Ranu be Do Ia Hegeregere, A?

“Tanobada ena ranu ibounai amo 2 pesen sibona be ranu korikori, bona unai ranu korikori ena kahana toi toi amo rua rua be aisi gabudia idauidau ai idia noho, bona 1 pesen bamona be inuinu ranuna.”​—Research and Exploration, National Geographic ena buka ta.

EMU ruma dekenai inua ranuna ia aru noho emu ranu tapu dekenai, a? Bema unai bamona, oiemu noho dalana ese momo edia ia hereaia. Taunimanima milioni momo be kilomita momo herea ai idia raka ranu abia totona​—bona nega momo idia davaria ia be hegeregere momokani lasi do idia inua. Haida be kaunsolo edia tapu dekenai eiava ranu motuka dekenai idia hebou, mai anina bada gauna, ranu sisina abia totona. Research and Exploration bukana ia gwau: “Taunimanima idia momo idia lao neganai, ranu gaukaralaia bona naria gaukarana ia bada ia lao. Unai hekwakwanai be bada herea ogogami tanodia dekenai, unuseniai taunimanima bilioni ta be idia davaria vadaeni inuinu ranuna namona abia karana be mai ena hekwarahi. Anina be, taunimanima ima ima amo ta ta tanobada hegegemadai be hekwakwanai badadia idia davaria, idia inua diba ranuna tahua karana dekenai.

Nega vairai do idia vara hekwakwanaidia edia uhe be idia hadoa vadaeni unai ranu lasi karana amo. Diba momo tauna ta ia gwau: “Taunimanima momo ese edia noho dalana idia haidaua diba lasi; ruma dikadia momo gabu tamona dekenai idia haginia kava, unuseniai idia ese noho dalana dikana bona bese idauidau edia hepapahuahu do idia hanaia dalana do idia davaria diba lasi; badina be inuinu ranuna, biru tanona, bona noholaia gabuna be lasi.”

Ita ta ta be dahaka do ita karaia, inai mai anina bada gauna be aonega dalanai ita gaukaralaia totona? Namona be ita gaukaralaia badabada lasi bona ita gaukaralaia namonamo​—ia be mai anina bada bona ia ore diba.

1) Ranu haorea kava lasi. Namona be tapu ranu ia aru kava lasi​—hegeregere isena huria neganai eiava sievi neganai. Bema oi be mai emu digu ranuna neganai, ranu henunai oi noho daudau lasi.

2) Ranu oi hamiroa lasi eiava momoru ia lalonai oi negea lasi. Bema sinavai badana eiava maragina be atai hanua amo ia aru mai emu hanua dekenai, bema unai hanua tauna ta ese ranu ia hamiroa, unai ese emui hanua taudia edia mauri dalana ia hadikaia. Nega momo unai hekwakwanai idia vara, badina be siti naria taudia, bisinesi karaia taudia, biru taudia, bona ma haida ese kukuri bona momoru dikadia be sinavai maragidia bona badadia ai idia negea.

Dirava, tanobada ia Havaraia Tauna bona ena biaguna, be mai ena maoro ita do ia hahemaoro henia tanobada ita gaukaralaia dalana dainai. Baibel ia peroveta ia gwau, Iehova ese momokani “tanobada idia hadikaia vadaeni taudia be do [ia] alaia ore.”​—Apokalupo 11:18.