LESENI 59
Dagedage Oi Haheaukalaia Diba
Hari o nega vaira ai, taunimanima ese iseda tomadiho karana dainai ita do idia inai henia o dagedage henia. Unai dainai do ita gari, a?
1. Dahaka dainai ita diba dagedage do ita davaria?
Baibel ia gwau: “Keriso ida idia hakapua bona idia ura Dirava badinaia karana idia hahedinaraia taudia ibounai be dagedage do idia davaria danu.” (2 Timoteo 3:12) Iesu be Satani ese ia biagua tanobadana ena lasi dainai dagedage ia davaria. Ita danu be inai tanobada ena lasi dainai, gavamani eiava tomadiho oreadia ese ita idia dagedage henia neganai, do ita hoa lasi.—Ioane 15:18, 19.
2. Edena dala ai dagedage totona ita hegaegae diba?
Hari iseda abidadama Iehova dekenai do ita hagoadaia be namo. Dina ta ta ai nega do ita atoa ita guriguri henia bona iena Hereva ita duahia totona. Hanaihanai kongrigeisen heboudia do ita lao. Unai bamona oi karaia neganai, do oi goada bona mai gari lasi ida dagedage karadia oi haheaukalaia diba. Ruma bese edia dagedage karadia do oi haheaukalaia danu. Aposetolo Paulo be nega momo dagedage ia davaria, ia gwau: “Iehova be egu durua tauna, lau be do lau gari lasi.”—Heberu 13:6.
Hanaihanai ita haroro neganai iseda gari lasi karana ita hagoadaia. Haroro gaukara amo Iehova abidadama henia karana ita hagoadaia bona taunimanima ita gari henia lasi. (Aonega Herevadia 29:25) Bema hari mai gari lasi ida oi haroro noho, gavamani ese haroro gaukara idia taravatua neganai, do oi haroro noho danu.—1 Tesalonika 2:2.
3. Dagedage ita haheaukalaia ena namo be dahaka?
Oibe, dagedage ita davaria neganai ita moale lasi, to bema ita haheauka, eda abidadama do ia goada. Ita mamia ita manoka neganai, Iehova ese ita ia durua bona unai amo eda hetura karana ia ida ia goada. (Iamesi 1:2-4 duahia.) Hisihisi ita abia neganai Iehova ia lalohisihisi, to ita haheauka neganai ia moale. Baibel ia gwau: “Bema kara namo umui karaia dainai hisihisi umui abia bona umui haheauka, Dirava ese unai ia moalelaia.” (1 Petero 2:20) Bema ita gini goada noho, Iehova ese tanobada matamatana ai mauri hanaihanai ena ahuna be ita dekenai do ia henia. Unuseniai idia noho taudia ibounai be Iehova do idia tomadiho henia bona ta ese do ia dagedage henidia lasi.—Mataio 24:13.
DIBA MA HAIDA ABIA
Ena be taunimanima ese ita idia dagedage henia, to Iehova do ita abidadama henia noho diba bona ita do ia hanamoa dalana do oi dibaia.
4. Ruma bese edia dagedage karana oi haheaukalaia diba
Iesu ia diba iseda ruma bese lalonai haida do idia ura lasi ita be Iehova do ita tomadiho henia. Mataio 10:34-36 duahia, bena inai henanadai herevalaia:
Bema ta ia ura Iehova ia tomadiho henia, ruma bese lalonai dahaka ia vara diba?
Unai kara ena haheitalai ta itaia totona, VIDIO itaia, bona henanadai herevalaia.
Dahaka do oi karaia bema emu varavara o turana ta ese oi ia koua Iehova oi tomadiho henia lasi totona?
Salamo 27:10 bona Mareko 10:29, 30 duahia. Unai siri ta ta duahia murinai, inai henanadai herevalaia:
Ruma bese bona turadia ese oi idia dagedage henia neganai, edena dala ai unai gwauhamata ese oi ia durua diba?
5. Ena be dagedage oi davaria to Iehova oi tomadiho henia noho
Iehova ita tomadiho henia totona ma haida ese ita idia koua neganai, ita boga-auka be namo. VIDIO itaia, bona henanadai herevalaia.
Vidio lalonai oi itaia haheitalai ese edena dala ai emu boga-auka karana ia hagoadaia?
Kara 5:27-29 bona Heberu 10:24, 25 duahia. Unai siri ta ta duahia murinai, inai henanadai herevalaia:
Ena be gavamani ese iseda haroro gaukara o hebou idia taravatua, to dahaka dainai Iehova ita tomadiho henia noho be gau badana?
6. Iehova ena heduru amo do oi haheauka
Ena be tanobada hegegemadai Iehova ena Witnesses taudia buruka bona matamata be dagedage idia davaria, to mai abidadama ida Iehova idia tomadiho henia noho. Dahaka ese idia ia durua oi diba totona, VIDIO itaia. Bona henanadai herevalaia.
Vidio lalonai, dahaka ese Witnes taudia ia durua?
Roma 8:35, 37-39 bona Filipi 4:13 duahia. Unai siri ta ta duahia murinai, inai henanadai herevalaia:
Edena dala ai unai siri ese oi ia hagoadaia, unai amo dagedage idauidau oi haheaukalaia diba?
Mataio 5:10-12 duahia, bena inai henanadai herevalaia:
Dahaka dainai ena be dagedage oi davaria to oi moale diba?
Iehova idia tomadiho henia taudia milioni momo be dagedage idia haheaukalaia bona idia kwalimu. Oi danu oi kwalimu diba!
HAIDA IDIA GWAU: “Lau hegeregere lasi dagedage karana lau haheaukalaia totona.”
Edena siri amo idia oi hagoadaia diba?
POINT BADANA
Dagedage negadiai Iehova ita tomadiho henia noho dainai, Iehova be iseda hekwarahi ia laloa bada. Iena heduru amo, ita haheauka diba!
Riviu
Dahaka dainai Keristani taudia ese dagedage do idia davaria?
Hari dahaka do oi karaia, unai amo dagedage ia vara neganai oi haheauka diba?
Ena be hekwakwanai idia vara, to dahaka ese oi do ia durua Iehova oi hesiai henia noho totona?
REFERENS ITAIA
Tadikaka matamata ta be gini siri karana dainai, dibura ai idia atoa bona Iehova ena heduru amo ia haheauka dalana ia herevalaia do oi itaia.
Headava tau bona hahine be lagani momo lalonai dagedage idia davaria, to dahaka ese idia ia durua mai abidadama ida Iehova idia hesiai henia noho ena sivarai do oi itaia.
Tanobada Oromana Ia Idau To Iehova Hesiai Henia Noho (7:11)
Mai gari lasi ida dagedage oi haheaukalaia dalana do oi dibaia.
“Dagedage Ia Do Vara Lasi Lalonai Oi Hegaegae” (Gima Kohorona, July 2019)
Ruma bese ese ita idia dagedage henia karana be edena bamona ita laloa be namo, bona edena dala ai maino ai do ita noho bona Iehova ita badinaia noho diba?
“Hereva Momokani ese ‘Maino Lasi, To Tuari Kaia [Ia] Mailaia’”(Gima Kohorona, October 2017)