Hamatamaia Hereva

Keristani Mauri Totona Baibel Siri Idauidau bukana be oi do ia durua Baibel siri oi davaria haraga totona bona idia noho Baibel sivarai amo hekwakwanai oi haheaukalaia dalana do oi dibaia. Danu Baibel siri maorodia oi abia hidi haraga diba, ma haida oi hagoadaia Iehova hanamoa ena abia hidi maorodia idia karaia totona. Oi ura henia topik dekenai oi lao, bena henanadai bona Baibel sivarai kwadogidia oi itaia. (Maua “Inai Pablikeisen Gaukaralaia Dalana” itaia.) Dirava ena Hereva amo idia mai sisiba, hakaua hereva, bona hagoadaia hereva namodia momo do oi davaria. Ma haida ida do oi herevalaia Baibel siri idauidau do oi davaria danu, unai ese edia hekwakwanai lalonai idia do ia hagoadaia bona sisiba bona heduru hereva do idia abia.

Inai Buka Gaukaralaia Dalana

Topik ta oi davaria totona, search box oi gaukaralaia, eiava topik edia kahana ta ta hegeregerena oi tahua. Inai buka Keristani Maurina Totona Baibel Siri Idauidau ena topik ta ta be kahana 7 ai idia hapararaia. Unai be: Dina Ta Ta Maurina, Hetura Karana Iehova Ida, Iseda Kara Idauidau, Kara Maoro Bona Kara Kerere, Kongrigeisen, Problem, bona Ruma Bese. Topik momo be unai kahana ta ta henunai. Kahana maorona oi abia hidi bona topik edia lista oi sekedia. To, bema oi daradara oi ura henia topik be edena kahana ai ia noho, Topik Ibounai oi abia hidi bona lista oi sekea ela bona oi ura henia topik maorona oi davaria. Do oi itaia topik ta ta henunai, sinado be toretore koremana ai idia torea. Hereva haida be henanadai to ma haida be lasi. Sinado henunai, Baibel siri be toretore koremana ai idia noho, unai oi duahia neganai, idia noho henanadai o hereva ia durua dalana oi laloa dobu. Nega haida, topik be hereva kwarana maragidia amo idia hapararaia, unai ese oi do ia durua infomeisen oi davaria totona. Gabu haida ai Baibel siri ma haida idia makaia “itaia danu.” Unai siri ese topik ena lalohadai idia durua. Nega momo, “Baibel sivarai haida” edia lista do oi itaia danu. Unai kahana ai sentens ta ese siri ena point badana o leseni ia herevalaia. Baibel siri oi duahia neganai, unai sentens oi gaukaralaia emu laloa dalana ia hakaua totona.

Inai buka lalonai topik ta ta ena Baibel siri haida sibona idia noho. Inai be research oi karaia matamaia ena dala namo hereana. (Ao 2:1-6) Diba ma haida abia totona, New World Translation of the Holy Scriptures ena majinol referens oi gaukaralaia. Sibona emu stadi ai, Iehova Ena Witnes Taudia Edia Stadi Indeks eiava Watch Tower Publications Index oi gaukaralaia, Baibel siri edia anina bona unai oi badinaia dalana oi diba namonamo totona. Emu laloparara be Baibel ena hahediba hereva matamatadia ida idia hegeregere totona, pablikeisen matamatadia oi sekea.

Namona be Keristani Mauri Totona Baibel Siri Idauidau bukana ese oi do ia durua Toretore Helagadia ai idia noho aonega, diba bona laloparara oi davaria totona. Inai buka oi gaukaralaia amo, do oi abia dae momokani “Dirava ena hereva be ia mauri noho, bona ia be mai ena siahu.”—He 4:12.