Saulo​—Israela Ena King Ginigunana

SAMUELA oi itaia, oela be inai tauna ena kwarana dekenai ia bubua noho. Idaunegai, bema idia ura hahedinaraia king ta idia abia hidi, unai bamona idia karaia. Iehova ese Samuela ia hamaoroa Saulo ena kwarana dekenai oela mai ena bonana namo herea ia bubua.

Saulo ia laloa ia hegeregere lasi king gaukarana ia karaia totona. Samuela ia hamaoroa: ‘Lau be Beniamina iduhu tauna. Israela lalonai unai be iduhu maragina. Dahaka dainai oi gwau lau be do lau king?’ Iehova ese Saulo ia ura henia badina sibona ia abia isi lasi. Unai dainai Ia abia hidi king ai ia lao totona.

To Saulo be ogogami tauna lasi eiava tau kwadogina lasi. Iena bese be kohu momo taudia bona ia be toana namona bona tau latana. Israela taudia ibounai amo ia be lata herea! Danu, Saulo be heau haraga bona goada tauna. Taunimanima idia moale badina Iehova ese Saulo ia abia hidi king ai do ia lao. Idia ibounai idia boiboi: ‘King do ia mauri daudau!’

Israela taudia edia inai taudia be idia goada momokani. Israela taudia dekenai hekwakwanai momo idia havaraia noho. Saulo ia king bena nega sisina murinai, Amono taudia be tuari totona idia mai. To Saulo ese tuari orea badana ta ia haboua, bona Amono taudia ia halusia. Unai neganai Israela taudia idia moale badina Saulo be king.

Lagani momo idia lao lalonai, Saulo ese Israela taudia ia hakaua dainai, edia inai taudia idia halusidia. Saulo ena natuna Ionatana danu be gari lasi tauna. Bona Ionatana ese Israela taudia ia durua tuari momo dekenai idia kwalimu totona. Pilistia taudia be do Israela taudia edia inai taudia. Dina ta Pilistia taudia tausen momo idia mai Israela taudia idia tuari henia totona.

Samuela ese Saulo ia hamaoroa do ia naria ela bona ia mai bona Iehova dekenai boubou gauna, eiava harihari gauna ta do ia henia. To Samuela ia mai haraga lasi. Saulo ia gari badina Pilistia taudia ese tuari idia hamatamaia garina, unai dainai ia sibona ese boubou gauna ia henia. Samuela ia mai neganai, Saulo ia hamaoroa ia kerere. Samuela ia gwau: ‘Iehova ese ma ta do ia abia hidi Israela ena king ai ia lao totona.’

Gabeai, Saulo ia kamonai lou lasi. Unai dainai Samuela ese ia hamaoroa: ‘Iehova kamonai henia karana ena namo ese mamoe namona henia karana ena namo ia hanaia. Badina Iehova oi kamonai henia lasi, Iehova ese oi do ia dogoatao lasi Israela edia king bamona.’

Unai sivarai amo gau namona ta ita dibaia. Ia hahedinaraia nega ibounai Iehova ita kamonai henia be namo. Danu ia hahedinaraia, ena be tau ta ena kara be guna ia namo, Saulo bamona, to gabeai ena kara ia idau bona ia dika diba. Ita ura lasi iseda kara ia dika, ani?