“Hedibagani Dekenai Do Umui Vareai Garina”
“Do umui gima noho bona guriguri loulou, hedibagani dekenai do umui vareai garina.”—MATAIO 26:41, NW.
IESU KERISO, Dirava ena Natuna, ia lalo-hekwarahi bada—nega ginigunana unai bamona hemami ia abia. Iena tanobada maurina ena dokona ia kahirakahira noho. Iesu ia diba kahirakahira ia do idia dogoatao, hamasea bona au ta ai do idia hasatauroa. Ia diba ia abia hidi gaudia ibounai bona ena kara ese ena Tamana ena ladana do ia hanamoa eiava hadikaia. Danu, Iesu ia diba do ia karaia gaudia dainai vaira neganai taunimanima be mauri do idia abia eiava lasi. Unai ibounai ia lalo-hekwarahilaia dainai, dahaka ia karaia?
2 Iesu be ena hahediba taudia ida Getesemane umana dekenai idia lao. Iesu be unai gabu dekenai ia lao momo. Unuseniai, iena hahediba taudia ia rakatania, gabu daudauna ta ia raka lao. Ia sibona ia noho neganai, ena guba Tamana amo goada ia noia, ia laloa gaudia be guriguri ai—nega tamona lasi to nega toi—ia gwauraia. Ena be Iesu ia goevadae, to ia laloa ia lalo-hekwarahilaia gaudia be ia sibona ese ia hanamoa diba lasi.—Mataio 26:36-44.
3 Hari, ita danu ita lalo-hekwarahi. Inai buklet ai ita herevalaia vadaeni gaudia ese idia hamomokania, ita be inai nega dikana ena dokona negana ai ita noho. Satani ena tanobada ena hedibagani bona lalo-hekwarahi gaudia be idia bada idia lao noho. Ita be Dirava momokanina ena hesiai taudia dainai, ita abia hidi gaudia bona eda kara amo do ita hahedinaraia Dirava ena ladana ita hanamoa eiava hadikaia bona Iena tanobada matamatana ai mauri hanaihanai helarona do ita abia eiava lasi. Iehova ita lalokau henia. Ita ura iseda “lalona do ia goada noho ela bona dokona”—eda mauri dokona eiava inai tanobada ena dokona, herevana edena be guna. (Mataio 24:13) To edena dala ai iseda karaharaga lalohadaina ita dogoatao bona ita gima noho diba?
4 Iesu ia diba ena hahediba taudia—guna bona hari—danu do idia lalo-hekwarahi dainai idia ia hagoadaia: “Do umui gima noho bona guriguri loulou, hedibagani dekenai do umui vareai garina.” (Mataio 26:41, NW ) Hari, unai hereva ena anina ita dekenai be dahaka? Dahaka hedibagani oi davaria? Bona edena bamona oi “gima noho” diba?
Dahaka Dainai Satani ese Ita Ia Dibagania?
5 Dina ta ta ai ita ibounai be hedibagani ita davaria, “Satani ena koikoi dekena amo” ita moru totona. (2 Timoteo 2:26) Baibel ese ita ia hadibaia, Satani ia ura bada Iehova idia tomadiho henia taudia ia koia. (1 Petero 5:8; Apokalupo 12:12, 17) Dahaka totona? Ita ia alaia totona lasi. Satani do ia kwalimu lasi bema Dirava ita abidadama henia ela bona ita mase. Satani ia diba Iehova ese, Iena nega korikorina ai, toreisi lou karana amo mase do ia haorea.—Luka 20:37, 38.
6 Satani ia ura hari ita abia maurina ia hereaia dava bada gauna do ia hadikaia—Dirava badinaia karana. Satani ia ura ia hamomokania, ia ese Iehova amo ita ia hakaua siri diba. Unai dainai, bema Satani ese ita ia veria oho diba bena ita gwau-edeede—sivarai namona harorolaia gaukara ita hadokoa eiava Keristani taravatudia ita negea—Satani ia kwalimu unai! (Efeso 6:11-13) Unai dainai, “Satani” ese hedibagani idauidau amo ita ia tohoa.—Mataio 4:3.
7 “Satani ena koikoi karadia” be idauidau. (Efeso 6:11) Ia ese kohu momo tahua karana, gari, daradara eiava moale karadia tahua karana amo ita ia dibagania. To ia gaukaralaia dala badana ta be lalo-manoka. Satani ena koikoi daladia be momo dainai, ia diba edena bamona ita ia hamanokaia diba bena ita moru. (Aonega Herevadia 24:10) Unai dainai eda lalona ia “manoka” neganai, Satani ese ita ia tohoa Dirava badinaia karana ita rakatania totona.—Salamo 38:8.
8 Nega dokona ia kahirakahira lalonai, toana be lalo-manoka ia havaraia gaudia idia bada idia lao bona ita idia hadikaia diba danu. (“Lalo-Manoka Idia Havaraia Gaudia Haida” mauana itaia.) Herevana ena badina be dahaka, to lalo-manoka ese eda goada ia haorea diba. Lauma dalanai emu maduna idauidau—Baibel oi stadilaia, Keristani heboudia oi lao henia bona haroro gaukara oi karaia—totona ‘nega namona oi hoia’ be do ia auka diba bema tauanina, lalona bona hemami dalanai oi hesiku. (Efeso 5:15, 16; NW ) Laloaboio lasi, Satani ia ura oi ia koia. To hari be ita hesiku eiava ita noholaia negana dekenai karaharaga lalohadaina ita haboioa negana lasi! (Luka 21:34-36) Edena dala ai hedibagani oi hanaia bona oi gima noho diba? Inai heduru herevadia foa mani oi laloa.
“Guriguri Loulou”
9 Iehova oi guriguri henia. Iesu ena haheitalai Getesemane umana dekenai mani oi laloa lou. Ia lalo-hekwarahi bada neganai, dahaka ia karaia? Iehova amo heduru ia noia, ia guriguri goadagoada dainai “iena kopina ia siahu ranuna be rara bamona ia moru tano dekenai.” (Luka 22:44) Mani oi laloa. Iesu be Satani ena kara ia diba momo. Satani ese Dirava ena hesiai taudia dekenai hedibagani idauidau ia gaukaralaia neganai, Iesu be guba amo unai ibounai ia itaia. To, Iesu ia gwau lasi Satani ena hedibagani idauidau do ia koua haraga diba. Bema Dirava ena Natuna goevadaena ia laloa Dirava ena heduru bona goada ia noia be gau badana, unai bamona ita karaia danu be namo!—1 Petero 2:21.
10 Laloaboio lasi, Iesu ese ena hahediba taudia idia “guriguri loulou” totona ia hagoadadia murinai, ia gwau: ‘Lauma be ia ura, to tauanina be ia manoka vadaeni.’ (Mataio 26:41) Iesu be daika ena tauanina ia gwauraia? Ia sibona ena tauanina ia gwauraia lasi, badina gau ta ia manoka lasi Iesu ena goevadae tauanina dekenai. (1 Petero 2:22) To iena hahediba taudia be idau. Idia be goevadae lasi bona kara dika taudia dainai, hedibagani hanaia totona heduru idia abia be namo. (Roma 7:21-24) Unai dainai, Iesu ese idia—bona edia murinai do idia noho Keristani taudia momokanidia ibounai—ia hadibaia hedibagani idia davaria neganai, guriguri amo heduru idia noia be namo. (Mataio 6:13) Iehova ese unai bamona guriguri ia haerelaidia. (Salamo 65:2) Edena dala ai? Dala rua amo.
11 Ginigunana be, Iehova ese ita ia durua hedibagani ita itaia totona. Satani ena hedibagani be dibura gabuna ai ia atoa tarapudia bamona. Bema oi itadia lasi, reana unai ese oi ia tarapua diba. Iehova be Baibel bona Baibel idia herevalaia bukadia amo diari ia halasia bena Satani ena tarapu idia hedinarai, unai ese ita ia durua hedibagani lalonai ita moru lasi totona. Idia hanaia laganidia lalonai, idia printaia bukadia bona hebouhebou badadia bona maragidia edia program ese ita idia hadibaia loulou taunimanima gari henia karana, sihari kava karana, kohu momo tahua karana bona Satani ena hedibagani gaudia ma haida dainai ita gima totona. (Aonega Herevadia 29:25; 1 Korinto 10:8-11; 1 Timoteo 6:9, 10) Iehova ese Satani ena koikoi daladia be ita dekenai ia hadibaia dainai oi moale, a? (2 Korinto 2:11) Hedibagani oi hanaia totona heduru oi noia neganai, Iehova be unai bamona hadibaia herevadia ibounai amo emu guriguri do ia haerelaia.
12 Iharuana be, Iehova ese eda guriguri ia haerelaia dalana be ita dekenai goada ia henia hedibagani ita haheaukalaia totona. Iena Hereva ia gwau: “Dirava . . . ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa.” (1 Korinto 10:13) Dirava ese hedibagani ta do ia rakatania lasi ela bona ia bada bena lauma dalanai eda goada be hegeregere lasi do ita hanaia totona—bema Ia dekenai ita tabekau noho. Edena dala ai iseda “dala ta do ia kehoa”? Ia ese “Lauma Helaga be idia noinoi taudia dekenai do ia henidia.” (Luka 11:13) Unai ese ita do ia durua Baibel ena hakaua herevadia ita laloatao totona, bena unai hereva ese ita ia durua diba kara bona abia hidi maorodia ita karaia totona. (Ioane 14:26; Iamesi 1:5, 6) Unai lauma helaga ese ita ia durua diba kara namodia ita hahedinaraia bona kara dika urana ita halusia totona. (Galatia 5:22, 23) Dirava ena lauma helaga ese tadikaka edia lalona ia veria, ita idia “durua bada herea” totona. (Kolose 4:11) Iehova amo heduru oi noia bena ia ese unai lalokau dalana amo oi ia haere henia dainai, ia oi tanikiu henia, a?
Tahua Gaudia Maorodia Oi Goadalaia
13 Ita gima noho totona, tahua gaudia maorodia ita goadalaia be namo. Hekwakwanai idauidau dainai, nega haida ita hesiku. To, namona be ita laloatao, Dirava ia gwauhamata lasi inai nega dikana lalonai hekwakwanai ta do ita davaria lasi. Baibel negadia ai, Dirava ena hesiai taudia danu be hisihisi, dagedage, ogogami, daradoko bona gorere idia davaria.—Kara 8:1; 2 Korinto 8:1, 2; 1 Tesalonika 5:14; 1 Timoteo 5:23.
14 Hari inai negai, ita danu be hekwakwanai ita davaria. Reana dagedage, moni ena hekwakwanai, daradoko, gorere bona hisihisi idauidau ita mamia. Bema hoa dalanai Iehova ese dika idauidau dekena amo ita ia gimaia, Satani ese Iehova do ia habadua dalana ta be lasi, ani? (Aonega Herevadia 27:11) Iehova ese dala ia kehoa dainai iena hesiai taudia be dagedage bona hahetoho idia davaria, bona nega haida edia inai taudia ese idia hamasedia.—Ioane 16:2.
15 Vadaeni, Iehova ia gwauhamata dahaka do ia karaia? Ita itaia vadaeni, Iehova ia gwauhamata ia ese ita do ia durua ita davaria hedibagani idauidau ita dadaraia totona, bema ia ita abidadama henia momokani. (Aonega Herevadia 3:5, 6) Iena Hereva, lauma helaga bona orea amo ita be lauma dalanai ia gimaia, ita ia durua eda hetura karana Ia ida ita gimaia totona. Unai hetura karana ia goada noho dainai, ena be ita mase to do ita kwalimu. Dirava ese ena kamonai hesiai taudia dekenai davana namona do ia henia be gau ta—mase danu—ese do ia koua diba lasi. (Heberu 11:6) Bona kahirakahira do ia vara tanobada matamatana ai, Iehova ese ia gwauhamatalaia hahenamo namodia ibounai be Ia idia lalokau henia taudia totona do ia hagugurua.—Salamo 145:16.
Hepapahuahu Badana Ita Laloatao
16 Ita haheauka ela bona dokona totona, hepapahuahu badadia idia vara dainai Dirava ese dika ia koua lasi karana ita laloatao be namo. Bema nega haida ita itaia iseda hekwakwanai idia bada herea bona ita ia tohoa ita manoka totona, Satani ese Iehova ena lohia siahuna maorona ia hepapahuahulaia karana ita laloatao be namo. Satani ese Dirava idia tomadiho henia taudia edia abidadama bona kara maoromaoro ia henanadailaia danu. (Iobu 1:8-11; 2:3, 4) Unai hepapahuahu herevadia bona Iehova ese ia hamaoromaorodia totona ia abia hidi dalana ese eda mauri ia hereaia. Edena dala ai?
17 Inai nega kwadogina ai Dirava ese hisihisi ia do koua lasi dainai, nega ia noho ma haida ese hereva momokani idia abia dae totona. Mani oi laloa: Iesu be hisihisi ia ania, unai amo ita ese mauri ita abia diba. (Ioane 3:16) Unai ita moalelaia bada, a? To inai nega kwadogina ai hisihisi ita haheaukalaia, badina ita ura ma haida ese mauri do idia abia, a? Ita haheauka ela bona dokona totona, namona be ita lalo-parara Iehova ena aonega ese eda aonega ia hanaia. (Isaia 55:9) Ia ese nega korikorina ai hepapahuahu badana do ia hamaoromaoroa momokani bona ita ese namo do ita abia ela bona hanaihanai, badina unai neganai ia ese gwau-edeede karana do ia hadokoa. Momokani, dala namona ma ta be lasi, ani? Dirava ena kara be maoromaoro!—Roma 9:14-24.
‘Dirava Dekenai Do Ita Raka Kahirakahira Lao’
18 Eda karaharaga lalohadaina ita dogoatao noho totona, Iehova kahirakahira ita noho be namo. Ita laloatao, Satani be mai ena goada ibounai ida ia hekwarahi noho eda hetura karana Iehova ida ia hadikaia totona. Satani ia ura ita abia dae, nega dokona be do ia mai lasi bona sivarai namona ita harorolaia eiava Baibel ena taravatu ita badinaia be anina lasi. To “ia be koikoi tauna, bona ia be koikoi ibounai edia tamana.” (Ioane 8:44) Namona be iseda lalona ita hadaia ‘Satani do ita tuari henia’ totona. Namona be eda hetura karana Iehova ida ita laloa bada. Baibel be lalokau dalanai ita ia hadibaia: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:7, 8) Edena dala ai Iehova kahirakahira oi lao diba?
19 Mai guriguri ida ita laloa dobu karana be mai anina bada. Bema oi itaia mauri ena hekwakwanai ia bada herea, oi laloa gaudia ibounai Iehova dekenai oi gwauraia be namo. Bema oi ura gaudia be guriguri ai oi gwauraia hedinarai goevagoeva, do oi itaia emu noinoi ena haere do oi abia haraga. Nega haida oi abia haerena be emu lalohadai hegeregerena lasi, to bema oi ura Iehova oi hanamoa bona oi badinaia noho, Ia ese oi do ia durua mai kwalimu ida oi haheauka diba totona. (1 Ioane 5:14) Ia ese emu mauri ia hakaua dalana oi itaia neganai, Ia kahirakahira do oi lao. Baibel ai Iehova ena kara bona dala ibounai oi duahia bona laloa dobu be mai anina bada danu. Unai laloa dobu karana ese oi ia durua Ia oi diba namonamo totona; unai ese emu kudouna ia hamarerea bona ia oi lalokau henia karana ia habadaia. (Salamo 19:14) Bona unai lalokau ese ma gau ibounai ia hereaia dainai, unai ese oi do ia durua hedibagani oi dadaraia bona oi gima noho totona.—1 Ioane 5:3.
20 Iehova kahirakahira ita lao totona, gau badana be iseda tadikaka kahirakahira ita noho danu. Inai buklet ena kahana ginigabena ese unai do ia herevalaia.
STADI ENA HENANADAI
• Iesu be ena tanobada maurina ena dokona ia kahirakahira bona ia lalo-hekwarahi bada neganai dahaka ia karaia, bona iena hahediba taudia ia hagoadaia dahaka idia karaia totona? (Par. 1-4)
• Dahaka dainai Satani ese Iehova idia tomadiho henia taudia ia koia, bona edena dala haida ai ita ia dibagania toho? (Par. 5-8)
• Hedibagani ita dadaraia totona, dahaka dainai ita guriguri loulou (Par. 9-12), tahua gaudia maorodia ita goadalaia (Par. 13-15), hepapahuahu badana ita laloatao (Par. 16-17), bona ‘Dirava dekenai do ita raka kahirakahira lao’ be namo (Par. 18-20)?
[Box on page 25]
Lalo-Manoka Idia Havaraia Gaudia Haida
Gorere/buruka. Bema nega daudau ita gorere eiava ita buruka ita lao dainai iseda goada be mai ena hetoana, reana do ita lalo-metau badina Dirava ena hesiai gaukara ita karaia badabada lasi.—Heberu 6:10.
Lalohisihisi. Bema ita itaia Dirava ena Hereva ita harorolaia goadagoada lalonai haida sibona idia kamonai, reana ita lalohisihisi.—Aonega Herevadia 13:12.
Ta ia laloa ia be anina lasi. Tadikaka eiava taihu ta be lagani momo lalonai dagedage ia davaria dainai, reana ia abia dae matamaia ta eiava Iehova ese ia idia lalokau henia lasi.—1 Ioane 3:19, 20.
Ta ena hemami hadikaia karana. Bema ta be ena tadikaka ena kara eiava hereva ese ia habadua, reana ena hemami ia dika dainai Keristani heboudia dekenai ia lao lasi eiava haroro gaukara ia karaia lasi.—Luka 17:1.
Dagedage. Dirava idia abidadama henia lasi taudia ma haida ese oi idia inai henia, dagedage henia eiava kirikirilaia.—2 Timoteo 3:12; 2 Petero 3:3, 4.
[Picture on page 26]
Iesu ese ita ia hagoadaia, hedibagani ita hanaia totona ita “guriguri loulou” be namo