Maivliag Puas Yog Vajtswv Niam?

Phau Vajlugkub qhia li no

Phau Vajlugkub tsis qhia tias Maivliag yog Vajtswv niam thiab tsis hais kom cov Khixatia teev tiam lossis pe hawm nws.a Cia peb kawm seb yog vim li cas.

Maivliag tsis txeev hais tias nws yog Vajtswv niam. Phau Vajlugkub piav tias Maivliag yug “Vajtswv tus tub” tsis yog yug Vajtswv.—Malakau 1:1; Luka 1:32.
Yexus Khetos tsis tau hais tias Maivliag yog Vajtswv niam lossis tsim nyog pe hawm nws. Yav thaum ub, muaj ib tug pojniam qhuas tias Maivliag muaj kev kaj siab vim nws yog Yexus niam, tiamsis Yexus teb nws tias: “Cov uas hnov Vajtswv tej lus thiab coj raws nraim thiaj yog cov uas tau nyob kaj siab lug.”—Luka 11:27, 28.
Tsis muaj lo lus “Vajtswv Niam” thiab “Ti-otakhaw” (Tus Yug Vajtswv) nyob hauv phau Vajlugkub.
Lub npe meej mom “Poj Vaj Saum Ntuj” hauv phau Vajlugkub tsis yog hais txog Maivliag. Thaum haiv neeg Yixayee fav xeeb rau Yehauvas lawv teev tiam ib tug dab mlom uas muaj lub npe meej mom ntawd. (Yelemi 44:15-19) Tej zaum tus “Poj Vaj Saum Ntuj” no yog Npanpiloo ib tug poj vajtswv uas muaj lub npe tias Isatha (Ishtar) lossis Axatawte (Astarte).
Cov Khixatia nyob thawj 100 xyoo tsis teev tiam Maivliag, lossis saib nws loj dua lwm tus. Ib tug tshawb fawb keeb kwm tau hais tias nyob thawj 100 xyoo cov Khixatia “tsis lees yuav tej kab lig kevcai no. Lawv txhawj tsam yog muab Maivliag saib ua tus loj ces luag tej yuav xav tias lawv teev tiam nws ua vajtswv.”—In Quest of the Jewish Mary.
Phau Vajlugkub qhia tias ib txwm muaj Vajtswv. (Ntawv Nkauj 90:1, 2; Yaxaya 40:28) Yog li ntawd, Vajtswv yeej tsis muaj niam. Tsis tas li ntawd xwb, phau Vajlugkub tseem qhia meej tias saum ntuj twb tsis txaus Vajtswv nyob. Vajtswv yuav ua li cas nyob tau hauv Maivliag lub tsev menyuam?—1 Vajntxwv 8:27.

Maivliag yog Yexus niam tsis yog “Vajtswv niam”

Maivliag yog neeg Yudai thiab nws yug los ntawm Davi caj ces. (Luka 3:23-31) Vajtswv txaus siab heev rau Maivliag vim nws muaj kev ntseeg thiab muab siab npuab Vajtswv. (Luka 1:28) Vajtswv thiaj xaiv nws los ua Yexus niam. (Luka 1:31, 35) Maivliag kuj muaj Yauxej ob peb tug menyuam thiab.—Malakau 6:3.

Phau Vajlugkub qhia tias Maivliag tau los ua Yexus ib tug thwjtim, tiamsis tsis qhia ntau txog nws lub neej.—Tubtxib Tes Haujlwm 1:14.

Vim li cas ib txhia xav tias Maivliag yog Vajtswv niam?

Thaum yuav txog xyoo 400 tom qab Yexus muaj cov uas pib teev tiam Maivliag. Lub caij ntawd, tebchaws Loos tau hloov los coj kevcai Kav Tos Liv, thiaj ua rau cov ntseeg cuav los lees coj kevcai Khixatia coob heev. Cov Kav Tos Liv kuj pib qhia txog Vaj Peb Leeg txawm tias tsis muaj nyob hauv phau Vajlugkub.

Vim cov thawj coj qhia tias Yexus yog Vajtswv, coob tus thiaj xav yuam kev tias Maivliag yog Vajtswv niam. Xyoo 431 tom qab Yexus, cov thawj coj Kav Tos Liv hauv Efexau tau tshaj tawm tias Maivliag yog Vajtswv niam tiag. Txij thaum ntawd los, tibneeg thiaj pe hawm Maivliag coob zuj zus tuaj. Tsis tas li ntawd xwb, muaj cov uas teev tiam tus poj vajtswv muaj tub ki hu ua Athemi uas cov Loos hu ua Di-ana (Diana) thiab Aixis (Isis). Tiamsis thaum lawv los ua Kav Tos Liv, lawv muab Maivliag daim duab thiab tej mlom Mab Liab los hloov lawv tej poj vajtswv chaw lawm.

Xyoo 432 tom qab Yexus, tus txiv Vaj Qhia Xiti (Pope Sixtus) 3, tau sam hwm kom tsa ib lub tsev teev ntuj hauv tebchaws Loos los qhuas “Vajtswv Niam.” Lawv ua lub tsev teev ntuj no nyob ze rau lub tsev uas cov Loos teev hawm Luxaina (Lucina), uas yog tus poj vajtswv tsom kwm kev yug menyuam. Ib tug kws sau ntawv tau hais txog lub tsev teev ntuj no tias “lub tsev no ua pov thawj tias tom qab tebchaws Loos saws txoj kevcai Khixatia, cov neeg coj kevcai dab qhuas thiab cov neeg teev hawm Maivliag tau los koom ua ib lub siab lawm.”—Mary—The Complete Resource.

a Muaj ntau txojkev ntseeg Khixatia qhia tias Maivliag yog Vajtswv niam. Lawv hais tias nws yog tus “Poj Vaj Saum Ntuj” lossis lawv muab nws hu raws lo lus Kili, Ti-otakhaw (Theotokos) uas txhais tias “Tus Yug Vajtswv.”