Hahenamo Ena Revareva Ta

Lalokau Tadikaka e,

Umui gwau Mauri Hanaihanai Paradaiso Lalonai bukana be “hadibaia buka namona,” bona emui hereva be momokani.

Unai buka lau kehoa bona lau raraia matamaia neganai lau lalo-rua sisina. Momokani unai buka be mai hairaina bona ena hereva be auka lasi taunimanima idia lalo-pararalaia totona, to ruma ta ruma ta ai, bona opesi ai lau davaria taudia, bona egu ruma kahirakahira taudia do idia ura henia bada eiava?

Haere be oibe, idia iboudiai idia ura henia! Doketa ena opesi dekenai lau gaukara bona buka momo be unuseniai lau haridia, bona egu ruma kahirakahira dekenai ia noho kekenina ese ta ia abia.

Unai kekeni ena mauri lagani be 13. Diba ia abia haraga bona mai moale danu ia herevahereva momo bona ia marere momo danu, iena kara unai.

Adorahi ta dekenai, egu natuna kekenina ia vadivadi henia neganai, unai “buka kakakakana” ia abia isi. Vadaeni unai buka ese iena kara ia haidaua momokani. Ia ese karoa ginigunana sibona ia stadilaia, to hebou dekenai ia mai ena tamana ese gwaumaoro ia henia negadia iboudiai, ena daiutu ia hagoevaia; hereva miro ia gwauraia lasi; hebamo dikadia bona miusik dikadia ia dadaraidia. Hari ia hereva momo lasi, ia manau bona ia lau moalelaia. Ena kara ia haidaua bada dainai, hari ena sinana danu ia ura unai buka ia stadilaia, badina ia ura ena natuna kekeni hegeregerena, ia danu ia moale bada.

Lau diba lasi dahaka do ia vara, to mai guriguri danu, lau ura idia ruaosi ese Iehova bona ena Natuna do idia lalokau henia bada, bena gabeai idia danu be unai “buka kakakakana” amo taunimanima ma haida do idia durudia.

Egu Lalokau Bada Lau Siaia,

D. L. F.