Ta be Oi Ia Tura Henia Noho Totona, Namona be Ia Oi Tura Henia

Hetura karana be lalokau dainai ia vara. Iehova dekenai emu diba oi habadaia neganai, emu lalokau ia dekenai do ia bada ia lao. Emu lalokau Dirava dekenai ia bada ia lao neganai, ia hesiai henia totona emu ura do ia bada ia lao danu. Unai ese oi do ia hasiahua Iesu Keriso ena hahediba tauna ta ai do oi lao. (Mataio 28:19) Iehova ena Witnes taudia edia moale ruma besena oi bamoa neganai, Dirava ena hetura karana oi moalelaia hanaihanai diba. Dahaka do oi karaia be namo?

Namona be emu lalokau Dirava dekenai oi hahedinaraia totona ena taravatu oi badinaia. “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”​​—1 Ioane 5:3.

Oi dibaia gaudia oi badinaia. Iesu ese sivarai ta ia gwauraia unai ia haheitalaia totona. Aonega tauna ese ena ruma be nadi latanai ia haginia. Kavakava tauna ese ena ruma be miri latanai ia haginia. Lai badana ia mai neganai, nadi latanai ia gini rumana be ia moru lasi, to miri latanai ia gini rumana be ia moru. Iesu ia gwau ena hahediba herevadia idia kamonai bona idia badinaia taudia be nadi latanai ena ruma ia haginia aonega tauna bamona. To iena hahediba herevadia idia kamonai bona idia badinaia lasi taudia be miri latanai ena ruma ia haginia kavakava tauna bamona. Oi ura oi be edena tau bamona?​—Mataio 7:​24-​27.

Gwauhamata. Unai ena anina be guriguri amo Iehova dekenai oi lao bona oi hamaoroa oi ura ena ura do oi karaia ela bona hanaihanai. Dirava ena ura oi karaia ese ia hahedinaraia oi be Iesu Keriso ena hahediba tauna ta.​​—Mataio 11:29.

Bapatiso. “Bapatiso oi abia [bona] oiemu kara dika ia huria totona, iena ladana dekenai oi boiboi.”​​—Kara 22:16.

Dirava ena hesiai gaukara lalonai vareai momokani. “Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona.”​​—Kolose 3:​23.