Ma Haida Hagoadaia Totona “Hereva Namodia” Oi Gwauraia

1-3. (a) Iehova ese ita dekenai ia henia harihari gauna ta be dahaka, bona edena dala ai ita gaukaralaia kerere diba? (b) Dirava ena lalokau lalonai ita noho totona, edena dala ai ita hereva be namo?

BEMA emu lalokau tauna ta dekenai harihari gauna ta oi henia, to unai harihari gauna ia gaukaralaia kerere, emu hemami be edena bamona? Reana, ia dekenai kaia ta oi henia, to gabeai oi kamonai ia ese unai kaia be dagedage dalanai ia gaukaralaia haida ia haberoa totona. Do oi lalohisihisi, ani?

² Mai laloparara ida ita herevahereva dalana be harihari gauna ta, bona ia be “harihari gaudia namodia momokani ibounai” ia henia Diravana, Iehova amo ia mai. (Iamesi 1:17) Unai harihari gauna dainai ita be ma ta dekenai iseda lalohadai bona hemami ita gwauraia diba. Animal be unai bamona idia karaia diba lasi. To kaia hegeregerena, herevahereva dalana ita gaukaralaia kerere diba. Bema iseda hereva dalana amo ma haida ita hahisia, unai ese Iehova do ia habadua!

³ Dirava ena lalokau lalonai ita noho totona, namona be Iehova ena ura hegeregerena ita hereva. Iehova ese ia hahedinaraia goevagoeva ia be edena herevahereva dalana ia moalelaia. Baibel ia gwau: “Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.” (Efeso 4:29) Hari ita ese dahaka dainai eda hereva dalana do ita naria, edena hereva do ita dadaraia bona edena dala ai ma haida hagoadaia herevadia do ita gwauraia karadia do ita herevalaia.

ISEDA HEREVAHEREVA DALANA ITA NARIA NAMONAMO ENA BADINA

4, 5. Edena dala ai Baibel ena aonega herevadia haida ese idia hahedinaraia iseda hereva be mai edia siahu?

⁴ Iseda herevahereva dalana ita naria namonamo ena badina badana ta be inai: Hereva be mai edia siahu. Aonega Herevadia 15:4 ia gwau: “Hereva mai bogahisihisi danu ese, mauri idia havaraia noho, to hereva dagedage ese, tau ena mauri dalana ia koua noho.” Ranu ese au kakorona ia hamauria diba hegeregerena, mai hebogahisi ida ita gwauraia herevana ese kamonai tauna ia hagoadaia bona ena lalona ia hamoalea diba. To, hereva dikadia be haida edia lalona ia hahisia diba. Oibe, ita gwauraia herevadia be mai edia siahu, ta idia hagoadaia eiava idia hahisia diba.—Aonega Herevadia 18:21.

⁵ Aonega herevana ma ta ese ia hahedinaraia hereva be mai ena siahu, ia gwau: “Ia hereva haraga tauna ena hereva, be tuari kaia ia gwadaia noho bamona.” (Aonega Herevadia 12:18) Ia laloa namonamo lasi to ia hereva haraga tauna ese ma ta ena lalona ia hahisia diba bona edia hetura karana ia hadikaia diba. Nega ta oi mamia ta ena hereva aukana ese tuari kaia bamona oi ia gwadaia, a? To, unai siri ma ia gwau: “Aonega tauna ena hereva ese, taunimanima idia hamauria diba.” Ta be ia laloa namonamo bona mai aonega ida ia hereva neganai, ma ta ena lalona do ia hagoadaia bona edia hetura karana do ia hanamoa. Nega ta oi mamia ta ena hereva namodia ese emu lalona ia hagoadaia, a? (Aonega Herevadia 16:24) Ita laloparara iseda hereva be mai ena siahu dainai, ita ura lasi iseda hereva amo ma haida ita hahisia, to ita ura edia lalona ita hagoadaia.

6. Dahaka dainai iseda herevahereva dalana ita hanamoa be mai ena hekwarahi?

⁶ Ena be ita hekwarahi bada, to iseda malana ita biagua diba lasi. Iseda herevahereva dalana ita naria namonamo ena badina iharuana be inai: Ita be goevadae lasi bona kara dika taudia dainai iseda hereva dekenai ita kerere diba. Ita gwauraia herevadia be iseda lalona ai idia noho gaudia idia hahedinaraia, bona taunimanima edia “laloa be dika” sibona. (Genese 8:21; Luka 6:45) Unai dainai, iseda malana ita naria namonamo totona namona be ita hekwarahi bada. (Iamesi 3:2-4) Ena be iseda malana ita biagua namonamo diba lasi, to ita hekwarahi noho iseda herevahereva dalana ita hanamoa totona. Ia aru haraga sinavai dekenai ia nahu tauna ia hekwarahi noho bamona, ita danu do ita hekwarahi noho iseda herevahereva dalana ita hanamoa totona.

7, 8. Bema eda herevahereva dalana ita naria namonamo lasi, Dirava ese iseda tomadiho dalana do ia abia dae, a?

⁷ Iseda herevahereva dalana ita naria namonamo ena badina ihatoina be inai: Iehova be iseda hereva dainai ita do ia hahemaoro henia. Ma haida ita tura henia karana dekenai iseda herevahereva dalana be mai anina bada. To unai sibona lasi, Iehova tura henia karana dekenai ia be mai anina bada danu. Iamesi 1:26 ia gwau: “Tau ta bema ia laloa ia be Keristani tauna namona, to iena malana ia naria diba lasi neganai, ia ese sibona ena lalona ia koia noho. Unai tau ena Keristani kara be anina lasi.” Karoa 11 dekenai ita itaia bamona, iseda herevahereva dalana be mai anina bada iseda tomadiho karana dekenai. Bema iseda malana ita naria namonamo lasi—ma haida hadikaia o hahisia herevadia ita gwauraia—iseda Keristani hesiai gaukara ibounai be anina lasi Dirava vairanai. Oibe, iseda herevahereva dalana ita naria namonamo be gau badana, ani?—Iamesi 3:8-10.

⁸ Momokani, unai badina toi dainai iseda herevahereva dalana ita gaukaralaia namonamo. Hari, ma haida hagoadaia totona ita gaukaralaia hereva namodia do ita stadilaia. To guna do ita tahua edena hereva mirodia be Keristani tauna korikorina ese do ia dadaraia be namo.

HAIDA HADIKAIA HEREVA

9, 10. (a) Hari inai negai taunimanima be edena bamona hereva idia manadalaia? (b) Dahaka dainai hereva mirodia ita dadaraia be namo? (Futnout itaia danu.)

⁹ Hereva mirodia. Hari inai negai taunimanima be ma haida dekenai hereva mirodia idia gwauraia karana idia manadalaia. Taunimanima momo be idia badu neganai hereva mirodia idia gwauraia, bona haida be taunimanima idia kiri totona hevaseha mirodia idia gwauraia. To, hereva mirodia gwauraia karana be kiri gauna lasi. Lagani 2,000 bamona gunanai, Paulo ese Kolose kongrigeisen ia sisiba henia “hereva mirodia” idia rakatania momokani totona. (Kolose 3:8) Paulo ese Efeso kongrigeisen ia hadibaia Keristani taudia korikoridia be “hevaseha hereva mai miro danu” idia dadaraia be namo.—Efeso 5:3, 4.

¹⁰ Iehova be hereva mirodia gwauraia karana ia inai henia. Danu, Iehova idia lalokau henia taudia ese unai kara idia inai henia. Momokani, Iehova ita lalokau henia dainai hereva mirodia gwauraia karana ita dadaraia. Paulo ese “tauanina ena kara” ia herevalaia neganai, “kara mirodia” ia gwauraia danu. Hereva mirodia gwauraia karana be unai “kara mirodia” ta. (Galatia 5:19-21) Unai be gadara gauna lasi. Badina bema ta be matabodaga herevadia, ma haida hadikaia herevadia o hereva dikadia ia gwauraia loulou, bona elda taudia ese idia sisiba henia to ia kamonai lasi, ia be kongrigeisen amo idia atoa siri diba.a

11, 12. (a) Udu mauri be dahaka, bona edena dala ai dika ia havaraia diba? (b) Dahaka dainai Iehova ena hesiai taudia ese ma haida edia ladana hadikaia herevadia idia dadaraia be namo?

¹¹ Udu mauri bona ladana hadikaia herevadia. Vaia, taunimanima idia ura ma haida edia mauri lalonai idia vara gaudia idia herevalaia. To, ma haida ita herevalaia karana ibounai be dika, a? Lasi. Badina bema ma haida ita hadikaia lasi, to vanegai daika ia bapatiso, eiava daika be ia gorere bona ita durua ena sivarai ita kikilaia neganai, unai be kerere lasi. Keristani taudia ginigunadia be edia tadikaka haida edia namo idia laloa bada bona edia tadikaka edia sivarai namodia be haida dekenai idia herevalaia. (Efeso 6:21, 22; Kolose 4:8, 9) To, udu mauri karana be dika bema ma haida dekenai hereva koikoidia ita gwauraia bona hehuni herevadia be ma haida dekenai ita gwauraia hedinarai. Unai kara amo ma haida edia ladana ita hadikaia diba bona unai ese dika do ia havaraia. Diksenari ta ia gwau, ladana hadikaia herevadia be “taunimanima ese idia gwauraia koikoi herevadia . . . ma ta ena ladana namona idia hadikaia totona.” Hegeregere, Farisea taudia be Iesu ena ladana idia hadikaia totona koikoi herevadia idia gwauraia. (Mataio 9:32-34; 12:22-24) Nega momo ladana hadikaia herevadia ese heai ia havaraia.—Aonega Herevadia 26:20.

¹² Iehova be edia hereva amo ma haida idia hadikaia o orea idia hapararaia taudia ia inai henia. Ia ese tadikaka huanai “kerere ia havaraia tauna” ia inai henia. (Aonega Herevadia 6:16-19) Greek herevana idia hahanaia “ladana hadikaia tauna” be di·aʹbo·los, bona unai be Satani ena ladana ta. Ia be “Diabolo,” Dirava ena ladana ia hadikaia tauna. (Apokalupo 12:9, 10) Momokani, ita ura lasi iseda herevahereva dalana ese ia hahedinaraia ita be Satani ena kara ita badinaia. Ma haida edia ladana hadikaia herevadia dainai idia vara “hepapahuahu” bona ‘orea hapararaia karadia’ be kongrigeisen lalonai ita abia dae lasi. (Galatia 5:19-21) Unai dainai, ta ena sivarai be ma ta dekenai oi do herevalaia lasi neganai, sibona oi nanadaia: ‘Unai sivarai be momokani, a? Ma ta dekenai lau herevalaia be lalokau karana, a? Badina namona ta dainai unai sivarai be ma haida dekenai lau herevalaia be maoro, a?’—1 Tesalonika 4:11, NW.

13, 14. (a) Ma haida ese idia hereva dika henia taudia edia hemami be edena bamona? (b) Ma haida ia hereva dika henia tauna dekenai dahaka ia vara diba?

¹³ Hereva dikadia. Guna ita herevalaia bamona, hereva be mai edia siahu tau ta ena lalona ia hahisia totona. Momokani, ita be goevadae lasi taudia dainai, nega haida ta ena lalona hahisia hereva ta ita gwauraia, to gabeai ita sori. To, Baibel be ita ia sisiba henia hereva haida be Keristani ruma bese eiava kongrigeisen lalonai do ita gwauraia lasi. Paulo be Keristani taudia ia hamaoroa: “Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa.” (Efeso 4:31) Hereva dikadia—hanaihanai ta gwau henia bona ena ladana hadikaia karana—ese ta ena lalona do ia hahisia bona do ia mamia ia be anina lasi. Natu maragidia edia lalona be ia goada lasi, bona idia lalohisihisi haraga diba bema ta be idia dekenai ia badu bona hereva dikadia ia gwauraia.—Kolose 3:21.

¹⁴  Baibel ia hahedinaraia goevagoeva, hemarai hereva dikadia bona lalona hahisia herevadia amo ma haida ita gwau henia loulou karana be taravatu. Unai bamona kara ia karaia loulou tauna be kongrigeisen amo idia atoa siri diba, bema elda taudia ese idia henia sisiba ia badinaia lasi. Bema ena kara ia haidaua lasi, ia be paradaiso lalonai do ia vareai lasi. (1 Korinto 5:11-13; 6:9, 10) Momokani, ita be Dirava ena lalokau lalonai do ita noho lasi bema hereva dikadia, hereva koikoi, eiava ma haida hadikaia herevadia ita gwauraia. Unai bamona hereva ese ta ena lalona ia hahisia.

“HAGOADAIA” HEREVADIA

15. Edena bamona hereva be ma haida ia hagoadaia diba?

¹⁵ Edena dala ai Dirava ese ia ura henia dalanai ita hereva diba? Namona be ita laloatao, Baibel be ita ia hagoadaia “hereva namodia” ita gwauraia totona. (Efeso 4:29, NW) Iseda hereva amo ma haida ita hagoadaia bona durua neganai, unai ese Iehova ia hamoalea. Unai ita karaia totona, ita laloa namonamo guna be gau badana. Baibel be iseda herevahereva dalana dekenai hakaua hereva namodia ia henia, to ita gwauraia “hereva namodia” ena lista ta ia henia lasi. (Tito 2:8) “Hagoadaia” herevadia ita gwauraia totona, namona be inai mai anina bada gaudia toi ita laloatao: Hereva namodia, hereva momokani, bona hebogahisi herevadia. Unai dainai namona be ma haida do idia hagoadaia herevadia do ita herevalaia.—Rau 160 ai maua ladana “Egu Hereva ese Ma Haida Ia Hagoadaia, A?” itaia.

16, 17. (a) Dahaka dainai haida dekenai hanamoa hereva ita gwauraia be namo? (b) Kongrigeisen bona ruma bese lalonai daidia ita hanamoa diba?

¹⁶ Ma ta hanamoa herevana. Iehova bona Iesu idia diba ma haida dekenai hanamoa hereva idia gwauraia be gau badana. (Mataio 3:17; 25:19-23; Ioane 1:47) Ita Keristani taudia ita diba, ma haida edia kara o gaukara namodia dainai ita hanamodia be namo. Dahaka dainai? Aonega Herevadia 15:23 ia gwau: “Nega korikori dekenai, hereva namona ta ia gwauraia, be namo bada!” Sibona oi nanadaia: ‘Ma haida ese lau dekenai hanamoa herevadia idia gwauraia neganai egu hemami be edena bamona? Unai ese egu lalona ia hanamoa bona lau moale, a?’ Momokani, ta amo hanamoa hereva oi abia neganai, unai ese ia hahedinaraia ta be oi karaia gauna ia itaia, oi ia laloa bada, bona oiemu hekwarahi be mai anina bada. Unai hereva namodia ese oi idia hagoadaia bona vaira negana ai emu gaukara do oi goadalaia diba. Ta ese oi dekenai hanamoa herevana ia gwauraia neganai oi moale dainai, oi danu be dala oi tahua ma haida dekenai hanamoa herevadia oi gwauraia totona, a?—Mataio 7:12.

¹⁷ Oi hekwarahi taunimanima edia kara namodia oi laloa bada totona, bona unai kara namodia dainai hanamoa hereva oi gwauraia be namo. Kongrigeisen hebou dekenai, tok namona ta oi kamonai, oi itaia matamata tauna ta be ia gaukara goada kongrigeisen lalonai maduna haida ia abia totona, eiava oi itaia tadikaka o taihu buruka ta be hanaihanai hebou dekenai ia mai ena be ena tauanina ia goada lasi o ia gorere momo. Unai bamona taudia dekenai hanamoa hereva ita gwauraia neganai, unai ese edia kudouna do ia hamarerea bona idia ia durua idia gini goada totona. Ruma bese lalonai, namona be tau bona hahine edia herevahereva dalana amo ta ta idia hanamoa, idia hahedinaraia ta ta idia lalokau henia bona laloa bada. (Aonega Herevadia 31:10, 28) Natudia be idia ura ma haida ese idia lalokau henia bona idia lalodia bada. Natudia dekenai hanamoa herevadia oi gwauraia be hegeregere flaoaflaoa ta be dina ena siahu bona ranu ia abia dainai ia tubu namo herea. Tama sina e, natudia be kara namodia eiava gaukara namodia idia karaia neganai, umui hanamodia be namo. Unai ese idia do ia hagoadaia bona ia durudia kara maoromaoro idia karaia noho totona.

18, 19. Dahaka dainai ita gaukara goada be namo iseda tadikaka taihu ita hagoadaia totona, bona edena dala ai ita karaia diba?

¹⁸ Ma ta ena lalona hamoalea bona hagoadaia herevadia. Iehova be “lalohisihisi taudia” ia laloa bada. (Salamo 34:18) Iena Hereva ese ita ia hagoadaia ‘lalometau taudia do ita hagoadaia’ bona idia ‘ita durua.’ (1 Tesalonika 5:11, 14, NW) Ita diba idia lalometau bona lalohisihisi tadikaka taihu edia lalona ita hamoalea bona hagoadaia neganai, Iehova be iseda kara namo ia itaia bona ia laloa bada.

¹⁹ To, ia lalometau o lalohisihisi tadikaka o taihu be edena bamona oi hagoadaia diba? Namo lasi oi laloa ena hekwakwanai do oi hamaoromaoroa. Nega momo, hereva kwadogina ese unai bamona tauna ia durua diba. Ia lalohisihisi tauna oi hadibaia oi be ia oi laloa bada bona oi ura ia oi durua. Oi hamaoroa ia ida oi guriguri totona; Iehova oi noia ia lalohisihisi tadikaka o taihu ia durua, unai amo emu guriguri ia kamonai diba; bona do ia diba Dirava bona ma haida be ia idia lalokau henia bada. (Iamesi 5:14, 15) Ia oi hamaoroa kongrigeisen ai ena gaukara be mai anina bada bona kongrigeisen taudia be ia idia laloa bada. (1 Korinto 12:12-26) Ia dekenai Baibel siri namona ta oi duahia; unai siri ese ia hahedinaraia Iehova ese ia laloa bada. (Salamo 34:18; Mataio 10:29-31) Nega oi atoa mai kudouna ibounai ida lalometau tauna dekenai “hereva namodia” oi gwauraia neganai, do ia mamia haida ese ia idia lalokau henia bona idia laloa bada bona unai ese ia do ia durua.—Aonega Herevadia 12:25.

20, 21. Edena dala ai emu sisiba herevana ese kamonai tauna do ia durua?

²⁰ Sisiba namodia. Ita ibounai be goevadae lasi taudia dainai, nega ta ta ai ta ese ita dekenai sisiba ia henia be namo. Baibel ia gwau: “Bema oi ura bada diba do oi abia, bona sisiba oi kamonai henia noho neganai, oi ese dina ta aonega do oi davaria.” (Aonega Herevadia 19:20) Sisiba henia ena maduna be elda taudia sibona ese idia karaia lasi. Tama sina ese natudia idia sisiba henia. (Efeso 6:4) Lo taihu ese taihu matamata dekenai sisiba idia henia diba. (Tito 2:3-5) Ma haida ita lalokau henia dainai, ita ura sisiba be do idia moalelaia dalanai ita henia. Dahaka ese ita ia durua diba unai bamona dala ai sisiba ita henia totona? Sisiba namona ita henia totona, inai gau toi do ita laloa: Sisiba henia tauna ena kara, ia henia sisiba ena badina, bona sisiba ia henia dalana.

²¹ Bema sisiba henia tauna ia ura ena sisiba ese ma ta ia durua, namona be sibona ia nanadaia, ‘Lau be edena bamona sisiba lau abia dae?’ Oi ia sisiba henia tauna be mai badu ida ia hereva lasi, to mai momokani ida ia hereva neganai, oi diba ia ese oi ia laloa bada bona iena sisiba do oi abia dae. Unai dainai ma haida oi sisiba henia neganai, unai bamona oi karaia danu be namo. Baibel amo sisiba hereva namodia oi henia diba. (2 Timoteo 3:16) Herevana Baibel amo siri ta ita duahia eiava ita herevalaia sibona, to gau badana be ita henia sisiba ibounai be Baibel amo ita abia. Unai dainai namona be elda taudia idia naria namonamo, namo lasi ma haida dekenai sibona edia lalohadai idia gwauraia; namo lasi Baibel ena hereva idia mogea sibodia edia lalohadai idia durua totona. Dala maorona ai ta ita sisiba henia neganai, ia ita durua diba. Bema ta dekenai mai gado namo ida sisiba oi henia, ia ese emu sisiba do ia abia dae bona do ia hemarai lasi.—Kolose 4:6.

22. Emu lalona oi hadaia emu herevahereva dalana be edena bamona oi gaukaralaia totona?

²² Momokani, herevahereva dalana be Dirava amo ia mai harihari gauna namona. Iehova ita lalokau henia dainai, namona be dala maorona ai unai harihari gauna ita gaukaralaia. Namona be ita laloatao ita gwauraia hereva be mai ena siahu—ta ia hagoadaia eiava ia hahisia diba. Unai dainai namona be unai harihari gauna be Iehova ena ura hegeregerena ita gaukaralaia—ma haida ita “hagoadaia” totona. Oibe, iseda herevahereva dalana ese ma haida ia hagoadaia diba bona ita ia durua Dirava ena lalokau lalonai ita noho totona.