Duahia Taudia Edia Amo

Udu Mauri  Tanikiu bada, badina nega korikori ai udu mauri ena sivarai umui torea. (Issue 2, 1992) Vanegai ta ia udu mauri neganai lauegu ladana ia hadikaia, to Baibel ena sisiba Mataio 18:​15-17 ai lau badinaia neganai, unai kerere tauna ena lalona lau hamaoromaoroa.

B. C., Australia

Lau laloa unai sivarai be mai edia hadibaia herevadia bona umui toredia namonamo. To, edia laulau lau hoalaidia. Laulau hani be udu mauri hahinedia edia. Unai amo umui hahedinaraia unai be vaia hahine edia kara.

H. W., United States

Ai ura lasi unai laulau amo hahine eiava tatau ai hadikadia. Unai laulau rua ese idia hahedinaraia tatau idia udu mauri. Ma ta ese hahine rua ia hahedinaraia, hahegoada herevadia idia gwauraidia hebou. Laulau ta ese ia hahedinaraia hahine ta be udu mauri hahinedia amo ia raka oho.​—⁠ED.

Tanobada Taudia be Tadikaka Bamona Do Idia Noho  Lauegu tisa ese ai ia hamaoroa sivarai ta do ai torea; unai sivarai ena sinado be “Bese ta ese ma bese ta ia hereaia herevana ita gwauraia be maoro, a?” Tanobada taudia be tadikaka bamona do idia noho sivaraidia (Issue 3, 1991) be nega korikori ai umui halasidia! Lauegu tisa ese lau ia nanadaia lau torea herevana be edeseni amo lau abia, unai dainai unai Noga! magasin lau henia. Lauegu gaukara ia tahua neganai maka 18 (20 amo) lau ia henia!

L. Q., France

Memero Kekeni​—⁠Lagani 1990 Murinai Edia Hekwakwanai Idia Vaira Henidia  Buka matamatana, Questions Young People Ask​—⁠Answers That Work, lau abia neganai lau duahia ore. Umui torea sivaraidia, memero kekeni edia (Issue 2, 1991), lau duahia neganai, unai ese lau ia ha-uraia, unai buka lau duahia lou totona. Guna lau duahia neganai lau moalelaia sisina, to hari lau duahia lou neganai lau moalelaia bada!

B. B., United States

Lau be kekeni, egu mauri laganidia be 13. Lau ura umui lau hamaoroa, memero kekeni edia sivarai lau moalelaia bada. Lau be mai egu Awake! sabskripsen. To, magasin lau abidia negadiai lau duahidia lasi, seipi lalonai lau udadia sibona. Hari magasin ese egu matana ia veria, unai dainai lau duahia bona ena sivarai lau moalelaia. Unai murinai, magasin gunadia haida lau abidia bena lau duahidia. Hari lau ese egu sinana lau noia ia ese lau ida Baibel do ia stadilaia.

A. P., United States

Dirava ese Hisihisi Ia Koua Lasi ena Badina  Lagani 1985 amo ema bona hari lau ese Noga! magasin edia hereva iboudiai lau duahidia, bona lau laloa Issue Number 3, 1991 gauna be namo herea, badina ia ese ia hahedinaraia goevagoeva dahaka dainai Dirava ese hisihisi ia koua lasi. Ia laloa namonamo tauna bema inai magasin ia duahidia, henanadai idauidau edia haere maoromaorodia do ia abia.

E. T. V., Brazil

Tanobada Gavamanidia  Umui torea sivaraidia, “Tanobada Gavamanidia Hahemaoro Henia” herevadia, ese lau idia hadaradaraia. Satana ese unai gavamani idauidau iboudiai ia hakereredia hanaihanai; vadaeni umui ese edia kara edia anina umui tahua bona umui hahemaoro henidia, ena namo be dahaka? Ta be edena bamona ia diba dahaka be Satana ena siahu dainai ia vara bona dahaka be taunimanima edia lalo-duhu dainai ia vara?

A. P., United States

Momokani, Satana ena kara dainai taunimanima idia hegeregere lasi sibodia do idia biagua. To, Dirava idia dadaraia taudia be sibodia edia lohia daladia amo idia kwalimu diba lasi, herevana Satana ese ia hakereredia eiava lasi. Ieremia 10:23 ia gwau: “Taunimanima ena raka na ia sibona ese do ia gwauraia hidi lasi.” Ai torea herevadia ese unai hereva idia hamomokania.​—⁠ED.