Siv Cov Ntawv Tseb Mus Tshaj Tawm

1. Vajtswv cov tibneeg tau siv cov ntawv tseb li cas?

¹ Yehauvas cov Timkhawv twb luam cov ntawv tseb los tshaj tawm txoj xov zoo tau ntau xyoo lawm. Nyob rau xyoo 1880, C.T. Russell thiab nws cov kwvluag pib luam ib co ntawv tseb hu ua Bible Students’ Tracts. Cov kwvtij txhawb kom cov uas txais phau Watch Tower pab tseb cov ntawv tseb no, mus rau tibneeg nyeem thiab. Cov ntawv tseb no tseem ceeb kawg li, nyob rau xyoo 1884, thaum C.T. Russell tau muab lub koom haum rau npe raws li txoj kevcai lij choj, nws thiaj muab tis npe hu ua Zion’s Watch Tower Tract Society. Tamsim no tau muab hloov npe hu ua Watch Tower Bible and Tract Society of Pennsylvania. Txij thaum ntawd los txog xyoo 1918, Cov Tub Kawm Vajlugkub tau tseb tshaj li 300 plhom daim ntawv tseb rau tibneeg nyeem. Niaj hnub no, cov ntawv tseb tseem pab tau coob leej ntau tus los kawm qhov tseeb.

2. Vim li cas cov ntawv tseb ho pab tau tibneeg?

² Vim Li Cas Ho Pab Tau Tibneeg: Cov ntawv tseb no muaj duab zoo zoo nkauj, thiab lub ntsiab yoojyim nkag siab heev, ua rau yus xav nyeem. Thiab muaj lus tsawg tsawg xwb, yog li cov uas tsis tshua nyiam saib ntawv, los kuj txais mus nyeem thiab. Kuj yoojyim rau cov uas nyuam qhuav pib tshaj tawm thiab cov menyuam yaus los tseb cov ntawv no thiab. Tsis tas li ntawd xwb, cov ntawv tseb no me me thiab tsis nyuaj nqa nrog yus.

3. Qhia seb cov ntawv tseb pab tau koj tus kheej li cas, lossis piav txog tej tug uas koj tau nyeem txog, es cov ntawv tseb pab tau lawv.

³ Coob leej tau los paub qhov tseeb vim lawv xub nyeem ib daim ntawv tseb. Nyob rau tebchaws Haiti, muaj ib tug pojniam khaws tau ib daim ntawv tseb ntawm kev los nyeem. Thaum nws nyeem tas, nws hais tias: “Kuv nrhiav tau qhov tseeb lawm tiag lauj!” Tom qab no, nws mus koom kev sib txoos tom lub Tsev Nceeg Vaj, thiab pib kawm Vajlugkub. Thaum kawg nws thiaj tau ua kevcai raus dej. Vim li cas thiaj muaj tau li no? Vim nws tau nyeem Vajtswv Txojlus hauv ib daim ntawv tseb.

4. Thaum txog caij siv cov ntawv tseb, peb lub hom phiaj yog li cas?

⁴ Qhia Ib Lub Tsev Rau Ib Lub: Cov ntawv tseb zoo siv los mus tshaj tawm txoj xov zoo kawg li. Yog li ntawd, pib lub 11 Hlis Ntuj no mus, yuav muaj lus tshaj tawm rau tej lub hlis, kom siv cov ntawv tseb mus qhia Vajlugkub. Tsis yog peb lam muab cev rau tibneeg xwb, tiamsis peb lub hom phiaj yog kom peb tau nrog tibneeg tham txog Vajlugkub. Thaum koj ntsib ib tug twg, lossis thawj zaug uas koj rov mus xyuas ib tug twg, yog tias ntxim zoo li nws xav kawm Vajlugkub, ces cia li siv sijhawm nrog nws kawm phau ntawv Vajlugkub Qhia. Yog tias lwm phau ntawv ho phim dua, ces siv los tau. Peb yuav hais li cas thaum peb siv cov ntawv tseb mus qhia ib lub tsev rau ib lub tsev? Cov ntawv tseb, nyias txawv nyias lawm ib yam, yog li ntawd peb yuav tsum muab nyeem ua ntej peb tseb.

5. Peb yuav hais li cas thaum peb siv cov ntawv tseb qhia ib lub tsev rau ib lub?

⁵ Thaum peb mus qhia Vajlugkub peb yuav tsum hais kom phim koog peb qhia, thiab phim daim ntawv tseb uas peb muab rau tibneeg. Thaum peb ntsib tibneeg, zoo rau peb muab daim ntawv tseb cev rau lawv. Tej zaum thaum lawv pom cov duab zoo zoo nkauj, yuav ua rau lawv xav paub ntxiv thiab. Lossis tej zaum zoo rau koj npaj ob peb daim ntawv tseb rau tus tswv tsev saib, nws mam li xaiv seb nws xav nyeem daim twg. Yog tias koj ho mus qhia koog uas tibneeg ntshai qheb qhov rooj, nug seb lawv puas kam koj muab ib daim ntawv tseb ntxig hauv lub taw rooj mus rau lawv, ces mam li nug seb lawv xav li cas txog daim ntawv tseb ntawd. Muaj tej daim ntawv tseb, lub ntsiab yog ib lo lus nug. Tej zaum zoo rau koj siv lo lus nug ntawd los nrog lawv tham. Yog tias koj xav npaj koj ib lo lus nug los tau thiab. Siv sijhawm los nyeem ob peb kab lus hauv daim ntawv tseb, thiab nco ntsoov nug seb tus tswv tsev xav li cas txog tej uas neb tau nyeem ntawd. Zoo rau koj nyeem cov nqe Vajlugkub tseem ceeb uas nyob rau hauv thiab. Tom qab neb xaus lus lawm, teem sijhawm rov mus saib nws dua. Yog tias koj lub koom txoos ib txwm rhais ntawv ntawm qhov rooj thaum tsis muaj neeg nyob hauv tsev, ces zoo rau koj rhais ib daim ntawv tseb rau ntawm lub qhov rooj. Tiamsis tsis txhob muab tso cuab tha.

6. Yuav siv cov ntawv tseb mus qhia Vajlugkub tom tej kev li cas?

⁶ Qhia Vajlugkub Tom Tej Kev: Koj puas tau siv cov ntawv tseb mus qhia Vajlugkub tom tej kev? Thaum peb qhia Vajlugkub tom tej kev, ntau zaus tibneeg tsis khoom nrog peb tham li. Tej zaum peb tsis paub xyov lawv puas xav kawm tiag. Yog tias koj muab ib phau The Watchtower lossis Awake! rau lawv, koj tsis paub xyov lawv puas yuav nyeem. Yog li ntawd, zoo rau koj muab ib daim ntawv tseb rau lawv. Tej zaum lawv yuav xav nyeem dua vim cov ntawv tseb tsis muaj lus ntau, nyeem ib pliag xwb tas lawm thiab kuj muaj tej ntsiab lus uas raug siab heev. Tiamsis, yog tias lawv ho muaj sijhawm nrog koj tham, koj mam li piav ntxiv hauv daim ntawv tseb los kuj tau thiab.

7. Piav seb cov kwvtij tau siv cov ntawv tseb li cas rau txhua lub caij.

⁷ Qhia Vajlugkub Txhua Lub Caij: Muaj ib tug kwvtij hais tias nws nqa cov ntawv tseb hauv hnab tshos, txhua txojke uas nws mus. Thaum nws ntsib tibneeg tom tej kiab khw, nws hais rau lawv tias nws xav muab ib daim ntawv rau lawv nyeem, ces nws cia li muab cev rau lawv xwb. Muaj ob niam txiv kuj tau mus ncig ua si hauv lub nroog New York City. Nkawd paub tias lub nroog ntawd muaj neeg coob kawg li tuaj txawv tebchaws tuaj. Yog li ntawd, nkawd thiaj nqa phau ntawv Nations nrog nkawd thiab npaj ib co ntawv tseb ua lwm yam lus. Thaum nkawd mus yos khw, mus noj mov, lossis taug kev ua si, es hnov lwm tus hais lwm yam lus, nkawd thiaj tau muab cov ntawv tseb rau lawv nyeem. Cov qauv no qhia tias, yoojyim heev rau peb siv cov ntawv tseb mus qhia Vajlugkub rau txhua lub caij.

8. Cov ntawv tseb zoo ib yam li tej noob qoob li cas?

⁸ “Tseb Koj Tej Noob”: Tej tub qoob tub loo tseb noob rau txhua txhia qhov, vim lawv yeej tsis paub tias lub twg yuav nrhau taus cag tuaj kaus, thiab tawg paj txi txiv. Cov ntawv tseb zoo ib yam nkaus li tej noob qoob ntawd thiab. Laj Lim Tswvyim 11:6 hais tias: “Thaum tagkis cia li tseb koj tej noob, thiab thaum tsaus ntuj tsis txhob nkaum tes, rau qhov koj tsis paub tias yam twg yuav vam meej, yog yam no los yam tod, lossis ob yam puavleej yuav vam meej ib yam nkaus.” Yog li ntawd, cia peb rau siab ntso siv cov ntawv tseb no mus qhia Vajlugkub, kom Vajtswv lub tswvyim nthuav mus rau txhua txhia qhov.​—P.L. 15:7.

[Cov lus rho hauv zaj no, nyob sab 3]

Cov ntawv tseb zoo siv los mus tshaj tawm txoj xov zoo kawg li. Yog li ntawd, pib lub 11 Hlis Ntuj no mus, yuav muaj lus tshaj tawm rau tej lub hlis, kom siv cov ntawv tseb mus qhia Vajlugkub