Hahemaoro Taudia

10 Abimeleka ia mase murinai, Pua ena natuna Tola ia toreisi, Israela taudia hamauria totona, iena tubuna be Dodo, bona ia be Isakara iduhu amo.+ Ia be Samiri ai ia noho, unai be Eparaima ena ororo gabudia ai. 2 Israela ai ia be lagani 23 lalonai hahemaoro gaukara ia karaia. Bena ia mase bona Samiri ai idia guria.

3 Ia murinai Gileada tauna Iairi ia toreisi bona Israela ai lagani 22 lalonai hahemaoro gaukara ia karaia. 4 Iena natudia memero be 30, bona idia be doniki 30 latanai idia guia, bona edia siti be 30, unai siti edia ladana be Havoto-iairi ema bona hari,+ unai be Gileada tano ai. 5 Unai murinai Iairi ia mase bona Kamono ai idia guria.

6 Israela taudia ese Iehova ena vairanai kara dika idia karaia lou,+ bona idia ese Bala diravadia, Asatorete laulaudia, Arama* edia dirava, Sidono edia dirava, Moaba edia dirava,+ Amono taudia edia dirava,+ bona Filistia taudia edia dirava+ idia hesiai henia matamaia.+ Idia ese Iehova idia rakatania bona ia idia hesiai henia lasi. 7 Bena Iehova ena badu mai siahuna be Israela taudia latanai ia diho, bona idia be Filistia taudia bona Amono taudia edia imana dekenai ia hoihoilaia.+ 8 Vadaeni unai lagani ai idia ese Israela taudia idia hahisidia bona dagedage henidia bada. Bona lagani 18 lalonai idia ese Israela taudia ibounai idia hahisia, unai be Ioridane ena ist kahanai, guna unai be Amoro taudia edia tano, Gileada dekenai. 9 Danu, Amono taudia be Ioridane idia hanaia, Iuda, Beniamina, bona Eparaima iduhu idia tuari henia totona. Bona Israela taudia be idia lalohisihisi bada. 10 Bena Israela taudia be heduru totona Iehova dekenai idia boiboi,+ idia gwau: “Emai Dirava e, ai be oi dekenai ai kara dika vadaeni, badina ai ese oi ai rakatania bona Bala diravadia ai hesiai henia.”+

11 To Iehova be Israela taudia dekenai ia gwau: “Lau ese umui be Aigupito taudia, Amoro taudia, Amono taudia, Filistia taudia amo lau hamauria,+ 12 bona Sidono taudia, Amaleka taudia, bona Midiana taudia amo danu, ani? Idia ese umui idia dagedage henia bona lau dekenai umui taitai neganai, lau ese idia amo umui lau hamauria. 13 To umui ese lau umui rakatania bona dirava ma haida umui hesiai henia.+ Unai dainai lau ese umui do lau hamauria lou lasi.+ 14 Umui abia hidi diravadia dekenai umui lao bona heduru totona idia dekenai umui boiboi.+ Emui hisihisi negana lalonai, namona be idia ese umui idia hamauria.”+ 15 To Israela taudia be Iehova dekenai idia gwau: “Ai be ai kara dika vadaeni. Oi ura karaia gauna be ai dekenai oi karaia. Mani hari dina ai oi hamauria.” 16 Bona edia huana amo idau diravadia idia kokia bona Iehova idia hesiai henia,+ unai dainai ia ura edia hisihisi amo idia ia hamauria.+

17 Bena Amono taudia+ be tuari totona idia haboua, bona Gileada ai idia kamepa. Vadaeni Israela taudia idia haboua bona Misipa ai idia kamepa. 18 Vadaeni Gileada ai idia noho Israela taudia bona edia lohia taudia be ta ta dekenai idia hereva, idia gwau: “Amono taudia tuari henia totona daika ese ita do ia gunalaia?+ Ia be Gileada taudia ibounai edia gunalaia tauna ai do ia lao.”