Rov Qab Nrog Yehauvas Sib Raug Zoo

IB XYOOS tag ib xyoos tuaj, muaj coob leej ntau tus tau ua txhaum es tig rov qab los cuag Yehauvas. Tej zaum txhua tus uas nyob saum ntuj ceeb tsheej yuav “zoo siab kawg nkaus” li. (Lukas 15:7, 10) Ua li puas yog koj yog ib tug nyuam qhuav tig rov qab los cuag Yehauvas dua? Nco ntsoov rau nruab siab tias Yehauvas, Yexus, thiab cov tubtxib qaum ntuj yeej zoo siab pom koj tig rov qab los nrog pawg ntseeg ua ke. Txawm li ntawd los, tej zaum yuav muaj tej yam ua rau koj ntxhov siab qas hnyo.

TEJ YAM NTXHOV SIAB QAS HNYO

Muaj ib txhia thaum lawv rov qab los, lawv tsis muaj lub ntsej muag los fim sawvdaws vim hais tias lawv lub siab pheej nkaug lawv tas zaj tas zog. Tej zaum lawv xav tib yam nkaus li Vajntxwv Daviv. Tom qab Yehauvas zam Daviv lub txim lawm los Daviv tseem hais tias: “Kuv tej kev txhaum raws cuag kuv ua rau kuv tsis pom kev li.” (Phau Ntawv Nkauj 40:12, TT; 65:3) Muaj ib tug npe hu ua Paj Yeeb tau raug rho tawm ntev li 20 tawm lub xyoos.a Thaum nws rov qab los, nws hais tias: “Kuv lub siab pheej nkaug kuv tas zaj tas zog tias Yehauvas tsis zam kuv lub txim.” Yog tias koj pheej xav tib yam li Paj Yeeb ces yuav txo txo koj lub zog. Tsis ntev xwb, koj txojkev sib raug zoo nrog Yehauvas yuav ploj zuj zus mus. (Pajlug 24:10) Txhob cia txojkev xav no tswj tau koj.

Muaj ib txhia xav tias lawv yuav tau hloov ntau ntau yam thiaj rov qab nrog tau Yehauvas sib raug zoo. Muaj ib tug npe hu ua Thoob (Antoine) piav tias: “Kuv tsis pom qab yuav pib Yehauvas tes haujlwm tog twg tuaj.” Vim muaj ib txhia xav tib yam li Thoob ces lawv tsis xav raus tes ua ib yam dabtsi rau Yehauvas li.

Lawv thiaj coj tib yam nkaus li zaj lus piv txwv no. Muaj ib zaug txawm muaj ib kob nag xob nag cua hlob hlob los nplawm ib tug txivneej lub tsev. Thaum nws xav txog tias yuav siv nyiaj txiag thiab sijhawm ntau npaum li cas los kho nws lub tsev ntshe nws yuav zaum tsaws quaj. Tib yam li ntawd, thaum tus ua txhaum tau rhuav nws txojkev sib raug zoo nrog Yehauvas lawm, nws yuav xav tias tseem tshuav ntau tsav ntau yam nws yuav tau hloov kom thiaj rov qab nrog tau Yehauvas sib raug zoo. Tiamsis tsis txhob tag kev cia siab vim tseem tshuav ntau yam yuav pab tau koj.

Yehauvas hais tias: “Peb cia li los sib hais txog zaj no.” (Yaxayas 1:18) Yog li ntawd, koj thiaj ua npaum li koj ua tau los nrog Yehauvas sib raug zoo. Vim koj rau rau siab ua qhov zoo qhov yog, Yehauvas thiaj hmov tshua koj ua luaj thiab muaj lus teb Dab Ntxwg Nyoog.​—Pajlug 27:11.

Thaum koj rov qab los cuag Yehauvas, twb yog ib kauj ruam ntawm koj txojkev sib raug zoo nrog Yehauvas ntag. Yehauvas los, nws yuav tshais ib kauj ruam los nrog koj tib yam nkaus. (Yakaunpaus 4:8) Nco ntsoov tias, yeej zoo tias koj rov qab los nrog sawvdaws teev tiam Yehauvas ua ke. Tiamsis qhov tseem ceeb tshaj yog koj txojkev sib raug zoo nrog Yehauvas. Koj yuav tau txhab ntxiv koj txojkev ntseeg kom ruaj li zeb, khov li tsua.

TEEM HOM PHIAJ

Teem tej hom phiaj kom koj ncav cuag. Koj twb niaj hnub kawm, koj thiaj paub Yehauvas zoo thiab tej yam nws yuav ua nyob rau yav pem suab. Tsis tas li ntawd, koj yuav tau muab tej uas koj niaj hnub kawm ntawd siv rau hauv koj lub neej koj thiaj muaj siab mus qhia Vajlugkub, mus kev sib txoos, thiab nrog cov ntseeg nyob sib nphoo ntxuas.

Thov Yehauvas tsis tseg tsis tu. Vim koj tau ua yuam kev yav tag los lawm, Yehauvas yeej paub tias yuav muaj qee lub sijhawm koj yuav ntxhov ntxhov siab ces koj yuav tsis muaj cuab kav fim nws. (Loos 8:26) Yog muaj li no rau koj, nco ntsoov tias qhov uas koj “thov Vajtswv tsis tseg tsis tu” ntawd, Vajtswv suav tias koj yeej xib nrhiav nws. (Loos 12:12) Yog tias koj tsis pom qab yuav thov nws li cas, cia li mus nyeem Vajntxwv Daviv cov lus thov hauv Phau Ntawv Nkauj 51 thiab 65. Muaj ib tug npe hu ua Anrej (Andrej) piav tias: “Kuv txaj muag kawg nkaus li rau tej yam kuv tau ua dhau los lawm. Kuv lub siab pheej tsuas pom nkaug kuv tas zaj tas zog. Tiamsis tom qab kuv thov Vajtswv tag, kuv lub siab txawm tus yees lawm.”

Kawm Vajtswv Txojlus tsis tseg tsis tu. Yog tias koj rau siab ntso kawm Vajtswv Txojlus ces yuav tsav tau koj txojkev ntseeg lawm hov ntau tuaj. (Phau Ntawv Nkauj 19:7-11) Muaj ib tug npe hu ua Felipe piav hais tias: “Kuv tsis rau siab kawm Vajtswv Txojlus, kuv txojkev ntseeg thiaj li tsuag zuj zus. Kuv tsis xav rov qab mus ua txhaum dua. Yog li ntawd, kuv thiaj lauj sijhawm los kawm Vajlugkub.” Koj yeej muaj peevxwm xyaum tau tib yam nkaus. Yog tias koj tsis paub seb yuav pib tog twg ua ntej, cia li kav tsij mus nug ib tug ntseeg uas paub qab hau pab koj.

Rov mus nrog cov ntseeg sib ncawg. Thaum ib tug twg rov qab los, ntshe nws yuav txhawj txhawj nyob tsam cov ntseeg hauv lub koom txoos laj laj ntsia nws. Muaj ib tug npe hu ua Lalixam (Larissa) piav hais tias: “Kuv mas txaj muag kawg nkaus li. Kuv pheej xav twj ywm tias kuv ua rau cov ntseeg tu siab tag lawm. Kuv lub siab pheej nkaug kuv li hais tas no.” Yog tias koj xav tib yam li Lalixam, nco ntsoov tias cov txwj laus thiab cov ntseeg uas paub qab hau yeej txaus siab hlo cev tes pab koj rov qab nrog Yehauvas sib raug zoo dua. (Saib lub ntsiab “Cov Txwj Laus Nqes Tes Pab Tau Li Cas?”) Txhua tus yeej txaus siab tias koj tig rov qab los cuag Yehauvas thiab tsuas xav kom koj tau lub neej zoo nkaus nkaus xwb.​—Pajlug 17:17.

Saib cov ntseeg coj li cas ces xyaum li ntawd. Xws li mus kev sib txoos thiab mus qhia Vajlugkub. Muaj ib tug npe hu ua Felis (Felix) piav hais tias: “Txhua tus hauv lub koom txoos yeej tos txais kuv rov qab los mas ua rau kuv xav tsis tag li. Kuv paub tias Yehauvas zam kuv lub txim lawm vim lawv ua zoo zoo rau kuv. Yog li ntawd, txij no mus kuv yuav rau rau siab ua Yehauvas tes haujlwm.”​—Mus saib lub ntsiab hu ua “Xyaum Tej Yam No.”

TSIS TXHOB TSO TSEG!

Nco ntsoov tias Dab Ntxwg Nyoog yuav nrhiav nrhw kev los txo koj txojkev ntseeg dua. (Lukas 4:13) Cia li npaj koj lub siab kom koj thiaj zam dhau Ntxwg Nyoog tej kev haub ntxias.

Yehauvas cog lus tseg li no tias: “Kuv yuav mus nrhiav cov yaj uas ploj lawm thiab coj cov yuam kev rov los, muab ntaub qhwv cov uas muaj qhov txhab, kho cov uas muaj mob thiab pab cov uas qaug zog.” (Exekees 34:16) Yehauvas twb pab coob leej ntau tus lawm. Cia li tso siab plhuav tias Yehauvas yeej yuav pab kom koj muaj kev sib raug zoo nrog nws dua.