab no pab tau tib neeg kom muaj kev cia siab thiab xav rau qhov zoo. Nyob rau xyoo 1989 muaj ib txoj kev kawm tshawb pom tias cov neeg mob uas tau txais kev txhawb siab muaj txoj sia nyob ntev dua, tiam sis tom qab no ho muaj ib co kev kawm tshawb pom tias tsis muaj pov thawj qhia tau li ntawd. Lawv hais tias tsuas pab ib tug neeg mob kom txhob hnov mob heev thiab kom txhob nyuaj siab dhau xwb zoo dua li tus uas tsis tau kev txhawb siab.

Xav txog lwm txoj kev kawm tshawb tsi ntsees rau qhov xav zoo thiab qhov uas xav tsis zoo tias yuav muaj li cas rau kev mob plawv. Lawv tau muab ib pab txiv neej coob tshaj li 1,300 tus coj los kawm seb qhov uas xav zoo thiab qhov uas xav tsis zoo txog lub neej yuav zoo li cas rau lawv. Tom qab 10 lub xyoos lawv taug qab saib cov txiv neej no thiab pom tias muaj txog li 160 tus muaj mob plawv. Ntawm 160 tus txiv neej no, cov uas xav rau qhov tsis zoo muaj coob dua cov uas xav rau qhov zoo. Tus kws xib hwb kho mob Laura Kubzansky tau hais tias, “Tej pov thawj yav tas los uas qhia tias ‘xav txog qhov zoo’ yeej pab tau kev noj qab nyob zoo, peb tso siab tsis tau rau. Tiam sis txoj kev kawm txog pab txiv neej no, yog thawj zaug uas qhia tias qhov xav zoo yeej pab tau lub plawv.”

Muaj ib co kev tshawb fawb pom tias yog ib tug neeg xav tias nws noj qab nyob zoo, ces thaum mus phais ib tug mob twg los nws yuav zoo sai dua. Cov tshawb fawb tseem xav tias yuav pab tib neeg muaj txoj sia nyob ntev dua thiab. Muaj ib txoj kev tshuaj ntsuam saib seb cov laus xav li cas txog qhov uas lawv laus zuj zus lawm. Lawv kuj hais ntxiv tias yog cov laus tau kev txhawb siab tias yim laus yim muaj tswv yim thiab paub tab ces yuav txhawb tau cov laus muaj dag muaj zog.

Vim li cas ib txhia kws tshawb fawb ho hais tias kev cia siab thiab qhov uas xav zoo xwb zoo li pab tau peb noj qab nyob zoo? Tej zaum lawv tseem tsis tau nkag siab zoo txog tib neeg lub cev thiab txoj kev xav, lawv tsuas hais raws li qhov uas lawv tau kawm xwb. Muaj ib tug xib hwb qhia txog tib neeg lub hlwb hais tias, “Yeej zoo yog peb muaj kev zoo siab thiab kev cia siab. Thaum peb tsis muaj kev nyuaj siab peb yeej zoo siab thiab peb yeej noj qab nyob zoo. Yog peb xav qhov zoo yeej pab tau peb.

Lub tswv yim uas xav li no zoo li tshiab rau cov kws kho mob, cov kws kho mob nyuaj siab, thiab cov kws tshawb txuj tiam sis tsis yog ib yam tshiab rau cov kawm Vajlugkub. Ze li 3,000 xyoo dhau los lawm, Vajtswv tshoov Vaj Ntxwv Xalaumoos sau cov lus no: “Kev zoo siab ua hauv tshuaj kuab muaj tsuas rau koj lub cev. Kev ntxhov siab ua rau koj lub neej tsaus ntuj nti.” (Pajlug 17:22) Cov lus Xalaumoos hais no tsis txhais tias muaj kev zoo siab ces yuav kho tau tej mob zoo tiam sis tsuas hais tias kev zoo siab pab tau peb xwb.

Muab xav li no, yog kev cia siab yog ib hauv tshuaj zoo es tus kws kho mob twg thiaj tsis kam muaj rau tib neeg? Tiam sis kev vam kev cia siab tseem pab tau peb ntau tshaj li kev noj qab nyob zoo.

Qhov Xav Zoo Thiab Xav Tsis Zoo Pab Tau Peb Li Cas

Cov kws tshawb fawb pom tias cov uas xav zoo txog lub neej yeej pab tau lawv dua, tsis hais thaum lawv mus kawm ntawv, mus ua hauj lwm, thiab mus ncaws pob. Cov kws tshawb fawb thiaj ua ib txoj kev kawm soj ntsuam ib pab poj niam uas sib tw khiav. Muaj cov neeg cob qhia soj ntsuam ib tug poj niam zuj zus seb lawv tshaj lij npaum li cas thaum muaj ib txoj kev sib tw twg. Lawv kuj nug cov poj niam no seb lawv xav tias lawv yuav ua tau zoo npaum li cas rau txoj kev sib tw. Thaum kawg, cov poj niam ua tau raws li qhov uas lawv ntseeg tias lawv yuav ua tau tiam sis tsis yog ua tau raws li cov uas cob qhia xav. Yog vim li cas txoj kev cia siab yuav txhawb tau tib neeg lub zog ua luaj?

Cov kws tshawb fawb kawm tau ntau yam los ntawm cov uas xav txog qhov tsis zoo. Muaj tshaj li 50 xyoo dhau los lawm, cov kws tshawb txuj kawm tau tias tsiaj thiab tib neeg puav leej txawj tag kev cia siab. Yog li lawv thiaj li muab ob pab neeg coj los sim nyob hauv ib chav seb cov neeg no yuav ua li cas. Lawv xub muab pab ib mus tso rau chav ntawd thiab tso ib lub suab uas tsis zoo mloog thiab hais tias yog lawv xav kom lub suab nres lawv yuav tsum nias cov pob kom yog ces lub suab mam nres. Pab no kuj ua tau li ntawd.

Zaum no lawv ho muab pab ob tso rau hauv tib chav ntawd thiab kom lawv ua tib yam nkaus tiam sis thaum lawv nias cov pob tsis ua hauj lwm li. Yog li coob tus ntawm pab no txawm pib tag kev cia siab. Tom qab ntawd lawv rov muab pab no sim dua tiam sis lawv tsis kam ua dab tsi li. Lawv xav tias xyov tej uas lawv ua puas yuav ua tau dab tsi. Txawm li ntawd los ib txhia hauv pab no tseem xav qhov zoo thiab tsis kam tso tseg li.

Tus xib hwb qhia ntawv qeb siab Martin Seligman yog ib tug uas pab tsim cov kev kawm uas peb nyuam qhuav tham tag los no. Vim nws xav paub ntxiv nws thiaj txiav txim siab mus kawm txog qhov uas xav zoo thiab qhov uas xav tsis zoo. Nws ua tib zoo soj ntsuam cov tib neeg uas tsis muaj kev cia siab seb lawv xav li cas. Nws thiaj pom tias cov tib neeg no tsis muaj siab ua tej hauj lwm uas neeg niaj hnub ua. Tus xib hwb Seligman hais ntxiv li no, “Kuv twb kawm txog cov tib neeg uas xav tsis zoo tau 25 lub xyoos lawm. Kuv pom tias cov tib neeg no ntseeg tias thaum lawv raug ib yam uas tsis zoo ces yog tim lawv xwb thiab tej kev phem yeej yuav los raug lawv tas li. Lawv xav tias txawm lawv yuav ua li cas los qhov tsis zoo yeej yuav los raug lawv. Yog li kuv xav tias vim cov neeg no xav qhov tsis zoo lawv thiaj raug tej xwm phem dua li cov neeg uas xav txog qhov zoo.”

Yog li ntawd qhov uas tshawb pom li no yuav ua rau tej tug neeg niaj hnub no xav tias yog ib yam tshiab tiam sis cov kawm Vajlugkub twb paub li no lawm. Phau Vajlugkub twb qhia lawm tias: “Yog koj qaug zog thaum raug kev ntxhov siab, ces yog koj siab yau heev.” (Pajlug 24:10) Yog li yeej muaj tseeb li phau Vajlugkub hais, thaum peb xav tsis zoo yuav ua rau peb qaug zog thiab peb yuav tsis xav ua ib yam dabtsi. Yog li ntawd peb yuav ua li cas kov yeej qhov xav tsis zoo thiab peb yuav ua li cas peb thiaj muaj kev cia siab thiab xav rau qhov zoo?

[Duab]

Kev vam kev cia siab pab tau peb lub neej.

Yuav Ua Cas Koj Thiaj Kov Yeej Qhov Xav Tsis Zoo

YAV tas los tej yam uas koj ua tsis tau koj xav li cas xwb? Coob tus neeg tshawb fawb hais tias yuav kom teb tau lo lus nug no nyob ntawm seb koj yog ib tug neeg xav rau qhov zoo los sis rau qhov phem. Peb txhua tus yeej ntsib ntau yam kev nyuaj siab, ib txhia muaj kev nyuaj siab ntau dua ib txhia. Yog vim li cas ib txhia uas ntsib kev nyuaj siab ho rov ua tau ub tau no, tiam sis ib txhia txawm lawv twb tsis nyuaj siab heev los lawv cia li tag kev cia siab?

Piv txwv tias, koj mus nhriav ib txoj hauj lwm ua tiam sis lawv tsis yuav koj. Tom qab ntawd koj yuav xav li cas xwb? Tej zaum koj tu siab thiab xav tias yog ib qhov teeb meem loj heev, thiab koj xav tias yuav tsis muaj leej twg txais koj ua hauj lwm li. Tsis tas li ntawd koj cia qhov teeb meem no los cuam tshuam txhua fab hauv koj lub neej thiab xav tias koj tsis muaj nuj nqis. Yog koj ntaus nqi li no rau koj tus kheej ces twb yog koj xav tsis zoo lawm.

Tawm Tsam Qhov Xav Tsis Zoo

Yuav ua cas koj thiaj tsis xav rau qhov tsis zoo? Ua ntej tshaj, koj yuav tsum ras tias koj pib xav tsis zoo lawm. Ces koj yuav tau hloov koj txoj kev xav. Ua tib zoo xav tias yog vim li cas lawv thiaj tsis txais koj ua hauj lwm. Xav li no, puas yog yuav tsis muaj leej twg txais koj uas hauj lwm li? Los sis tej zaum tus tswv hauj lwm xav nrhiav ib tug uas muaj lwm yam txuj los ua txoj hauj lwm xwb?

Thaum koj muab txhua yam los ua tib zoo xav tej zaum koj xav ntau zog lawm xwb. Txawm koj plam ib txoj hauj lwm los tsis txhais tias koj yuav plam txhua txoj. Koj yuav tsum xav txog tej uas koj twb tau ua zoo los lawm xws li, koj txoj kev sib raug zoo nrog Vajtswv, koj tsev neeg thiab koj tej phooj ywg. Tsis txhob xav tias tsam yav tom ntej koj ua dab tsi los yuav ua tsis tau zoo. Vim koj twb tsis paub tseeb tias koj yuav nrhiav tau hauj lwm ua los tsis tau. Yog li no koj muaj peev xwm tawm tsam qhov uas xav tsis zoo.

Xav Qhov Zoo Thiab Txawj Npaj Hom Phiaj

Tau ob peb xyoos dhau los no cov kws tshawb fawb tsuas piav me ntsis tias kev vam kev cia siab yog li cas xwb. Lawv hais tias kev cia siab yog qhov uas koj ntseeg tias koj yuav ncav cuag koj tej hom phiaj. Tab sis zaj tom ntej yuav qhia tias kev cia siab tseem pab tau ntau tshaj li qhov uas ncav cuag tej hom phiaj xwb. Txawm li los qhov uas cov kws tshawb fawb hais yeej zoo thiab. Yog koj xav ntsoov txog koj txoj kev cia siab yuav pab tau koj xav txog qhov zoo thiab txawj npaj koj tej hom phiaj.

Yuav kom koj ntseeg tau tias koj yeej yuav ncav cuag koj tej hom phiaj rau yav pem suab, koj yuav tsum ua tej yam los qhia tias koj twb muaj tej hom phiaj thiab ncav cuag lawm. Yog koj tseem tsis tau ncav cuag ib lub hom phiaj twg, ces zoo rau koj xav txog tej hom phiaj koj yuav tau npaj rau koj tus kheej. Yog li koj puas muaj ib lub hom phiaj twg li? Peb yeej khwv heev thiab tsis yooj yim rau peb lauj sij hawm los ua tib zoo xav tias yam twg tseem ceeb tshaj thiab peb xav tau dab tsi tshaj hauv peb lub neej. Yuav kom peb paub npaj peb yuav tsum coj raws li phau Vajlugkub tej hauv paus ntsiab lus uas hais tias: “Paub hais tias yam twg yog yam uas zoo dua ntais.”​—Filipis 1:10.

Thaum peb paub tias yam twg tseem ceeb dua lawm, yuav yooj yim rau peb xaiv peb tej hom phiaj xws li, kev teev tiam Yehauvas, peb tsev neeg thiab peb txoj hauj lwm. Thaum xub pib npaj tej hom phiaj, tsis txhob npaj ntau dhau tsuas npaj lub uas peb yuav ncav cuag ua ntej tso. Tsis li ntawd ces, thaum nyuaj rau peb ncav cuag ib lub hom phiaj twg yuav ua rau peb siab me thiab tso tseg. Yog li no zoo rau peb muab tej hom phiaj loj uas yuav siv sij hawm ntev loo faib ua tej hom phiaj me, thiaj tsis tau siv sij hawm ntev ncav cuag.

“Yog muaj siab tiag yeej ua tau xwb.” Cov lus hais no yeej muaj tseeb. Thaum peb npaj tau tej hom phiaj tseem ceeb lawm peb yuav tsum txiav txim siab​—muaj siab ua tiag thiab rau siab ntso ua​—thiaj li yuav ncav cuag. Yog peb ua zoo xav txog tias peb lub hom phiaj muaj nqis npaum li cas thiab yog thaum peb ncav cuag lawm yuav zoo npaum li cas, ces yuav pab peb rau siab ntso ua. Yeej paub tias yuav tsis yooj yim tiam sis peb yuav tsum tsis txhob tag kev cia siab thiab txhob tso tseg.

Txawm li cas los peb yuav tsum xav seb peb yuav ua li cas thiaj ncav cuag peb lub hom phiaj. Tus sau ntaub ntawv C. R. Snyder kawm txog vim li cas tseem ceeb rau peb muaj kev cia siab qhia tias, peb yuav tsum npaj ob peb txoj hau kev kom thiaj ncav cuag peb lub hom phiaj. Yog thaum ib txoj mus tsis taus los thiaj li tseem tshuav lwm txoj uas yuav pab peb ncav cuag peb lub hom phiaj.

Snyder qhia ntxiv tias muaj tej thaud peb yuav tau hloov peb lub hom phiaj. Yog muaj tej yam los tav ua rau peb ncav tsis cuag peb lub hom phiaj, es yog peb pheej txhawj txog yuav ua rau peb qaug zog xwb. Tiam sis yog peb muab lwm lub hom phiaj los hloov uas peb paub tias peb yuav ncav cuag ces yuav ua rau peb muaj kev cia siab.

Nyob hauv phau Vajlugkub muaj ib tug qauv zoo uas yuav txhawb tau peb. Thaum Vaj Ntxwv Daviv npaj siab xav ua lub tuam tsev rau Vajtswv Yehauvas, tiam sis Vajtswv hais rau Daviv tias nws tus tub Xalaumoos yuav yog tus los ua lub tuam tsev. Txawm li ntawd los Daviv tsis chim thiab tsis poob siab, nws tsuas hloov nws lub hom phiaj xwb. Nws kub siab lug thiab siv dag siv zog los npaj tej nyiaj thiab tej khoom kom nws tus tub thiaj li ua tau lub tuam tsev tiav.​—1 Vajntxwv 8:17-19; 1 Xwmtxheej Vajntxwv 29:3-7.

Txawm hais tias peb paub npaj peb tej hom phiaj, peb xav rau qhov zoo thiab tawm tsam qhov uas xav tsis zoo los, yeej tseem nyuaj rau peb muaj kev vam kev cia siab. Vim li cas? Rau qhov muaj ntau yam teeb meem los raug noob neej uas peb tswj tsis tau xws li, kev txom nyem, kev tsov kev rog, kev tsis ncaj ncees, kev mob kev nkeeg thiab kev ploj kev tuag. Yog zoo li no, peb yuav ua li cas tuav rawv kev vam kev cia siab?

[Duab]

Yog lawv tsis yuav koj ua txoj hauj lwm uas koj xav ua, koj puas xav tias ntshe koj yuav nrhiav tsis tau hauj lwm ua li lawm?

[Duab]

Txawm Vaj Ntxwv Daviv lub hom phiaj hloov lawm los nws tsis tag kev cia siab

Koj Yuav Nrhiav Kev Vam Kev Cia Siab Ntawm Leej Twg?

KOJ lub twj qhia sij hawm cia li tuag tsis ua hauj lwm lawm. Muaj ntau lub chaw uas koj coj mus kho tau. Tsis tas li ntawd muaj tej chaw tshaj tawm tias lawv yeej yuav kho tau tus hais li cas los muaj. Tab sis koj ho hnov tias koj ib tug neeg zej zog yog tus tsim lub twj no tau ntau xyoo dhau los lawm. Tsis yog li ntawd xwb, nws tseem yuav pab kho dawb rau koj. Zaum no koj paub tias koj yuav coj mus rau leej twg kho lawm tiag.

Cia peb muab qhov no piv rau peb txoj kev cia siab. Peb nyob rau ib lub caij uas muaj teeb meem ntau yam thiab tsis muaj kev vam kev cia siab li. Peb yuav nhriav kev vam kev cia siab ntawm leej twg? Muaj coob leej ntau tus hais tias lawv yuav pab peb kho tau peb tej teeb meem, tiam sis lawv nyias hais lawm nyias ib yam haj yam ua rau peb nyuaj siab. Yog li tsim nyog peb mus cuag tus uas tsim noob neej nws thiaj yuav muab tau kev vam kev cia siab rau peb. Phau Vajlugkub hais tias, “Vajtswv yeej nyob tsis deb ntawm peb txhua tug” thiab nws yeej xav pab peb.​—Tes Haujlwm 17:27; 1 Petus 5:7.

Phau Vajlugkub Qhia Li Cas Txog Kev Vam Kev Cia Siab

Phau Vajlugkub qhia txog kev vam kev cia siab tau tob thiab tshab dua cov kws kho mob, cov kws tshawb txuj, thiab cov kws kho mob nyuaj siab tau qhia. Lo lus Henplais thiab lus Kili nyob hauv phau Vajlugkub uas hais txog “kev vam kev cia siab” yog txhais tias kub siab tos thiab tos ntsoov rau tej yam zoo. Txoj kev vam kev cia siab muaj ob yam nyob rau hauv, xws li ntshaw kom tau yam zoo thiab muaj tej uas ntseeg tau tias qhov zoo yeej yuav los txog. Txoj kev cia siab uas muaj nyob hauv phau Vajlugkub tsis yog lam hais xwb, yeej muaj pov thawj qhia tias peb yeej ntseeg tau tiag.

Yog li kev cia siab thiab kev ntseeg muaj ntsis zoo sib xws, yuav tsum muaj pov thawj tsis yog lam tau lam ntseeg xwb. (Henplais 11:1) Txawm li ntawd los, phau Vajlugkub qhia tias kev ntseeg thiab kev cia siab muaj qhov sib txawv.​—1 Kauleethaus 13:13.

Piv txwv li no, koj hais kom koj tus phooj ywg tuaj pab koj, koj cia siab tias nws yeej yuav tuaj. Koj txoj kev cia siab rau nws tsis yog lam tau lam cia siab xwb vim rau qhov koj yeej paub nws zoo thiab ntseeg tau nws. Koj twb tau pom nws muaj lub siab dawb siab zoo yav tag los lawm. Yog li ntawd koj txoj kev ntseeg thiab kev cia siab muaj qhov zoo sib xws, yog muaj kev ntseeg yuav tsum muaj kev cia siab yog muaj kev cia siab yuav tsum muaj kev ntseeg, tiam sis ob qhov no kuj muaj qhov sib txawv me ntsis. Yuav ua li cas koj thiaj muaj kev cia siab rau Vajtswv?

Peb Cia Siab Rau Leej Twg

Vajtswv yog lub hauv paus rau txoj kev vam kev cia siab. Yav thaum ub phau Vajlugkub hais tias Yehauvas “yog cov Yixalayees lub chaw vamkhom.” (Yelemis 14:8) Tej kev cia siab uas nws haiv neeg muaj yog los ntawm nws los; nws yog lawv txoj kev vam kev cia siab ntag. Txoj kev cia siab uas lawv muaj tsis yog lam tau lam cia siab xwb. Vajtswv twb nrog nws haiv neeg tau ntau ntau tiam los lawm thiab nws ib txwm ua raws li nws tej lus cog tseg. Yausuas uas yog cov Yixalayees tus thawj coj tau hais tias, “Nej yeej paub hais tias, tus TSWV [Yehauvas, NWT] uas yog nej tus Vajtswv twb pub ib puas tsav yam zoo rau nej raws li nws tau coglus tseg rau nej tsis poob ib los li.”​—Yausuas 23:14.

Niaj hnub nim no los peb yeej ntseeg tau Vajtswv tej lus cog tseg. Phau Vajlugkub twb qhia txog Vajtswv tej lus cog tseg thiab tseem qhia txog tej lus cog tseg uas twb muaj tiav lawm. Nws tej lus faj lem hais tau tseeb heev tej thaud cuag li twb muaj tiav kiag rau thaum lub sij hawm uas nws hais tej lus cog tseg ntawd.

Vim li no peb thiaj hais tau tias phau Vajlugkub yog ib phau ntawv uas peb cia siab tau rau. Yog koj kawm Vajlugkub koj yuav pom tias koj yeej tso siab tau rau Vajtswv thiab yuav txhawb kom koj txoj kev cia siab nyob ruaj khov. Tus tub txib Paulus hais tias, “Vajtswv txojlus uas thaum ub luag muab sau tseg rau hauv ntawv twb yog sau qhia rau peb. Vajtswv txojlus ua rau peb muaj kev cia siab, ua siab ntev thiab muab siab rau ntseeg ntxiv.”​—Loos 15:4.

Vajtswv Muab Tau Kev Cia Siab Li Cas Rau Peb?

Thaum ib tug uas peb hlub tau tag sim neej lawm yog ib lub caij uas peb cheem tsum kev vam khom tshaj. Muaj coob leej ntau tus xav tias thaum zoo li no yog ib lub sij hawm uas tsis muaj kev cia siab li. Tsis muaj ib yam dab tsi yuav ua rau peb tag kev cia siab npaum li txoj kev tuag. Peb txhua tus yeej khiav tsis dim txoj kev tuag, ib hnub caum tsis cuag los ib hnub yeej yuav caum cuag peb. Yog li no phau Vajlugkub thiaj muab txoj kev tuag hu ua “Tus yeeb ncuab kawg.”​—1 Khaulee 15:26

Yog li puas muaj kev cia siab rau cov uas tau tag sim neej lawm? Nyob hauv tib nqe Vajlugkub uas muab txoj kev tuag hu ua tus yeeb ncuab kawg hais ntxiv tias txoj kev tuag ‘yuav muab ua kom puam tsuaj mus.’ Vajtswv Yehauvas muaj hwj chim tshaj txoj kev tuag, muaj ntau zaus nws twb kov yeej txoj kev tuag lawm. Nws kov yeej tau li cas? Yehauvas twb tau tsa cov tuag sawv rov los lawm. Phau Vajlugkub twb tau qhia 9 zaug uas Vajtswv siv nws lub hwj chim tsa cov tuag sawv rov los.

Xws li thaum Yehauvas muab hwj chim rau Yexus tsa Laxalus uas twb tau tag sim neej tau 4 hnub lawm. Qhov txuj ci no Yexus tsis ua zais ntshis tiam sis nws yeej ua tab meeg sawv daws pom.​—Yauhas 11:38-48, 53; 12:9, 10.

Tej zaum koj yuav xav tias, ‘Vim li cas thiaj tsa cov tuag sawv rov qab los? Txawm li cas los lawv yeej yuav txawj laus txawj tuag dua?’ Yeej muaj tseeb li koj xav. Tiam sis tej uas phau Vajlugkub qhia txog qhov uas ciaj sawv rov los yuav pab tau peb muaj txoj kev cia siab tias cov uas tau tag sim neej lawm yeej yuav ciaj sawv rov qab los. Peb yeej ntseeg tau thiab qhov no yuav ua rau peb muaj kev vam kev cia siab.

Yexus hais tias, “Kuv yog txojkev sawv hauv qhov tuag rov qab los thiab yog txojsia.” (Yauhas 11:25) Vajtswv Yehauvas yuav pub hwj chim rau Yexus ua tus tsa cov tuag sawv rov qab los thoob plaws lub ntiaj teb no. Yexus hais ntxiv tias, “Lub sijhawm tabtom los lawm; thaum ntawd cov neeg uas tuag lawm yuav hnov Leej Tub lub suab hu, thiab lawv yuav tawm hauv lawv tej qhov ntxa los.” (Yauhas 5:28, 29) Yog li, cov uas tau tag sim neej lawm muaj txoj kev cia siab tias lawv yeej yuav sawv rov qab los tau txoj sia nyob hauv lub vaj kaj siab.

Yaxayas tus uas cev Vajtswv lus hais cov lus txhawb siab txog qhov uas ciaj sawv rov los li no, “Peb cov neeg uas tuag lawm yuav rov muaj sia dua! Lawv tej cev yuav sawv rov qab los muaj sia. Cov neeg uas pw hauv tej qhov ntxa yuav sawv los hu nkauj zoo siab. Yog li ntawd, Vajtswv yuav tsa cov neeg uas tuag tau ntev lawm sawv los ib yam li lub lwg dej uas ci rau lub ntiajteb thaum sawv ntxov.”​—Yaxayas 26:19.

Cov lus no nplig tau peb siab kawg. Peb tso siab tau tias cov uas peb hlub uas tau tag sim neej lawm nyob rau ib qhov chaw uas zoo tshaj plaws, uas yog nyob hauv Vajtswv txoj kev nco ntsoov lawv thiab yuav tsa lawv sawv daws rov los tau txoj sia. (Lukas 20:37, 38) Tshuav tsis ntev lawm xwb lawv yuav sawv rov qab los tau txoj sia thiab cov neeg uas hlub tshua txog lawv yuav tos txais lawv. Yog li, yeej muaj kev cia siab rau cov uas tau tag sim neej lawm.

Kev Vam Kev Cia Siab Pab Tau Peb Li Cas

Paulus tau qhia tias kev vam kev cia siab tseem ceeb npaum li cas diam. Nws hais tias kev cia siab yog ib yam cuab yeej ntawm sab kev ntseeg uas muaj nqis heev, zoo li lub mom hlau uas peb looj tiv thaiv peb lub tob hau. (1 Thexalaunikes 5:8) Ua cas nws muab kev cia siab piv rau lub kaus mom hlau? Thaum ub cov tub rog mus sib tua lawv looj cov tawv tsiaj zooj tuaj sab hauv ces mam looj lub mom hlau tuaj sab nrauv. Twb yog vim muaj lub kaus mom hlau thaiv thaum raug tob hau thiaj tsis raug kev phom sij. Ua cas Paulus thiaj hais li no? Zoo tib yam nkaus li lub mom hlau tiv thaiv lub tob hau, ces peb txoj kev cia siab tiv thaiv peb txoj kev xav. Yog peb muaj kev cia siab rau Vajtswv tej lus cog tseg, ces peb yuav muaj lub siab tus thiab peb yuav tsis poob siab thaum peb ntsib kev nyuaj siab. Peb txhua tus yeej xav muaj txoj kev cia siab zoo li no.

Paulus qhia ntxiv kom peb paub meej tias kev cia siab zoo li cas tiag. Nws hais tias, “Qhov uas peb cia siab no zoo ib yam li tus tswg uas muaj hlua khi peb lub siab kom nyob ruaj ruaj.” (Henplais 6:19) Paulus paub tias tus tswg nkoj tseem ceeb npaum li cas vim nws twb tau dim ntau zaus uas raug nkoj tog. Thaum muaj cua dab cua dub tus tsav nkoj tso tus tswg nkoj dauv mus rau hauv dej. Yog tus tswg mus khuam hauv qab thu dej, lub nkoj yuav nyob ruaj khov thiab tsis mus tsoo pob zeb.

Ib yam li tus tswg tuav lub nkoj nyob ruaj, yog peb cia siab rau Vajtswv tej lus cog tseg yuav pab tau peb nyiaj dhau tej kev nyuaj siab. Yehauvas cog lus tseg tias tshuav tsis ntev lawm xwb yuav tsis muaj kev tsov kev rog, kev ua nruj ua tsiv, kev nyuaj siab thiab kev ploj kev tuag. (Mus saib lub ntsiab me nyob sab 10.) Yog peb tuav rawv txoj kev cia siab yuav pab kom peb coj lub neej raws li Vajtswv tej lus qhia. Peb yuav tsis coj li lub ntiaj teb uas muaj kev ntxhov hnyov thiab ua phem ua qias thoob qhov txhia chaw niaj hnub no.

Yehauvas yeej xav kom koj muaj kev vam kev cia siab. Tsis tas li ntawd Vajtswv tsuas xav kom koj tau ib lub neej zoo xwb. Nws xav kom txhua tus tau kev cawm dim. Nws yuav cawm peb li cas? Ua ntej tshaj, peb yuav tsum los kawm kom “paub qhov tseeb.” (1 Timautes 2:4) Peb txhawb koj los kawm txog qhov tseeb nyob hauv Vajtswv txoj lus. Txoj kev cia siab uas Vajtswv pub rau koj tseem zoo tshaj tej kev cia siab nyob hauv lub ntiaj teb no.

Thaum koj muaj Vajtswv txoj kev cia siab lawm koj tsis tas yuav txhawj. Nws yuav pub lub dag lub zog rau koj ncav kom cuag tej hom phiaj uas koj muaj yog tias koj ua raws li nws lub siab nyiam. (2 Kauleethaus 4:7; Filipis 4:13) Peb txhua leej txhua tus yeej xav muaj txoj kev cia siab. Yog tias koj tseem nhriav txoj kev vam kev cia siab tas zog txhob tag kev cia siab, koj yeej yuav nrhiav tau xwb!

[Ntsiab me/Duab]

Tej Uas Pab Peb Muaj Kev Vam Kev Cia Siab

Cov nqe Vajlugkub no yuav txhawb tau peb txoj kev vam kev cia siab:

◼ Vajtswv cog lus tias peb yuav nyob kaj siab lug yav tom ntej.

Vajtswv txoj lus hais tias lub ntiaj teb yuav ua ib lub vaj kaj siab uas yuav muaj cov neeg muaj kev zoo siab thiab sib koom siab nyob rau hauv.​—Phau Ntawv Nkauj 37:11, 29; Yaxayas 25:8; Tshwmsim 21:3, 4.

◼ Vajtswv tsis txawj dag.

Vajtswv ntxub txhua txoj kev dag. Yehauvas yog tus dawb huv thiab tsis muaj kev txhaum, yog li nws yeej tsis dag ib zaug li.​—Pajlug 6:16-19; Yaxayas 6:2, 3; Titus 1:2; Henplais 6:18.

◼ Vajtswv muaj hwj chim loj kawg nkaus.

Tsuas yog Yehauvas tib leeg xwb thiaj yog tus muaj hwj chim loj dua ntais. Tsis muaj ib yam hauv lub qab ntuj khwb no yuav tav tau Vajtswv tej lus cog tseg kom muaj tiav.​—Khiav Dim 15:11; Yaxayas 40:25, 26.

◼ Vajtswv xav kom peb tau txoj sia nyob mus ib txhis.

​—Yauhas 3:16; 1 Timautes 2:3, 4.

◼ Vajtswv cia siab tias peb yeej yuav mloog nws lus.

Nws tsis cim ntsoov peb tej kev txhaum tiam sis nws saib rau qhov zoo uas peb muaj thiab qhov uas peb siv zog xyaum ua zoo. (Phau Ntawv Nkauj 103:12-14; 130:3; Henplais 6:10) Nws cia siab tias peb yuav ua qhov yog thiab nws yuav txaus siab thaum peb coj haum nws siab.​—Pajlug 27:11.

◼ Vajtswv yuav pab kom peb ua tau raws li nws lub siab nyiam.

Cov uas teev tiam nws tsis tas yuav txhawj. Vajtswv yuav pub nws lub hwj huam dawb huv los pab peb.​—Filipis 4:13.

◼ Yog peb cia siab rau Vajtswv peb yuav tsis poob siab li.

Peb yeej tso siab tau rau Vajtswv kawg siab kawg ntsws. Nws yuav tsis tso peb tseg li.​—Phau Ntawv Nkauj 25:3.

[Duab]

Zoo tib yam nkaus li lub mom hlau tiv thaiv peb lub tob hau, ces peb txoj kev cia siab tiv thaiv peb txoj kev xav

[Duab]

Zoo li tus tswg nkoj uas nyob khov kho, txoj kev vam kev cia siab uas cog ruaj lawm yuav nyob ruaj khov

[Credit Line]

Courtesy René Seindal/Su concessione del Museo Archeologico Regionale A. Salinas di Palermo