Davida Bona Goliata

PILISTIA taudia idia giroa lou Israela taudia idia tuari henia totona. Davida ena kakadia toi be Saulo ena tuari oreana lalonai. Unai dainai dina ta Iese ese Davida ia hamaoroa: ‘Emu kakadia dekenai uiti bona paraoa haida oi abia lao. Oi itaia idia be edena bamona.’

Davida be tuari taudia edia kamepa dekenai ia ginidae neganai, tuari gabuna dekenai ia heau lao ena kakadia ia tahudia totona. Unai neganai Pilistia tau bada hereana, Goliata, ia mai Israela taudia ia kirikirilaia totona. Dina 40 bamona lalonai hanuaboi bona dina unai bamona ia karaia. Ia boiboi bada: ‘Emui tau ta umui abia hidi lau ia heai henia totona. Bema ia kwalimu bona lau ia hamasea, ai be emui hesiai taudia ai do ai lao. To bema lau kwalimu bona ia lau hamasea, umui be emai hesiai taudia ai do umui lao. Ta umui abia hidi.’

Davida ese tuari taudia haida ia nanadaia: ‘Pilistia tauna ia hamasea bona Israela ena hemarai ia kokia tauna be dahaka do ia abia?’

Tuari tauna ia gwau: ‘Saulo be unai tau dekenai kohu momo do ia henia, bona unai tau ese ena natuna kekeni do ia adavaia.’

To Israela taudia ibounai be Goliata dekenai idia gari badina ia be tau bada herea. Ena lata be mita toi ia hanaia, bona tuari tauna ta ese ena kesi ia huaia.

Tuari taudia haida ese Saulo idia hamaoroa Davida ia ura Goliata danu ia heatu. To Saulo ese Davida ia hamaoroa: ‘Oi be hegeregere lasi inai Pilistia tauna oi heatu henia. Oi be mero sibona, to ia be tuari dekenai ia manada tauna.’ Davida ia haere: ‘Egu tamana ena mamoe idia abia lao laiona bona bea lau alaia. Bona inai Pilistia tauna danu be do lau alaia. Iehova ese lau do ia durua.’ Unai dainai Saulo ia gwau: ‘Oi lao, bona Iehova be oi danu do ia noho.’

Davida be sinavai ta amo nadi 5 ia abia, bona ena baege lalonai ia udaia. Bena ena vilipopo ia abia bona tau badana dekenai ia lao. Goliata ese ia itaia neganai ia hoa bada. Ia laloa Davida ia hamasea haraga diba.

Goliata ia gwau: ‘Lau dekenai oi mai bona emu tauanina be manu bona animal dekenai do lau henia idia ania totona.’ To Davida ia gwau: ‘Oi be mai emu tuari kaia bona io danu oi mai, to lau be Iehova ena ladana dekenai lau mai. Hari dina Iehova ese oi be lau dekenai do ia henia bona oi do lau alaia mase.’

Bena Davida be Goliata dekenai ia heau lao. Nadi ta be ena baege amo ia kokia, ena vilipopo lalonai ia atoa, bena mai goada danu ia negea. Nadi be maoromaoro Goliata ena kwarana lalonai ia vareai bena ia moru bona ia mase! Pilistia taudia idia itaia edia tau goadana ia mase neganai, idia ibounai idia heau. Israela taudia ese idia luludia bona tuari dekenai idia kwalimu.