ESERA

1 Parasa ena king, Kurese ena lohia lagani ginigunana ai,+ Iehova ese Parasa ena king, Kurese ena lalona ia veria ena basileia ibounai dekenai hereva ta ia siaia totona, unai amo Iehova ese Ieremia amo ia gwauraia herevana do ia guguru,+ unai hereva be revareva ai ia torea danu,+ ia gwau:

2 “Parasa ena king, Kurese be inai bamona ia hereva, ‘Guba ena Dirava, Iehova be lau dekenai tanobada ena basileia ibounai ia henia,+ bona lau ia oda henia ia totona Ierusalema ai ruma ta do lau haginia,+ unai be Iuda dekenai. 3 Umui huanai idia noho taudia, Dirava ena taunimanima ibounai unai, be Ierusalema dekenai do idia lao, unai be Iuda dekenai, bona edia Dirava be idia ida do ia noho. Idia be do idia daekau lao Israela ena Dirava momokanina Iehova ena ruma Ierusalema ai idia haginia lou totona.* 4 Bona do idia lao lasi taudia+ be Ierusalema dekenai do idia giroa lou taudia do idia durua, idia dekenai siliva bona golo, kohu bona animal, bona harihari bouboudia do idia henia, Dirava momokanina ena ruma totona,+ unai be Ierusalema ai ia noho.’”

5 Bena Iuda taudia, Beniamina taudia, bona hahelaga taudia bona Levi taudia edia bese kwaradia, Dirava momokanina ese edia lalona ia veria taudia ibounai unai, be idia hegaegae bona idia daekau lao Iehova ena ruma idia haginia lou totona, unai be Ierusalema ai. 6 Idia lao lasi taudia ibounai be idia dekenai siliva bona golo, kohu idauidau, animal, bona dava bada gaudia idia henia, bona harihari bouboudia ibounai danu idia henia.

7 Danu King Kurese ese oda ia henia Iehova ena ruma ena kohu ibounai idia kokia totona, unai kohu be Nebukanesa ese Ierusalema amo ia abia bona iena dirava ena ruma dekenai ia atoa.+ 8 Parasa ena king, Kurese ese moni naria tauna Miteredata dekenai gaukara ia henia, Iuda taudia edia gunalaia tauna Sesebasara* totona unai kohu ibounai ia duahia bona lista ai ia torea, bona Sesebasara dekenai ia henia.+

9 Unai kohu edia lista be inai: Golo bosea 30, siliva bosea 1,000, bosea ma haida 29, 10 golo disi maragidia 30, siliva disi maragidia 410, bona kohu ma haida 1,000. 11 Golo bona siliva kohudia ibounai be 5,400. Iuda taudia be Babulonia amo Ierusalema dekenai idia giroa lou neganai, Sesebasara ese unai kohu ibounai ia abia lao danu.+

2 Bona inai be provinsi* amo idia mai taudia, igui tanona amo idia mai taudia unai,+ idia be Babulonia ena king, Nebukanesa ese igui taudia bamona Babulonia dekenai ia abia lao+ bona gabeai Ierusalema bona Iuda dekenai idia giroa, idia ta ta be edia siti ta ta dekenai idia giroa lou.+ 2 Idia be Serubabele,+ Iesua,+ Nehemia, Seraia, Rilaia, Modekai, Bilesana, Misipara, Bigevai, Rehumu, bona Banaha ida idia mai.

Israela tatau ibounai edia namba be inai:+ 3 Paroso ena bese amo be 2,172; 4 Sepataia ena bese amo be 372; 5 Araha ena bese+ amo be 775; 6 Pahata-moaba ena bese,+ unai be Iesua bona Ioaba edia bese taudia, idia be 2,812; 7 Elama ena bese+ amo be 1,254; 8 Satu ena bese+ amo be 945; 9 Sakai ena bese amo be 760; 10 Bani* ena bese amo be 642; 11 Bebai ena bese amo be 623; 12 Asagada ena bese amo be 1,222; 13 Adonikama ena bese amo be 666; 14 Bigevai ena bese amo be 2,056; 15 Adini ena bese amo be 454; 16 Hesekaia ena bese tauna Atere ena bese amo be 98; 17 Besaia ena bese amo be 323; 18 Iora* ena bese amo be 112; 19 Hasumu ena bese+ amo be 223; 20 Gibara* ena bese amo be 95; 21 Betelehema ai idia noho taudia be 123; 22 Netopa tatau be 56; 23 Anatoto tatau+ be 128; 24 Asamavete tatau be 42; 25 Kiriata-iearimi taudia, Kepira taudia, bona Beroto taudia, ibounai be 743; 26 Rama taudia+ bona Geba taudia,+ ibounai be 621; 27 Mikimas amo be tatau 122; 28 Betele bona Ai amo be tatau+ 223; 29 Nebo taudia+ be 52; 30 Magabisi taudia* be 156; 31 Elama ma ta ena bese amo be 1,254; 32 Harimi ena bese amo be 320; 33 Lodu taudia, Hadida taudia, bona Ono taudia, ibounai be 725; 34 Ieriko taudia be 345; 35 Senaha taudia be 3,630.

36 Hahelaga taudia:+ Iesua ena bese tauna+ Iedaia ena bese+ amo be 973; 37 Imere ena bese+ amo be 1,052; 38 Pasahuru ena bese+ amo be 1,247; 39 Harimi ena bese+ amo be 1,017.

40 Levi taudia:+ Hodavaia ena bese amo, Iesua bona Kademiele edia bese taudia unai,+ ibounai be 74; 41 Ane abia taudia:+ Asapa ena bese+ amo be 128; 42 Geiti naria taudia edia bese taudia:+ Salumu ena bese taudia, Atere ena bese taudia, Talamono ena bese taudia,+ Akubu ena bese taudia,+ Hatita ena bese taudia, Sobai ena bese taudia, idia ibounai be 139.

43 Dubu ena hesiai taudia:*+ Siha ena bese amo, Hasupa ena bese amo, Tabaota ena bese amo, 44 Kerosi ena bese amo, Sia ena bese amo, Padono ena bese amo, 45 Lebana ena bese amo, Hagabaha ena bese amo, Akubu ena bese amo, 46 Hagaba ena bese amo, Samalai ena bese amo, Hanana ena bese amo, 47 Gidele ena bese amo, Gahara ena bese amo, Reaia ena bese amo, 48 Resini ena bese amo, Nekoda ena bese amo, Gasama ena bese amo, 49 Usa ena bese amo, Pasea ena bese amo, Besai ena bese amo, 50 Asana ena bese amo, Meunimi ena bese amo, Nepisimi ena bese amo, 51 Bakabuku ena bese amo, Hakupa ena bese amo, Harahuru ena bese amo, 52 Basalutu ena bese amo, Mehida ena bese amo, Harasa ena bese amo, 53 Bakosi ena bese amo, Sisera ena bese amo, Temaha ena bese amo, 54 Nesaia ena bese amo, Hatipa ena bese amo.

55 Solomona ena hesiai taudia edia bese taudia: Sotai ena bese amo, Soperete ena bese amo, Peruda ena bese amo,+ 56 Iala ena bese amo, Darakono ena bese amo, Gidele ena bese amo, 57 Sepataia ena bese amo, Hatili ena bese amo, Pokerete-hasabaimi ena bese amo, Ami ena bese amo.

58 Dubu ena hesiai taudia* bona Solomona ena hesiai taudia edia bese taudia ibounai be 392.

59 Bona Tele-mela, Tele-harasa, Kerubu, Adana, bona Imere amo taunimanima idia lao, to unai taudia be lista ai idia hamomokania diba lasi edia tamana ena bese taudia bona idia be Israela taudia eiava lasi.+ 60 Delaia ena bese taudia, Tobaia ena bese taudia, Nekoda ena bese taudia, ibounai be 652. 61 Bona hahelaga taudia edia bese amo be, Habaia ena bese taudia, Hakoso ena bese taudia,+ Barasilai ena bese taudia. Barasilai ese Gileada tauna Barasilai ena natuna kekeni ta ia adavaia,+ bona ia ese ena ravana tauna ena ladana ia abia hanai. 62 Inai taudia be sene taudia edia ladadia ena lista ai edia bese ena ladana idia tahua, to idia davaria lasi, unai dainai idia be hegeregere lasi hahelaga taudia edia gaukara idia karaia totona.+ 63 Gavana* ese idia ia hamaoroa helaga herea gauna+ ta idia ania diba lasi ela bona Urima bona Tumima* ia gaukaralaia hahelaga tauna ta do ia hedinarai.+

64 Idia haboua taudia ibounai be 42,360,+ 65 bona hesiai tatau bona hesiai hahinedia ibounai be 7,337, danu ane abia tatau bona hahine* ibounai be 200. 66 Edia hosi badadia ibounai be 736, edia hosi maragidia* ibounai be 245, 67 edia kamelo ibounai be 435, edia doniki ibounai be 6,720.

68 Ierusalema ai Iehova ena ruma dekenai idia ginidae neganai, iduhu kwaradia edia gunalaia taudia haida be Dirava momokanina ena ruma totona harihari bouboudia idia henia,+ unai amo Dirava ena ruma be ena gabu ai do idia haginia lou.+ 69 Edia goada hegeregerena, gaukara durua moni idia henia, golo drekma* 61,000, siliva mina* 5,000,+ bona hahelaga taudia totona dabua 100 idia henia. 70 Bona hahelaga taudia, Levi taudia, ane abia taudia, geiti naria taudia, dubu ena hesiai taudia,* bona taunimanima oredia ibounai be edia siti ta ta dekenai idia noho. Vadaeni Israela taudia ibounai be edia siti ta ta dekenai idia noho.+

3 Hua namba 7+ ai Israela taudia be edia siti idauidau ai idia noho, unai nega ai idia ibounai be mai lalotamona ida Ierusalema ai idia haboua. 2 Iehosadaka ena natuna mero Iesua,+ hahelaga taudia ma haida, Sealetiele ena natuna mero Serubabele+ bona ena tadikakadia idia toreisi bona Israela ena Dirava totona boubou patana ta idia haginia, unai amo gabua bouboudia idia henia diba, Dirava momokanina ena hesiai tauna Mose ena Taravatu ai ia noho hegeregerena.+

3 Ena be edia badinai idia noho besedia dekenai idia gari, to boubou patana be ena gabu gunana ai idia haginia lou,+ bona idia ese unai boubou patana latanai Iehova dekenai gabua bouboudia idia henia, daba bona adorahi ena gabua bouboudia unai.+ 4 Bena Taravatu ai ia noho hegeregerena Au Raurau Rumadia Ena Aria* idia karaia,+ bona dina ta ta ai idia bouboulaia animal be ena namba hegeregerena gabua bouboudia totona idia henia.+ 5 Unai murinai hanaihanai idia gabua bouboudia idia henia,+ bona hua matamata ena boubou gaudia+ bona Iehova ena helaga ariadia totona idia henia boubou gaudia ibounai idia bouboulaia.+ Bona taunimanima ese mai kudouna ibounai ida Iehova totona idia henia boubou gaudia idia bouboulaia danu.+ 6 Hua namba 7 ena dina ginigunana+ ai Iehova dekenai gabua bouboudia idia henia matamaia, ena be Iehova ena dubu helaga ena badina idia do haginia lasi.

7 Idia ese nadi utua taudia bona gaukara idauidau idia diba taudia dekenai moni idia henia,+ bona Sidono bona Turo taudia dekenai aniani bona inua gaudia bona oela idia henia, badina davara amo idia ese Lebanona amo sida au idia abia mai Iopa dekenai,+ Parasa ena king, Kurese ese idia ia oda henia hegeregerena.+

8 Ierusalema ai Dirava ena ruma dekenai idia mai bena lagani iharuana ena hua iharuana ai, Sealetiele ena natuna mero Serubabele, Iehosadaka ena natuna mero Iesua bona edia tadikaka ma haida, hahelaga taudia bona Levi taudia, bona igui tanona amo Ierusalema dekenai idia mai taudia ibounai+ be gaukara idia hamatamaia. Idia ese Levi taudia, edia mauri lagani be 20 amo ia daekau taudia unai, idia abia hidi Iehova ena ruma dekenai idia karaia gaukara idia naria totona. 9 Vadaeni Iesua, ena natudia memero bona ena tadikakadia, Kademiele bona ena natudia memero, Iuda ena natudia memero, Henadada ena natudia memero bona idia edia natudia memero bona edia tadikakadia, Levi taudia unai, idia ibounai idia gaukara hebou Dirava momokanina ena ruma dekenai idia karaia gaukarana idia naria totona.+

10 Ruma haginia taudia ese Iehova ena dubu helaga ena badina idia karaia haorea neganai,+ dubu ena dabua idia karaia hahelaga taudia mai edia kibi+ bona Asapa ena bese taudia, Levi taudia unai, be mai edia simbol* bamona gaudia ida idia gini, Iehova idia hanamoa totona, Davida, Israela ena king ese ia henia oda hegeregerena.+ 11 Bona idia be ane idia abia matamaia,+ Iehova idia hanamoa bona tanikiu henia, “badina ia be namo, bona iena lalokau be ia noho hanaihanai.”+ Bena taunimanima ibounai be mai gado bada ida Iehova idia hanamoa, badina Iehova ena ruma ena badina idia haginia vadaeni. 12 Hahelaga taudia, Levi taudia, bona bese kwaradia, idia momo be idia buruka bona dubu helaga gunana idia itaia taudia,+ ese dubu ena badina idia itaia neganai, mai gado bada ida idia taitai. Bona taunimanima momo be mai moale bada ida idia boiboi badabada.+ 13 Edia moale ena boiboi bona edia taitai regena be bada herea dainai, daudau ai idia noho taudia idia diba lasi unai be taitai eiava moale ena regena, badina boiboi ena regena sibona idia kamonai.

4 Iuda iduhuna bona Beniamina iduhuna edia inai taudia+ idia kamonai Babulonia amo idia giroa mai taudia+ be Israela ena Dirava Iehova ena dubu helaga idia haginia lou neganai, 2 idia be maoromaoro Serubabele bona iduhu kwarana taudia dekenai idia lao bona idia gwau: “Namona be umui ida dubu ita haginia. Badina ai be umui hegeregerena, emui Dirava ai tomadiho henia*+ bona ia dekenai boubou gaudia ai henia noho, unai be Esara-hadona, Asuria ena king, ena nega amo unai bamona ai karaia,+ unai king ese iniseniai ai ia hakaua mai.”+ 3 To, Serubabele bona Iesua bona Israela ena iduhu kwarana taudia be idia dekenai idia gwau: “Umui be maoro lasi emai Dirava ena ruma haginia gaukarana dekenai ai umui durua totona,+ badina ai sibona ese Israela ena Dirava Iehova ena dubu do ai haginia, Parasa ena king, Kurese ese ai ia oda henia hegeregerena.”+

4 Vadaeni unai tano ai idia noho taudia ese Iuda taudia edia lalona idia hamanokaia noho bona idia koua dubu idia haginia lasi totona.+ 5 Idia ese Parasa Basileiana ena sisiba henia taudia idia hoia Iuda taudia edia palani idia hadikaia totona.+ Unai bamona idia karaia noho Parasa ena king, Kurese ena nega amo ela bona Parasa ena king, Dariuse* ena lohia negana.+ 6 Ahasuero* ia lohia matamaia neganai, idia ese Iuda bona Ierusalema ai idia noho taudia totona samania revareva ta idia torea. 7 Bona Parasa ena king, Aratasaseta ena lohia negana lalonai, Bisilama, Miteredata, Tabele, bona iena bamodia be King Aratasaseta dekenai revareva idia torea. Unai revareva be Aramia gado dekenai idia hahanaia,+ bona Aramia toretoredia dekenai idia torea.*

8 * Gavamani ena ofesa tauna badana Rehumu bona taravatu hadibaia tauna Simisai be King Aratasaseta dekenai revareva ta idia torea, Ierusalema ai idia noho taudia idia samania totona. 9 (Unai revareva be gavamani ena ofesa tauna badana Rehumu bona taravatu hadibaia tauna Simisai bona edia bamodia, hahemaoro taudia bona gavana taudia ma haida, seketere ibounai, Ereke taudia,+ Babulonia taudia, bona Susa ai idia noho taudia,+ unai be Elama taudia,+ 10 bona ladana bada tauna Osonopara ese ia abidia lao bona Samaria ena siti ibounai dekenai ia rakatania bese oredia ibounai,+ bona Euperate Sinavai ena west kahana* ai idia noho taudia amo.) 11 Bona Aratasaseta dekenai idia siaia revareva be inai:

“Inai revareva be King Aratasaseta totona, emu hesiai taudia, Euperate Sinavai ena west kahana ai idia noho tatau amo: 12 King e, namona be inai oi diba, Iuda taudia, oi idia rakatania taudia unai, be Ierusalema dekenai idia ginidae vadaeni. Idia ese inai siti idia haginia lou. Unai siti be kara dika taudia bona gwau-edeede taudia amo ia honu. Bona siti ena haba idia haorea+ gwauraia bona ena badina idia hanamoa noho. 13 King e, namona be oi diba, bema inai siti idia haginia bona ena haba idia haorea, idia be takisi moni* do idia henia lasi,+ bona unai dainai king taudia ese do idia abia moni be bada lasi. 14 Badina ai be king amo emai gaukara ena davana ai abia,* bona ai ura lasi idia karaia gaudia ese oi dekenai hekwakwanai idia havaraia, unai dainai inai revareva amo oi ai hadibaia, 15 unai amo emu sene taudia edia sivarai bukana ai do oi tahua.+ Unai sivarai bukana ai do oi itaia bona do oi diba inai siti taudia be gwau-edeede taudia, king taudia bona provinsi* idauidau dekenai hekwakwanai idia havaraia, bona idaunega amo unai siti ai idia noho taudia haida ese gwau-edeede karadia idia havaraia noho. Unai dainai inai siti idia hadikaia.+ 16 Ai ura king ai hadibaia, bema inai siti idia haginia lou bona ena magu idia haorea, oi be Euperate Sinavai ena west kahana ai ia noho tanodia do oi biagua diba lasi.”+

17 King be gavamani ena ofesa tauna Rehumu bona taravatu hadibaia tauna Simisai bona edia bamodia, Samaria ai bona Euperate Sinavai ena west kahana ai idia noho taudia unai, dekenai hereva ia siaia:

“Maino umui abia! 18 Umui siaia revareva be lau vairanai idia duahia hedinarai* vadaeni. 19 Egu oda herevana dainai, sivarai bukana ai idia tahua, bona idia davaria, guna unai siti taudia ese king taudia idia dagedage henia bona idia gwau-edeede.+ 20 Ierusalema idia lohiaia king goadadia ese Euperate Sinavai ena west kahana idia lohiaia, bona takisi moni be idia dekenai idia henia. 21 Vadaeni Iuda taudia umui oda henia edia gaukara idia hadokoa totona, unai amo unai siti do idia haginia lou lasi ela bona oda ma ta do lau gwauraia. 22 Namona be unai umui karaia, unai amo king ena lohia dalana do ia dika lasi.”+

23 Vadaeni King Aratasaseta ena revareva be Rehumu bona taravatu hadibaia tauna Simisai bona edia bamodia dekenai idia duahia murinai, karaharaga tuari taudia ida Ierusalema dekenai idia lao bona Iuda taudia idia hadibaia edia gaukara idia hadokoa totona. 24 Vadaeni unai nega amo Ierusalema ai Dirava ena ruma haginia gaukarana ia doko. Bona unai haginia gaukara idia karaia lasi ela bona Parasa ena king, Dariuse ena lohia lagani iharuana ai.+

5 Bena peroveta taudia Hagai+ bona Sekaraia,+ Ido+ ena tubuna mero unai, be Iuda bona Ierusalema ai idia noho Iuda taudia dekenai idia peroveta. Unai peroveta taudia be Israela ena Dirava, Iuda taudia ida ia noho Diravana unai, ena ladanai idia peroveta. 2 Unai nega ai Sealetiele ena natuna mero Serubabele+ bona Iehosadaka ena natuna mero Iesua+ be Dirava ena ruma idia haginia matamaia,+ unai be Ierusalema ai. Bona Dirava ena peroveta taudia be idia ida idia noho bona idia durudia.+ 3 Unai nega ai Euperate Sinavai ena west kahana* ena gavana Tatenai bona Setara-bosenai bona edia bamodia be Iuda taudia dekenai idia mai bona idia henanadai: “Daika ese umui dekenai oda ia henia inai ruma umui haginia lou, bona ena auri gaudia umui haginia haorea totona?” 4 Bena idia henanadai: “Inai ruma idia haginia taudia edia ladadia be daika?” 5 To Dirava be Iuda ena tau badadia ida ia noho,+ bona Tatenai bona tatau ma haida ese edia gaukara idia koua lasi, badina King Dariuse dekenai revareva ta do idia siaia guna bena king ena oda inai gauna totona revareva ta do ia siaia giroa.

6 Euperate Sinavai ena west kahana ena gavana Tatenai bona Setara-bosenai bona edia bamodia, Euperate Sinavai ena west kahana ena gavana ma haida unai, be King Dariuse dekenai inai revareva idia siaia. 7 Dariuse dekenai idia siaia revareva be inai, ia gwau:

“King Dariuse e:

“Maino oi abia! 8 King e, namona be oi diba ai be Iuda ena provinsi dekenai ai lao, Dirava badana ena ruma dekenai, bona unai ruma be nadi badadia amo idia haginia noho, bona ena haba be timba amo idia karaia. Taunimanima be mai ura ida unai gaukara idia karaia bona edia gaukara goada karana dainai unai haginia gaukarana ia heau namonamo noho. 9 Bena ai ese edia tau badadia ai nanadaia: ‘Daika ese umui dekenai oda ia henia inai ruma umui haginia lou, bona ena auri gaudia umui haginia haorea totona?’+ 10 Danu edia ladadia totona ai henanadai, unai amo gaukara idia gunalaia tatau edia ladadia ai torea bona oi dekenai do ai hadibaia.

11 “Ai dekenai inai bamona idia haere: ‘Ai be guba bona tanobada ena Dirava ena hesiai taudia, bona ai be lagani momo gunanai idia haginia rumana ai haginia lou noho, unai ruma be Israela ena king badana ta ese ia haginia bona haorea.+ 12 To, emai sene taudia ese guba ena Dirava idia habadua dainai,+ Dirava ese Babulonia ena king, Nebukanesa,+ Kaledea tauna unai, ena imana dekenai idia ia atoa, bona unai king ese unai ruma ia hadikaia+ bona taunimanima be Babulonia dekenai ia abia lao.+ 13 To, Babulonia ena king, Kurese ena lohia lagani ginigunana ai, King Kurese ese oda ia henia Dirava ena ruma ai haginia lou totona.+ 14 Ma danu, King Kurese ese Babulonia ena dubu amo golo bona siliva gaudia ia kokia, unai kohu be guna Nebukanesa ese Ierusalema ai ia noho dubu helaga amo ia abidia bona Babulonia ena dubu dekenai ia atodia.+ Kurese ese unai gaudia be tau ta ladana Sesebasara,*+ gavana ai ia halaoa tauna unai, dekenai ia henia.+ 15 Kurese ese Sesebasara ia hamaoroa: “Inai kohu oi abidia. Oi lao, bona Ierusalema ena dubu helaga ai oi atoa, bona Dirava ena ruma be ena gabu korikori ai oi haginia lou be namo.”+ 16 Bena Sesebasara ia mai, bona ia ese Dirava ena ruma ena badina ia haginia,+ unai be Ierusalema ai. Bona unai ruma idia karaia noho ema bona hari, to idia do haorea lasi.’+

17 “Vadaeni king e, bema oi dekenai ia namo, tau ta oi siaia, guna idia torea gaudia be Babulonia dekenai king ena dava bada kohu idauidau haboua rumana ai do ia sekea, unai amo do oi diba King Kurese ese Dirava ena ruma be Ierusalema ai idia haginia lou totona revareva ta ia torea eiava lasi.+ Bena oi karaia abia hidi be ai dekenai oi hadibaia.”

6 Vadaeni King Dariuse be oda ia henia, bona Babulonia dekenai idia lao bona kohu idauidau idia noho rumana ai sivarai bukadia idia sekea. 2 Bona Media ena provinsi ena hanua ta Ekebatana ai ia noho magu aukana dekenai lokua toretorena ta idia davaria, bona unai lokua toretorena lalonai idia noho herevadia be inai:

3 “King Kurese ena lohia lagani ginigunana ai, King Kurese ese Dirava ena ruma totona oda ia henia, ia gwau:+ ‘Namona be Iuda taudia ese dubu idia haginia lou, unai amo idia ese boubou gaudia be unuseniai idia henia diba, bona ena badina umui haginia auka. Ena ataiai be 60 kiubit,* bona ena lababa be 60 kiubit,+ 4 bona dubu ena haba idia karaia totona nadi badadia be laini toi ai idia atoa bona edia latanai timba be laini ta ai idia atoa,+ unai bamona idia karaia daekau. Bona namona be king ena ruma amo umui abia moni amo unai gaudia edia davana umui henia.+ 5 Danu Dirava ena ruma ena golo bona siliva gaudia, Nebukanesa ese Ierusalema ena dubu helaga amo ia abidia bona Babulonia dekenai ia mailaia gaudia+ be Ierusalema dekenai do umui abidia giroa, unai amo Ierusalema ai Dirava ena ruma lalonai do umui atodia lou.’+

6 “Vadaeni Euperate Sinavai ena west kahana* ena gavana Tatenai, Setara-bosenai, bona Euperate Sinavai ena west kahana ena gavana ma haida,+ umui lau hamaoroa, unai gaukara umui koua lasi. 7 Namo lasi Dirava ena ruma haginia gaukarana umui koua. Iuda taudia edia gavana bona edia tau badadia ese Dirava ena ruma be ena gabu ai do idia haginia lou. 8 Ma danu, Iuda ena tau badadia ese Dirava ena ruma idia haginia lou totona, umui dekenai egu oda be inai: King ena ruma ai ia noho moni,+ Euperate Sinavai ena west kahana ai idia noho taudia amo umui gogoa takisi moni unai, be dubu do idia haginia tatau dekenai umui henia be namo, unai amo gaukara do idia karaia noho.+ 9 Bona namona be dina ta ta ai Ierusalema ena hahelaga taudia idia ura gaudia umui henia noho, hegeregere gabua bouboudia totona guba ena Dirava dekenai do idia henia boromakau natudia,+ mamoe tatau+ bona mamoe natudia+ umui henia, bona witi,+ damena,+ wain,+ bona oela+ danu, 10 unai amo hanaihanai do idia bouboulaia gaudia dekenai guba ena Dirava do ia moale bona king bona ena natudia memero edia mauri ia namo totona do idia guriguri.+ 11 Lau ese lau henia oda bema ta ese ia badinaia lasi, vadaeni iena ruma ena timba ta do idia kokia bona ia do idia abia isi bona unai timba dekenai do idia kokoa kau, bona ena kara dainai ena ruma be mei rumana ai do idia halaoa.* 12 Bona bema king ta eiava taunimanima ta ese inai oda ia badinaia lasi bona Ierusalema ai dubu helaga ia hadikaia, Dirava ese unai tauna do ia hadikaia, badina unai gabu ai Dirava ena ladana ia noho.+ Lau, Dariuse, ese inai oda lau henia. Inai oda herevana umui badinaia be namo.”

13 Bena Euperate Sinavai ena west kahana ena gavana Tatenai, Setara-bosenai,+ bona edia bamodia ese King Dariuse ena oda herevadia ibounai idia badinaia namonamo. 14 Bona Iuda ena tau badadia ese dubu haginia gaukarana idia karaia bona anina namona ia vara noho,+ badina peroveta taudia Hagai+ bona Sekaraia,+ Ido ena tubuna mero unai, edia peroveta herevadia ese idia ia hagoadaia. Israela ena Dirava bona Kurese bona Dariuse bona Parasa ena king, Aratasaseta edia oda herevana hegeregerena, unai haginia gaukarana idia karaia haorea.+ 15 Adara* hua ena dina ihatoina ai, idia ese dubu idia haginia haorea, unai be King Dariuse ena lohia lagani namba 6 ai.

16 Bena Israela taudia, hahelaga taudia, Levi taudia,+ bona Babulonia amo idia giroa lou taudia oredia ese mai moale ida Dirava ena ruma idia hahelagaia. 17 Bona Dirava ena ruma hahelagaia totona, idia ese boromakau 100, mamoe tau 200, mamoe natudia 400, bona Israela taudia ibounai edia kara dika boubouna totona nanigosi tau 12 idia henia, Israela taudia edia iduhu ta ta edia namba hegeregerena.+ 18 Bona idia ese edia orea ta ta ai hahelaga taudia bona Levi taudia idia abia hidi Ierusalema dekenai Dirava ena hesiai gaukara idia karaia totona,+ Mose ena buka ai idia torea hegeregerena.+

19 Bona Babulonia amo idia giroa lou taudia ese hua ginigunana ena dina namba 14 ai Pasova ariana idia karaia.+ 20 Hahelaga taudia bona Levi taudia be sibodia idia hagoevaia,+ unai dainai idia ibounai idia goeva. Levi taudia ese Babulonia amo idia giroa lou taudia, hahelaga taudia ma haida, bona idia sibodia totona Pasova boubouna ena animal idia alaia. 21 Bena Babulonia amo idia giroa lou Israela taudia be Pasova idia ania. Bona Israela ena Dirava, Iehova, tomadiho henia totona Israela taudia idia bamoa bona bese idauidau edia miro karadia idia rakatania taudia ese unai Pasova idia ania danu.+ 22 Danu idia ese mai moale ida dina 7 lalonai Isti Lasi Paraoa Ena Aria+ idia karaia, badina Iehova dainai idia moale bona ia ese Asuria ena king ena lalona ia veria idia ia lalonamo henia,+ bena king be Israela ena Dirava momokanina ena ruma haginia gaukarana ai idia ia durua.

7 Parasa ena king, Aratasaseta ena lohia negana ai,+ unai gaudia idia vara murinai, Esera*+ ia giroa lou. Esera be Seraia ena natuna mero,+ Seraia be Asaraia ena natuna mero, Asaraia be Hilekaia ena natuna mero,+ 2 Hilekaia be Salumu ena natuna mero, Salumu be Sadoka ena natuna mero, Sadoka be Ahitubu ena natuna mero, 3 Ahitubu be Amaraia ena natuna mero, Amaraia be Asaraia+ ena natuna mero, Asaraia be Meraioto ena natuna mero, 4 Meraioto be Serahaia ena natuna mero, Serahaia be Usisi ena natuna mero, Usisi be Buki ena natuna mero, 5 Buki be Abisua ena natuna mero, Abisua be Pineha+ ena natuna mero, Pineha be Eleasara+ ena natuna mero, Eleasara be hahelaga tauna badana Arona ena natuna mero.+ 6 Esera be Babulonia amo ia mai. Ia be taravatu torea hanai tauna* bona Mose ena Taravatu, Israela ena Dirava Iehova ese ia henia taravatuna unai, ia diba namonamo.+ King ese Esera ena noinoi gaudia ibounai ia henia, badina Esera ena Dirava Iehova be ia ida ia noho.

7 King Aratasaseta ena lohia lagani namba 7 ai, Israela taudia haida, hahelaga taudia, Levi taudia,+ ane abia taudia,+ geiti naria taudia,+ bona dubu ena hesiai taudia*+ be Ierusalema dekenai idia daekau lao. 8 Bona king ena lohia lagani namba 7 ena hua namba 5 ai, Esera be Ierusalema dekenai ia lao. 9 Hua ginigunana ena dina ginigunana ai, Esera be Babulonia amo ena laolao ia hamatamaia bona hua namba 5 ena dina ginigunana ai Ierusalema dekenai ia ginidae, badina ena Dirava be ia ida ia noho.+ 10 Esera be ena lalona ia hadaia* Iehova ena Taravatu ia tahua bona ia badinaia totona,+ bona unai taravatu ena hakaua herevadia bona hahemaoro herevadia be Israela taudia dekenai ia hadibaia totona.+

11 King Aratasaseta ese hahelaga tauna bona taravatu torea hanai tauna* Esera, Iehova ena oda herevadia ia diba namonamo bona Israela taudia dekenai Dirava ena hakaua herevadia ia hadibaia tauna unai, dekenai ia henia revareva be inai:

12 * “Lau, Aratasaseta,+ king ibounai edia king, ese inai revareva be hahelaga tauna Esera, guba ena Dirava ena taravatu torea hanai tauna,* dekenai lau torea: Maino oi abia. Bona hari 13 lau ese oda lau henia, egu basileia lalonai idia noho Israela taudia, edia hahelaga taudia bona Levi taudia bema idia ura oi ida Ierusalema dekenai idia lao, do idia lao diba.+ 14 Badina lau bona egu sisiba henia taudia 7 ese oi ai siaia Iuda bona Ierusalema ai idia noho taudia oi sekea totona, bema idia be emu Dirava ena Taravatu, oi ida ia noho gauna,* idia badinaia noho, 15 bona lau bona egu sisiba henia taudia ese mai ura ida siliva bona golo ai henia, unai amo oi abia lao diba Israela ena Dirava totona, ena noho gabuna be Ierusalema ai. 16 Bona Babulonia ena provinsi ibounai amo umui abia siliva bona golo, bona taunimanima bona hahelaga taudia ese Ierusalema ai ia noho Dirava ena ruma totona mai ura ida idia henia harihari gaudia oi abia lao.+ 17 Bona namona be inai moni oi gaukaralaia namonamo, boromakau,+ mamoe tatau,+ mamoe natudia,+ aniani bouboudia+ bona wain bouboudia+ hoia totona, bona oi ese Ierusalema ai emui Dirava ena ruma ena boubou patana ai unai gaudia do oi bouboulaia.

18 “Bona bema oi bona emu tadikakadia umui ura siliva bona golo oredia umui gaukaralaia, vadaeni umui gaukaralaia diba, emui Dirava ena ura hegeregerena. 19 Bona Ierusalema ai emu Dirava ena ruma ai idia karaia hesiai gaukara totona oi dekenai idia henia kohu ibounai be Dirava vairanai do oi atoa.+ 20 Bona emu Dirava ena ruma totona bema gau ma haida oi ura, oi ese king ena ruma amo oi abia moni amo unai gaudia do oi hoia.+

21 “Lau, King Aratasaseta ese Euperate Sinavai ena west kahanai* idia noho moni naria taudia ibounai dekenai oda lau henia, hahelaga tauna Esera,+ guba ena Dirava ena taravatu torea hanai tauna* unai, ia noia gaudia ibounai be do idia karaia haraga. 22 Gaudia be 100 siliva talent,* witi 100 kor,* wain be 100 bat,*+ oela be 100 bat,+ bona damena+ momo do idia henia. 23 Namona be Dirava ena ruma totona, guba ena Dirava ese ia oda gaudia ibounai be mai ura bada ida do umui karaia,+ unai amo guba ena Dirava be egu basileia bona egu natudia dekenai do ia badu lasi.+ 24 Bona umui lau hadibaia lou, hahelaga taudia bona Levi taudia, miusiki gadaralaia taudia,+ iduara naria taudia, dubu ena hesiai taudia,* bona Dirava ena ruma ai idia gaukara taudia+ amo takisi moni*+ do umui gogoa lasi.

25 “Esera e, emu Dirava ese oi dekenai ia henia aonega oi gaukaralaia, majistret taudia bona hahemaoro taudia oi abia hidi Euperate Sinavai ena west kahanai idia noho taudia ibounai, emui Dirava ena taravatu idia diba taudia unai, idia naria totona. Bema ta be unai taravatu ia diba lasi, ia umui hadibaia be namo.+ 26 Bona emu Dirava ena Taravatu bona king ena taravatu idia badinaia lasi taudia ibounai be edia kerere davana do idia henia haraga. Unai be do idia hamasea, eiava tano amo idia lulua, eiava moni do ia henia, eiava dibura ai idia atoa.”

27 Namona be iseda sene taudia edia Dirava Iehova ita hanamoa, ia ese king ena lalona ia veria Ierusalema ai Iehova ena ruma ia hanamoa totona!+ 28 Bona ia ese lau dekenai lalokau* ia hahedinaraia dainai, king+ bona ena sisiba henia taudia+ bona ena lohia tau badadia be lau idia lalonamo henia. Vadaeni egu Dirava Iehova be lau ia durua noho dainai goada lau abia, bona Israela amo tau badadia lau haboua Ierusalema dekenai ai daekau lao totona.

8 King Aratasaseta ena lohia negana lalonai, lau ida Babulonia idia rakatania bona Ierusalema dekenai idia daekau lao taudia edia bese kwarana taudia bona edia bese taudia edia ladadia ena lista be inai:+ 2 Pineha ena bese+ amo be Geresome. Itamara ena bese+ amo be Daniela. Davida ena bese amo be Hatusu. 3 Sekanaia ena bese bona Paroso ena bese amo be Sekaraia, bona ia ida be buka ai edia ladana idia torea tatau ibounai 150. 4 Pahata-moaba ena bese+ amo be, Serahaia ena natuna mero Eliaho-enai, bona ia ida be tatau 200. 5 Satu ena bese+ amo be, Iahasiele ena natuna mero Sekanaia, bona ia ida be tatau 300. 6 Adini ena bese+ amo be, Ionatana ena natuna mero Ebedi, bona ia ida be tatau 50. 7 Elama ena bese+ amo be, Atalaia ena natuna mero Iesaia, bona ia ida be tatau 70. 8 Sepataia ena bese+ amo be, Mikaela ena natuna mero Sebadaia, bona ia ida be tatau 80. 9 Ioaba ena bese amo be, Ieiele ena natuna mero Obadaia, bona ia ida be tatau 218. 10 Bani ena bese amo be, Iosipaia ena natuna mero Selomiti, bona ia ida be tatau 160. 11 Bebai ena bese+ amo be, Bebai ena natuna mero Sekaraia, bona ia ida be tatau 28. 12 Asagada ena bese+ amo be, Hakatana ena natuna mero Iohanana, bona ia ida be tatau 110. 13 Adonikama ena bese taudia,+ idia be Ierusalema ai idia giroa lou taudia ginigabedia, bona edia ladadia be inai: Elipelete, Ieile, bona Semaia, bona idia ida be tatau 60. 14 Bona Bigevai ena bese+ amo be, Utai bona Sabudu, bona idia ida be tatau 70.

15 Lau ese Ahava dekenai ia aru lao sinavai kahirakahira dekenai idia lau haboua,+ bona unuseniai palai rumadia ai haginia bona dina toi ai noho. To palai rumadia lau sekea neganai, taunimanima bona hahelaga taudia huanai Levi tauna ta lau davaria lasi. 16 Vadaeni lau ese gunalaia tatau, Eliesere, Ariele, Semaia, Elanatana, Iaribi, Elanatana, Natana, Sekaraia, bona Mesulama totona hereva lau siaia, bona hadibaia taudia Ioiaribi bona Elanatana totona hereva lau siaia danu. 17 Bena lau ese idia dekenai oda lau henia gunalaia tauna Ido dekenai do idia lao, unai be gabu ladana Kasipia ai. Idia lau hamaoroa Ido bona ena tadikakadia, dubu ena hesiai taudia* unai, do idia hamaoroa, Dirava ena ruma ai hesiai gaukara do idia karaia taudia idia mailaia totona. 18 Iseda Dirava ese ita ia durua dainai, idia ese aonega tauna ta ladana, Serebaia idia hakaua mai, ia be Mali ena bese amo,+ Mali be Levi ena tubuna mero, Levi be Israela ena natuna mero. Serebaia+ bona ena natudia memero bona ena tadikakadia, ibounai be 18. 19 Bona Hasabaia bona ia ida be Merari tauna Iesaia,+ iena tadikakadia bona edia natudia memero, ibounai be 20. 20 Bona dubu ena hesiai taudia* ibounai be 220, idia be Davida bona lohia taudia ese idia abia hidi Levi taudia idia durua totona, idia ibounai be buka ai edia ladana ia noho hegeregerena idia abia hidi.

21 Bena Ahava sinavai dekenai lau ese taunimanima lau hamaoroa do ai aniani lasi,* emai Dirava ena vairana ai do ai manau, bona ia ai noia emai laolao dekenai ai, emai natudia, bona emai kohu ibounai ia gimaia totona. 22 Lau ura lasi king lau noia tuari taudia bona hosi guia taudia be emai laolao lalonai taunimanima dikadia amo ai idia gimaia totona, badina ai be king dekenai ai gwau: “Emai Dirava be ia idia tahua taudia ibounai ia gimaia,+ to ia idia dadaraia taudia ibounai ia panisidia bona iena badu be idia latanai ia noho.”+ 23 Vadaeni ai aniani lasi* bona emai Dirava dekenai ai noinoi ai ia gimaia totona, bona emai noinoi ia kamonai henia.+

24 Lau ese hahelaga taudia edia gunalaia taudia 12 lau abia hidi, idia be Serebaia bona Hasabaia,+ bona edia tadikakadia 10. 25 Bena lau ese siliva bona golo bona kohu idauidau lau sikelea bona idia dekenai lau henia. Unai be king bona ena sisiba henia taudia bona ena lohia taudia bona unuseni idia noho Israela taudia ibounai ese Dirava ena ruma totona idia henia harihari gaudia.+ 26 Vadaeni idia dekenai lau henia gaudia be, 650 siliva talent,* siliva kohu idauidau 100 edia davana be talent rua, 100 golo talent, 27 golo disi maragidia 20 edia davana be 1,000 dariki,* bona kopa namo hereana amo idia karaia uro rua, edia toana be golo bamona.

28 Bena idia dekenai lau gwau: “Iehova vairanai umui be helaga,+ bona kohu be helaga, bona siliva bona golo be emui sene taudia edia Dirava Iehova dekenai harihari gaudia bamona umui henia. 29 Unai gaudia umui naria namonamo ela bona Ierusalema dekenai umui ginidae, bona Iehova ena ruma ena kohu haboua daiutudia lalonai hahelaga taudia bona Levi taudia edia gunalaia taudia bona Israela ena bese kwaradia edia lohia taudia ibounai edia vairanai unai kohu umui sikelea bona idia dekenai umui henia.”+ 30 Bona hahelaga taudia bona Levi taudia ese idia amo siliva bona golo bona kohu idauidau idia abia, bena Dirava ena ruma dekenai idia abia mai, unai be Ierusalema ai.

31 Hua ginigunana ena dina namba 12 ai+ Ahava ena sinavai ai rakatania,+ Ierusalema dekenai ai lao totona, bona emai Dirava ese ai ia naria, bona emai laolao lalonai ia ese emai inai taudia bona taunimanima dikadia amo ai ia hamauria. 32 Vadaeni Ierusalema dekenai ai ginidae+ bona unuseniai dina toi ai noho. 33 Bona dina namba 4 ai, ai ese siliva, golo, bona kohu be emai Dirava ena ruma lalonai ai sikelea+ bona hahelaga tauna Uraia ena natuna mero Meremoto dekenai ai henia,+ bona ia ida be Pineha ena natuna mero Eleasara, bona idia ida be Levi taudia, unai be Iesua ena natuna mero, Iosabada, bona Binui ena natuna mero, Noadia.+ 34 Gau ibounai idia sikelea bona edia namba idia torea, bona edia metau be buka dekenai idia torea. 35 Babulonia idia rakatania bona Ierusalema dekenai idia giroa lou taudia be Israela ena Dirava dekenai gabua bouboudia idia henia, boromakau 12+ be Israela taudia ibounai totona, bona mamoe tatau 96,+ mamoe natuna 77, bona nanigosi tatau 12+ be kara dika boubouna totona. Unai gaudia ibounai be gabua bouboudia Iehova dekenai idia henia.+

36 Bena ai ese king ena lohia taudia bona Euperate Sinavai+ ena west kahana* ena gavana taudia dekenai king ena oda herevana ai gwauraia,+ bona idia ese taunimanima bona Dirava momokanina ena ruma gaukara idia durua.+

9 Bona unai gaudia idia karaia haorea murinai, maoromaoro iduhu gunalaia taudia be lau dekenai idia mai bona idia gwau: “Israela taudia bona hahelaga taudia bona Levi taudia be edia badinai idia noho tano taudia bona edia kara dika rohorohodia amo idia raka-siri lasi.+ Unai tano taudia be Kanana taudia, Hiti taudia, Perisi taudia, Iebusu taudia, Amono taudia, Moaba taudia, Aigupito taudia,+ bona Amoro taudia.+ 2 Idia bona edia natudia memero ese unai tano taudia edia natudia kekenidia idia adavaia.+ Vadaeni idia, bese helagana unai,+ be unai tano taudia ida idia hebamo.+ Iduhu gunalaia taudia bona ofesa taudia ese unai kara dikadia idia karaia guna.”

3 Vadaeni unai sivarai lau kamonai neganai, egu dabua lau darea bona egu kwara huina haida bona aukina huina haida lau veria bona kokia, bona lau helai diho mai lalohisihisi bada ida. 4 Bena Israela ena Dirava ena hereva dainai idia gari taudia ibounai be lau idia hagegea, badina Babulonia amo idia giroa mai taudia idia kara dika, unai nega ai lau be mai lalohisihisi bada ida lau helai noho ela bona adorahi ena aniani boubou ena nega.+

5 Bona adorahi ena aniani boubou ena nega ai,+ egu lalohisihisi ai lau helai gabuna amo lau toreisi, egu dabua danu be ia darea, bona lau tui diho bona Iehova egu Dirava vairanai egu imana lau kehoa. 6 Bona lau gwau: “Egu Dirava e, lau hemarai bona lau mamia lau be anina lasi oi lau vaira henia totona, egu Dirava e, badina emai kara dika be bada herea bona ia daekau lao guba dekenai.+ 7 Emai sene taudia edia nega amo ia mai bona hari, emai kara dika be bada herea.+ Bona emai kara dika dainai, oi ese ai, emai king taudia, bona emai hahelaga taudia be inai tano taudia edia king edia imana dekenai oi atoa, kaia amo ai idia hamasea,+ emai kohu idia henaoa,+ bona ai idia abia lao,+ ai idia hahemaraia. Hari danu unai bamona ia vara noho.+ 8 To hari emai Dirava Iehova ese nega sisina lalonai ai ia lalonamo henia, badina ia ese ena taunimanima ia hamauria bona iena gabu helagana dekenai noho gabuna ta ia henia,+ emai Dirava e, unai amo do ai moale bona emai igui hesiai gaukara amo ai oi ruhaia. 9 Ena be ai be igui hesiai gaukara ai karaia,+ to emai Dirava ese ai ia rakatania lasi. Ia ese Parasa ena king taudia edia vairana ai iena lalokau* be ai dekenai ia hahedinaraia,+ unai amo ai ia durua Dirava ena ruma ai haginia+ bona ena dika gabudia ai hanamoa lou totona bona Iuda bona Ierusalema dekenai nadi magu bamona ai ia gimaia.

10 “To emai Dirava e, unai gaudia ibounai idia vara murinai ai be dahaka do ai gwau? Badina ai ese emu oda herevadia ai badinaia lasi. 11 Unai oda be emu hesiai peroveta taudia amo oi henia, idia gwau: ‘Do umui abia tanona be tano namona lasi, badina unai tano idia noholaia taudia be idia kara dika, bona unai tano ena kahana ibounai dekenai kara dika rohorohodia bona miro karadia be momo herea.+ 12 Unai dainai, emui natudia kekeni be unai taudia edia natudia memero dekenai umui henia lasi, bona edia natudia kekeni be emui natudia memero totona umui abia dae lasi.+ Bona namo lasi gau ta umui karaia unai ese maino bona noho namo idia dekenai do ia mailaia.+ Vadaeni do umui goada bona tano ena anina namona do umui ania bona unai tano do umui abia emui natudia ese idia noholaia hanaihanai totona.’ 13 Bona emai Dirava e, emai kara dikadia bona kerere badadia dainai idia vara gaudia ibounai murinai, oi ese ai be emai kerere ena bada hegeregerena oi panisia lasi,+ to dala oi kehoa ai oi hamauria totona.+ 14 Ai ese emu oda herevadia ai makohia lou bona kara dikadia idia karaia taudia ai adavaia be maoro, a?+ Oi be ai oi badu henia dainai ai do oi hadikaia ore momokani, bona ta do ia heau mauri lasi, a? 15 Israela ena Dirava Iehova e, oi be kara maoromaoro Diravana,+ badina ai oi hamauria bona ai be orea ta bamona ai noho ema bona hari. Emu vairanai hari ai gini inai, ai be kara dika taudia, bona ai hegeregere lasi emu vairanai ai gini totona.”+

10 Esera be Dirava momokanina ena ruma vairanai ia goru diho bona ia guriguri noho,+ mai taitai ida taunimanima edia dika ia gwauraia, Israela tatau, hahine, bona natudia hutuma be mai taitai ida ia idia hagegea. 2 Bena Elama ena bese tauna Ieiele ena natuna mero Sekanaia+ be Esera dekenai ia gwau: “Ai ese Dirava ai badinaia lasi badina idau tano hahinedia ai adavaia.*+ To, Dirava ese Israela taudia do ia lalonamo henia lou. 3 Vadaeni namona be iseda Dirava ida gwaubou ta ita karaia,+ inai idau tano hahinedia bona edia natudia ibounai ita siaia giroa, Iehova ena hakaua herevana bona Dirava ena oda herevadia dainai idia gari taudia edia hereva hegeregerena.+ Namona be Taravatu hegeregerena ita kara. 4 Oi toreisi, inai be emu gaukara, bona ai be oi do ai durua. Namona be oi boga-auka bona kara ta oi karaia.”

5 Vadaeni Esera ia toreisi bona hahelaga taudia edia gunalaia taudia, Levi taudia, bona Israela taudia ibounai ida gwauhamata ta idia karaia.+ 6 Bena Esera be Dirava momokanina ena ruma ena vairana amo ia toreisi bona Eliasibi ena natuna mero Iehonana ena daiutu* dekenai ia lao, unai be dubu lalonai. Ena be unuseni ia lao, to ia aniani lasi bona ranu ia inua lasi, badina Babulonia amo idia giroa lou taudia edia kara dika dainai ia lalohisihisi noho.+

7 Bena Iuda bona Ierusalema ena gabu ibounai dekenai hadibaia hereva idia siaia, Babulonia amo idia giroa lou taudia ibounai be Ierusalema dekenai do idia haboua totona. 8 Bona iduhu gunalaia taudia bona tau badadia edia hereva hegeregerena, bema dina toi lalonai ta ia mai lasi, ena kohu ibounai be ia amo do idia kokia, bona ia be Babulonia amo idia mai taudia huanai do ia noho lasi.+ 9 Vadaeni Iuda iduhu bona Beniamina iduhu tatau ibounai be dina toi lalonai Ierusalema dekenai idia haboua, unai be hua namba 9 ena dina namba 20 ai. Taunimanima ibounai be Dirava momokanina ena ruma ena ariara ai idia helai noho, idia karaia kerere dainai idia gari bona medu bada ia diho dainai idia heudeheude noho.

10 Bena hahelaga tauna Esera ia toreisi bona idia dekenai ia gwau: “Umui be idau tano hahinedia umui adavaia dainai kara dika umui karaia vadaeni,+ bona Israela taudia edia kerere umui habadaia vadaeni. 11 Vadaeni emui sene taudia edia Dirava Iehova dekenai emui kerere umui gwauraia hedinarai bona ena ura umui karaia. Inai tano taudia amo umui siri bona idau tano hahinedia umui siaia giroa.”+ 12 Vadaeni idia haboua taudia ibounai be mai gado bada ida idia gwau: “Ai be emu hereva hegeregerena do ai karaia. 13 To, taunimanima be momo herea, bona inai be medu negana. Murimuri dekenai ai gini be hegeregere lasi, bona ai be dina ta eiava rua sibona lalonai unai do ai hamaoromaoroa lasi badina emai kerere be bada herea. 14 Vadaeni, mani emai iduhu gunalaia taudia be ai ibounai totona do idia hereva.+ Bona umui abia hidi negana ai, emai siti lalodiai idia noho tatau, idau tano hahinedia idia adavaia tatau unai, ibounai do idia mai, siti ta ta ai idia noho tau badadia bona hahemaoro taudia do idia mai danu, unai amo iseda Dirava be ita do ia badu henia lasi.”

15 To, Asahele ena natuna mero Ionatana bona Tikava ena natuna mero Iahaseia, Levi taudia Mesulama bona Sebetai+ be unai hereva idia abia dae lasi. 16 To Babulonia amo idia mai taudia ese unai hereva idia abia dae. Bona hahelaga tauna Esera bona bese kwarana taudia, edia ladadia be lista ai idia noho taudia ibounai unai, be hua namba 10 ena dina ginigunana ai idia hebou unai gauna idia herevalaia totona. 17 Bona hua ginigunana ena dina ginigunana ai, idau tano hahinedia idia adavaia tatau ibounai idia nanadaia. 18 Bona idia davaria hahelaga taudia haida edia natudia memero be idau tano hahinedia idia adavaia:+ Iehosadaka ena natuna mero Iesua+ bona ena tadikakadia edia natudia, Maseaia, Eliesere, Iaribi, bona Gedalaia. 19 To idia gwauhamata edia adavadia do idia siaia giroa, bona idia kara dika dainai, mamoe orea amo mamoe tau ta do idia henia edia kara dika totona.+

20 Unai kara dika idia karaia taudia haida be Imere ena natudia memero+ Hanani bona Sebadaia. 21 Harimi ena natudia memero+ Maseaia, Elia, Semaia, Ieiele, bona Usaia. 22 Pasahuru ena natudia memero+ Elioenai, Maseaia, Isamaela, Netanele, Iosabada, bona Eleasa. 23 Levi taudia amo be Iosabada, Simei, Kelaia (ia be Kelita), Petahaia, Iuda bona Eliesere. 24 Bona ane abia taudia amo be Eliasibi, bona geiti naria taudia amo be Salumu, Teleme, bona Uri.

25 Bona Israela amo be Paroso ena natudia memero+ Ramaia, Isia, Malekaia, Miamini, Eleasara, Malekaia, bona Benaia. 26 Elama ena natudia memero+ Matanaia, Sekaraia, Ieiele,+ Abidi, Ieremoto, bona Elia. 27 Bona Satu ena natudia memero+ Elioenai, Eliasibi, Matanaia, Ieremoto, Sabada, bona Asisa. 28 Bona Bebai ena natudia memero+ Iehonana, Hananaia, Sabai, bona Atalai. 29 Bona Bani ena natudia memero Mesulama, Maluku, Adaia, Iasubu, Seala, bona Ieremoto. 30 Bona Pahata-moaba ena natudia memero+ Adna, Kelala, Benaia, Maseaia, Matanaia, Besalele, Binui, bona Manase. 31 Bona Harimi ena natudia memero+ Eliesere, Isihia, Malekaia,+ Semaia, Simeo, 32 Beniamina, Maluku, bona Semaraia. 33 Hasumu ena natudia memero+ Matenai, Matataha, Sabada, Elipelete, Ieremai, Manase, bona Simei. 34 Bani ena natudia memero Ma-adai, Amarama, Uele, 35 Benaia, Bedeia, Keluhi, 36 Vanaia, Meremoto, Eliasibi, 37 Matanaia, Matenai, bona Iasu. 38 Binui ena natudia memero Simei, 39 Selemaia, Natana, Adaia, 40 Makenadebai, Sasai, Sarai, 41 Asarelo, Selemaia, Semaraia, 42 Salumu, Amaraia, bona Iosepa. 43 Nebo ena natudia memero Ieile, Matitaia, Sabada, Sabina, Iadai, Ioela, bona Benaia. 44 Unai taudia ibounai be idau tano hahinedia idia adavaia,+ bona idia ese edia adavadia bona natudia idia siaia giroa.+