Stadi 7
Hadibaia Dalana Namona Dibalaia
1 Ita Keristani taudia eda Hadibaia Taudia badadia be Iehova bona Iesu Keriso, bona edia hadibaia karadia tohotohoa dalana ita tahua. Hadibaia tauna namona ese ia hadibaia herevana ena anina ibounai bona ena badina ibounai ia gwauraia hedinarai. Vadaeni, namona be ita Keristani taudia ese iseda hadibaia dalana ita hanamoa.—Mat. 28:19, 20; 2 Tim. 4:2.
2 Taunimanima hadibadia negadia be momo. Tama sina ese edia natudia idia hadibadia. Baibel stadi taudia bona pablisa matamatadia haida ita hadibadia. Hesiai hebou ai eiava pablik tok ai, tadikaka ese edia haroro herevadia amo hebou taudia idia hadibadia. Namona be Haroro Sikuli lalonai hereva idia henia taudia ese idia hahedinaraia, edia haroro dalana idia hanamoa toho noho.
3 Iehova dekenai oi tabekau. Hadibaia tauna namona ai do oi lao totona, namona be Iehova dekenai oi tabekau, oi kamonai henia, bona ena heduru oi tahua. (Aon. 3:5, 6; Ioa. 7:16) Iesu ese taunimanima ia hadibadia neganai, Baibel ena hereva ia gwauraia hedinarai idia dekenai. Namona be iena kara oi tohotohoa. Namo lasi oi gwau, ‘Lau be hadibaia tauna lasi.’ Bema Iehova dekenai oi tabekau, hadibaia gaukarana do oi karaia diba.—2 Kor. 3:5.
4 Hegaegae. Bema oi ura hereva ta be tau ta do oi hadibaia, namona be unai hereva oi diba namonamo guna. (Roma 2:21) Emu diba ia bada ia lao neganai, hadibaia tauna namona ai do oi lao. Haroro Sikuli ese oi do ia durua, hadibaia tauna namona ai do oi lao totona.
5 Bema Baibel stadi ta oi karaia gwauraia, inai bamona oi kara guna: Stadi ena hereva badadia edia anina bona edia badina oi lalodia goevagoeva. Sibona emu hereva amo oi gwauraidia toho. Unai hereva idia hamomokania Baibel siridia edia anina oi dibaia namonamo. Oi laloa, stadi tauna be reana dahaka henanadai do ia gwauraidia, bena edia haere oi hegaegaelaidia.
6 Henanadai. Ta oi stadi henia neganai, henanadai momo oi henia, Iesu Keriso ia karaia bamona. (Luka 10:36) Buka ena henanadai oi gaukaralaidia, bona ma henanadai haida danu oi henia, sibona ena hereva amo do ia haere totona.
7 Henanadai haida ese stadi tauna idia durua, diba ma haida be ia abia vadaeni dibana dekenai do ia atoa kau totona. (Mat. 17:25, 26; 22:41-46) Namo lasi haere oi gwauraia, to namona be oi durua, ia sibona ese haere do ia laloa davari totona.
8 Eiava henanadai oi henia, iena lalohadai do oi dibaia totona. Ruma ta ruma ta dekenai oi haroro neganai, henanadai oi henia ruma tauna dekenai, iena lalohadai do oi dibaia totona. Sibona ena lalohadai ia gwauraia neganai, bema iena hereva oi kamonai, reana ena lalona do ia hegeregere oiemu hereva do ia kamonai.
9 Hereva oi henia neganai, idia kamonai taudia oi henanadai henidia, idia haerelaia totona eiava idia lalohadailaia totona.—Luka 12:49-51.
10 Hereva hegeregeredia. Iesu ese taunimanima ia hadibadia neganai, hereva hegeregeredia o parabole momo ia gwauraidia. Hari inai negai danu, Keristani hadibaia taudia ese idia gaukaralaidia be namo, taunimanima edia lalona hapararaia totona. (Mat. 13:34, 35) Oi gwauraia hereva hegeregeredia idia auka lasi be namo. Iakobo ese hereva hegeregeredia ia gwauraidia neganai, ia ese davara hurehure, lagatoi bona hosi taria gaudia, bona ma gau haida ia herevalaidia. Hereva hegeregerena ta oi gwauraia neganai, oi hereva henia taudia idia diba gauna oi gwauraia be namo.
11 Gwauraia loulou. Hereva o point badadia bona Baibel ena siri oi gwauraidia loulou, oi hadibaia tauna do ia lalo-pararalaidia totona. Danu, henanadai oi henia lou, Iesu ia karaia bamona.—Mat. 13:51.
12 Emu hereva amo oi hadibadia goevagoeva. Hadibaia tauna namona ese hebou taudia ia hereva henidia neganai, inai bamona ia kara: Ia hereva haragaharaga lasi; henanadai ia henidia; ia hamaorodia edia Baibel idia kehoa siri haida idia duahia totona; laulau ia gaukaralaidia. Bema oiemu hadibaia dalana be namo, idia kamonai taudia ese emu hereva ena kwarana bona ena badina badadia, bona oi gwauraia Baibel siridia haida danu, be do idia gwauraidia lou diba.
13 Hadibaia Taudia Badadia ruaosi herevalaidia. Oi be Keristani hadibaia tauna dainai, taunimanima oi hadibadia neganai, namona be oi durudia, Iehova Dirava bona Iesu Keriso idia lalodia bada totona, badina Iehova be mauri ena badina, bona Iesu amo Dirava ese mauri bona hahenamo abia dalana ia karaia.
14 Oi hadibaia tauna ese Iehova do ia lalokau henia be gau badana, unai dainai namona be Iehova ena kara idauidau oi hadibalaia. Ena aonega, hahemaoro maoromaoro, lalokau, bona siahu oi gwauraia hedinarai ia dekenai.