Dahaka Dainai Haere Ita Abia be Namo?

Dahaka dainai Havaraia Tauna ia noho eiava lasi ita diba be gau badana? Bema hamomokania gaudia idia noho dainai oi abia dae siahu ibounai Diravana ia noho, vadaeni do oi ura hamomokania Baibel be Dirava ena hereva. Bema Baibel ena hereva oi trast henia, inai dala haida ai namo do oi abia.

Emu mauri do oi moalelaia bada

BAIBEL IA GWAU: “[Dirava ese] umui dekenai medu bona aniani momo negadia ia henia, vadaeni aniani momo umui abia bona emui kudouna ia hamoalea.”—Kara 14:17.

HEREVA ENA ANINA: Tanobada ai ita moalelaia gaudia ibounai be Havaraia Tauna amo ia mai harihari gaudia. Dirava ese ita ia laloa bada karana oi dibaia neganai, ia henia harihari gaudia dainai ia do oi tanikiu henia.

Oi do ia durua sisiba namodia oi tahua

BAIBEL IA GWAU: “Kara maoromaoro bona kota maoromaoro bona kara momokani do oi lalopararalaia, vadaeni raka dala maorona do oi lalopararalaia.”—Aonega Herevadia 2:9.

HEREVA ENA ANINA: Dirava be emu Havaraia Tauna dainai, ia diba dahaka gaudia ese oi do ia hamoalea. Baibel ena hereva oi stadilaia karana amo, hari oi ia durua leseni idauidau do oi dibaia.

Emu henanadai edia haere oi abia

BAIBEL IA GWAU: “Dirava do oi diba.”—Aonega Herevadia 2:5.

HEREVA ENA ANINA: Havaraia Tauna ia noho oi dibaia karana ese oi do ia durua, mai anina bada henanadai edia haere oi diba totona, hegeregere: Mauri ena badina be dahaka? Dahaka dainai hisihisi be momo? Ita mase neganai dahaka ia vara? Baibel ai haere maorodia do oi davaria.

Vaira nega ena helaro oi abia

BAIBEL IA GWAU: “Iehova ia gwau: ‘Lau diba umui totona dahaka do lau karaia, lau ese umui dekenai maino do lau henia, bona dika do lau henia lasi, unai amo vaira nega ai noho namo do umui davaria.’”—Ieremia 29:11.

HEREVA ENA ANINA: Dirava ia gwauhamata vaira nega ai kara dikadia, hisihisi bona mase do ia haorea. Ena gwauhamata oi abidadama henia neganai, vaira nega ena helaro namodia ese oi do ia durua, mai gari lasi ida dina ta ta ena hekwakwanai oi haheaukalaia.

Haida ese Havaraia Tauna abidadama henia karana amo namo idia abia dalana

“Dirava ese mauri ai ita ia durua daladia idauidau lau itaia neganai lau hoa. Ita ia durua mai anina bada gaudia ita diba, ma haida ita kara namo henia bona Dirava ena turana ai ita lao totona.”—Cyndi, U.S.A.

“Havaraia Tauna lau abidadama henia dainai, egu mauri be mai anina bona lau moale. Badina Dirava, havaraia gaudia bona ena Hereva dekenai do lau dibaia gaudia be momo.”—Elise, France.

“Iseda Havaraia Tauna ese Baibel amo ita ia hadibaia gaudia lau badinaia neganai lau moale. Unai ese lau ia durua lau laloa maoromaoro, haida lau laloa, bona egu mauri lau moalelaia. Danu lau ia durua tama namona ai lau lao totona.”—Peter, Netherlands.

“Dirava lau do diba lasi neganai, egu mauri ai lau laloa gaudia be aniani, mahuta bona gaukara sibona. Mauri lau moalelaia lasi! To, hari lau diba mauri be harihari gauna namona. Ita moalelaia bona laloa bada be namo.”—Liz, Estonia.

“Lau be wari momo tauna. To kara dikadia, kara gageva, bona hisihisi be do idia ore karana lau dibaia neganai, unai ese lau ia durua lau haheauka totona.”—Adrien, France.