Zaj 3—Xyaum Qhia Kom Tus Kawm Vajlugkub Loj Hlob
Paub Piav Cov Nqe Vajlugkub
1. Vim li cas peb yuav tsum siv phau Vajlugkub los qhia?
1 Peb xav kom tibneeg los ua Yexus cov “thwjtim,” peb thiaj pab lawv kawm Vajtswv Txojlus, thiab qhia kom lawv paub coj raws li tej ua lawv tau kawm ntawd. (Mth. 28:19, 20; 1Thxk. 2:13) Yog li ntawd, txhua yam uas peb qhia peb yuav tsum siv phau Vajlugkub los qhia. Zoo rau peb xub qhia tus uas kawm kom nws txawj nthuav Vajlugkub. Tiamsis peb yuav piav cov nqe Vajlugkub li cas nws thiaj loj hlob ntawm sab kev ntseeg?
2. Peb yuav xaiv cov nqe Vajlugkub twg los nyeem?
2 Xaiv Cov Nqe Vajlugkub Ua Ntej: Thaum koj npaj mus qhia ib tug twg, zoo rau koj nyeem zaj kawm ntawd, thiab cov nqe Vajlugkub tibsi. Xav seb cov nqe ntawd, txhawb lub ntsiab li cas. Muaj ntau nqe Vajlugkub, tiamsis zoo rau koj npaj ib ob nqes los nyeem xwb. Nyeem cov nqe Vajlugkub uas yuav pab kom nws pom tias tej uas peb ntseeg yog rho los ntawm phau Vajlugkub los. Xav txog tus uas kawm, koj thiaj paub nyeem tej nqes uas yuav rub tau nws lub siab.
3. Vim li cas zoo rau peb siv lus nug, thiab peb yuav nug li cas?
3 Siv Lus Nug: Thaum neb nyeem ib nqes Vajlugkub tas tsis txhob maj piav lub ntsiab rau nws, tiamsis nug seb nws nkag siab nqe ntawd li cas. Yog tias nqe Vajlugkub yoojyim nkag siab, ces nug seb nqe ntawd txhawb zaj kawm li cas xwb. Yog tias nqe Vajlugkub nyuaj rau nws to taub, tej zaum koj yuav tau nug tsi ntsees rau lub ntsiab, lossis nug ib qho zuj zus kom nws muab tau lub ntsiab. Tom qab nws teb tas, yog nws tseem tsis tau nkag siab, ces koj mam li qhia ntxiv.
4. Peb yuav piav cov nqe Vajlugkub li cas?
4 Qhia Kom Yooj Yim: Tus neeg uas txawj tua hneev, txawm nws tua tib xib xub xwb los, yeej ntob nkaus daim phiaj. Ib yam li ntawd, tus uas txawj qhia Vajlugkub tsis tas yuav piav ntev piav ntau. Nws qhia yooj yoojyim xwb los, tus kawm twb nkag siab lawm. Muaj tej nqe Vajlugkub, yuav tau tshawb nrhiav ntxiv los ntawm lwm phau ntawv, tus uas kawm thiaj li nkag siab. (2Tmt. 2:15) Tiamsis tsis tas peb yuav piav txhua nqe tibsi. Peb xav qhia kom tus uas kawm to taub lub ntsiab xwb.
5, 6. Peb yuav pab cov uas kawm kom lawv paub siv Vajtswv Txojlus li cas tiamsis peb yuav tsum tsis txhob ua dabtsi?
5 Qhia Kom Nws Paub Coj Raws Li Vajlugkub: Thaum zoo hais ces qhia kom tus uas kawm paub coj raws li phau Vajlugkub. Muab ua piv txwv li no: Neb nyeem tas nqe Vajlugkub ntawm Henplais 10:24, 25. Yog tias tus uas kawm tsis tau tuaj koom kev sib txoos dua li, ces zoo rau koj piav seb peb sib txoos li cas, thiab caw kom nws tuaj saib ib zaug. Tiamsis tsis txhob yuam nws. Cia Vajtswv Txojlus rub nws lub siab, nws mam li txiav txim rau nws tus kheej seb nws puas yuav ua raws li Yehauvas lub siab nyiam los tsis ua.—Hnpl. 4:12.
6 Thaum peb mus coj tibneeg los ua Yexus cov thwjtim, cia peb xyaum piav cov nqe Vajlugkub, xwv lawv thiaj li paub mloog Vajtswv lus.—Loos 16:26.