Bible ena Haere

Diabolo be Momokani Ia Noho, A?

OI MARAGI neganai, dibura garina oi gari, a? Reana oi laloa dagedage gauna ta be emu uindo murimuri ai ia gini, bona ia naria emu tamana bona sinana amo oi do ia dadia totona. Hari oi bada vadaeni, bona oi ese gau momokanidia oi laloa diba bona emu lalohadai dalana be maoromaoro, unai dainai oi diba oi maragi neganai oi garilaia gaudia be kavakava gaudia bamona. Vadaeni, taunimanima haida idia gwau: “Unai dainai namona be Diabolo be unai bamona ita laloa​—⁠ia be natuna ese ia lalohadailaia dagedage gauna dikana bamona, ani?”

Diabolo be ia noho momokani lasi, a? Tomadiho ta ena pepapepa ta be unai bamona ia hereva, ia gwau: “Bible lalonai unai kara dika dagedage gauna ia herevalaia lasi” bona, “Diabolo bona Satana edia anina be taunimanima iboudiai lalonai ia noho kara dika.” United States dekenai ia noho dubu hadibaia tauna ta ia gwau: “Diabolo be taunimanima sibodia.” Reana unai hereva ibounai ita hamomokania be auka lasi, a?​—⁠to reana ia maoro lasi, a?

Taunimanima Edia Kara Ena Badina

Bema Diabolo be ita taunimanima sibodia, dahaka dainai ita kahirakahira iboudiai ese iseda ruma bese edia namo ita tahua? Haheitalai be inai: Taunimanima ese aniani be edia ruma bese taudia idia henia; sibona dekenai poisini idia henia lasi, bona edia mauri hadikaia gaudia amo idia siri. Edia kara be diabolo karadia bamona lasi! To, unai taudia be bese badadia lalonai idia gaukara hebou neganai, taunimanima iboudiai hanamoa gaudia idia itaia diba lasi. Bese badadia ese aniani orena idia gaukaralaia lasi unai bese durudia totona to idia rakatania ela bona ia dika, badina idia ura lasi hitolo taudia idia henia dainai. Tanobada idia hamiroa. Tuari kohu idia haboua idia hadikaia heheni totona​—⁠niuklia tuari lalonai. Edia kara be idau, bona ia kavakava, sibona hadikaia karadia unai!

Dahaka dainai taunimanima edia kara haida idia kavakava bamona? Taunimanima momo idia noho hebou neganai, edia kara idia haidaua dainai, a? Taunimanima edia biaguna haida idia kavakava dainai, a? Lasi momokani. Ia be unai gau sibona dainai lasi. Bible sibona ia hahedinaraia tau ta ese “inai tanobada” ibounai lalonai idia noho abidadama lasi taudia “edia lalona ia hadiburaia.” Unai tau be daika? “Iena ladana be Diabolo bona Satani. Ia be tanobada taudia ibounai ia koia noho gauna.” Mai aonega bada ida taunimanima ia biagua namonamo, unai dainai Bible lalonai ia gwau ia be inai tanobada ena “dirava.”​—⁠2 Korinto 4:​4; Apokalupo 12:⁠9.

Unai “dirava” be emu uindo murimuri ai ia gini dagedage gauna ta lasi. To ia be mai ena siahu tauna, politikol karadia ia diba namonamo tauna, bona ita itaia diba lasi tauna ta. Nega ta, ia ese Iesu ia veria toho ia tomadiho henia neganai, ia kwalimu diba lasi to unai neganai tanobada ena basileia iboudiai be Iesu ia henia diba. (Luka 4:​6, 7) Daniel bukana lalonai ia hahedinaraia gwau-edeede anerudia ese siahu idia abia tanobada basileia idia biagua totona​—⁠edia dagi ladana haida be “Parasa lohiana,” bona “Greece lohiana.” Unai dainai ia hedinarai unai siahu be Iesu ia do henia toho lasi neganai, Satana ese siahu be aneru haida dekenai ia henidia vadaeni.​—⁠Daniel 10:​20, 21.

Unai dainai, Satana ese orea badana ia haginia​—⁠badina ia be “[ita itaia diba] tanobada ena lohia” dainai bona “[ita itaia diba lasi] lauma dika edia lohia tauna.” (Ioane 14:30; 16:11; Mataio 12:24) Diabolo ese orea badana ta tanobada ibounai lalonai ia biagua. Unai dainai gau momo idia vara gaudia edia badina dekenai ita lalo-parara diba.

Orea Ta Ia Biagua Ena Badina

Taravatu utua orea badana ena biaguna ese kara dika momo reana ia naria​—⁠hegeregere, drag, ariara karadia, henaohenao karadia, laki gadara, kohu abia hehuni karadia bona ma kara haida danu, to ia biagudia taudia haida ese ia idia itaia lasi. Unai hegeregerena, Satana ese orea ta ia gaukaralaia taunimanima momo herea ia biagua totona, edia namba ese Satana sibona ia biagudia diba taudia edia namba ia hanaia. Iena palani be dahaka? Nega haida tau ta o hahine ta ia dagedage henia. Danu, ia bona iena demoni ese taunimanima idia kara henidia, hegeregere idia be boromakau besena bamona. Unai neganai idia hekwarahi lasi idia ta ta sibona sibona idia hakaua kerere totona. To vairanai idia raka boromakau haida idia veria neganai, boromakau oredia be idia murinai do idia raka kau. Unai murinai, sibona idia raka oho boromakaudia danu idia veria toho.

Oibe, Diabolo ia noho momokani, to iena toana korikorina be taunimanima ese idia hahedinaraia toana hegeregerena lasi, bona ia be tomadiho hadibaia taudia edia lalohadai kava hegeregerena lasi. Idia lalohadai kava, a? Oibe, Satan, A Portrait bukana ia hereva hegeregerena. Ia gwau lagani 1800 murinai, “taunimanima ese Satana idia lalohadailaia goevagoeva lasi” bona tomadiho hadibaia taudia “ese Satana idia gwauraia hegeregere ia be lauma tauna ta lasi to ia be ma gau ta bamona.”

Daika ese Hereva Momokani Ia Gwauraia Satana Ia Herevalaia Neganai?

Hari inai negai idia noho tomadiho orea ese Bible be Satana ia herevalaia dalana idia dadaraia haraga, badina kohu idia laloa momo bona Dirava idia daradaralaia taudia idia hesiai henia dainai. Ruth Asher be iena buka The Reality of the Devil lalonai ia gwau: “Hari inai negai Diabolo ia boio vadaeni bona . . . kahirakahira Dirava do ia boio danu.”

Bible ena hereva idia dadaraia dainai, hari inai negai ena tomadiho ena “diba momo” taudia ese taunimanima edia kara idau nega amo ema bona hari ena badina idia laloa lasi. Romania amo ia mai drama torea tauna Eugène Ionesco be Germany ena niuspepa ta dekenai ia gwau: “Bema demoni edia kara ita laloa lasi, ita be dala lasi idau nega amo ema bona hari idia vara gaudia edia badina dekenai ita lalo-parara.”​—⁠Welt am Sonntag, September 2, 1979.

Hari inai negai hekwakwanai momo herea be tanobada latanai idia vara. Diabolo ese unai hekwakwanai momo ia havaraia, to taunimanima haida edia lalo-goada ia hegeregere unai idia hahedinaraia totona, a? Oibe! Lagani 1928 lalonai, hebouhebou ta dekenai taunimanima iboudiai ese inai gwaubou herevana, “Satana Dadaraia bona Iehova Abia Dae Herevana” idia karaia. Unai hereva amo Iehova ena Witness taudia idia gwauhamata do idia harorolaia, kahirakahira do ia mai tuari badana, Aramagedono, ese Satana bona iena orea dikana edia gaukara do ia haorea vaitani. Edia haroro hereva be hegeregere tuari lalonai taunimanima ia inai henia tauna, Satana, dekenai idia boiboi bamona.

Momokani, idau nega amo ema bona hari idia vara gaudia ese idia hahedinaraia Diabolo be ita ibounai eda inai henia tauna momokani. To ia hedinarai Iehova Dirava ese ita ia rakatania lasi. Unai dainai, ma diba haida oi abia be namo, ani? Iseda inai tauna ena kara ita diba be gau badana, “Satani ese ita dekena amo kwalimu do ia abia garina, badina be iena koikoi ita diba vadaeni.”​—⁠2 Korinto 2:⁠11.

[Blurb on page 31]

“Hari inai negai Diabolo ia boio vadaeni bona . . . kahirakahira Dirava do ia boio danu.”

[Picture on page 30]

Diabolo ena toana korikorina be tomadiho laulaudia hegeregerena lasi bona ia be tomadiho hadibaia taudia edia lalohadai kava hegeregerena lasi

[Credit Line]

Gustave Doré