Russia Kahana Ai Idia Moale

INAI kekeni maragina Lvov dekenai ia moale be mai ena badina. Ia be taunimanima 74,252 taudia ida Russia Kahana ena Keristen hebouhebou badana dekenai idia hebou tamona, bona idia ese buka matamata namona ta, ladana Tau Hereadaena, Russia gado dekenai idia abia. Ena be guna Iehova ena Witness taudia be gavamani taudia ese edia hebouhebou badadia idia taravatudia, to vanegai siahu ena negana lalonai idia ese hebouhebou badadia 7 idia karaia. Hebouhebou idia lao henia taudia edia namba be inai magasin ena rau 31 dekenai ia hedinarai.

Hebouhebou hanuana ta be Alma-Ata, Kazakhstan dekenai, unai hebouhebou dekenai Russia, Uzbekistan, Kirghizia, Tadzhikistan bona Turkmenistan amo idia mai. Alma-Ata dekenai, taunimanima 6,000 mai kahana idia moale unai buka matamata idia abia dainai. Taunimanima 4,000 mai kahana be Usolye-Sibirskoye, Siberia, ena hebouhebou dekenai unai buka idia abia neganai davana lasi dekenai, unai steidiam ena biaguna be mai hoa danu ia gwau: “Unai be hoa gauna momokani!”

Kiev dekenai, polisi taudia bona lahi habodoa taudia be unai buka idia itaia neganai, idia noinoi ta idia abia danu, idia gwau: “Ai be umui ai naria, bona ai be umui danu ai hebou tamona.” Polisi gunalaia tauna ta ia ura diba, “Unai buka be edeseni ai idia karaia? Buka hida idia printaia?”

Unai buka be 12 milion mai kahana idia printaia vadaeni gado idauidau 60 dekenai, idia haida be, Bislama, Efịk, Ewe, Ga, Igbo, Rarotongan, Sepedi, Shona, Tsonga, Tswana, Twi, bona Venda.

Taunimanima milion momo be unai buka mai ena rau 448 idia duahia neganai, Iesu Keriso ena mauri bona ena hesiai gaukara idia diba bona moale bada herea idia davaria. Bema oi ura Iesu ena gaukara bona Dirava ena ura tanobada dekenai ia hagugurua ena sivarai haida oi diba, rau 5 dekenai idia noho address ta dekenai oi tore henia diba.