Karoa 14
Baibel bona Oi
Hari inai negai haida ese dala idauidau amo Baibel idia gorea. To Iesu ia gwau: “Oi [Dirava] emu hereva be hereva momokani.” (Ioane 17:17) Ita diba vadaeni gaudia ese Iesu ena hereva idia hamomokania. Idia hahedinaraia Baibel ena sivarai be sivarai momokanidia. Danu, ena hereva idia hamomokani heheni dalana, ena peroveta herevadia momokanidia, ena aonega bada, bona ena siahu namona taunimanima edia mauri lalodiai, ese idia hahedinaraia Baibel be Dirava ena Hereva. Momokani, “Buka Helaga ena hereva ibounai be Dirava ena Lauma ese ia havaraia.”—2 Timoteo 3:16.
1. (Hamatamaia herevana danu) (a) Ita davaria gaudia ese Baibel edena bamona idia hamomokania? (b) Baibel be Dirava ena Hereva dainai, dahaka ita diba momokani?
BAIBEL be Dirava ena hereva, taunimanima edia lasi. Unai ena anina badana be inai: Dirava ese momokani taunimanima ia hereva henidia vadaeni, iseda henanadai momo ia haerelaia vadaeni, bona iseda lalo-hekwarahi gaudia momo kokia dalana ia hahedinaraia vadaeni. Nega vairai helarona Baibel lalonai idia gwauraia be helaro korikorina. Dirava ena Basileia be momokani ia lohia noho, bona kara kereredia, taunimanima hahisidia karadia bona hisihisi iboudiai be tanobada amo do ia kokia.
2. Oi diba Baibel be Dirava ena Hereva, unai dainai dahaka do oi karaia be namo?
2 Vadaeni, unai oi diba dainai, dahaka do oi karaia? Oi diba Baibel be Dirava ena Hereva, unai dainai oi tahua namonamo be namo. Salamo torea tauna ta ia gwau unai bamona idia karaia taudia do idia moale; ia gwau: “Inai tau ia moale: ia be kara dika taudia edia sisiba ai ia raka lasi, . . . Iehova ena taravatu ia ese ia moalelaia, bona ena taravatu ia duahia dina ai bona hanuaboi ai.”—Salamo 1:1, 2.
Heduru Oi Abia Dae
3, 4. (a) Baibel ese ia hahedinaraia hegeregerena, iena hereva ta ena anina bema ita lalo-pararalaia lasi neganai, dahaka ita karaia be namo? (b) Daidia idia ura taunimanima idia durudia, Baibel ena anina idia diba namonamo totona?
3 Baibel lalonai do oi duahia herevadia haida edia anina do oi diba lasi reana. (2 Petero 3:16) Sivarai ta Baibel lalonai ese ia hahedinaraia unai oi hoalaia lasi be namo. Nega daudau lasi Iesu ia mase murinai, Etiopia tauna ta ese Baibel bukana Isaia ena peroveta herevadia ia duahia noho neganai, Keristen haroro tauna Filipo ese ia hedavari henia bona ia nanadaia, ia gwau: “Oi diba dahaka oi duahia, a?” Etiopia tauna be unai ia diba lasi, unai dainai Filipo ia noia do ia durua.—Kara 8:30, 31.
4 Hahine ta United States dekenai be unai bamona. Ena be Baibel ia duahia loulou, to ena hahediba herevadia badadia momo be unai dala amo ia lalo-pararalaia lasi. To ia be Iehova ena Witness taudia ida idia herevahereva hebou neganai, Dirava ena Basileia ena anina bada bona Basileia ese taunimanima do ia hanamodia daladia momo ia dibaia. Bema oi ese Iehova ena Witness taudia oi boiridia, oi do idia durua mai edia moale ida, Baibel lalonai oi duahia herevadia edia anina do oi diba goevagoeva totona.
Baibel ena Sisiba Oi Badinaia
5. Baibel ia gwau dahaka do ita karaia be namo, moale do ita davaria totona?
5 Baibel ese ita ia hagoadaia, do ita duahia totona sibona lasi, to ena hereva do ita badinaia totona danu. (Salamo 119:2) Ma ia gwau: “Umui mamia toho, bena do umui diba, Iehova be namo; ia ia abidadama henia tauna be ia moale.” (Salamo 34:8) Baibel ese ita ia boiria, Iehova do ita tohoa totona. Dirava ena hahegani oi badinadia toho. Unai amo do oi hahedinaraia ia oi abidadama henia bona oi laloa oiemu namo habadaia daladia be ia diba. Unai neganai sibona do oi diba, dala maorona be unai. Dirava be unai bamona idia abidadama henia taudia be idia moale momokani.
6. Hari inai negai Baibel ena hereva ita badinaia be hegeregere, a? Mani oi gwauraia.
6 Ena be haida idia gwau ta ese Baibel ena hereva ia badinaia diba lasi badina be tanobada be kara dika amo ia honu, to momo ese idia badinaia. Daidia ese? Tauhau ta Africa dekenai ese unai bamona taudia haida ia davaridia. Ia gwau: “Hanaia lagani lalodiai, lau itaia, iniseniai, Zimbabwe dekenai, umui Iehova ena Witness taudia ese Keriso ena kara umui tohotohoa momokani . . . Umui sibona ese egu lalona umui ania dainai, Dirava ena lalokau bona Iena sivarai namona ena siahu lau abia dae. Unai be emui hereva bona emui buka amo sibona lasi, to emui mauri dalana amo danu. Taunimanima momo ese sivarai namona idia harorolaia to idia badinaia lasi, to umui ese sivarai namona umui badinaia bona umui harorolaia danu.”
Ena Siahu Oi Abia Dae
7. Dahaka kara be Baibel ese ia taravatua, to hari inai negai taunimanima momo ese idia karaia?
7 Aposetolo Paulo ia gwau Baibel be “mai ena siahu, hereva momokani ita dekenai do ia hadibaia . . . iseda kara dika do ia hedinaraia, iseda kerere do ia hamaoromaoroa.” (2 Timoteo 3:16) To taunimanima momo ese Baibel ena hereva idia abia dae lasi. Ena be Baibel ia gwau tatau ese tatau idia sihari henidia be taravatu, to taunimanima momo idia laloa unai kara be kerere lasi. (Roma 1:24-27; 1 Korinto 6:9-11; 1 Timoteo 1:9-11) Ena be Baibel ia gwau beibi be ena sinana ena bogana lalonai hamasea be taravatu badina be ena mauri be mai anina bada, to lagani ta ta iboudiai beibi 50 milion bamona idia hamasedia. (Esodo 21:22, 23; Salamo 36:9; 139:14-16; Ieremia 1:5) Bema ita davaria Baibel ena taravatu unai bamodia ita badinaia be auka, dakaha do ita karaia be namo?
8, 9. Bema Baibel ena hereva ta ita abia dae be auka, dahaka ita laloa be namo, bona daika ena hahegani be nega iboudiai ita abia dae be namo?
8 Keristen taudia idia diba vadaeni, nega iboudiai Dirava ena Hereva idia badinaia be namo, badina be Baibel ena hereva badinaia karana ese iboudiai edia namo ia havaraia. (Hereva Lada-isidia 2:1-11) Taunimanima edia aonega be hegeregere lasi. Nega momo, edia kara ese do ia havaraia gaudia be idia diba guna lasi. Peroveta tauna Ieremia ia gwau: “Iehova e, lau diba taunimanima ena dala be ia sibona lalonai lasi, bona taunimanima ena raka be ia sibona ese ia gwauraia hidi diba lasi.”—Ieremia 10:23.
9 Iseda gabu dekenai idia vara gaudia bema ita itaia, ita diba unai hereva be momokani. Tanobada dekenai kerere momo idia vara, badina be taunimanima ese Dirava ena Hereva idia badinaia lasi dainai. Matamana negana amo ema bona hari, taunimanima edia kerere sivaraidia ese idia hahedinaraia idia be hegeregere lasi namo bona dika do idia gwauraia hidi. Dirava ena aonega ese iseda aonega ia hanaia momokani. Iena hereva ita abia dae bona sibona eda aonega dekenai ita tabekau lasi be namo, ani?—Hereva Lada-isidia 28:26; Ieremia 17:9.
Ita Ibounai Ita Goevadae Lasi
10, 11. (a) Ita be edena bamona bona tanobada be edena bamona, unai dainai Baibel ena hereva ita badinaia be auka? (b) Baibel ese ita ia hagoadaia edena bamona taudia ita bamodia totona, bona edeseniai ita davaridia diba?
10 Baibel ese ita ia hadibaia, dala ma ta amo heduru ita abia be namo. Ita ibounai be mai eda ura dika, iseda tamadia sinadia edia amo ita abia. “Taunimanima . . . idia maragi negana amo edia lalohadai be dika.” (Genese 8:21; Roma 7:21) Tanobada taudia, edia bogaragidiai ita noho, ese ita idia hakererea danu, badina be Baibel ena taravatu idia badinaia lasi dainai. Unai dainai namona be heduru ita abia, Baibel ena anina ita lalo-pararalaia totona sibona lasi, to ita dibaia gaudia ita badinaia totona danu. Unai dainai Baibel ese ita ia sisiba henia, idia ura Dirava ena ura do idia badinaia taudia do ita bamodia be namo. Salamo torea tauna ta ia gwau: “Kara dika taudia edia hebou be lau inai henia, bona kara kerere taudia ida lau helai hebou lasi. . . . Hebou badana lalonai Iehova do lau hanamoa.” Bona ma ta ia gwau: “Tadikaka idia noho hebou mai edia lalo-tamona ida, unai be namo, bona mai ena moale danu.”—Salamo 26:5, 12; 133:1.
11 Hebou karana be Iehova ena Witness taudia edia tomadiho karana badana ta. Pura iboudiai idia hebou loulou, bona nega ta ta hebouhebou badadia idia karaia. Unai hebou dekenai Baibel idia stadilaia bona ena hahegani badinaia daladia idia herevalaia hebou. Tanobada ibounai lalonai idia mai edia tadikaka ida be orea ta, bona edia orea lalonai idia hagoadaia heheni bona idia durua heheni, unai hahegani namo hereadia do idia badinaia totona. (1 Petero 2:17) Vadaeni, edia hebou ta dekenai oi lao bona oi do idia durua diba dalana oi dibaia be namo, ani?—Heberu 10:24, 25.
Dirava ena Hereva Badinaia
12. Ita diba Baibel be Dirava ena Hereva, unai dainai dahaka hahenamo ita abia?
12 Ita diba Baibel be Dirava ena Hereva neganai, unai diba ese hahenamo ia mailaidia, bona maduna haida danu. Unai hahenamo haida be inai: Dina ta ta iboudiai Baibel ese ita ia hakaua iseda kara iboudiai lalodiai, bona Dirava ena lalokau ita diba, unai lalokau dainai ia sibona ena Natuna ia henia iseda mauri davana, mauri hanaihanai helarona do ita abia totona. (Ioane 3:16) Ita diba King Iesu ia lohia noho bona nega daudau lasi murinai kara dika tanobada amo do ia kokia. Bona, Dirava sibona ese ia gwauhamatalaia gaudia, “guba matamata bona tanobada matamata,” ita naria noho.—2 Petero 3:13.
13. Baibel ita abia dae Dirava ena Hereva neganai, dahaka maduna ita abia?
13 To ita be mai eda maduna danu. Iseda maduna be inai: Baibel do ita stadilaia bona ena hereva do ita abia dae bona do ita badinaia. Dirava ia gwau: “Natugu e, egu taravatu oi laloaboio lasi, bona emu lalona ese egu hahegani do ia badinadia.” (Hereva Lada-isidia 3:1) Ena be momo idia laloa Baibel be taunimanima edia hereva sibona, to namona be ita laloa “taunimanima ibounai be idia koikoi noho, to Dirava tamona be nega ibounai ia hereva momokani.” (Roma 3:4) Dirava ena aonega ese oi do ia hakaua be namo. “Iehova oi abidadama henia mai emu lalona ibounai ida . . . Emu dala iboudiai lalodiai ia oi laloa.” (Hereva Lada-isidia 3:5, 6) Bema Dirava ena Hereva be unai bamona oi badinaia mai emu aonega ida, unai ese oi do ia hanamoa, hari inai nega amo ela bona hanaihanai.
[Blurb on page 187]
Namona be Baibel ita duahia bona ita badinaia danu
[Blurb on page 188]
Baibel badinaia karana ese namo ia havaraia nega iboudiai