Matamata Taudia Idia Henanadai . . .
Muvini Piksa Namona Ta be Edena Bamona Lau Abia Hidi Diba?
NEGA gunanai muvini piksa lalonai ia vareai hahinena ta ena hereva idia gwauraia, ia gwau: “Taunimanima . . . idia henanadai, dahaka dainai hari lau be muvini piksa dekenai lau lao lasi. Muvini piksa mirodia be momo herea.” Moale karadia ia abia hidi neganai, unai hahine ese muvini piksa iboudiai ia dadaraia.
Kekeni ta ladana Denise ena lalohadai be unai hahine ena lalohadai hegeregerena, to ia ese muvini piksa iboudiai ia dadaraia lasi. Ia gwau: “Muvini piksa momo lau raraia lasi, badina dagedage karadia idia hahedinaraia. Unai dainai lau raraia gaudia dekenai lau naria namonamo.”
Reana oi danu be nega haida muvini piksa oi itaia. Unai dainai bema oi ura lasi muvini piksa iboudiai do oi dadaraia, unai be hoa gauna lasi. To, niuspepa lalonai idia torea muvini piksa edia lista ese idia hamomokania, hari inai negai muvini piksa momo idia dika dainai, Keristen memero kekeni idia raraia be namo lasi. Unai be mai anina bada, badina oi raraia muvini piksa idia hahedinaraia dahaka be gau badadia oi dekenai. Idia hahedinaraia goevagoeva edena bamona bamodia oi moalelaia, edena bamona hereva oi abia dae, bona emu lalohadai mahuta hebou karana dekenai be dahaka.
Bible be ita dekenai ia gwau: “Dika umui inai henia.” (Salamo 97:10) To Satana badinaia taudia edia rara bubua karadia, bona hahisia karadia, dagedage karadia, bona sihari kava karadia bema hanaihanai oi raraia, dika oi inai henia diba, a? Lasi momokani. Mero o kekeni ta, bema Dirava ena taravatu ia ura henia, dala do ia tahua Bible ena sisiba Filipi 4:8 dekenai do ia badinaia totona, unai sisiba be inai: “Lauegu varavara e, lauegu hereva orena be inai. Inai bamona karadia sibona do umui laloa: kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, mai mataurai karadia.” Unai hereva dainai ita gwau diba lasi muvini piksa iboudiai ita dadaraia be namo, to oi raraia gaudia dainai oi naria namonamo be gau badana. Edena bamona unai bamona oi karaia diba?
Muvini Piksa Hahegeregerea Taudia —Idia Kerere Diba Lasi, A?
United States dekenai muvini piksa idia hahegeregerea Motion Picture Association of America ena taravatu hegeregerena. Leta ta amo idia hahedinaraia muvini piksa ia hegeregere taunimanima iboudiai idia itaia, eiava tama sina ese edia gwaumaoro idia henia guna be namo, eiava taunimanima badadia sibodia idia itaia be namo. Unai muvini piksa idia hahegeregerea totona, idia tahua mahuta hebou karana, dagedage karana, kekero muramuradia, drak ania kava, hereva mirodia bona unai bamona gaudia be edena bamona idia hedinarai unai muvini piksa lalonai.
Muvini piksa be unai bamona idia hahegeregerea neganai, haida idia kerere diba bona nega momo edia lalohadai idauidau idia hakoikoia heheni. To, herevana, muvini piksa ia ura itaia tauna be unai hereva amo ia diba muvini piksa lalonai edena bamona gaudia idia hedinarai bona ia hegeregere ia raraia eiava lasi. Bema emu tano lalonai muvini piksa be unai bamona idia hahegeregerea, momokani unai ese oi ia durua diba. Reana emu tamana bona sinana ese unai hahegeregerea herevadia idia gaukaralaia diba, bena idia gwauraia edena muvini piksa oi itaia diba.
To, unai hahegeregerea karadia ese ita idia hakaua kerere diba. Oi laloatao: Muvini piksa idia hahegeregerea taudia be reana Bible ena hereva idia abia dae lasi. Bona inai tanobada ena kara ia dika ia lao dainai, hari idia gwau muvini piksa momo idia hegeregere taunimanima iboudiai idia itaia totona, to lagani haida gunanai idia gwau unai muvini piksa idia dika herea.
Mero ta, ladana DeMarlo, ese unai ia davaria. Nega ta ia lao muvini piksa ta ia itaia totona, idia gwau unai piksa ia hegeregere taunimanima iboudiai idia itaia totona. To, unai muvini piksa lalonai “hereva mirodia bona dagedage karadia” be momo. Unai dainai, muvini piksa idia hahegeregerea neganai, unai ese ita ia durua diba, to unai hereva sibona dainai muvini piksa ita abia hidi be namo lasi. Bible ia gwau: “Aonega lasi tauna ese hereva iboudiai ia abia dae, to aonega tauna ese iena raka dalana ia naria namonamo.”—Hereva Lada-isidia 14:15.
Muvini Piksa Abia Hidi Dalana
Dahaka dala maorodia oi badinaia diba? Toretore taudia ese muvini piksa idia herevalaia. Edia hereva dainai bona advetismen dainai, reana muvini piksa ena anina oi diba. To, namona be oi naria namonamo. Unai toretore taudia edia hereva be sibona edia lalohadai sibona. Bona reana advetismen do ia hahedinaraia lasi muvini piksa ena kahana haida idia dika.
Kekeni ta, ladana Connie, ia gwau: “Lau davaria, bema lau diba daika daika be muvini piksa ta lalonai idia noho, nega momo lau diba dahaka gau be unai muvini piksa lalonai do idia hedinarai. Keristen memero kekeni, bema oiemu Bible lalohadai idia diba, reana do idia diba muvini piksa ta ia namo eiava. Bona cinema ena biaguna eiava tiketi ia hoia lao tauna ena hereva be reana oi do ia durua momokani. To, vaia edia kara, taunimanima ese muvini piksa lalonai idia moaleleia kahana idia gwauraia. Namona be oi henanadai, muvini piksa lalonai dahaka gau dikadia idia noho? Oi henanadai namonamo. Oi henanadai dagedage karadia, mahuta hebou karadia, eiava demoni karadia be unai muvini piksa lalonai idia hedinarai, eiava.
Reana oiemu tamana bona sinana danu ese sisiba namona idia henia diba. Kekeni ta, ladana Vanessa, ia gwau: “Lauegu tamana bona sinana lau nanadaia. Bema idia gwau muvini piksa ta ia hegeregere lau itaia, vadaeni do lau itaia.”
Video kaset oi abia neganai danu, reana oiemu tamana bona sinana ese oi idia durua diba. Danu, video ena maua oi sekea namonamo. Maua dekenai laulau eiava hereva haida idia hahedinaraia reana unai muvini piksa ia dika, a? Bema unai bamona, unai video oi abia lasi! Danu, bema video sitoa tauna, unai muvini piksa ia itaia vadaeni tauna, danu oi herevahereva reana ia ese oi ia durua diba. Hereva Lada-isidia 14:16 lalonai ia gwau: “Aonega tauna ia naria namonamo, bona kara dika ia dadaraia; to kavakava tauna ia laloa namonamo lasi, bona ia moru haraga.”
Oi Raka Oho, Video Masini Oi Koua
To, bema video kaset oi abia bena gabeai oi davaria ia hahedinaraia gaudia idia dika, edena bamona? Oi koua! Reana unai be auka. Reana muvini piksa ena sivarai o ena taunimanima oi ura henia. Reana oi ura dikadika muvini piksa ena sivarai dokona oi diba. To kara dika oi dadaraia be aonega karana.—Mataio 5:29, 30 itaia danu.
Reana unai be auka herea bema oi be emu turadia danu umui lao cinema dekenai, bena muvini piksa ia dika ia lao. Mero ta ladana Joseph dekenai unai ia vara. Advetismen idia gwau muvini piksa ta ia “namo herea momokani.” To, Joseph ia laloatao, ia gwau: “Piksa ena miniti ginigunadia 5 lalonai nega toi dagedage karadia bona kopina kava taudia idia hedinarai.” Mai gado namo ida Joseph ese iena turadia ia hamaoroa cinema rumana do ia rakatania, bena ia raka oho. Ia hemarai, a? Joseph ia gwau: “Lasi momokani. Iehova bona Iehova hamoalea dalana lau laloa guna.”
Momokani, oiemu turadia edia ura dainai, reana unai bamona oi karaia be auka herea. Reana Keristen tama sinadia edia natudia haida ese oi do idia doria, edia ura do oi karaia totona, to unai bamona matamata taudia edia lalona idia auka vadaeni, hegeregere mase gauna bamona bona gau ta ia mamia diba lasi bamona, badina idia ese muvini piksa dikadia momo idia itaia dainai. (1 Timoteo 4:2) Reana oi do idia samania, do idia gwau oi laloa kerere eiava kara maoromaoro oi goadalaia kerere. To namona be emu turadia edia ura oi badinaia lasi. Namona be mai emu “laloa maoromaoro” oi noho. (1 Petero 3:16) Emu turadia edia lalohadai oi dekenai be gau badana lasi, to gau badana be Iehova ena lalohadai oi dekenai! Bona bema emu turadia ese oi idia hereva dika henia, lalo-goeva dalana oi badinaia dainai, namona be turadia namodia oi tahudia. (Hereva Lada-isidia 13:20) Maduna be oi sibona dekenai ia noho, oiemu matana, oiemu taiana, bona oiemu kudouna oi naria namonamo totona.—Iobu 12:11; 31:1; Hereva Lada-isidia 4:23 itaia danu.
Emu Lalo-Goeva Oi Rakatania Lasi
Kekeni ta, ladana Georgia, be nega momo hehuni dalana ai muvini piksa ia itaia, iena mauri laganidia taudia dekenai unai piksa idia taravatua. To gabeai ia ura Dirava danu do ia hetura namonamo. Vadaeni, muvini piksa dikadia dekenai ia lao lasi, bona iena Keristen turadia ida moale karadia idaudia idia karaia. Ia gwau: “Hari, egu lalona ia metau lasi. Bona lau mahuta namonamo diba badina egu lalona dekenai lau goeva momokani.”
Oi ura oi goeva kudouna ia Tohoa Tauna, Iehova Dirava, ena matana dekenai, a? (Hereva Lada-isidia 17:3) Bema oibe, emu kudouna lalonai oi atoa vareai gaudia oi naria namonamo. Dagedage karadia, mahuta hebou kara dikadia bona hereva mirodia oi raraia kava lasi; unai kara iboudiai ese emu diba kara maoromaoro dekenai idia hadikaia bona emu kudouna do idia hamiroa. Salamo torea tauna bamona oi karaia, ia guriguri ia gwau: “Lauegu matana oi naria, anina lasi gaudia idia itaia lasi totona.”—Salamo 119:37.
Bema oi naria namonamo, bona muvini piksa namodia sibona oi abia hidi, oi ese sibona do oi naria bona gau dikadia do oi koua. Unai sibona lasi, to Georgia ia herevalaia gauna, lalo-goeva, do oi davaria danu. Bona unai lalo-goeva ena mamina namona ese Hollywood ena hoa karadia iboudiai ia hanaia momokani!
[Blurb on page 13]
Hari idia gwau muvini piksa momo idia hegeregere taunimanima iboudiai idia itaia totona, to lagani haida gunanai idia gwau unai muvini piksa idia dika herea
[Picture on page 12]
Reana emu tamana o sinana do idia diba advetismen lalonai idia gwauraia muvini piksa ia dika, eiava