Duahia Taudia Edia Amo

Mahuta Hebou Hadibaia Karana  Lauegu mauri lagani be 25 bona Baibel ena taravatu mahuta hebou karana dekenai lau abia dae. (Issue Number 4, 1992) Mahuta hebou kava karana amo idia abia moale be anina lasi badina lalohisihisi momo ia havaraia. Ena be lau be natuna maragina lasi, to unai hereva amo sisiba namodia lau abia.

S. H., United States

Lauegu mauri lalonai unai bamona sivarai ta lau duahia lasi. Umui ese aonega dalanai, edena dala amo natudia be mahuta hebou karana ena anina hadibaia karana umui gwauraia, bona ma danu natudia umui hadibadia kara goevana idia badinaia totona.

N. C., Italy

Lau be sinana ta bona mai egu natudia kekeni rua. Lau ese idia danu mahuta hebou karana ena anina ai herevalaia vadaeni. To lau be mai egu natudia mero maragidia rua danu, edia mauri lagani be 11 bona 9. Mahuta hebou karana ena anina haida ai herevalaia vadaeni. To edia tauanina toana idia idau gaudia ai herevalaia lasi. Hari adorahi lalonai, emui magasin namo hereana ia mai. Unai ese lau do ia durua egu natudia mero rua lau hadibaia totona.

P. W., Australia

Ruma Bese e, Umui Lalo-Tamona  Lau ese emui sivarai “Ruma Bese e, Lalo-Tamona Umui Tahua” lau moalelaia bada. (Issue Number 3, 1992) Unai magasin ena murimuri laulau lau itaia neganai, tai mamina lau abia. Emui hereva umui abia hidi namonamo bona umui torea mai lalokau ida. Tanikiu bada badina ai umui durua ruma bese lalonai ai lalo-tamona totona.

K. E., United States

Umui torea herevadia be lauegu kudouna ia hamarerea momokani. Ai momo ai laloa bema emai natudia danu Baibel ai stadilaia, hebouhebou dekenai ai abidia lao bona haroro gaukara dekenai ai gaukara hebou neganai, ai be tamana bona sinana namodia. To hari lau diba tama bona sina namodia danu be natudia idia tura henidia be namo​—⁠unai kara amo tama bona sina edia lalokau be natuna dekenai idia hahedinaraia. Unai bamona hereva be guna lau duahia, to hari ena anina lau diba momokani.

T. H., United States

Lau headava lasi neganai, moni naria buka gaukarana lau karaia. Lauegu gaukara lau moalelaia bada. To egu natudia lau havaraia murinai, gaukara lau rakatania bona egu natudia danu ruma dekenai lau noho. To nega haida egu mamina be hegeregere unai be anina lasi bamona bona lau ura giroa lao gaukara. To emui hereva lau duahia murinai, lau diba lau be mai egu maduna egu natudia dekenai.

S. M., United States

Inuinu Kekero Manadalaia Tama Sina  “Matamata Taudia Edia Henanadai . . . Kekero Muramura Manadalaia Tama Eiava Sina​—⁠Edena Bamona Lau Haheaukalaia Diba?” sivarai dainai lau tanikiu bada. (Issue Number 2, 1993) Lauegu tamana be inuinu kekero karana ia rakatania. Guna, ai ia botaia momo bona ai dekenai ia hereva dika. Lauegu lagani be bada lasi neganai inuinu kekero muramura lau inua matamaia bona lau danu be inuinu kekero manadalaia tauna ai lau lao noho neganai, egu sinana be Iehova ena Witness taudia danu ia stadi matamaia. Lau moale bada badina August 1991 lalonai, bapatiso lau abia! Hari pioneer gaukara totona lau hegaegae noho. Matamata taudia edia mamina edia inuinu kekero manadalaia tama sina dekenai umui torea herevana lau abia dae momokani. Ai lalokau henidia, to edia kara dika ai hunia be namo lasi.

L. W., United States