Duahia Taudia Edia Amo

Tama Sina Burukadia  Lauegu ravana tau ia raka diba lasi bona mahuta patana dekenai sibona ia hekure dainai gau ibounai lau karaia ia totona. Unai dainai lau lalo-metau bona tauanina dalanai lau hesiku. Nega haida lau haheauka lasi bona lau hereva kava dainai, lau sori bada herea. Awake! ena hereva ta ladana “The Challenge of Caring for Aged Parents,” (February 8, 1994), lau duahia neganai lauegu kudou ia hamarerea momokani! Mai lalona ibounai ida umui lau tanikiu henia unai hereva umui torea dainai. Egu maduna lau huaia noho lalonai, unai hereva ese lau do idia durua noho.

T. H., Japan

Lauegu mauri laganidia be 16, bona hari egu tubuna hahine ia buruka bona sibona ia naria diba lasi. Aiemai gabu dekena amo iena noho gabuna be kilomita 160 bamona. Unai dainai, aiemai ruma bese idia hekwarahi bada herea. Ai idia hagoadaia herevadia dainai, umui ai tanikiu henia bada.

M. R., United States

Lau be buruka taudia idia naria welfea oreana dekenai lau gaukara. Nega momo, egu gaukara taudia dekenai Baibel duahiduahi gaudia lau hariharilaia neganai, idia ura lasi. To, aiemai hebou ta dekenai, February 8, 1994, Awake!, ena kopi lau henia idia ta ta dekenai. Iboudiai idia abia dae! Hahine ta lau davaria, ena gaukara gabuna ai ia helai bona Awake! ia duahia noho.

B. H., United States

Umui gwau namona be iseda tadikaka bona taihu momokani ita noia, tama sina naria gaukarana idia durua totona. Guna, lau laloa bema lau noidia, do idia dadaraia lasi. To, lau ura umui lau hadibaia, lagani 10 lalodiai lau sibona ese egu tama sina lau naria, egu tadikaka bona taihu lau nanadaia neganai, idia ura lasi lau idia durua. Iseda nega lalonai, lalokau ia keru noho. Namona be taunimanima idia noga bamona, bona idia diba tama sina naria gaukarana be gaukara sibona lasi​—ia be hahenamo ta!

M. D., United States

Revareva Helagadia ese iseda Keristani maduna ia herevalaia, ia gwau, “Bema tau ta ese iena varavara ia naria lasi, o iena ruma taudia ia ubua lasi neganai, ia ese iena abidadama Keriso dekenai ia negea vadaeni.” (1 Timoteo 5:8)​—Edita.

Emui sisiba lau laloa bada, umui gwau nega atoa oi sibona totona bona emu adavana totona. Guna, unai bamona karana lau karaia lasi badina lau laloa tama sina lau naria be gau badana, bona unai sibona be mai anina; nega lau atoa lasi egu tau totona​—eiava lau totona. To, hari, emui sisiba ena aonega lau lalo-pararalaia, bona unai sisiba do lau badinaia toho.

M. O., United States

Noho Gabuna Haidaua  Lauegu mauri laganidia be 14, bona umui torea herevana ladana “Young People Ask . . . Why Do We Have to Move?” (February 22, 1994) dainai umui lau tanikiu henia. Lauegu mauri laganidia be 9 neganai, egu tamana be kongregesen elda ta, bona idia noia kongregesen ma ta dekenai ia lao totona. Lagani 4 mai kahana idia hanaia vadaeni, inai kongregesen lalonai ai noho bona tadikaka bona taihu ai lalokau henia bada herea. Hari, egu tamana idia noia lou kongregesen ma ta dekenai do ia lao. Idia nanadaia dinana ai unai Awake! ai abia. Egu tadina bona lau ia durua bada herea. Ai idia noia be hahenamo ta, to aiemai lalokau tadikaka ai bamahuta henia be auka herea.

L. B., England

Bese Idauidau Inai Henia Karana  Hari sibona lau ese July-September, 1994, Noga! ena hereva “Bese Idauidau Do Idia Lalo-Tamona Diba, A?” lau duahia. Lau hoa bona moale badina be mai lalo-maoro, mai aonega, bona mai lalo-parara ida unai hekwakwanai aukana umui kikilaia. Vanegai, koledi ta dekenai histori kosina ta lau haorea. To, emui magasin ena rau 9 lalodiai, unai hekwakwanai ena histori, ena badina, bona hanamoa dalana umui hahedinaraia goevagoeva! Egu kosi, koledi bukadia, bona profesa ena hereva ibounai ia hanaia.

R. J., United States