Lalohekwarahi​—“Kahana Ibounai amo Metau Idauidau ese Ai Idia Koua Noho”

TAUNIMANIMA ibounai​—Dirava ena hesiai taudia danu​—idia lalohekwarahi. Salamo torea tauna ia gwau: “Egu lalona ia hekwarahi mo- mo.” (Salamo 94:19) Bona Iesu ia gwau, dokona negana ai “mauri ena lalohekwarahi” ese Iehova hesiai henia karana ia hadikaia diba. (Luka 21:34) Oi be edena bamona? Moni, famili, o gorere dainai oi lalohekwarahi, a? Edena dala ai Iehova ese oi ia durua diba oi haheauka totona?

“Taunimanima Edia Siahu Ia Hereaia Gauna”

Namona be ta ese ita ia durua lalohekwarahi ita hanaia totona. Aposetolo Paulo ia gwau: “Kahana ibounai amo metau idauidau ese ai idia koua noho, to . . . ai laloa daradara.” Ma ia gwau, unai ese ita “idia koua momokani lasi,” “hanaia dalana ia noho” bona ita “idia hadikaia ore lasi.” Dahaka ese ita ia durua ita haheauka totona? “Taunimanima edia siahu ia hereaia gauna”​—unai be Iehova, eda siahu ibounai Diravana amo ia mai.​—2 Korinto 4:7-9.

Gunaguna unai “siahu” oi abia dalana oi laloa. Edena tok ese oi ia hagoadaia Iehova ena lalokau oi laloa bada totona? Haida dekenai Paradaiso helarona oi harorolaia neganai, unai ese oi ia hagoadaia Iehova ena gwauhamata ibounai oi abidadama henia totona, a? Hebou ibounai dekenai ita lao bona Dirava ena hereva be ma haida dekenai ita harorolaia neganai, goada ita abia lalohekwarahi ita hanaia bona mai lalomaino bona moale ida Iehova ita hesiai henia.

“Oi Mamia Toho, Bena Do Oi Diba, Iehova be Namo”

Nega haida metau idauidau be nega tamona idia vara. Hegeregere, Iehova ese ita ia noia Basileia ita atoa guna bona eda tomadiho karana ita goadalaia be namo. (Mataio 6:33; Luka 13:24) To, bema turadia o famili ese oi idia dagedage henia, oi gorere, o bese lalonai idia vara hekwakwanai dainai oi lalomanoka be edena bamona? Eiava bema emu nega bona goada be moni gaukara dekenai oi henia dainai, kongrigeisen oi bamoa lasi be edena bamona? Bema metau be momo​—bona nega o goada be bada lasi unai metau oi hanaia totona​—reana do oi lalohekwarahi. Reana oi laloa Iehova be oi ia doria oi karaia diba lasi gaudia oi karaia totona.

Iehova be ia laloparara. Ia be ita ia doria lasi ita karaia diba lasi gaudia ita karaia totona. Ena be ita hesiku o ita lalohekwarahi, to Dirava ia diba gabeai do ita namo lou.​—Salamo 103:13, 14.

Hegeregere, Iehova ese peroveta tauna Elia ia naria dalana mani oi laloa. Ena be Elia ia lalomanoka bona ia gari dainai taunimanima idia noho lasi tano dekenai ia heau lao, to Iehova ese ia gwau henia lasi bona ia doria lasi ia giroa lou ena gaukara ia karaia totona. Iehova be nega rua aneru ta ia siaia, Elia ia hanogaia namonamo bena aniani ia henia. Herevana dina 40 idia ore, to Elia ia lalohekwarahi bona gari noho. Edena dala ai Iehova be Elia ia durua noho? (1) Iehova ese ia hahedinaraia ia be Elia ia gimaia diba. (2) Iehova “be gado maragina, hereva manoka sibona” amo Elia ena lalona ia hagoadaia. (3) Iehova ese ia hahedinaraia taunimanima tausen momo be Dirava idia tomadiho henia danu. Daudau lasi murinai, Elia be ena peroveta gaukara ia karaia goada lou. (1 King Taudia 19:1-19) Unai amo dahaka ita dibaia? Lalohekwarahi negadiai, Iehova be mai haheauka bona hebogahisi ida Elia ia durua. Iehova ena kara be ia idau lasi. Ia be ita do ia durua namonamo danu.

Iehova dekenai oi henia diba gauna oi laloa neganai, namona be lalohadai maorona oi abia. Namo lasi hari oi karaia diba gauna be guna oi karaia gauna ida oi hahegeregerea. Haheitalai be inai: Treinini ia hadokoa heau helulu tauna ta be hua haida o lagani haida murinai ena treinini ia hamatamaia lou, to metairametaira unai ia karaia. Anina be, gau maragidia haida ia karaia ela bona ia goada momokani. Keristani taudia be heau helulu taudia bamona. Edia treinini lalonai tahua gauna tamona sibona idia laloa. (1 Korinto 9:24-27) Bema oi laloa emu tahua gauna ta be hari oi hagugurua diba, vadaeni unai oi karaia guna. Hegeregere, reana emu tahua gauna ta be, kongrigeisen hebouna ta oi lao be namo. Iehova oi noia, oi ia durua unai oi hagugurua totona. Oi goada oi lao lalonai, Iehova do “oi mamia toho, bena do oi diba, Iehova be namo.” (Salamo 34:8, BHḡ) Laloatao, bema oi karaia gauna maragina ta amo oi hahedinaraia Iehova oi lalokau henia, Ia be unai ia laloa bada.​—Luka 21:1-4.

“Lau Naria Noho Negana be Inai”

Edena dala ai Iehova ese June ia durua ia giroa lou totona? Taihu ia gwau: “Hanaihanai Iehova lau guriguri henia, lau noia lau ia durua totona. Daudau lasi murinai, egu ravana hahine be lau noho taoni ai do ia vara hebouhebouna ia herevalaia. Vadaeni, hebouhebou ena dina tamona lau lao. Lau moale badina Iehova ena taunimanima ida lau noho! Unai hebouhebou ese lau ia hagoadaia​—lau naria noho negana be inai. Hari mai moale ida Iehova lau hesiai henia lou. Lau dekenai mauri be mai anina. Hari lau diba, lau sibona lau noho o sibona lau durua be hegeregere lasi. Iehova lau tanikiu henia badina lau ia naria ela bona lau giroa lou.”