Iesu ena Mauri bona Gaukara

Ena Hanua ena Dubu Ai

IESU be ena hanua, Nasaret, dekenai ia giroa lou neganai, hanua taudia idia moale. Lagani ta bamona gunanai, Iesu be hanua ia rakatania Ioane ese ia bapatisoa totona neganai, idia diba Iesu be kapenta tauna. To hari, taunimanima momo idia diba ia be hoa karadia ia karaia diba. Ena hanua taudia idia ura ena hoa karadia haida do idia itaia.

Edia ura ia bada ia lao, lesu be vaia hanua ena dubu dekenai ia lao neganai. Hebou lalonai, buka duahia totona ia toreisi bena Peroveta tauna Isaia ena buka idia henia. la kehoa gabuna be Iehova ena lauma ese ia horoa Tauna ena sivarai ia gwauraia. Iseda Buka Helaga lalonai unai sivarai be Isaia karoa 61 lalonai.

Ia duahia herevana ena anina be inai: unai Tauna ese guia taudia ruhadia herevana bona matakepulu taudia edia matana kehoa herevana bona Iehova ena hahenamo laganina ena hereva do ia harorolaia. Iesu ia duahia murinai, naria tauna dekenai buka ia henia lou, bena ia helai diho. Idia iboudiai ese ia idia raraia tao. Bena ia haroro hamatamaia; ia gwau: “Inai umui kamonaia herevana be hari dina ia momokani vadaeni.”

Taunimanima ese ena “hereva namodia” idia hoalaidia, idia gwau: “Inai be Iosepa ena natuna lasi, a?” Vadaeni, Iesu ia diba idia ura ia ese hoa karadia do ia karaia, Iesu be edia lalohadai ia diba, unai dainai ia gwau: “Inai hereva be momokani do umui gwauraia lau dekenai, do umui gwau, ‘Doketa tauna e, oi sibona do oi hamauria, Kaperanauma dekenai oi karaia edia sivaraina ai kamonai, be iniseniai, oiemu hanua korikori dekenai danu oi karaia.’” Hanua taudia idia laloa, namona be sibona ena hanua ai gorere taudia ia hanamodia guna be namo. Idia laloa Iesu ese ia dadaraidia.

Iesu be edia lalohadai ia diba, unai dainai mai anina sivaraina ia hamaorodia. Ia gwau, Israel lalonai, Elia ena negai, vabu momo idia noho, to Dirava ese Elia idia dekenai ia siaia lasi. To idau, ia lao Israel lasi vabuna ta dekenai, Sidono ai, bona ena mase natuna ia hamauria lou. EIisaia ena negai danu, lepra taudia be momo, to Elisaia ese Naaman, Suria tauna, sibona ia hanamoa.

Vadaeni, dubu lalonai idia noho taudia be unai sivarai idia kamonai neganai idia badu, badina ia hahedinaraia idia ese sibodia edia namo idia tahua bona edia abidadama be lasi. Unai dainai idia toreisi, hanua amo Iesu idia doria lasi. Nasaret hanuana idia haginia ororona dekenai idia veria lao, ororo dekena amo idia negea diho gwauraia. To ia be edia huana dekena amo ia raka oho. Luka 4:16-30; 1 Hanua Pavapavadia 17:8-16; 2 Hanua Pavapavadia 5:8-14.

◆ Dahaka dainai Nasaret dekenai taunimanima idia moale?

◆ Hanua taudia ese Iesu ena hereva edena bamona idia laloa, to gabeai dahaka ese ia habadudia?

◆ Iesu dekenai dahaka idia karaia toho?