Tauanina Gaukaralaia Momo Karana ese Oi Ia Durua Dalana
LAGANI 4 gunanai, The New England Journal of Medicine ena magasin lalonai, Harvard Iunivesiti dekenai guna idia lao student hahine taudia 17,000 edia hereva idia torea, bona unai ese ia hahedinaraia tauanina gaukaralaia momo karana be ita do matamata neganai mase dalana ia koua diba. Unai hahine henanadai henidia gaukarana ia gunalaia tauna, Doketa Ralph S. Paffenbarger, Jr. ia gwau: “Oiemu tauanina oi gaukaralaia momo neganai, oi goada bona oi gorere momo lasi.”
June 1989 lalonai, The Journal of the American Medical Association ia gwau: “Tauanina gaukaralaia momo karana dainai gorere momo idia koua diba bona unai gorere idia abia taudia idia durua bada diba; unai gorere haida be hegeregere kudou gorere (CHD), rara be varo lalonai ia heau goada momokani, . . . bona darana gorere haida.” Unai magasin be ma danu ia gwau: “Tauanina ia gaukaralaia momo lasi tauna be tauanina ia gaukaralaia momo tauna danu idia hahegeregerea neganai, tauanina ia gaukaralaia momo lasi tauna be nega 1.9 amo ia bada CHD gorere ia abia neganai. Unai bamona ia vara dainai ita hoa.”
November 1989 lalonai, unai magasin ese taunimanima 13,344 idia stadilaia taudia edia hereva ia gwauraia, bona tauanina gaukaralaia karana ena namo ia hahedinaraia. Unai kara idia tahua neganai idia davaria tauanina gaukaralaia karana sisina sibona—hegeregere dina tamona tamona lalonai, raka haragaharaga karana miniti 30 lalonai—ese tauanina be gorere idauidau amo ia mase dalana ia koua diba.
Doketa Norman M. Kaplan, University of Texas Southwestern Medical School, Dallas dekenai, be varo lalonai rara ia heau karana ia diba momo, bona ia gwau tauanina gaukaralaia dalana ena namo dekenai iena lalohadai ia haidaua ia be unai gorere ia hanamoa neganai. “Idia hanaia lagani toi eiava hani lalonai, hamomokania dalana lau itaia vadaeni bona lau be taunimanima lau hagoadaia idia be tauanina idia gaukaralaia totona.”
Doketa Kaplan be varo lalonai rara ia heau goada momokani dainai idia gorere taudia ia durudia neganai ia hamaorodia aerobic tauanina gaukaralaia karana idia karaia be namo. Ia gwau: “Lau durudia gorere taudia lau hamaorodia edia kudou ia hamarerea karadia idia karaia. Lau hamaorodia metairametaira idia hamatamaia be namo. Namo lasi idia hamatamaia haraga. Namona be idia hamatamaia neganai idia raka bona metairametaira idia goada idia lao ela bona idia heau diba bona idia karaia noho ela bona idia goada. Bema hisihisi haida idia vara, oi metaira oi lao be namo.” Oiemu tauanina gaukaralaia momo karana ese oi ia durua totona, namona be nega momo oi karaia, namona be wiki tamona tamona lalonai, nega toi eiava hani lalonai, miniti 20 eiava 30 eiava ma miniti haida lalonai, oi karaia.