Daniela be Laiona Ena Guri Lalonai

Babulonia ena king ma ta be Dariuse, ia be Media tauna. Dariuse ia itaia Daniela be ma haida amo ia idau. Unai dainai Daniela be dagi bada taudia edia gunalaia tauna ai ia halaoa. To dagi bada taudia be Daniela dekenai idia mama bona idia ura ia idia hamasea. Idia diba Daniela be dina ta ta ai nega toi Iehova dekenai ia guriguri. Unai dainai idia gwau: ‘King e, namona be taravatu ta oi atoa, taunimanima be oi sibona dekenai do idia guriguri, bema ta be unai taravatu ia badinaia lasi, laiona ena guri dekenai do idia negea diho be namo.’ Dariuse be unai lalohadai ia ura henia bona taravatu ia sainia.

Daniela be taravatu matamata ia kamonai neganai, maoromaoro ena ruma dekenai ia lao. Windo vairanai ia tui diho bona Iehova dekenai ia guriguri. Unai dagi bada tatau idia lao ena ruma dekenai bona idia itaia ia guriguri noho. Dariuse dekenai idia heau lao bona idia gwau: ‘Daniela be oi ia badinaia lasi. Ia be dina ta ta ai nega toi, ena Dirava dekenai ia guriguri.’ Dariuse be Daniela ia ura henia bona ia ura lasi ia mase. Unai dina ai Daniela ia hamauria dalana ia laloa. To king be ia sainia taravatu do ia haidaua diba lasi. Unai dainai ena hesiai taudia ia oda henia Daniela be laiona ena guri ai idia negea diho totona.

Unai hanuaboi ai, Dariuse be Daniela totona ia lalohekwarahi dainai ia mahuta lasi. Daba ai, ia heau lao guri dekenai bona Daniela dekenai ia boiboi: ‘Emu Dirava ese oi ia hamauria, a?’

Dariuse be gadona ta ia kamonai. Unai be Daniela! Dariuse dekenai ia boiboi: ‘Iehova ena aneru ese laiona ena uduna ia koua. Lau idia haberoa lasi.’ Dariuse ia moale bada! Daniela be guri amo idia kokia totona oda ia henia. Daniela be bero ta ia abia lasi. Bena king ia gwau: ‘Daniela idia samania taudia be guri dekenai negea diho.’ Unai tatau idia negea diho neganai, laiona ese idia ania ore.

Dariuse ese ena taunimanima dekenai inai oda hereva ia siaia: ‘Taunimanima ibounai ese Daniela ena Dirava idia matauraia be namo. Ia ese laiona ena guri amo Daniela ia hamauria.’

Daniela hegeregerena, dina ta ta ai Iehova oi guriguri henia, a?