Lalokau Karadia Badadia Ruaosi

“Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be … mauri hanaihanai do idia abia.”—IOANE 3:16.

1 Inai hereva “Dirava be lalokau” ena anina be dahaka?

“DIRAVA be lalokau” Aposetolo Ioane ese unai hereva ia gwauraia nega rua. (1 Ioane 4:8, 16) Oibe, Iehova Dirava ena lalokau ese ena aonega bona ena siahu ia hanaia; dala hereadaena amo ia be lalokau. Ia lalonai lalokau ia hedinarai goevagoeva. Namona be oi be sibona dekenai oi henanadai, oi gwau: ‘Lau diba dahaka dainai unai hereva be momokani, a? Iena kara edia sivarai amo lau hamomokania diba Ia be lalokau, a? Bona inai ena anina lauegu mauri bona lauegu kara dekenai be dahaka?’

2 Dirava ese edena dala amo iena lalokau ia hahedinaraia vadaeni?

² Iehova Dirava ese taunimanima na tanobada dekenai ia karadia mai ena lalokau bada ida! Inai gau mani oi laloa namonamo: iseda matana edia hairai bona edia gaukara, iseda turia edia goada, iseda varovaro edia siahu, bona iseda ima kwakikwakidia edia hemami siahuna. Salamo torea tauna ena lalohadai ita gwauraia be mai ena badina; ia gwau: “Oi do lau hanamoa, badina be gari bona hoa havaraia dalanai lau oi karaia.” Inai gau danu mani oi laloa: ororo badadia, sinavai maragidia mai edia ranu negarina, uda dekenai idia tubu flaoaflaoadia, bona dina ia diho negadia edia hairai. “Iehova e, oi karaia gaudia be momo herea! Iboudiai be mai emu aonega ida oi karaia vadaeni. Oi karaia gaudia ese tanobada idia hahonua.”—Salamo 139:13, 14; 104:24.

3, 4. Dirava ena lalokau karadia haida, Heberu Revarevadia lalodiai idia torelaia, be dahaka dahaka?

³ Ia karadia taudia ginigunadia idia gwau-edeede neganai, Dirava ena lalokau ia ore lasi. Iehova ese lalokau ia hahedinaraia dalana ta be inai: Unai tau mai ena adavana ida ia koudia lasi dainai idia ese edia natudia idia havaradia, unai natudia be Iehova ese ena gwauhamata “garana” ena amo do ia henia gauna ese do ia hanamodia totona. (Genese 3:15) Gabeai, Noa ia hagania, vanagi ta do ia karaia, taunimanima bona animal hamauridia totona. (Genese 6:13-21) Bena ia ese lalokau bada ia hahedinaraia Abraham dekenai, unai tau be gabeai idia gwauraia Iehova ena turana. (Genese 18:19; Isaia 41:8) Abraham ena bese taudia be Egypt ena dibura gaukarana amo ia hamauridia neganai, Iehova ese ena lalokau ma ia hahedinaraia lou, Deuteronomi 7:8 ese ia gwauraia hegeregerena: “To Iehova ese umui ia lalokau henia … unai dainai mai ena imana siahuna ida umui ia hakaua lasi.”

⁴ Ena be Israel taudia be idia hahedinaraia loulou Dirava ena heduru idia laloa lasi, bona idia gwau-edeede henia loulou, to ia dadaraidia haraga lasi. Lasi, to ia noidia mai ena lalokau ida, ia gwau: “Emui kara dikadia amo umui giroa. Israel besena e, anina be dahaka do umui mase?” (Esekiel 33:11) To, ena be Iehova ena kara korikori be lalokau, to ia be mai ena kara maoromaoro bona aonega ida danu. Unai dainai nega ia ginidae, iena haheauka iena gwau-edeede bese taudia dekenai be ia doko! Edia dika be bada herea dainai “hanamodia lou dalana be lasi,” unai dainai ia kahudia nege Babulono dekenai idia dibura totona. (2 Sisiga 36:15, 16) To unai neganai danu Dirava ena lalokau be ia ore vaitani lasi. Lagani 70 murinai dala ia kehoa, idia haida be edia tano korikorina dekenai do idia giroa lou totona. Idia giroa lou taudia edia lalohadai oi diba totona, mani oi ese Salamo 126 oi duahia.

Iena Lalokau Karana Badana Totona Ia Hegaegae

5. Dahaka dainai ita gwau iena Natuna be tanobada dekenai ia siaia neganai Dirava ese ena lalokau ia hahedinaraia unai?

⁵ Ma lagani momo murinai nega ia ginidae, Iehova ese ena lalokau karana badana do ia karaia. Mai ena lalokau korikori ida Dirava ese sibona ena Natuna ia henia gwauraia. Unai dainai ena Natuna ena mauri be guba ena lauma gabuna amo ia abia diho, Iuda hane-ulatona Maria ena bogana lalonai ia atoa vareai. (Mataio 1:20-23; Luka 1:26-35) Mani oi laloa, guna Iehova be ena Natuna ida idia hebamo heheni namo herea. Iesu be taunimanima ta ai ia do lao lasi neganai, ia be sibona ia gwauraia, ia gwau: “Unai neganai lau be ia kahirakahira dekenai lau noho, gaukara diba momo tauna bamona; dina iboudiai ia ese lau ia moalelaia, bona lau be iena vairanai lau moale nega ibounai.” (Hereva Lada-isidia 8:30, 31) Vadaeni, Iehova ese ena Natuna unai bamona ia siaia diho neganai, ia be sibona ena namo ia dadaraia, ani?

6. Iesu ena vara lagani be do momo lasi neganai, iena Tamana Iehova ese edena bamona ia laloa bada?

⁶ Momokani, iena natuna be Maria ena bogana lalonai ia tubu matamaia negana ela Iehova ese ia raraia mai ena ura bada danu. Dirava ena lauma helaga ese Maria ia naria, ena natuna iena bogana lalonai be gau ta ese do ia hadikaia garina. Iehova ese dala ia karaia, Iosef bona Maria be Betelehem dekenai do idia lao edia ladana torea totona; unai amo Iesu be unuseniai ia vara, Mika 5:2 hamomokania totona. Aneru ta ena amo, Dirava ese Iosef ia hadibaia King Herod ese ena natuna ia alaia mase gwauraia, unai dainai Iosef be mai ena adavana bona natuna ida idia heau Egypt dekenai, bena unuseniai idia noho ela bona Herod ia mase. (Mataio 2:13-15) Vadaeni, Iesu ia goada ia lao noho lalonai, Dirava ese ia laloa bada noho. Iesu ena mauri lagani be 12 neganai, dubu helaga lalonai ia ese ena henanadai bona haere amo hadibaia taudia bona ma haida ia hahoadia; unai neganai Dirava ese ia raraia mai ena moale bada danu!—Luka 2:42-47.

7. Dahaka hereva toi ese idia hahedinaraia Dirava ese Iesu ena haroro gaukarana ia laloa bada?

⁷ Ma lagani 18 idia ore murinai Iehova ese Iesu ia itaia tao, Iesu be bapatiso abia totona Ioane Bapatiso dekenai ia mai neganai. Unai neganai ia ese ena lauma helaga ia siaia diho Iesu latanai, ia gwau: “Inai be lauegu Natuna, egu lalokau, lau moale bada ia dekenai.” (Mataio 3:17) Keristen tataudia bema idia be mai edia natudia, idia diba Dirava ia moale bada Iesu ena haroro gaukara ia itaia neganai, badina be Iesu ese taunimanima ia hamaorodia iena Tamana guba dekenai do idia hanamoa. Nega ta Iesu ese aposetolo taudia haida ia hakaudia daekau ororo badana ta dekenai. Unuseniai Iehova ese Keriso na hairai idauna amo ia hadiaria, ma ia gwau: “Egu Natuna be inai, lauegu lalokau tauna. Lauegu lalona ia moale ia dekenai. Iena hereva do umui kamonai henia.” (Mataio 17:5) Iesu ese Dirava ia noia ia be sibona ena ladana do ia hanamoa, bena Iehova be nega ihatoina ia hereva hedinarai, ia gwau: “Lau hanamoa vadaeni, ma do lau hanamoa lou.” Unai bamona ia hereva Iesu durua totona. Unai neganai Iesu ena bamona haida idia laloa aneru ta ia hereva, ma haida idia laloa guba ia boiboi.—Ioane 12:28, 29.

8. Oi ese Dirava ena lalokau edena bamona oi laloa?

⁸ Inai sivarai kwadogina, Dirava ese ena Natuna dekenai ia karaia karadia bona ena namo ia laloa bada sivaraina dainai dahaka oi laloa? Inai sivarai ese ia hahedinaraia goevagoeva, Iehova ese ena Natuna, ia sibona ia havaraia Natuna tamona, ia lalokau henia bada. Unai iena lalokau bona taunimanima ta ese ena natuna tamona ia henia lalokauna danu oi laloa noho lalonai, mani oi ese unai murinai ia vara gauna oi laloa—Iesu be boubou gauna ta bamona ia mase.

Lalokau Karana Badana

9, 10. Dirava ena lalokau karana bada hereana taunimanima dekenai be dahaka, bona unai ese dahaka siri Bible lalonai ia hamomokania?

⁹ Bible ese ia hahedinaraia iseda Tamana guba dekenai ese iseda lalohisihisi ena mamina ia abia. Isaia 63:9 ese ena bese Israel inai bamona ia gwauraia: “Edia hisihisi iboudiai ia ese ia hisihisilaia, bona ena vairana amo ia mai aneruna ese ia hamauridia. Ena lalokau bona ena hebogahisi ai ia ese ia hoidia lou, nega gunadia iboudiai lalodiai ia ese ia abidia isi bona ia huadia.” Vadaeni, Iesu be Getesemane umana lalonai Dirava ia guriguri henia “mai taitai bona mai matana ranu danu” neganai, Iehova ese unai ia hisihisilaia bada herea. (Heberu 5:7) Iesu be dibura ai idia koua, idia kota henia koikoi, idia botaia bona idia dadabaia, bona kwara gauna ta be ava ginigini amo idia karaia bena iena kwarana dekenai idia atoa. Mani oi laloa, iena lalokau Tamana ese unai ibounai ia itaia noho. Satauro ena metau dainai Iesu ia hekwakwanai neganai, ia ese unai danu ia itaia, bona ena Natuna be unai satauro dekenai idia kokoa kau neganai, ia ese ia itaia. Mani inai ita laloaboio lasi, Dirava ese ena lalokau Natuna ena hisihisi ia koua diba. To Iehova ese ia koua lasi dainai Iesu ese hisihisi bada ia ania. Dirava be mai ena hebogahisi, unai dainai ena lalona ia hisihisi bada herea, Iesu ena hisihisi ia itaia neganai.

¹⁰ Unai ibounai dainai, ita diba Iesu ena hereva Nikodemo dekenai be mai anina bada; ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Ioane, Iesu ena lalokau aposetolo tauna, ena hereva danu ena anina be unai bamona; ia gwau: “Dirava ese iena lalokau ita dekenai be inai bamona ia hedinaraia: Ia ese iena Natuna tamona tanobada dekenai ia siaia … ia sibona be iseda dika gwauatao dalana totona.”—1 Ioane 4:9, 10.

11. Aposetolo Paulo ese Dirava ena lalokau karana bada hereana edena bamona ia gwauraia hedinarai namonamo?

¹¹ Vadaeni, oi diba badina be dahaka aposetolo Paulo be Roma 5:6-8 dekenai Iehova Dirava ena lalokau bada be inai bamona ia gwauraia: “Badina be ita be do manokamanoka noho neganai, Keriso ia mase dika taudia totona, Dirava ena nega korikori dekenai. Kara maoromaoro tauna dainai be daika do ia mase? Sedira ta lasi. Sedira tau ta ese tau namona ta dainai do ia mase diba. To Dirava ese iena lalokau badana ia hedinaraia ita dekenai, badina ita be do kara dika noho taudia neganai Keriso be ita dainai ia mase.” Iehova Dirava ese iena Natuna, ia sibona ia havaraia Natuna tamona, tanobada dekenai ia siaia mai, hisihisi do ia ania bona dala dika rohorohona amo do ia mase totona; momokani, unai neganai Iehova Dirava ese lalokau karana bada hereana ia karaia, lalokau karana ma ta be unai hegeregerena lasi.

Lalokau Karana Badana Iharuana

12, 13. (a) Dahaka dainai Iesu ena lalokau karana be idau vaitani? (b) Paulo ese Iesu ena lalokau bada edena bamona ia gwauraia?

¹² Reana oi henanadai, oi gwau, ‘Unai murinai lalokau karana badana ma ta be dahaka?’ Iesu Keriso ia gwau: “Lalokau namo herea momokani be inai, tau ta ena mauri do ia atoa diho, ena turana totona.” (Ioane 15:13) Momokani, matamana negana amo ema bona hari, taunimanima haida ese edia mauri idia atoa diho, ma haida dainai. To edia mauri be mauri mai ena dokona; bema edia mauri idia atoa diho guna lasi, gabeai idia be dala idauna amo idia mase. To Iesu Keriso be taunimanima goevadaena ta, ia be mai ena maoro mauri do ia abia. Taunimanima oredia iboudiai be Adam ena kerere dainai idia mase gwauraia, to ia be unai bamona lasi; bona bema Iesu ena lalona ia hegeregere lasi, ta ese ia alaia mase diba lasi. (Ioane 10:18; Heberu 7:26) Iena hereva mani oi laloa, ia gwau: “Oi laloa lau be siahu lasi a, lauegu Tamana bema lau noia, be ia ese aneru orea 12, bona ma haida danu do ia siaia, lau dekenai durua henia totona?”—Mataio 26:53; Ioane 10:17, 18.

¹³ Iesu ena lalokau ita laloa namonamo totona, mani inai danu ita laloa: Guna ia be lauma ta mai ena hairai bada guba dekenai; unuseniai ia ese guba bona tanobada edia noho hanaihanai Pavapavana ia bamoa bona ia ida idia gaukara hebou. To Iesu be mai ena lalokau bona sibona ena namo ia tahua lasi, unai dainai aposetolo Paulo ena hereva hegeregerena: “Ena be ia be Dirava ena oromana hegeregerena ai ia noho, to ia laloa lasi dala do ia tahua ia be Dirava ida do idia hegeregere totona. Lasi, to iena dagi badana ia negea, hesiai tauna ena oromana ia abia, bona taunimanima edia oromana ai ia vara. Unai sibona lasi. To iena oromana be taunimanima edia oromana hegeregerena neganai, ia be sibona ia hamanaua bona Dirava ia kamonai henia ela bona mase, oibe hahisia auna ena mase.”—Filipi 2:6-8.

14. Peroveta tauna Isaia ese Iesu ena lalokau karana badana edena bamona ia gwauraia?

¹⁴ Unai be lalokau karana ta ani? Momokani, iena Tamana guba dekenai, Iehova Dirava, ena lalokau karana mo sibona ese ia hanaia. Isaia karoa 53 ena peroveta herevadia ese Iesu ena hisihisi idia gwauraia, idia gwau: Taunimanima ese idia dadaraia bona idia rakatania, lalohisihisi tauna, gorere be ia diba. … Momokani, ia ese iseda gorere ia huaia, bona iseda lalohisihisi danu. To iseda lalona dekenai ita gwau ia be Dirava ese ia panisia bona ia hadikaia bona ia hahisia tauna. To iseda kerere dainai idia gwadaia; bona iseda kara dika dainai idia hahisihisia. … Iena bero dainai ita namo lou. … Ia ese ena mauri ia bubua nege mase dekenai.”—Isaia 53:3-5, 12.

15, 16. Iesu be dahaka ia gwau, unai hereva amo ita diba ia be sibona ena ura ia dadaraia?

¹⁵ Iena mase dainai do idia vara gaudia iboudiai dainai, Iesu be Getesemane umana dekenai ia guriguri, ia gwau: “Egu Tamana e, bema mai dala, inai kapusi lau dekena amo do oi kokia. To lauegu ura lasi, oiemu ura sibona.” (Mataio 26:39) Unai bamona ia hereva neganai, Iesu be dahaka ia noinoilaia? Ia ura lasi “Dirava ena Mamoe Natuna … tanobada ena dika kokia tauna” ai do ia lao, a? (Ioane 1:29) Lasi, ena hereva ena anina be unai lasi, badina be Iesu ese ena hahediba taudia ia hamaorodia loulou vadaeni, ia be hisihisi do ia ania bena do ia mase; ena mase dalana danu ia gwauraia hedinarai vadaeni. (Mataio 16:21; Ioane 3:14) Unai dainai, Iesu be unai bamona ia guriguri neganai gau idauna ta ia laloa noho.

¹⁶ Momokani, Iesu ia lalo-hekwarahi badina be ia diba ia do idia samania, do idia gwau ena hereva amo Dirava ia hadikaia; Iuda taudia vairadiai unai be kerere bada hereana. Badina be dahaka unai samani herevana koikoina dainai ia laloa momo? Badina be unai bamona do ia mase neganai, unai ese ena Tamana guba dekenai ena ladana do ia hadikaia. Oibe, Dirava ena Natuna hereadaena, kara maoromaoro ia ura henia bada bona kara dika ia inai henia bada bona ena Tamana ena ladana hanamoa totona tanobada dekenai ia mai tauna, be Dirava sibona ena bese taudia ese idia hamasea gwauraia, badina be idia laloa ia be lehova Dirava hadikaia tauna ta.—Heberu 1:9; Ioane 17:4.

17. Dahaka dainai Iesu ia lalo-hekwarahi bada, iena mase ia laloa guna neganai?

¹⁷ Iesu be guna ia gwau: “Lau be mai egu bapatiso, inai bapatiso do idia henia lau, bona lauegu lalona do ia laga-ani diba lasi ela bona lau abia momokani.” (Luka 12:50) Vadaeni, unai neganai ia be unai bapatiso ia abia momokani gwauraia. Unai dainai iena kopina ena siahu ranuna be rara bamona ai ia lao. (Luka 22:44) Danu, unai hanuaboi ai maduna bada hereana be iena pagana latanai ia noho, unai maduna ita lalo-pararalaia diba lasi. Ia diba Dirava do ia badinaia noho be gau badana, badina be bema ia moru, unai ese Iehova do ia hahemaraia bada! Satana do ia gwau ia be maoro bona Dirava Iehova be ia kerere. To Satana Diabolo hemarai bada herea, badina be Iesu ese Dirava ia badinaia ela bona mase! Unai amo ia ese ia hahedinaraia Satana be koikoi tauna dika rohorohona.—Hereva Lada-isidia 27:11.

18. Iehova Dirava bona Iesu Keriso edia lalokau karadia bada hereadia dainai dahaka ita karaia be namo?

¹⁸ Iehova Dirava ese ena Natuna ena kamonai ia abidadama henia bada dainai, ia ese Iesu ena kamonai karana ia perovetalaia. (Isaia 53:9-12) To Iesu be ia diba kara maoromaoro badinaia karana ena maduna be ia sibona latanai ia noho. Ia moru diba. Kara dika ia karaia diba. (Luka 12:50) Ia sibona ena mauri hanaihanai bona taunimanima iboudiai edia danu be unai hanuaboi ai idia boio diba. Unai dainai lesu ia lalo-hekwarahi bada herea! Ita goevadae lasi taudia be ita manoka dainai bema ita kara dika, ita be tau ma ta ena boubou karana dainai hebogahisi ita noinoilaia diba, to bema Iesu be ia manoka ia lao bona kara dika ia karaia, ia be unai bamona ia noinoi diba lasi.

19. Iesu be sibona ena ura ia dadaraia dainai ia be dahaka hahenamo ia havaraia?

¹⁹ Momokani, Iesu be Nisan 14, 33 C.E. ai ia haheauka neganai, sibona ena namo ia dadaraia bona lalokau bada herea ia hahedinaraia; taunimanima ma ta ese unai bamona lalokau ia hahedinaraia lasi, Iehova Dirava ena lalokau sibona ese ia hanaia. Bona iena mase amo Iesu ese gau namo hereadia ia karaia ita dainai! Iena mase amo ia be “Dirava ena Mamoe Natuna … tanobada ena dika kokia tauna” ai ia lao. (Ioane 1:29) Dala ia kehoa, ia murinai idia raka taudia 144,000 be pavapava ai bona hahelaga taudia ai do idia lao bona ia ida do idia lohia hebou ela bona lagani 1,000 do idia ore. (Apokalupo 20:4, 6) Danu, hari inai negai “mamoe idaudia” “hutuma bada herea” be Keriso ena boubou karana amo namo idia davaria bona edia helaro be inai nega dikana ena dokona amo do idia roho mauri. Tanobada ena paradaiso ena hahenamo do idia moalelaia taudia ginigunadia unai. Bona taunimanima milion milion be Iesu ese ia karaia karana dainai do idia toreisi lou. Idia danu ese dala do idia davaria, mauri hanaihanai be tanobada ena Paradaiso lalonai do idia abia totona. (Apokalupo 7:9-14; Ioane 10:16; 5:28, 29) Momokani, “Keriso be Dirava ena gwauhamata ibounai edia ‘oibe.’”—2 Korinto 1:20.

20. Iehova Dirava bona Iesu Keriso edia lalokau karadia bada hereadia dainai dahaka ita karaia be namo?

²⁰ Vadaeni, namona be ita hahedinaraia ita ese Iehova Dirava bona Iesu Keriso edia lalokau karadia ita laloa bada, ita dainai idia karaia karadia unai. Edia kara be unai bamona ita laloa bada be maoro, bona unai kara ena hahenamo ita abia vaitani totona, namona be iseda kara amo ita hahedinaraia ita laloa bada. Hahedinaraia daladia namodia be stadi herevana gabena ese do ia hahedinaraia.

Inai Oi Laloatao A?

□ Dirava ena lalokau karadia, taunimanima iboudiai idia itaia diba karadia, be dahaka dahaka?

□ Edena bamona ita diba Iehova ena lalona ia hisihisi iena Natuna ena hisihisi ia itaia neganai?

□ Iesu be taunimanima dainai ia mase neganai, iena mase be edena bamona ia idau, sibodia edia mauri idia atoa diho taudia oredia edia mase hegeregerena lasi ?

□ Iehova bona Iesu ese ita idia lalokau henia dainai, dahaka ita karaia be namo?