“Egu Lalohadai Doketa Edia Maduna Dekenai Lau Haidaua”

OSAKA, Japan dekenai, kekeni maragina ta ena mauri lagani be hani, ladana Akane be kudouna gorere ia davaria​—tricuspid varovaro ia koua bona atrial haba dekenai matu ia noho dainai kudouna dekenai operesen badana do ia abia. Ena tama sina ese doketa taudia idia noidia rara gaukaralaia lasi operesen do idia karaia.a

Natu maragidia dekenai rara idia gaukaralaia lasi kudou operesen be auka, badina edia rara be bada lasi. Doketa taudia idia gwau Akane dekenai rara lasi operesen idia karaia diba. Akane ena operesen idia karaia namonamo neganai, edia aonega bada idia hahedinaraia. Ia namo lou haraga bona hari ia gorere lasi dainai ia moale.

Akane sinana ese operesen idia karaia doketa taudia dekenai, revareva bona vanegai Akane ena foto ta idia abia gauna ia siaia. Anesthesiology doketa hahine ese Akane ena sinana ia tore henia lou. Ena revareva ena kahana be inai ia hereva:

“Akane ia namo haraga lou dainai ai moale bada. Emu revareva lalonai oi siaia foto lau itaia neganai, lau hekwarahi bada lau tai lasi totona. Operesen ia auka dainai lau lalo-hekwarahi bada lasi, to emu abidadama bona lauegu abidadama gaudia edia idau lau lalo-hekwarahilaia bada momo. Hari, unai ekspiriens dainai, egu lalohadai doketa edia maduna dekenai lau haidaua. Doketa taudia ese edia aonega ibounai idia gaukaralaia taunimanima idia hamauridia totona be namo, to idia ese gorere taudia bona edia ura idia matauraia danu be namo.”

[Footnotes]