Txawj Ua Vajtswv Tes Num Zuj Zus
1. Nyob rau thawj 100 xyoo, muaj cov qauv twg qhia tias peb yuav tsum kawm kom txawj ua Vajtswv tes num zuj zus?
1 Cov Khixatia yuav tsum txawj ua Vajtswv tes num zuj zus mus. Vim li no, Yexus thiaj cob nws cov thwjtim tsis tseg kom txawj mus qhia Vajlugkub. (Lk. 9:1-5; 10:1-11) Thiab twb yog vim li no, Plixila thiab Akhila thiaj coj Apaulau “mus qhia kom paub Vajtswv txoj kev zoo heev dua tuaj.” (Ttx. 18:24-26) Tsis tas li ntawd xwb, txawm Timaute twb yog ib tug uas txawj qhia Vajtswv txojlus heev los, Povlauj tseem txhawb kom nws rau siab ntso kawm, xwv ‘txhua tus thiaj pom tias nws kheev hlob zuj zus.’ (1Tmt. 4:13-15) Yog li ntawd, txawm peb ua haujlwm rau tus Tswv ntev npaum li cas lawm los, peb yuav tsum xyaum kom yimhuab txawj tshaj tawm ntxiv.
2. Peb xyaum tau lwm tus li cas?
2 Xyaum Lwm Tus: Yog peb xyaum lwm tus ces peb yuav yimhuab txawj qhia. (P.L. 27:17) Yog li ntawd, thaum peb nrog lwm tus mus qhia Vajlugkub, peb yuav tsum ua tib zoo mloog thaum nws tabtom tham. Nug cov uas txawj qhia seb lawv qhia li cas thiab ua tib zoo mloog thaum lawv qhia koj. (P.L. 1:5) Koj puas ntshai mus qhia Vajlugkub lossis ntshai rov mus xyuas cov uas koj twb ntsib lawm? Mus nug tus saib xyuas koj pawg lossis ib tug uas txawj qhia Vajlugkub kom nws pab qhia koj. Thiab nco ntsoov tias Yehauvas lub hwj huam yeej pab tau peb kom hajyam txawj qhia. Yog li ntawd, peb yuav tsum tas zog thov nws kom pub lub hwj huam rau peb.—Lk. 11:13.
3. Yog lwm tus pab hais peb, peb yuav tsum ua li cas?
3 Txawm koj tsis tau hais lwm tus pab koj los, yog nws pab hais koj, tsis txhob npau taws. (L.Tsy. 7:9) Xyaum txo hwjchim li Apaulau es zoo siab hlo mloog tej uas tus ntawd hais. Yog koj ua li ntawd, qhia tau tias koj muaj tswvyim.—P.L. 12:15.
4. Yexus qhia tias yog peb yimhuab txawj tshaj tawm ces peb yuav ua tau dabtsi?
4 Ua Rau Vajtswv Tau Koob Meej: Yexus siv lus piv txwv los qhia nws cov thwjtim kom yimhuab txawj ua Vajtswv tes num. Nws hais tias nws yog tsob txiv hmab thiab nws cov thwjtim yog cov ceg. Yexus hais ntxiv tias Leej Txiv yuav muab txhua ceg uas txi txiv “tav kom yimhuab txi ntau.” (Yh. 15:2) Ib yam li tus tswv teb uas xav kom nws tej txiv hmab yimhuab txi ntau, Yehauvas xav kom peb yimhuab txawj “xyeem tej lus ntawm lub qhov ncauj.” (Hnpl. 13:15) Yog peb yimhuab txawj tshaj tawm ces peb yimhuab yuav ua tau dabtsi? Yexus teb tias: “Yog nej tawg paj txi txiv ntau . . . qhov ntawd yuav ua rau kuv leej Txiv tau koob meej.”—Yh. 15:8.