Ua Zoo Kawm Phau Ntawv Phau Vajlugkub Qhia Txog Dabtsi Tiag?
1. (1) Peb yuav kawm phau Vajlugkub Qhia rau thaum twg? (2) Vim li cas peb yuav tsum ua zoo kawm phau no?
1 Xyoo 2010, peb tau txais phau ntawv Phau Vajlugkub Qhia Txog Dabtsi Tiag? ua lus Hmoob. Txij thaum ntawd los, peb yeej siv phau no heev mus qhia Vajlugkub rau tibneeg. Vim li no, peb yuav tsum paub phau ntawv no kom zoo. Yog li ntawd, pib lub 11 Hlis tim 9, 2015, peb yuav kawm phau ntawv no rau Lub Koom Txoos Kev Kawm Vajlugkub.
2. Yuav kawm phau Vajlugkub Qhia li cas, thiab vim li cas koj yuav xav tsa tes teb?
2 Thaum pib ib tshooj twg, muaj ib co lus nug. Tus kwvtij uas coj Lub Koom Txoos Kev Kawm Vajlugkub mam tham mentsis txog cov lus nug ntawd. Tom qab ntawd, mam pib kawm tshooj ntawd thiab teb cov lus nug uas nyob hauv qab. Mus nyeem thiab tham cov nqe Vajlugkub uas hom tseg kom “nyeem.” Thaum kawm ib tshooj twg tas, mus tham lub ntsiab me “Phau Vajlugkub Qhia Li No” uas muaj nyob tom qab txhua tshooj. Lub ntsiab me ntawd muaj cov nqe Vajlugkub uas teb tau thawj cov lus nug. Vim phau ntawv no yog ib phau uas sau tau meej thiab yoojyim to taub, koj yeej yuav xav tsa tes teb xwb!
3. Yuav kawm cov ntsiab hauv Cov Lus Qhia Ntxiv li cas?
3 Nyob rau tom qab phau ntawv no muaj Cov Lus Qhia Ntxiv txog qho lub ntsiab. Thaum cov uas peb qhia xav paub ntxiv txog ib lub ntsiab twg, peb kuj siv tau Cov Lus Qhia Ntxiv los piav rau lawv. Muaj tej lub lim tiam kuj yuav kawm Cov Lus Qhia Ntxiv rau Lub Koom Txoos Kev Kawm Vajlugkub thiab. Tus kwvtij uas nyeem mam ua tus nyeem Cov Lus Qhia Ntxiv. Tej zaj uas ntev zog ces mam ua ntu zus kawm. Cov Lus Qhia Ntxiv tsis muaj cov lus nug hauv qab. Yog li ntawd, tus kwvtij uas coj mam nug txog tej ntsiab tseem ceeb rau sawvdaws teb.
4. (1) Thaum kawm phau Vajlugkub Qhia hauv lub koom txoos ho txawv thaum kawm nrog tibneeg li cas? (2) Thaum peb kawm phau Vajlugkub Qhia, zoo rau peb ua dabtsi?
4 Thaum kawm phau Vajlugkub Qhia rau Lub Koom Txoos Kev Kawm Vajlugkub, yuav kawm nrawm nroos. Tiamsis tsis tas peb yuav kawm li ntawd thaum peb qhia tibneeg thiab yimhuab tsis zoo rau peb kawm nrawm nroos yog tus uas peb qhia tsis paub Vajlugkub zoo. (Ttx. 26:28, 29) Thaum qhia Vajlugkub rau tibneeg, peb yuav tau piav cov nqe Vajlugkub, cov duab, thiab lwm yam uas tseem ceeb kom ntxaws ntxaws. Yog li ntawd, rau siab ntso mus koom kev sib txoos txhua lub lim tiam thiab npaj tsa tes teb thaum kawm phau ntawv Phau Vajlugkub Qhia Txog Dabtsi Tiag?