Tano Idia Hagoevaia Guba Manudia

Bema taunimanima momo oi nanadaia edena manu idia ura lasi itaia momokani, do idia gwau bogibada manu.

Manu momo be idia namo to bogibada idia gwauraia dika. Unai manu dikana be mase gaudia ataiai ia roho hegege. Ia roho loaloa neganai taunimanima idia gwau mase badana ta do ia vara, eiava hanua ta do idia hadikaia bona lalohisihisi do ia vara dainai unai ia karaia. To unai be gori koikoi sibona.

Idia gwauraia maoro hereva haida be inai: Taunimanima momo be bogibada ena roho dalana namona bona mai lalokau danu ena natu maragi ia naridia karana idia hoalaia bada. Mauri gaudia dekenai ia karaia gaukara ena anina idia diba. Idia dekenai bogibada be namo herea bona idia laloa ia be mai aonega bada dainai ita hadikaia diba lasi.

To momokani, bogibada ese ia ania gaudia bona ena kara ma haida be namo lasi. Idia be hairai lasi, bona idia boiboi neganai edia gadona regena be boroma, kokoroku, paroparo bona gaigai bamona. To edia kara haida dainai ita ura henidia diba.

Bogibada be edia natu idia naridia namonamo. Lagani ta ta ibounai lalonai “natu tamona” sibona ia vara bona tama sina be idia naria ela bona natu be ia sibona ia naria diba. Bogibada maragina be hua momo lalodiai atai momokani nadi matuna ta lalonai sibona ia noho diba lasi dainai ena tama bona sina ese idia naria mai hebogahisi bada danu. Andean condor ena natuna be hua 6 lalonai idia ubua ela bona vara gabuna ia rakatania diba, bena unai neganai “natuna” be kahirakahira ia bada vadaeni.

Bogibada manu be gaukara namona ta idia karaia. Ena be manu momo be kara idauidau amo taunimanima idia durudia, to bogibada manu be kara idauna ta idia karaia. Idia ese tano dekenai bodaga eiava mase gaudia idia ania.

Gabu Hagoevaia Gaukara

Dina ibounai taunimanima eiava animal edia mase tauanina kokia gaukarana be ta ese ia moalelaia lasi, to ia be mai anina bada. Mase tauanina kokia haraga karana be namo gabu ia goeva totona, bema unai ia vara lasi, taunimanima bona animal be gorere dikadia idia abia.

Bogibada be unai gaukara idia diba momo. Ena be mase gauna ia bodaga dainai gorere haida, hegeregere anthrax eiava botulin idia noho to idia ania sibona ela bona turia sibona ia noho.

Bogibada haida be turia sibona idia ania. Inai manu, ladana lammergeier bogibada, Europe, Asia bona Africa dekenai ia noho, ese turia ia abia daekau ataiai bena nadi latanai ia hamorudia. Turia idia mokohi neganai, lammergeier ese turia lalonai anina bona turia maragidia ia ania.

Gau namona ta be idia edia gaukara amo idia raka oho diba lasi, taunimanima haida bamona idia karaia lasi. Bema bogibada ese unai gaukara idia karaia lasi neganai, mase tauanidia momo mai gorere dikadia danu be siahu bada medu momo gabu ibounai dekenai do idia noho kava.

Namona be bogibada haida ese dina ibounai lalonai idia karaia gaukara ita itaia.

Guba Dekenai Idia Roho Loaloa

Dina ia daekau murinai, idia roho lao ta ta ese tano ena kahana ta ta naria totona. Unai dina lalonai ataiai idia roho loaloa bona tano dekenai mase animal tauanidia idia tahua. Bema manu ta ese mase tauanina ta ia itaia neganai, haraga momokani ia roho diho. Unai ia karaia neganai, manu haida ese idia itaia bona idia roho lao haraga aniani abia totona danu. Miniti haida lalonai, manu momo be gabu tamona dekenai idia haboua.

Idia do aniani lasi neganai, mase tauanina idia rakaia hegege sibona. Ena be taunimanima idia gwauraia dika, to unai manu idia hemarai momo. Vadaeni, manu ta ese mase tauanina do ia koria, inai be saini bamona manu haida dekenai idia aniani hamatamaia totona. Idia heai bona regerege momo idia karaia, edia toana be ragbi gadara ta idia karaia bamona. Ia hitolo dikadika manuna, bema ia heai goadagoada neganai, do ia aniani guna. Bema mase gauna be bada, idia ibounai idia aniani diba.

Miniti haida murinai idia aniani ore bona turia sibona idia rakatania bena idia roho lao, aniani ma haida idia tahua totona. Bogibada ena mauri be auka momokani. Nega haida, dina rua eiava toi murinai aniani ia davaria.

Matana Namona Bona Gaukara Hebou

Bogibada manu be ataiai amo tano dekenai idia noho gaudia idia itaia namonamo diba. Edia apena badadia be aonega dalanai hora momo lalodiai atai momokani dekenai idia roho namo herea diba. Hodahoda siahuna be tano amo ia daekau guba dekenai bona bogibada manu ese unai hodahoda lalonai idia roho bona unai ese ia durudia nega daudau idia roho totona. Manu ia stadilaia America tauna, ladana Dean Amadon, ia gwau, “unai be manu edia roho dalana ia hahedinaraia namo herea.”

Manu idia stadilaia taudia be lagani momo lalodiai idia daradara bada, edena dala amo bogibada manu be mase tauanidia idia davaria haraga diba?

Idia davaria unai manu ena matana be namo herea momokani bona manu ibounai idia gaukara hebou dainai. Idia davaria ena be bogibada be 750 mita bamona ataiai, ia roho loaloa noho neganai tano dekenai gauna ena gau ta ena bada 13 sentimita ia hanaia lasi to ia itaia diba. To ena be ena matana be namo herea, sibona ia gaukara manuna be gau ta do ia davaria haraga lasi.

Unai dainai, idia gaukara hebou be gau badana. Idia itaia taudia idia gwau, bogibada ta ta be gabu ta ta ai idia roho lao edia gabu dekenai aniani tahua totona. Bema bogibada ta ia roho diho haraga, iena roho dalana amo saini ia henia manu haida dekenai aniani ia noho kahirakahira, vadaeni idia danu unai gabu dekenai idia roho lao haraga. Edia roho dalana idia haidaua be manu haida ese idia itaia danu, bona idia danu idia roho lao haraga. Unai bamona kara be ia gaukara namo herea, bema tau ta ia herarai noho, do ia itaia manu ibounai be hegeregere nega tamona idia roho diho bamona.

To madi, edia gaukara namona be hegeregere lasi idia ia naria bona hamauria totona.

Condor Manu Ia Giroa Mai

Ena be tanobada ibounai amo ia be badana ta bona mai aonega danu ia labana diba, to tanobada kahana haida dekenai hari bogibada manudia be idia mase ore noho. Aniani momo idia davaria lasi, bona mase gauna ta idia davaria neganai ia be mai ena poisini danu. Lagani tamona lalonai natuna tamona sibona idia havaraia dainai, unai be hegeregere lasi idia momo lou haraga totona.

To gau namona ta ia vara danu. California dekenai bogibada manu ta ladana condor idia ubudia bona natuna momo idia havaraia vadaeni, unai amo manu momo do idia vara bona do idia siaidia lou diba uda dekenai. France dekenai manu idia lalokau henia taudia edia gaukara dainai, ita tanikiu henia badina edia heduru amo Massif Central, France, dekenai guna griffon bogibada idia noho lasi to hari idia noho.

Vadaeni hari, taunimanima idia gaukara goada noho, guna idia inai henia manuna idia ura hamauria totona. North bona South America edia ororo ataiai condor ia roho lao karana ita moalelaia bada, bona ena dala ita koua be namo lasi.

Ena be taunimanima idia laloa bada lasi, to Africa bona Asia dekenai bogibada manu be idia gaukara noho, ataiai idia roho loaloa bona tano dekenai mase gaudia idia anidia ore.

[Box on page 12]

Bogibada Edia Sivarai

TANOBADA dekenai bogibada manu be momo lasi to idia be manu badadia momokani. Bona idia sibona be ataiai momokani idia roho diba.

Califonia condor be kahirakahira idia ore momokani. Unai bogibada manu idia hamauria totona, unai manu badadia 24 idia ubudia, idia ura natu maragidia idia havaraia. Lagani 1986 lalonai California condor toi sibona be uda dekenai idia noho.

Andean condor bona Africa ena manu ta ladana, marabou stork, edia apena be manu ibounai edia apena ena lata idia hanaia, edia apena ena lata be mita toi bamona. Andean condor be metau bada herea, nega haida ena metau be 14 kilogram bamona.

Bogibada manu be ataiai momokani idia roho diba danu. Lagani 1973 lalonai, peleini ta be Côte d’Ivoire, West Africa dekenai, ataiai momokani 11,000 mita ai ia roho lalonai, Africa ena bogibada manu (Gyps rueppellii) ta danu ia bampa.

[Picture Credit Line on page 10]

Photo: Courtesy of Madrid Zoo, Madrid, Spain