Ororo Harorona

Iesu be reana ia hesiku, badina hanuaboi ibounai ia guriguri bona unai murinai hahediba taudia 12 ia abia hidi, ena aposetolo taudia ai idia lao totona. To dina ai Iesu ia gaukara goada taunimanima ia durua totona. Vadaeni Galilea ena ororo ta badinai taunimanima ia durua, reana unai be ena gaukara ia hamatamaia gabuna Kaperanauma kahirakahira.

Hutuma be gabu daudau amo ia dekenai idia mai. Haida be saut kahana amo, Ierusalema, bona Iudea ena hanua amo idia mai. Ma haida be not kahana amo, Turo bona Sidono edia kone hanuadia amo idia mai. Dahaka dainai Iesu idia tahua? “Ena hereva idia kamonai bona edia gorere ia hanamoa totona.” Bona unai bamona ia vara—Iesu ese “idia ibounai edia gorere ia hanamoa.” Mani oi laloa! Gorere taudia ibounai be idia namo. Danu, “demoni ese idia hahisia taudia,” Satani ena aneru dikadia ese idia hahisidia taudia unai, ia haroro henia.​—Luka 6:17-19.

Gabeai Iesu be ororo badinai ia noho palaka gabunai ia helai bona hutuma be ia idia hagegea. Iena hahediba taudia, reana iena aposetolo 12 be ia kahirakahira idia helai. Iesu be hoa karadia ia karaia diba dainai, idia ura ia idia kamonai henia. Iena haroro herevana ese kamonai taudia ia durua. Unai nega amo, momo be unai hereva amo namo idia davaria. Ita danu be hereva momokani dobudia ita lalopararalaia diba, badina auka lasi dalanai unai ia gwauraia bona edia anina ia hahedinaraia namonamo. Iesu be dina ta ta ai taunimanima ese idia karaia gaudia bona idia diba gaudia ia gaukaralaia. Unai dainai Dirava ena dala idia ura badinaia taudia be iena hereva ena anina idia lalopararalaia. Iesu ena haroro herevana ai, edena hereva badadia ia gaukaralaia taunimanima ia durua totona?

DAIDIA BE IDIA MOALE?

Taunimanima ibounai idia ura idia moale. Iesu be unai ia diba dainai, ena hereva hamatamataia totona, idia moale taudia ia herevalaia. Mani oi laloa, unai ese kamonai taudia edia lalona ia veria momokani. To reana gau haida dainai idia daradara.

Ia gwau: “Dirava dibaia totona idia hitolo taudia be idia moale, badina guba Basileia be idia edia. Idia taitai taudia be idia moale, badina ma haida ese do idia hagoadadia. . . . Kara maoromaoro totona idia hitolo bona ranu mase taudia be idia moale, badina Dirava ese edia ura gaudia ibounai do ia henia. . . . Kara maoromaoro dainai dagedage idia davaria taudia be idia moale, badina guba Basileia be idia edia. Lau dainai taunimanima ese umui idia gwauraia dika, idia dagedage henia . . . neganai, umui moale. Umui moale bada herea.”​—Mataio 5:3-12.

Iesu ese ia herevalaia “moale” be dahaka? Ia be gau namona ta dainai ta ese ia mamia moalena ia herevalaia lasi. Moale korikorina be ta ena lalona amo ia daekau hemamina. Anina be ta ia moale badina ia mamia ia dekenai idia noho gaudia be hegeregere, bona ena mauri be mai anina.

Iesu ia gwau inai taudia be idia moale: Idia laloparara Dirava idia tura henia be namo, edia kara dika dainai idia lalohisihisi, bona Dirava idia dibaia bona idia hesiai henia. Ena be Dirava ena ura idia karaia dainai, idia inai henidia eiava dagedage henidia, to idia moale, badina idia diba idia be Dirava idia hamoalea bona ia ese davana namona, mauri hanaihanai, do ia henia.

Taunimanima momo idia laloa kohu momo maurina bona moale karadia tahua karana amo moale korikorina do idia davaria. To Iesu ena hereva be idau. Iena hereva dainai momo idia daradara. Ia gwau: “Umui taga taudia e, madi o, badina emui ahuna be umui abia vadaeni. Hari umui bogakunu taudia e, madi o, badina do umui hitolo. Hari umui kiri taudia e, madi o, badina do umui lalohisihisi bona taitai. Taunimanima ibounai ese umui idia hanamoa neganai, madi o, badina edia sene taudia ese peroveta koikoi taudia dekenai unai bamona idia karaia.”​—Luka 6:24-26.

Dahaka dainai taga taudia, idia kiri taudia, bona ma haida ese idia hanamoa taudia dekenai ia gwau madi? Badina bema ta ena nega bada be unai gaudia dekenai ia haorea, ia ese Dirava hesiai henia karana do ia laloa bada lasi, bona moale korikorina do ia davaria lasi. Iesu ia gwau lasi ta be ia ogogami eiava hitolo dainai ia moale. Lasi, unai ia gwauraia badina nega momo unai bamona taudia ese iena hadibaia herevadia idia abia dae bona moale korikorina idia davaria.

Iesu ese ena hahediba taudia ia laloa dainai, ia gwau: “Umui be tanobada ena damena.” (Mataio 5:13) To idia be damena korikorina lasi. Vaia damena be aniani dekenai idia atoa, ia bodaga lasi totona. Iehova ena dubu helaga ena boubou patana badinai, damena bada idia haboua, unai amo boubou gaudia dekenai idia atoa diba. Danu, damena ese dika eiava bodaga ia koua gauna ia laulaulaia. (Levitiko 2:13; Esekiela 43:23, 24) Iesu ena hahediba taudia be “tanobada ena damena” bamona. Idia ese taunimanima idia durua, unai amo idia kara maoromaoro diba bona edia hetura karana Iehova ida do ia dika lasi. Oibe, idia harorolaia sivaraina ese kamonai taudia ia hamauria!

Iesu ese ena hahediba taudia ia hamaoroa, ia gwau: “Umui be tanobada ena diari.” Lamepa be vaia bosea amo idia koua lasi, to lamepa ena atoa gauna dekenai idia atoa, unai amo ruma ia hadiaria. Unai dainai Iesu ia gwau: “Taunimanima vairanai emui diari umui hahedinaraia, vadaeni emui kara namodia do idia itaia bona emui Tamana guba ai ia noho do idia hanamoa.”​—Mataio 5:14-16.

TARAVATU HEREADAENA IENA MURINAI IDIA RAKA TAUDIA TOTONA

Iuda tomadiho gunalaia taudia idia gwau Iesu be Dirava ena Taravatu ia utua bona palani idia karaia ia idia hamasea totona. Unai dainai Iesu ia gwau: “Namo lasi umui laloa Taravatu bona Peroveta Taudia edia hereva hadikaia totona lau mai. Lau mai edia hereva hadikaia totona lasi, to hagugurua totona.”​—Mataio 5:17.

Iesu be Dirava ena Taravatu ia laloa bada bona ma haida ia hagoadaia unai idia karaia totona. Ia gwau: “Unai dainai bema tau ta ese unai taravatu maragina ta ia utua bona taunimanima ia hadibaia unai bamona do idia karaia, unai tauna be do ia hegeregere lasi guba Basileia lalonai ia vareai totona.” Ma ia gwau: “To unai taravatu ia badinaia bona ia hadibaia tauna be do ia hegeregere guba Basileia lalonai ia vareai totona.”​—Mataio 5:19.

Iesu ia gwau lalohadai kereredia ita dadaraia be namo, badina unai ese ta ia doria diba Dirava ena Taravatu ia utua totona. Iesu ese inai Taravatu, “Namo lasi umui ala-ala” ia gwauraia murinai, ia gwau: “Iena tadikaka ia badu henia noho tauna be kota dekenai do idia abia lao.” (Mataio 5:21, 22) Ta ese ma ta ia badu henia noho be dika, badina ia ala-ala diba. Unai dainai Iesu ese maino karaia dalana ia herevalaia, ia gwau: “Bema emu harihari gauna be boubou patana dekenai oi abia lao bona unuseniai oi laloatao emu tadikaka be oi dekenai ia lalohisihisi, namona be emu harihari gauna be boubou patana vairanai oi rakatania bona oi lao. Emu tadikaka ida maino oi karaia guna, bena oi giroa lou bona emu harihari gauna oi bouboulaia.”​—Mataio 5:23, 24.

Taravatu ese heudahanai karana ia gwauraia dika danu. Iesu ia gwau: “Guna umui kamonai vadaeni idia gwau: ‘Namo lasi umui heudahanai.’ To umui lau hamaoroa, bema tau ta be hahine ta ia raraia ela bona ia ura henia dikadika, unai tauna be iena kudouna ai unai hahine ida ia heudahanai vadaeni.” (Mataio 5:27, 28) Iesu be nega sisina lalonai ia vara lalohadai mirona ia herevalaia lasi, to ia ese ta be ma ta ia “raraia” noho karana ena dika ia herevalaia. Nega momo ta raraia noho karana ese lalohadai mirodia ia havaraia diba. Bena dala ia kehoa neganai, ia heudahanai diba. Unai ia vara lasi totona, ta be dahaka do ia karaia? Kara ta ia karaia haraga be namo. Iesu ia gwau: “Bema emu matana idibana be oi ia hahekwakwanaia noho, oi kokia bona negea. . . . Bema emu imana idibana be oi ia hahekwakwanaia noho, oi utua bona negea.”​—Mataio 5:29, 30.

Taunimanima haida be idia mauri noho totona, edia gorere imana eiava aena idia utua oho. Unai hegeregerena, Iesu ia gwau gau ta ita “negea” be mai anina bada, herevana unai be iseda matana o imana, unai amo lalohadai mirodia bona ia havaraia dika ita dadaraia diba. Iesu ia gwau: “Emu tauanina ena kahana ta oi haboioa be namo, to emu tauanina ibounai be Gehena dekenai idia negea be dika.” (Gehena be Ierusalema ena magu murimuriai ia noho momoru gabua gabuna), bona mase hanaihanai ia laulaulaia.

Danu, Iesu ese haida idia haberoa bona hahekwakwanaia taudia kara henia dalana dekenai sisiba ia henia. Ia gwau: “Kara dika tauna umui heai henia lasi. Bema ta ese emu medena idibana ia pataia, laurina danu oi henia.” (Mataio 5:39) Iesu ia gwau lasi, ta ese oi eiava emu ruma bese ia heatu henia neganai, do oi koua lasi. To ia gwau bema ese oi ia pataia ia ese oi ia haberoa eiava hamasea totona lasi, to ena lalona hahisia sibona totona. Unai dainai Iesu ena hereva ena anina be, bema ta ia ura oi ida ia heai o hepapahuahu dainai, oi ia pataia eiava hereva dika henia, davana oi henia lasi.

Unai sisiba be Dirava ena taravatu, dekena tauna lalokau henia karana, ida ia hegeregere. Unai dainai Iesu ese kamonai taudia ia sisiba henia, ia gwau: “Emui inai taudia do umui lalokau henia noho bona umui idia dagedage henia taudia totona do umui guriguri noho.” Bena ena badina ia gwauraia: “Unai amo emui Tamana guba ai ia noho ena natudia ai do umui lao, badina ia ese kara dika taudia bona kara namo taudia latanai dina ena diari ia henia.”​—Mataio 5:44, 45.

Iesu ena hereva ena dokonai, ia gwau: “Emui guba Tamana ia goevadae hegeregerena, umui danu umui goevadae be namo.” (Mataio 5:48) Momokani, ia diba taunimanima be idia goevadae lasi. To bema Dirava ena kara ita tohotohoa, iseda inai taudia do ita lalokau henia danu. Ita gwau diba: “Hebogahisi karadia umui hahedinaraia noho, emui Tamana ia hebogahisi hegeregerena.”​—Luka 6:36.

GURIGURI BONA DIRAVA ABIDADAMA HENIA

Iesu ena haroro herevana ai, ena kamonai taudia ia hamaoroa: “Umui naria namonamo, namo lasi taunimanima vairanai umui kara maoromaoro, idia ese idia itaia totona.” Iesu ese Dirava idia badinaia koikoi taudia ia gwauraia dika, ia gwau: “Harihari gaudia umui henia neganai, namo lasi kibi umui hiriria guna, koikoi taudia . . . idia karaia bamona.” (Mataio 6:1, 2) Hehuni ai harihari gaudia ita henia be namo.

Iesu ma ia gwau: “Umui guriguri neganai, koikoi taudia bamona umui karaia lasi, badina idia be sinagoga lalonai bona dala badana ena kona dekenai idia gini bona idia guriguri, taunimanima ese idia itaia totona.” To ia gwau: “Oi guriguri neganai, daiutu lalonai oi vareai bona iduara oi koua murinai, emu guba Tamana oi guriguri henia.” (Mataio 6:5, 6) Iesu be taunimanima vairanai guriguri karana ia gwauraia dika lasi, badina ia danu be unai ia karaia. To ena hereva ena anina be namo lasi ta be heagi dalanai ia guriguri, taunimanima ese idia hanamoa totona.

Hutuma ia sisiba henia: “Oi guriguri neganai, gau tamona oi gwauraia loulou lasi, tanobada taudia idia karaia bamona.” (Mataio 6:7) Anina be gau tamona totona ita guriguri loulou be kerere, a? Lasi. Iesu ena hereva anina be pepa ai idia torea herevadia be iseda guriguri ai ita “gwauraia loulou” be maoro lasi. Bena ia ese guriguri dalana ia hadibaia, unai guriguri lalonai gau 7 ia gwauraia. Gau ginigunadia toi ese idia hahedinaraia Dirava be mai ena maoro taunimanima ia lohiaia totona bona iena ura do ia hagugurua—unai be iena ladana do ia hahelagaia, iena Basileia do ia mai, bona iena ura do ia karaia. Unai gaudia totona ita guriguri murinai, iseda ura gaudia ita gwauraia diba, hegeregere, aniani, iseda dika ia gwauatao, iseda goada ia hanaia hedibagani amo ita ia gimaia, bona dika tauna amo ita ia hamauria.

Kohu haboua karana ita dekenai be mai anina bada, a? Iesu be hutuma ia hamaoroa: “Tanobada dekenai umui sibona totona dava bada kohu haboua karana umui hadokoa, badina unuseniai manumanu bona raraka ese do idia hadikaia bona henaohenao taudia ese do idia henaoa.” Sisiba namona, ani? Ita haboua kohu be idia dika diba, bona kohu ese iseda hetura karana Dirava ida do ia hagoadaia lasi. Unai dainai Iesu ia gwau: “Guba dekenai umui sibona totona dava bada kohu do umui haboua.” Unai ita karaia diba, bema iseda mauri ai Dirava ena hesiai gaukara ita atoa guna. Ta ese iseda Dirava badinaia karaia eiava do ita abia davana namona, mauri hanaihanai, ia kokia diba lasi. Iesu ena hereva be momokani, ia gwau: “Emu dava bada kohu ia noho gabunai, emu kudouna danu be unuseniai.”​—Mataio 6:19-21.

Unai hereva habadaia totona, Iesu ese parabole ta ia gwauraia: “Tauanina ena lamepa be matana. Bema emu matana be gau tamona sibona ia raraia, emu tauanina ibounai be do ia diari. To bema emu matana ese ma haida edia gau ia ura henia, emu tauanina ibounai be do ia dibura.” (Mataio 6:22, 23) Iseda matana ia namo neganai, ita dekenai ia be lamepa ena diari bamona. To unai ia vara totona, iseda matana be gau tamona sibona ia raraia be namo; bema lasi, do ita laloa iseda mauri ai kohu be mai anina bada. Unai bamona ita laloa neganai, Dirava hesiai henia karana do ita laloa maragi, iseda “tauanina ibounai be do ia dibura,” bona reana koikoi karadia ita karaia diba.

Bena Iesu ese inai haheitalai namona ia gwauraia: “Tau ta be biaguna rua edia hesiai gaukara ia karaia diba lasi, badina ia ese ta do ia inai henia bona ta do ia ura henia, eiava ta do ia badinaia bona ta do ia dadaraia. Dirava bona Taga be nega tamona umui hesiai henia diba lasi.”​—Mataio 6:24.

Iesu ena hereva idia kamonai taudia haida be reana edia kohu dainai idia laloa momo. Unai dainai ia hamaorodia, bema Dirava hesiai henia karana idia atoa guna, do idia lalohekwarahi lasi. “Guba manudia umui itaia namonamo. Idia be uhe idia hadoa lasi, anina idia gogoa lasi bona aniani haboua rumadia ai aniani idia haboua lasi, to emui guba Tamana ese idia ia ubua.”​—Mataio 6:26.

Ororo ai idia tubu lili be edena bamona? Iesu ia gwau: “Solomona ena hairai ibounai ese unai flaoaflaoa edia hairai ia hereaia lasi.” Unai ese dahaka ia hahedinaraia? “Bema Dirava ese unai dala ai tano ena tubutubu gaudia ia hahairaia, ena be idia be hari idia noho bona kerukeru lahi dekenai idia negea, vadaeni . . . Dirava ese umui dekenai dabua do ia henia lasi, a?” (Mataio 6:29, 30) Iesu ese ia hamaorodia: “Namo lasi umui lalohekwarahi bona umui gwau, ‘Dahaka do ita ania?’ eiava, ‘Dahaka do ita inua?’ eiava ‘Dahaka dabua do ita hahedokilaia?’ . . . Emui guba Tamana be ia diba unai gaudia ibounai umui abia be namo. Nega ibounai Dirava ena Basileia bona ena kara maoromaoro do umui tahua guna, bona unai gaudia ibounai be umui dekenai do ia henia.”​—Mataio 6:31-33.

MAURI ABIA DALANA

Aposetolo taudia bona kudou-maoro taudia ma haida idia ura edia mauri dalana amo Dirava idia hamoalea, to unai idia karaia be auka. Farisea taudia momo be taunimanima idia gwauraia dika bona idia hahemaoro henidia auka. Unai dainai Iesu ese kamonai taudia ia hamaoroa: “Ma haida hahemaoro henia karana umui hadokoa, vadaeni Dirava ese umui do ia hahemaoro henia lasi, badina ma haida umui hahemaoro henia hegeregerena, umui do ia hahemaoro henia.”​—Mataio 7:1, 2.

Bena parabole ta amo Iesu ese ia hahedinaraia Farisea taudia edia kara ita tohotohoa be dika, ia gwau: “Matakepulu tauna ta ese matakepulu tauna ma ta ia hakaua diba lasi, ani? Idia ruaosi be guri lalonai do idia moru, ani?” Vadaeni kamonai taudia ese edena dala ai ma haida idia kara henia be namo? Taunimanima do idia hahemaoro henia auka lasi, badina unai be kerere badana. Iesu ia gwau: “Edena bamona emu tadikaka dekenai oi gwau, ‘Tadikaka e, mani emu matana dekenai ia noho momoru maragina lau kokia,’ to oi sibona emu matana dekenai ia noho au badana oi itaia lasi? Koikoi tauna! Emu matana amo au badana oi kokia guna, bena do oi itaia namonamo edena dala ai emu tadikaka ena matana amo, momoru maragina oi kokia diba.”​—Luka 6:39-42.

Namo lasi ita laloa, unai ena anina be ena hahediba taudia be taunimanima do idia hahemaoro henia lasi. Iesu ese ia hamaorodia: “Helaga gaudia be sisia dekenai umui henia lasi, bona emui pel nadi be boroma dekenai umui negea lasi.” (Mataio 7:6) Baibel ena hereva momokanidia be dava bada pel nadina bamona. Bema haida be inai dava bada hereva momokanidia idia laloa bada lasi, namona be hahediba taudia ese idia rakatanidia bona kamonai taudia ma haida idia tahua.

Iesu ese guriguri karana ia herevalaia lou, bona ia hagoadadia unai do idia goadalaia noho. Ia gwau: “Umui noinoi noho, bona umui dekenai do ia henia.” Parabole ta amo Iesu ese ia hahedinaraia Dirava be ia noho hegaegae guriguri ia haerelaia totona. Ia gwau: “Umui daika, bema ena natuna be paraoa totona ia noinoi, ia dekenai nadi do ia henia, a? . . . Unai dainai, bema umui kara dika taudia ese emui natudia dekenai harihari gaudia namodia umui henia diba, namona be umui diba momokani, emui Tamana, guba ai ia noho ese gau namodia be idia noinoi taudia dekenai do ia henia!”​—Mataio 7:7-11.

Bena Iesu be momo ese idia badinaia taravatu hereadaena ia gwauraia: “Umui ura taunimanima ese umui dekenai do idia karaia gaudia ibounai be idia dekenai do umui karaia danu.” Ma haida ita kara henia neganai, unai sisiba ita badinaia be namo. To Iesu ena hereva amo ia hahedinaraia unai bamona ita karaia be mai ena hekwarahi: “Geiti maragina dekenai umui vareai, badina mase ia lao henia dalana be bada bona ena geiti be lababa herea, bona momo be unai geiti dekenai idia vareai noho. To mauri ia lao henia dalana be maragi bona ena geiti be maragi momokani, bona haida sibona ese unai dala idia davaria.”​—Mataio 7:12-14.

Haida ese hahediba taudia edia lalona idia veria diba mauri ia lao henia dalana idia rakatania totona, unai dainai Iesu ia gwau: “Peroveta koikoi taudia dainai do umui naria namonamo, edia toana be mamoe bamona, to edia lalona be idia hitolo bada uda sisia bamona.” (Mataio 7:15) Iesu ia gwau, au namodia bona au dikadia be edia huahua amo do ita diba. Unai hegeregerena, peroveta koikoi taudia be edia hahediba herevadia bona kara amo do ita diba. Oibe, Iesu ia gwau, tau ta be iena hereva sibona amo lasi, to iena kara amo do ia hahedinaraia ia be Iesu ena hahediba tauna. Haida idia gwau Iesu be edia Lohiabada, to bema Dirava ena ura idia karaia lasi be edena bamona? Iesu ia gwau: “Idia dekenai do lau gwau: ‘Umui lau diba lasi! Lau amo umui siri, umui be taravatu utua taudia!’”—Mataio 7:23.

Iesu ena haroro hereva dokonai, ia gwau: “Egu hereva idia kamonai bona badinaia taudia ibounai be aonega tauna bamona, iena ruma be nadi badana latanai ia haginia. Bena medu ia diho, abata ranu ia daekau, lai ia toa bona unai ruma ia botaia, to unai ruma ia moru lasi, badina nadi badana latanai ia haginia.” (Mataio 7:24, 25) Dahaka dainai ruma ia moru lasi? Badina “guri ia geia dobu ela bona nadi badana ia davaria, bena nadi latanai ruma ena badina ia haginia.” (Luka 6:48) Unai dainai Iesu ena hereva ita kamonai sibona be hegeregere lasi. Namona be ita hekwarahi ita “badinaia” totona.

To Iesu ena “hereva idia kamonai” to “idia badinaia lasi taudia” be edena bamona? Idia be “kavakava tauna bamona, iena ruma be miri latanai ia haginia.” (Mataio 7:26) Medu, abata, bona lai ese unai ruma ia hamorua diba.

Hutuma be Iesu ena hadibaia dalana dekenai idia hoa. Badina ia be mai siahu ida ia hadibaia, tomadiho gunalaia taudia bamona lasi. Ena hereva idia kamonai taudia momo be reana iena hahediba taudia ai idia lao.