Tej Lus Nug Uas Peb Muaj
◼ Puas tsim nyog cov tshaj tawm siv Is Taws Nej qhia Vajlugkub lossis kawm Vajlugkub nrog cov tibneeg lawv tsis paub uas nyob rau lwm tebchaws?
Cov tshaj tawm ib txhia tau siv Is Taws Nej los nrhiav tibneeg kawm Vajlugkub nyob rau tej lub tebchaws uas tsis pub mus qhia Vajlugkub ywj siab lossis tej lub uas tsis muaj coob tus tshaj tawm txoj xov zoo. Tej thaud, kuj nrhiav tau cov uas nyiam kawm thiab. Tiamsis cov tshaj tawm yuav tau ceev faj thaum sau e-mail lossis sib tham hauv Is Taws Nej nrog cov uas lawv tsis paub. (Mus saib daim Tes Num Rau Lub Nceeg Vaj lub 7 Hli xyoo 2007, sab 3, ua lus Askiv.) Txawm peb lub hom phiaj yog qhia txoj xov zoo txog lub Nceeg Vaj rau cov uas muaj siab mos siab muag xwb los, peb yuav tau ceev faj tsam peb ho ntsib tau cov neeg phem lossis cov neeg fav xeeb rau Vajtswv. (1Khl. 1:19-25; Khx. 2:8) Tsis tas li ntawd xwb, nyob rau tej lub tebchaws uas tsis pub mus qhia Vajlugkub ywj siab lossis txwv tsis pub tshaj tawm, tej zaum cov nom tswv yuav tshuaj ntshis tej lus peb hais ces kuj yuav tsim tau teeb meem rau peb cov kwvtij nkauj muam uas nyob rau lub tebchaws ntawd thiab. Yog li ntawd, cov tshaj tawm yuav tsum tsis txhob siv Is Taws Nej nrhiav tibneeg nyob txawv tebchaws los qhia txoj xov zoo rau.
Yog peb mus ub mus no es ntsib ib tug uas tuaj lwm tebchaws tuaj thiab peb ho tau qhia Vajlugkub rau tus ntawd, peb yuav tsum tsis txhob qhia Vajlugkub rau nws tom qab nws rov mus tsev yog tias ceg uas nyob rau lub tebchaws uas peb nyob tsis tau tso cai rau peb ua li ntawd. Tiamsis zoo rau peb qhia kom nws paub siv jw.org mus nrhiav ntaub ntawv los nyeem lossis mus nrhiav ceg Npe-ee uas nyob ze nws. Peb kuj txhawb kom nws mus nrhiav lub Tsev Nceeg Vaj uas nyob ze nws thiab. Tiamsis tej lub tebchaws tsis muaj Tsev Nceeg Vaj. Yog nws xav kom Yehauvas Cov Timkhawv mus xyuas nws, peb yuav tau sau nws npe rau daim Please Follow Up (S-43) es muab rau tus ceev ntawv hauv lub koom txoos. Tus ceev ntawv mam muab xa hauv jw.org mus. Ces ceg uas saib xyuas lub tebchaws ntawd mam saib xyuas nws vim lawv paub tias yuav mus qhia li cas thiaj qhia tau Vajlugkub rau nws xwv nws txojkev ntseeg thiaj yuav loj hlob.—Mus saib lub ntsiab “Yuav Tau Mus Xyuas Kom Sai” hauv daim Tes Num Rau Lub Nceeg Vaj lub 6 Hli xyoo 2014, sab 7; thiab daim Tes Num Rau Lub Nceeg Vaj lub 11 Hlis xyoo 2011, sab 2, ua lus Askiv.
Yog tus uas peb pheej rov mus xyuas tsiv mus nyob rau lwm lub tebchaws lossis yog peb tabtom kawm Vajlugkub nrog ib tug uas nyob txawv tebchaws uas peb tsuas paub hauv Is Taws Nej xwb, peb yuav tau ua raws li cov lus hais tas los no. Tiamsis zoo rau peb kawm Vajlugkub nrog nws mus txog thaum ib tug tshaj tawm uas nyob rau nws lub tebchaws tuaj kawm nrog nws tso. Txawm li cas los, peb yuav tau ceev faj yog peb sau ntawv, tham xov tooj, lossis tham hauv Is Taws Nej txog phau Vajlugkub nrog ib tug uas nyob rau ib lub tebchaws uas tsis pub mus qhia Vajlugkub ywj siab lossis txwv tsis pub tshaj tawm txog phau Vajlugkub.—Mth. 10:16.