Davida Ia Heau Ena Badina

DAVIDA ese Goliata ia alaia murinai, Israela ena tuari biaguna Abinere ese Saulo dekenai Davida ia hakaua mai. Saulo be Davida dekenai ia moale. Ena tuari biaguna ta ai ia halaoa bona king ena ruma ai ia noho.

Gabeai, Pilistia taudia dekenai idia tuari taudia idia giroa neganai, hahine ese ane ta idia abia: ‘Saulo ese 1,000, ia alaia, to Davida ese 10,000, ia alaia vadaeni.’ Saulo ia mama badina Davida idia hanamoa bada, to ia idia hanamoa maragi. To Saulo ena natuna Ionatana be ia mama lasi. Ia ese Davida ia lalokau henia bada, bona Davida ese Ionatana ia lalokau henia danu. Unai dainai ta ta dekenai idia gwauhamata idia be tura korikoridia ai do idia lao.

Davida be gita botaia diba momo tauna, bona Saulo be ia gadaralaia miusiki ia ura henia bada. To dina ta, Saulo ena mama dainai, kara dika hereana ta ia karaia. Davida be gita ia gadaralaia noho lalonai, Saulo ese ena io ia abia bona ia negea, ia gwau: ‘Lau ese Davida be haba dekenai do lau gwadaia mase!’ To Davida ia siri haraga bona io ese ia reaia. Gabeai Saulo ese ena io amo Davida ia reaia lou. Unai dainai, hari Davida ia diba ia naria namonamo be namo.

Saulo ena gwauhamata oi laloatao, a? Ia gwau Goliata ia alaia tauna dekenai ena natuna kekeni do ia henia ia adavaia totona. Saulo ese Davida ia hamaoroa ena natuna kekeni Mikala do ia abia, to Pilistia taudia 100 do ia alaia guna. Mani unai oi laloa! Saulo ena ura be Pilistia taudia ese Davida do idia alaia mase. To idia alaia lasi dainai, Saulo ese ena natuna kekeni be Davida dekenai ia henia.

Dina ta Saulo ese Ionatana bona ena hesiai taudia ibounai ia hamaoroa ia ura Davida ia alaia. To Ionatana be ena tamana dekenai ia gwau: ‘Davida oi hadikaia lasi. Ia ese oi dekenai gau dikana ta ia karaia lasi. Ena kara ibounai be oi hanamoa totona ia karaia. Goliata ia alaia neganai, ena mauri ia laloa lasi, bona unai negai oi moale danu.’

Saulo ese ena natuna ia kamonai henia, bona ia gwauhamata Davida do ia hadikaia lasi. Davida ia giroa lou bona Saulo ena ruma dekenai ena hesiai gaukara ia karaia, guna bamona. To dina ta, Davida be gita ia gadaralaia noho lalonai, Saulo ese ena io be Davida dekenai ia negea lou. Davida ia siri haraga bona io be haba ia gwadaia. Unai be nega ihatoina! Davida ia diba ia heau be namo!

Unai hanuaboi ai Davida be ena ruma dekenai ia giroa. To Saulo ese tatau haida ia siaia Davida idia alaia totona. Mikala be ena tamana ena lalohadai ia diba. Unai dainai ena tau ia hamaoroa: ‘Bema hari hanuaboi oi heau lasi, kerukeru do oi mase.’ Unai hanuaboi ai Mikala ese Davida ia durua uindo amo ia heau totona. Lagani 7 Davida be gabu idauidau dekenai ia komu Saulo ese ia davaria garina.