Limestone be Gabu Momo Dekenai to Dava Bada Nadina
Noga! toretore tauna ta Belgium ai ia torea
DAVA BADA NADIDIA! Unai hereva oi kamonai neganai, nadi mai edia kala idauidau oi laloa, hegeregere: daimon (diamond), barekete (emerald), sadio (ruby), sapairo bona limestone. Limestone, a? Oibe, ia be dava bada nadina ta bamona.
Belgium dekenai bona gabu momo dekenai, limestone be gabu ibounai dekenai oi davaria diba. Ruma bona taunimanima idia matauraia gau badadia idia karaia limestone amo. Ia dekena amo nadi maragimaragi idia karaia taunimanima be ia latanai idia raka totona. To unai gabu momo dekenai oi davaria nadina be dahaka?
Limestone nadi be pauda amo sibona ia haboua bona ia auka bona 50 pesen calcium carbonate (ia be ahu bamona) be unai nadi lalonai ia noho. Gunaguna, tano dekenai gau idauidau idia vara dainai, unai nadi ia vara bona limestone idauidau danu idia vara. Davara dekenai idia noho mauri gaudia, hegeregere bisisi bona kururu bona davara nadi (coral) ese ranu amo calcium carbonate idia abia bena edia koukou bona turia idia karaia. Unai mauri gaudia idia mase murinai, edia koukou bona turia idia noho. Unai dainai, buka ta ladana The World Book Encyclopedia ia gwau: “Tanobada lalonai limestone idia noho gabudia momo be gunaguna bisisi, davara nadi bona kopukopu.”
Bema calcium carbonate be ranu lalonai ia noho bona ranu ia siahu bona kwalahu ai ia lao neganai, limestone ia vara. Limestone haida be ranu amo idia vara, hegeregere tano amo ia lohilohi dae gabuna ena isenai bona sinavai bona davara dekenai danu idia vara. Tano kopina ia mareremarere dainai davara henunai tano be ia daekau davara ataiai. (Salamo 104:8 itaia.) Stadi ta idia karaia neganai idia davaria sinavai eiava davara edia nadi idauidau ibounai amo 20 pesen be limestone.
Sioka (chalk) be davara lalonai idia mauri gaudia maragimaragidia edia koukou eiava turia amo ia vara gauna, bona ia be limestone danu. Limestone be nega daudau lalonai siahu bada ai bona metau bada henunai ia noho murinai Marble ia vara. Ororo matudia momo, hegeregere United States dekenai Carlsbad Caverns lalonai, hairai momokani stalactite bona stalagmite idia noho. Calcium carbonate be ranu lalonai ia noho bona ranu be kohua ena atai amo sisina sisina ia hetuturu neganai, unai gaudia ia karadia.
Limestone Abia ena Hekwarahi
To, Limestone be oi davaria haraga lasi. Guri badadia idia geia bona tano idia kokia, limestone idia abia totona. Gunaguna, unai nadi kokia gaukara taudia be mai haheauka bona goada ida idia gaukara nadi kahana ta ta dekenai guri idia geia idia kokia totona bona nadi badadia be idau gabu dekenai idia atodia. Gaukara aukana be nadi idia makohia hama badadia amo.
To hari, masini ese unai gaukara aukadia idia karaia. Ena be unai guri badadia lalonai idia gaukara taudia be dika idia davaria diba, to taunimanima ese limestone idia ura henia bada dainai, idia kokia neganai dika ia vara diba karana idia manadalaia. Limestone namona abia totona siahu bada lasi dainamait idia gaukaralaia. Dala namona be saw amo idia utua bona kokia.
Limestone amo Ruma Idia Karaia
Limestone be ruma haida karaia gauna namona ta. Badina ia ese ruma ena keru eiava siahu ia koua diba. Limestone amo daiutu ena haba idia karaia, ena lababa be 30 sentimita neganai, daiutu ena lalona ena keruma ia idau lasi, ena be murimuri ai siahu be celcius 20 amo ia daekau. Limestone ia lababa dainai daiutu lalonai ia keruma noho.
Limestone oi gaukaralaia diba regerege koua totona. Bona danu bema oi gaukaralaia namonamo limestone ese ranu ia koua diba. Medu ranuna lalonai ia noho gauna, carbon dioxide (hodahoda) be limestone ia botaia neganai, unai ese nadi latanai gau ta ia havaraia ranu ia koua totona.
Danu limestone be mai hairai bada. Limestone amo idia karaia lada bada kohoro ta be, Arc de Triomphe Paris, dekenai. Bona hairai gaudia haida be Aigupito dekenai idia karaia pyramid badadia, idia be limestone biriki edia metau be 16 ton bamona amo idia karadia! Marble be limestone ta bona oi hahururua diba. Idia hahururua neganai ia noho daudau bona ia hairai momokani dainai, nadi koroa ia diba momo tauna, ladana Michelangelo ese ia gaukaralaia momo.
Limestone bona Ahu
Limestone ibounai idia gaukaralaia lasi unai gau namodia idia karaia totona. Bada herea be masini ta lalonai idia atoa vareai ia makohia lao pauda bamona bona unai amo mai anina bada gaudia idauidau idia karaia. Hegeregere gunaguna Baibel idia torea ena nega amo, taunimanima ese limestone idia gabua ahu (calcium oxide) idia karaia totona. Unai nega lalonai, limestone be fanel toana eiava drum toana ena kiln badana lalonai idia atoa bona idia gabua. Gunaguna, ahu idia atoa biriki hakapua muramurana bona simenisi bamona idia atoa haba dekenai bona idia gaukaralaia haba penia totona bona gara gabunai nadi idia penia totona.—Deuteronomi 27:4; Esekiel 13:10; Mataio 23:27; Kara 23:3.
Tano haida lalonai ranu dikana dekenai ahu idia atoa dainai ranu idia inua diba. Ahu ranuna lalonai, calcium carbonate eiava calcium sulfate muramura ia noho dainai kukuri ranu gorere ia koua. Ahu idia gaukaralaia danu tano ia hanamoa totona. Dala ia kehoa ranu bona hodahoda tano lalonai vareai totona, unai amo tano ese aniani namodia ia havaraia. Bona danu ahu idia gaukaralaia suga idia karaia neganai.
Oibe, limestone amo idia karaia gaudia be idauidau bona momo herea. Momokani, limestone abia karana ese hekwakwanai momo ia havaraia. Nega momo guri badadia idia geia limestone abia totona, bena gabeai idia rakatanidia neganai, edia toana be namo lasi momokani. Unai guri kahirakahira dekenai idia noho hanuadia be kahu kurokuro ese ia koudia, bona dainamait ia pou regena bona tano maremare ese hanua taudia ia habadudia.
To, bema limestone amo gau idauidau idia karaia gaudia oi laloa neganai, momokani ia be dava bada nadina ta. Momokani, ia be daimon lasi. To edena ruma eiava kohoro be daimon amo idia karaia, ta lasi ani?