KEV PAB RAU THAUM KHOOM KIM ZUJ ZUS TUAJ

Ua Zoo Luj Koj Cov Nyiaj

Thaum txhua yam kim zuj zus tuaj, yeej nyuaj heev rau peb sawv daws. Tiam sis koj yuav tsum tsis txhob tag kev cia siab. Yeej tseem tshuav tej yam uas koj ua tau los pab koj tus kheej thiab koj tsev neeg.

VIM LI CAS KOJ YUAV TAU UA ZOO LUJ KOJ COV NYIAJ?

Yog koj tsis txawj luj ces yim huab yuav ua rau koj txhawj. Tej zaum koj yuav xav tias, koj twb tsis muaj nyiaj ntau es yuav ua li cas luj? Tab txawm koj tsis muaj nyiaj ntau los, yeej muaj tej yam uas koj yuav ua tau.

KOJ YUAV UA LI CAS XWB?

Txhob siv nyiaj ntau tshaj qhov uas koj khwv tau. Yog koj ua li no ces koj yuav tseg tau nyiaj thiab koj yuav tsis txhawj thaum muaj chaw ti.

Yuav kom koj luj tau koj cov nyiaj, sau seb koj muaj li cas thiab yuav siv li cas. Tom qab koj sau tag, ces siv koj cov nyiaj raws li koj sau tseg. Yog koj cov nyiaj hli hloov los sis khoom rov nce nqi lawd, ces zoo rau koj rov qab ua zoo saib seb koj yuav siv koj cov nyiaj li cas. Yog koj muaj txij nkawm ces nco ntsoov nrog nws sib tham thiab txiav txim siab ua ke.

Yog li, koj yuav ua li cas, koj thiaj tsis siv nyiaj ntau tshaj qhov uas koj khwv tau? Thaum mus yuav khoom, tsis txhob qiv luag nyiaj es mam li them rov qab, yog hais tias koj them tau kiag kom tag tam sid ces zoo rau koj ua li ntawd. Cov uas ua li no pom hais tias lawv tshuav nyiaj li cas thiab tsis muaj nuj nqi ntau. Yog koj tso nyiaj hauv ib lub tuam txhab tso nyiaj, siv sij hawm mus saib daim ntawv uas qhia tias koj tso nyiaj thiab siv nyiaj npaum li cas lawm. Yog koj ua li no ces koj yuav tsis tshua txhawj txog nyiaj txiag.

Muaj tej lub sij hawm uas yuav tsis yooj yim rau koj kom txhob siv nyiaj ntau tshaj qhov uas koj muaj. Tiam sis yog koj ua zoo luj koj cov nyiaj ces koj yuav tsis tshua muaj kev txob kev txhawj txog nyiaj txiag.

“Zaum tsaws xam zoo zoo ua ntej seb puas muaj nyiaj txaus.”—Lukas 14:28.

Ua npaum li koj ua tau kom txhob poob hauj lwm. Kub siab lug ua koj txoj hauj lwm thiab tsis txhob mus lig. Saib taus cov uas ua hauj lwm nrog koj thiab ua qhia tias koj yeej xav pab lawv. Ua raws li koj txoj hauj lwm tej kev cai thiab kawm kom koj paub koj txoj hauj lwm kom zoo ntxiv tuaj.

Tsis txhob lam tau lam phob nyiaj. Ua zoo xav seb puas yog koj siv koj tej nyiaj txiag rau tej yam uas twb pab tsis tau koj. Muaj ib txhia muab lawv tej nyiaj txiag mus yuav yeeb yuav tshuaj, yuav dej yuav cawv. Hos muaj dua ib txhia muab lawv tej nyiaj txiag mus twv nyiaj twv txiaj, ua rau lawv tej nyiaj txiag poob tag. Tej no ua tau rau lawv muaj mob muaj nkeeg thiab kuj ua tau rau lawv poob lawv txoj hauj lwm.

‘Tus uas muaj tswv yim yeej nyob kaj siab lug. Lub tswv yim tseem ceeb dua nyiaj.’—Pajlug 3:13, 14.

Tseg nyiaj rau thaum muaj chaw ti. Yog koj ua li no ces koj yuav tsis tshua txhawj rau thaum koj ntsib teeb meem, xws li thaum koj poob hauj lwm, thaum ib tug hauv koj tsev neeg muaj mob, los sis thaum muaj lwm yam.

‘Tsis muaj leej twg paub hais tias kev puas tsuaj yuav los raug nws thaum twg.’—Tej Lus Qhia 9:12.

Yuav Txuag Nyiaj Li Cas

Ua zaub mov noj hauv tsev.

Yog koj pheej yuav tej zaub mov uas twb siav lawm los sis pheej tawm mus noj sab nraud xwb ces yuav kim zog. Txawm tias ua zaub ua mov hauv tsev noj yuav siv sij hawm me ntsis los qhov no yuav pab tau koj tseg nyiaj. Thiab tej zaub mov uas koj ua, koj kuj paub tias koj tso dab tsi rau dab tsi.

Siv tswv yim thaum mus yuav khoom.

Sau koj cov khoom uas koj cheem tsum rau ib daim ntawv es yuav raws li ntawd xwb, tsis txhob mus saib lwm yam.
Thaum koj yuav tej pob khoom uas ntim loj zog los sis ntau zog, tej zaum yuav pab tau koj tseg me ntsis nyiaj dua li qhov uas koj yuav ib pob me me. Tiam sis yog tias koj mus yuav tej khoom noj uas ntim ua tej pob loj loj ces ua tib zoo saib seb koj puas muaj chaw ntim kom txhob lwj.
Ib lub khw twg yeej txais khoom ntawm ntau tus tswv tuaj muag, uas nyias muaj nyias ib lub npe. Cov khoom los yeej zoo sib thooj thiab, tiam sis yog koj yuav lub khw ntawd cov khoom kiag xwb ces yuav pheej yig zog.
Yog koj yuav khoom saum huab saum cua ces tej thaum koj yuav nrhiav tau tus nqi uas pheej yig zog thiab kuj yuav pab tau koj luj koj tej nyiaj txiag seb koj siv npaum li cas lawm.
Mus nrhiav thiab yuav tej khoom uas lawv twb txo nqi me ntsis lawm. Koj kuj mus saib ob peb lub khw los sis ob peb lub tuam txhab seb tus nqi ho puas pheej yig zog. Xws li, nyob rau tej lub teb chaws, muaj ob peb lub tuam txhab tso dej thiab hluav taws xob uas lawv cov nqi tsis sib thooj, ces muab sib piv seb qhov twg zoo tshaj rau koj.

Ua zoo xav seb puas tsim nyog hloov koj lub twj mus rau cov tawm tshiab.

Cov tuam txhab ua xov tooj thiab lwm yam twj yeej niaj xyoo tso tawm tej yam tshiab kom lawv tau nyiaj txiag. Yog li ntawd, ua ntej koj yuav yuav ib lub twj, ua zoo xav li no, ‘Puas yuav pab tau kuv li cas, yog hais tias kuv yuav lub twj uas tawm tshiab? Puas yog kuv yuav tsum hloov mus rau lub tshiab tam sim no xwb xwb li? Ua cas kuv ho yuav tsum tau lub uas tawm tshiab?’

Kho thiab siv dua tej twj qub.

Tu thiab txuag koj tej khoom kom thiaj kav ntev. Yog puas lawm los, sim muab kho yog hais tias tsis kim heev. Koj kuj yuav tseg tau nyiaj yog hais tias koj yuav tej khoom uas lwm tus twb siv dua los lawm.

Cog ub cog no los noj.

Koj puas muaj chaw cog ub cog no? Yog koj ua tau li no ces tseem yuav pab tau koj txuag me ntsis nyiaj thiab koj kuj muab tau tej koj cog coj mus pauv, mus muag, los sis pub rau lwm tus noj.

“Nquag thiab ua tib zoo npaj koj thiaj muaj nplua mias.”—Pajlug 21:5.

Ib tug txiv neej hu ua Meej uas nyob teb chaws Askiv hais tias, “Kuv poj niam wb yeej ua zoo saib seb tej yam khoom uas wb yuav puas nce nqi los sis poob nqi. Wb kuj ua zoo saib seb wb siv wb daim credit card li cas lawm xwb.”

Ib tug txiv neej hu ua Yelemis uas nyob teb chaws U.S.A. hais tias, “Ua ntej kuv tsev neeg peb mus yuav khoom noj khoom haus, peb sau rau ntawm ib daim ntawv tias peb yuav yuav dab tsi.”

Ib tug poj niam hu ua Ya-ees uas nyob teb chaws Ixayees hais tias, “Peb yeej ua zoo luj seb peb yuav khoom tau ntau npaum li cas. Peb kuj muab ib co nyiaj tseg cia rau thaum muaj chaw ti thiab.”

Ib tug txiv neej hu ua Ntsefilis uas nyob teb chaws U.S.A. hais tias, “Kuv poj niam wb cob wb cov me nyuam kom txawj kho tej yam uas puas lawm, lawv thiaj txawj txuag. Wb qhia kom lawv txawj kho tsheb thiab txawj kho ub kho no hauv vaj hauv tsev. Yog hais tias wb yuav tsum yuav ib lub twj twg los wb tsis yuav lub uas nyuam qhuav tawm tshiab tshiab.”

Ib tug txiv neej hu ua Haunaus uas nyob teb chaws Phab Mab hais tias, “Kuv tseg tau nyiaj me ntsis vim hais tias kuv cog zaub thiab yug qaib. Kuv kuj muab kuv ib co zaub mus pub rau lwm tus tau noj thiab.”

Ib tug txiv neej tab tom de nws cov zaub hauv nws lub vaj.