Bema TV be Lasi, Famili Edia Moale Do Ia Bada, A?
FEBRUARY 1994 ai, The Wall Street Journal be hereva ta idia hahedinaraia: “TV Lasi: Famili Haida be TV Lasi Bona Edia Mauri be Namo Herea.” Unai niuspepa ia gwau: “America famili haida sibodia ese TV idia rakatania vaitani, bona ena be televisen be lasi— edia mauri idia moalelaia noho.”
Lagani 40 gunanai, Roger Bannister ese miniti hani ia abia lasi lalonai, mile ta ia heau haorea idia laloatao ena pati dekenai, televisen idia herevalaia danu. Lagani 1966 bona 1967 lalonai heau helulu kwalimu tauna, Jim Ryun, ia gwau 1968 Olympics ia do vara lasi negana ai, ia bona Roger idia aniani noho lalonai, televisen idia herevalaia.
Ryun ia gwau: “Unai neganai egu adavana, Anne, bona lau ai maoheni vadaeni, unai dainai Roger ia ura iena famili ena mauri ia hanamoa gauna ai diba. Ai ura kamonai momokani. Ia gwau TV be ruma amo ia kokia bena ena famili ese nega idia moalelaia hebou diba, idia kiki hebou, idia duahiduahi hebou.”
Ia gwau: “Iena hereva ese aiemai famili ia haidaua bada herea. Ai laloa matamaia ‘TV ia noho be gau badana lasi.’ ”
Taunimanima momo ese unai lalohadai idia abia vadaeni danu. Dahaka dainai? Badina TV ese maragidia edia lalona ia ania diba. Maryland, U.S.A. dekenai, sinana ta ia gwau TV vairanai ia helai bona natuna dekenai rata ia henia neganai, ena natuna be “rata ia rakatania haraga bona kwarana ia giroa TV ia raraia totona. Ai laloa bema ia maragi neganai TV ia ura dikadika, dahaka do ia vara ia bada neganai?” Unai famili ese edia TV idia hoihoilaia.
Bema oi ura lasi TV oi dadaraia vaitani, reana aonega karana be gaukaralaia taravatu oi atoa, ani? Karen Stevenson, England ena Oxford University amo Rhodes Scholarship ia abia korema hahine ginigunana ese ia maragi negana ia herevalaia: “Wiki lalonai TV ai itaia lasi. Bema program namona ai ura itaia . . . , Sunday ai [sinana] ai nanadaia wiki vairai totona bona ai palanilaia.”
TV itaia karana oiemu famili lalonai be edena bamona? Aonega gaukaralaia taravatu oi atoa, eiava nega sisina lalonai oi dadaraia, ena namo oi itaia diba, a?