Nrog Tsev Neeg Pe Hawm Yehauvas
1 Yehauvas cov tibneeg txheej puag thaum ub nyiam ua ntau tsav ntau yam nrog lawv tsev neeg. Lawv nrog lawv tsev neeg khwv noj khwv haus, tu vaj tu tsev, thiab pe hawm Yehauvas. (L.Kc. 10:12-14; Kc. 31:12) Niaj hnub no nyob rau ntau qhov, tibneeg tsis nyiam nrog lawv tsev neeg ua ub ua no lawm. Tiamsis, Yehauvas cov tibneeg tsis zoo li ntawd. Lawv paub tias nrog tsev neeg ua ub ua no yog ib qho tseem ceeb, tiamsis qhov tseem ceeb tshaj yog thaum pe hawm Yehauvas. Vim lawv koom siab nrog lawv tsev neeg pe hawm Yehauvas li no, ua rau Yehauvas uas yog tus tsim lub cuab lub yig zoo siab heev.
2 Nrog Tsev Neeg Mus Qhia Vajlugkub: Yog tsev neeg mus qhia Vajlugkub ua ke, yuav pab tau lawv sib raug zoo. Yog li ntawd, ib tug txwj laus tsis yog yuav nrog lub koom txoos mus qhia Vajlugkub xwb, tiamsis nws yuav tau nrog nws pojniam menyuam mus thiab. (1Tmt. 3:4, 5) Xws li cov uas ncig xyuas cov koom txoos, txawm lawv tsis xyeej kiag li los, lawv tseem nrhiav sijhawm mus qhia Vajlugkub nrog lawv cov pojniam thiab.
3 Cov niam txiv uas nrog lawv cov menyuam mus qhia Vajlugkub pab tau cov menyuam txawj mus qhia Vajlugkub. Tsis tas li ntawd xwb, lawv yuav pom lawv niam lawv txiv txojkev zoo siab xyiv fab thiab nkawd txojkev hlub rau Yehauvas thiab tej neeg zej zog. (Kc. 6:5-7) Txawm tias cov menyuam loj tas lawm los, zoo rau cov niam txiv nrog lawv mus qhia Vajlugkub tsis tu ncua. Muaj ib nkawm niam txiv tau coj nkawd 3 tug tub, hnub nyug 15 xyoos, 18 xyoo, thiab 21 xyoos, nrog nkawd mus qhia Vajlugkub tsis tu ncua li. Leej txiv tau hais tias: “Txhua zaus peb mus qhia Vajlugkub, wb yeej nrhiav ib yam tshiab los qhia lawv. Thiab wb npaj kom hnub ntawd yog ib hnub uas lawv muaj kev zoo siab xyiv fab thiab kom txhawb tau lawv lub zog.”
4 Npaj Mus Qhia Vajlugkub Ua Ke: Cov uas muaj cuab muaj yig lawd pom tias yog tsev neeg npaj ua ke seb yuav mus qhia Vajlugkub li cas, ces pab tau sawvdaws heev. Tej menyuam los yeej nyiam heev thaum tsev neeg xyaum ua ke es cia ib tug ua tus tshaj tawm hos ib tug ua tus tswv tsev. Tej yim kuj tau siv lub sijhawm tom qab tsev neeg pe hawm Vajtswv ua ke los xyaum li no.
5 Peb zoo siab xyiv fab heev thaum peb nrog cov neeg uas peb hlub ua tej yam tseem ceeb. Qhov uas ua rau peb zoo siab xyiv fab tshaj yog thaum peb nrog peb tsev neeg mus qhia Vajlugkub ib lub tsev rau tsev, rov mus xyuas cov uas peb tau ntsib, thiab mus kawm Vajlugkub nrog tibneeg. Yog koj nrog koj tsev neeg pe hawm Yehauvas li no, koj yuav zoo siab hais tias: ‘Kuv thiab kuv tsev neeg, peb yuav teev tiam Yehauvas.’—Ys. 24:15.