Dabtsi Thiaj Yuav Qhia Peb Txog Lub Neej Yav Tom Ntej?
Coob leej ntseeg tias lawv tej dab qhuas yuav pab tau lawv lub neej rau yav tom hauv ntej. Yog li lawv thiaj rau siab ntso teev lawv tej dab qhuas.
COOB TUS NTSEEG LI NO
SAIB HNUB QUB: Ib txhia mus saib seb thaum lawv yug los tej ntsaus hnub qub saum ntuj zoo li cas, vim lawv ntseeg tias lawv lub neej yuav mus raws li tej hnub qub qhia. Lawv mus cuag cov saib hnub qub seb yuav muaj xwm txheej dabtsi los raug lawv xwv lawv thiaj paub tias yuav ua li cas thiaj tau qhov zoo thiab zam dhau qhov phem.
MUS CUAG TXIV NEEB: Ib txhia ntseeg tias yuav kom lawv tau zoo nyob lawv yuav tsum mus cuag tej txiv neeb txiv yaig. Lawv xav tias yog lawv ua li tus txiv neeb hais lawv yuav tsis muaj mob muaj nkeeg lawm.
TEEV TIAM POJ KOOB YAWM TXWV: Ib txhia teev tiam poj koob yawm txwv vim lawv ntseeg tias poj koob yawm txwv yuav pov hwm pov yawm lawv thiab yuav pab lawv kom ua dabtsi los ua nce tes. Muaj ib tug pojniam hu ua Vees (Van)a nyob Nyab Laj teb hais tias, “Yog yus hlawv nyiaj txiag xyab ntawv rau poj koob yawm txwv, lawv yuav pab yus thiab yus cov menyuam nyob kaj siab lug kom txhob muaj hmab dawm tes hlua dawm taw.”
THAWJ THIAB: Coob leej ntseeg tias thaum ib tug neeg tuag nws mus thawj thiab lawm. Thiab lawv ntseeg tias yog yus ua zoo tiam tas los yus yuav tau ntuj ntoo tiamsis yog yus ua phem ces yus yuav tau kev npam.
Lwm cov kuj tsis ntseeg li tej uas hais tas los no. Txawm li ntawd los lawv yeej xav paub txog lub neej yav tom hauv ntej. Yog li lawv thiaj mus saib hmoov saib kab teg.
THAUM KAWG ZOO LI CAS?
Tej kev ntseeg no pab puas tau tibneeg nyob kaj siab lug tiag?
Cia peb mus kawm seb ib tug txivneej nyob Nyab Laj teb hu ua Haus (Hào) uas nyiam mus saib neeb saib yaig, saib hnub qub thiab teev poj koob yawm txwv tau hais li cas. Haus hais tias, “Thaum kawg kuv poob lag luam, tiv nuj tiv nqi ntau heev thiab muaj teeb meem hauv lub cuab lub yig, ua rau kuv nyuaj siab tsis txawj tag.”
Hos nyob rau tebchaws Tais Vam (Taiwan) muaj ib tug txivneej hu ua Tshaus Mees (Qiuming) uas ntseeg ib yam li Haus. Nws tseem ntseeg ntxiv tias thaum tibneeg tuag lawv mus thawj thiab lawm. Tiamsis thaum nws muab tej uas nws ntseeg ua tib zoo soj ntsuam nws hais tias: “Tej kev ntseeg no nyias hais nyias lawm ib yam ua rau yus tsis pom qab yuav ntseeg zaj twg. Cov saib hnub qub hais tej yam uas twb tsis muaj tseeb li. Thiab yog ib tug neeg rov los thawj thiab es nws twb tsis nco txog tiam tas los, nws yuav ua cas paub hloov nws lub neej kom nws tau qhov zoo rau tiam tom ntej?”
“Tej kev ntseeg no nyias hais nyias lawm ib yam ua rau yus tsis pom qab yuav ntseeg zaj twg.”—TSHAUS MEES UAS NYOB TAIS VAM
Raws li Haus, Tshaus Mees thiab lwm tus tau pom peb lub neej yav tom ntej tsis yog nyob ntawm txoj hmoo, ntawm tej hnub qub, qhov uas teev poj koob yawm txwv, lossis qhov uas rov los thawj dua thiab. Yog li yuav ua li cas peb thiaj tau lub neej zoo rau yav tom ntej?
Coob tus hais tias yog yus mus kawm txawj kawm ntse ces yav tom ntej yus lub neej thiaj yuav tsis txom nyem, yus thiaj yuav nyob tso siab plhuav. Tiamsis cia peb mus saib seb cov uas tau mus kawm ntawv qib siab ho hais li cas xwb?
a Tau muab cov npe hauv phau no hloov lawm.
b Cov lus no nyob hauv phau Vajlugkub ntawm Kalatias 6:7. Ib txhia neeg Axias los kuj muaj ib lo zoo li no thiab. Lawv hais tias Koj cog dib ces yuav tau dib, koj cog taum ces yuav tau taum.