Stadi 6

Autlain Karaia Dalana

¹ Autlain ita karaia neganai, iseda hereva ena hereva badadia o point iboudiai be edia gabu korikoridia ai pepa dekenai ita torea, bena hereva ita henia neganai idia kamonai taudia ese ena anina do idia lalo-pararalaia.

² Lalohadai badadia abidia hidi. Namona be lalohadai badadia, emu hereva lalonai do oi gwauraia gaudia, be oi abidia hidi guna. Oi ura idia kamonai taudia ese dahaka lalohadai do idia laloatao oiemu hereva ena dokonai? Vadaeni, pepa ta dekenai unai oi torea. Unai be emu hereva kwarana o sinado namona.

³ Vadaeni, lalohadai eiava hereva badadia ta ta, unai hereva kwarana hamomokania herevadia unai, be oi abidia hidi. Unai murinai unai hereva ta ta be pepa maragidia ta ta dekenai oi torea, bena edia gabu korikoridia dekenai oi atodia, do oi gwauraia guna herevana amo ela bona hereva ginigabena. Bema lalohadai haida be hereva kwarana ida idia hegeregere lasi, oi kokidia.

⁴ Unai hereva badadia iboudiai be emu hereva ena kahana badana o body. Oi abidia hegaegae murinai, emu hereva hamatamaia herevana bona hadokoa herevana oi tahudia. Namona be idia kamonai taudia be hadokoa herevana amo oi durudia, idia kamonai herevadia do idia badinaia totona.

⁵ Autlain edia toana rua. Autlain edia toana ta be inai bamona: Pepa ena atai kahanai hereva kwarana oi torea. Ia henunai hereva badadia ta ta be pepa ena lauri kahana amo oi torea. Idia ta ta henunai, hamomokania herevadia ta ta be sisina lalona kahana amo oi torea, bena hereva badadia do idia hedinarai goevagoeva.

⁶ Autlain ma ta ena toana be inai bamona: Sentens oi toredia, idia ta ta lalonai emu lalohadai badadia ta ta oi toredia. Bema hereva ta do oi henia loulou, inai bamona autlain oi gaukaralaia be namo.

⁷ Hereva ta oi hegaegaelaia gwauraia neganai, unai autlain karaia dalana ta oi abia hidi diba. To hereva oi henia neganai, autlain kwadogina oi gaukaralaia be namo.

⁸ Hamatamaia herevana. Namona be emu hereva ena hamatamaia herevana o introduction amo oiemu hereva idia kamonai taudia edia lalona oi veridia, do idia ura kamonai totona.

⁹ Hereva idauidau amo emu hereva oi hamatamaia diba. Oi gwauraia diba gaudia haida be inai: hereva hegeregerena ta, Baibel ena siri ta, hekwakwanai ta, henanadai haida, emu hereva ena badina o point badadia.

¹⁰ Namona be hamatamaia herevana be emu hereva ida idia hegeregere. Hamatamaia herevana oi gwauraia neganai, oi hereva goevagoeva bona oi hereva goadagoada be namo.

¹¹ Hereva ena kahana badana (body). Hereva ena kahana badana gwauraia dalana ta be inai: Anina bada lasi herevadia oi gwauraidia guna, bena hereva ena anina oi habadaia ela bona dokonai emu hereva badana momokanina oi gwauraia. Ma dala ta be inai: Hereva badana ta oi gwauraia vaitani, bena unai murinai ma hereva badana ta oi gwauraia vaitani; unai bamona oi karaia ela bona hereva badadia iboudiai oi gwauraidia vadaeni.

¹² Eiava hekwakwanai ta oi gwauraia, bena hanaia dalana oi gwauraia hedinarai. Eiava idia vara gaudia edia sivarai oi herevalaia, eiava ia vara gauna ta ena namo bona ena dika oi herevalaia.

¹³ Hereva dokona (conclusion). Namona be hereva dokona lalonai emu hereva badadia iboudiai edia anina oi haboua, bena oi gwauraia neganai, idia kamonai taudia edia lalona oi veria, idia kamonai herevadia do idia badinaia totona. Hereva momo oi gwauraia lasi.

¹⁴ Emu hereva hadokoa daladia haida be inai: Hereva badadia oi gwauraidia lou; hereva ena anina kamonai taudia dekenai be oi gwauraia hedinarai, bona oi hamaorodia dahaka dahaka do idia karaia be namo, unai hereva do idia badinaia totona. Ruma ta ruma ta dekenai oi haroro neganai, unai dala amo emu hereva oi hadokoa be namo.

¹⁵ Eiava, oi ura emu hereva idia kamonai taudia ese do idia laloa bada herevana badana ta oi gwauraia, eiava hereva hegeregerena ta o Baibel ena siri ta, hamatamaia herevana lalonai oi gwauraia gauna unai, be oi gwauraia lou. Namona be emu hereva ena dokona ese idia kamonai taudia edia lalona ia veria, oi gwauraia Baibel siridia do idia badinaia totona.