Edia Lalokau Karadia Dainai Tanikiu Henidia Dalana
“Ita be mai iseda lalokau bona ena badina korikori be inai: Dirava ese ita ia lalokau henia guna.”—1 IOANE 4:19.
1. Iesu be dahaka ia karaia, ita danu be unai do ita karaia totona?
IEHOVA Dirava bona Iesu Keriso ese lalokau bada idia hahedinaraia ita dekenai; vadaeni ita be edena dala amo ita tanikiu henidia badabada diba? Dala ginigunana be Iesu ena kara ita tohotohoa, ia ese ena Tamana ena ladana bona Basileia ia harorolaia goadagoada, unai gaukara ia hesikulaia lasi. (1 Petro 2:21) Unai gaukara be taunimanima edia ruma lalodiai, dubu lalodiai, ororo dekenai, bona kone dekenai danu ia karaia. Vadaeni, mani ita ese tanikiu henidia daladia idauidau 9 ita lalohadailaia.
Ruma ta Ruma ta Gaukarana
2. Ruma ta ruma gaukara lalonai edena bamona oi haheauka diba?
2 Iseda lalokau bona ura-heni ita hahedinaraia diba dalana ginigunana bona badana be inai: Dirava ena Basileia ena sivarai namona be ruma ta ruma ta dekenai ita loaloalaia. Unai ita karaia neganai, namona be ita hereva mai eda goada danu, badina be ita hedavari henidia taudia momo ese iseda hereva do idia moalelaia lasi. Ita be ruma ta ruma ta dekenai ita lao loulou totona, namona be Dirava bona iseda dekena taudia ita lalokau henidia momokani, badina be haida ese iseda hereva do idia laloa maragi, ita do idia badu henia, ita do idia dadaraia, eiava ita do idia dagedage henia.—Esekiel 3:7-9 itaia.
3. Bible ese edena bamona ia hamomokania ruma ta ruma ta gaukarana ita karaia be maoro?
3 Iesu ese ena aposetolo 12 ia oda henidia guna bena gabeai ia ese sivarai namona harorolaia taudia 70 ia oda henidia; iena hahegani herevadia, Evanelia bukadia lalodiai idia torea, ese idia hahedinaraia goevagoeva, idia be ruma ta ruma ta dekenai do idia lao, Dirava ena Basileia ena sivarai namona do idia harorolaia. (Mataio 10:5-14; Luka 10:1-7) Aposetolo edia Kara 20:20 dekenai aposetolo Paulo ia gwau ia be ruma ta ruma ta dekenai ia lao. Haida idia gwau iena hereva ena anina be ia ese ekalesia taudia ia vadivadi henidia unai, to siri 21 ese ia hahedinaraia goevagoeva ia be gaukara idauna ia herevalaia unai, badina be Paulo be ma ia gwau: “Iuda taudia bona Helene taudia danu dekenai lau sisiba henidia goada edia lalona do idia giroa Dirava dekenai, bona Lohiabada Iesu do idia abidadama henia.” Elda ta ese ena Keristen tadikaka bona taihu ia vadivadi henidia neganai, ia sisiba henidia goada lasi ‘edia lalona do idia giroa Dirava dekenai bona Iesu do idia abidadama henia.’ Lasi, to ena Keristen bamodia edia lalona ia hagoadaia, edia hebou karadia eiava haroro gaukarana idia laloa bada totona, eiava ia durudia edia hekwakwanai kokidia totona.
4. Dahaka ese iseda lalona ia hagoadaia ruma ta ruma ta gaukarana ita karaia totona?
4 Buka Helaga ese ia hahedinaraia goevagoeva ita be ruma ta ruma ta dekenai ita lao be maoro, bona unai gaukara ena huahua ese ia hahedinaraia Iehova ese ia hanamoa. Oibe, “Dirava ena aonega ese anina namona do ia havaraia. Inai dekena amo ita diba Dirava ena aonega be momokani.” (Mataio 11:19) Nega momo, ruma ta ruma ta dekenai idia lao taudia ese gau haida idia itaia, unai gau ese idia hamomokania aneru ese idia hakaudia lao kara maoromaoro hitolona idia hitolo bona ranu-masena idia ranu mase taudia dekenai. Ruma tauna ese ia hamaorodia, ia gwau ia be heduru abia totona ia guriguri bena Witness tauna ese ia vadivadi henia neganai unai ese ena guriguri ia haerelaia.
5. Dahaka heduru gauna namona amo ita idia durua ruma ta ruma ta gaukarana ita karaia totona, bona ia ese ita edena dala idauidau amo ia durua diba?
5 Bema ita be Nao gado ita diba, buka to ladana Reasoning From the Scriptures ese ita ia durua bada, iseda haroro gaukara lalonai! Bible ena hereva gwauraia matamaia daladia namodia momo be ia lalonai idia torelaia, bona Bible ena hereva momo bona tomadiho herevadia momo danu. Unai dainai namona be oi abia loaloa kava lasi, to oi duahia loulou danu be namo. Pioneer taudia idia gwau inai heduru gauna namona dainai idia moale. Dirava ena lalokau dainai oi tanikiu henia totona, inai buka be do oi gaukaralaia badabada bona namonamo a?
6. Basileia ena sivarai be ruma ta ruma ta dekenai ita loaloalaia neganai, unai ese ita edena bamona ia durua?
6 Namona be ita laloaboio lasi, ruma ta ruma ta dekenai ita haroro neganai, unai ese ita ia hanamoa bada. Ita Keristen taudia be iseda abidadama ita gaukaralaia noho lalonai, ia auka ia lao; ita be mai eda momokani ida ita hereva noho lalonai, ia goada ia lao. Iseda helaro be ma haida ita hamaorolaidia neganai, sibona eda helaro ia hedinarai goevagoeva, unai ese ita ia durua lauma helaga ena huahua, Galatia 5:22, 23 ese ia gwauraia karadia, ita goadalaia totona. Unai be momokani, badina be Bible ia gwau: “Hariharibada tauna do ia kwalimu; taunimanima edia lalona be do idia hanamoa lou.”—Hereva Lada-isidia 11:25, New International Version.
7, 8. Kamonai taudia ita lou henidia ena badina maorodia haida be dahaka?
7 Dirava bona Keriso ese ita dekenai idia hedinaraia lalokauna dainai ita tanikiu henidia. Dalana iharuana be inai: Basileia sivaraina idia ura henia taudia ita lou henidia. Paulo bona Banaba ese idia haroro henidia vadaeni taudia durudia dalana idia laloa (Kara 15:36) Momokani, ita kara momokani totona, namona be kamonai taudia ita lou henidia. Ita be ruma ta ruma ta dekenai, eiava dala dekenai eiava gabu idaudia dekenai ita haroro neganai, ita ese “idia diba lauma dalanai idia dabu taudia” ita tahudia noho.(Mataio 5:3, NW) Momokani, bema ita durudia sisina sibona, hegeregere lauma ranuna kapusi tamona eiava lauma paraoana tamona ita henidia bamona, unai be hegeregere lasi. Mauri ia lao henia dalana dekenai idia raka vareai totona, namona be heduru bada idia abia.
8 Iseda gaukara ginigunadia be hereva momokani ena uhena hadoa karana bamona. To aposetolo Paulo be 1 Korinto 3:6, 7 dekenai ia hahedinaraia gaukara ma ta danu ia karaia be namo. Ia hadohado sibona be hegeregere lasi. Namona be ta ese unai uhe be ranu amo ia dairia, Apolo ese ia dairia hegeregerena. Bena idia diba Dirava ese do ia hatubua. Haida ese inai gaukara idia karaia lasi, to momo idia laloa inai Keristen gaukarana be haraga herea. Dahaka dainai? Badina be ita lou henidia taudia ese edia ura-heni idia hahedinaraia vadaeni.
Edia Ruma Dekenai Bible Stadi Karaia
9. Dahaka dainai Bible stadi ta oi tahua be namo?
9 Basileia sivaraina idia ura henia taudia bema ita lou henidia loulou, Bible stadi be idia momo edia ruma dekenai do ita karaia diba—Dirava bona Keriso ita tanikiu henidia dalana ihatoina unai. Unai gaukara ita moalelaia bada diba bona anina bada ia havaraia diba. Badina be dahaka? Badina be, bema taunimanima ita itadia edia diba bona ura-heni Bible ena hereva momokanidia dekenai idia bada idia lao, bona bema ita itadia edia kara idia haidaua noho, bona be ita durudia ela bona Dirava idia gwauhamata henia bona bapatiso idia abia, vadaeni ita moale bada herea! Momokani, ita gwau diba, lauma dalanai unai bamona taudia be iseda natudia bona ita be edia tamadia bona sinadia.—1Korinto 4:14, 15; 1 Petro 5:13 itaia.
10. Dahaka haheitalai namona ese ia hahedinaraia kamonai taudia be Bible amo ita stadi henidia be namo?
10 Unai bamona taudia ta ena sivarai mani oi laloa. Caribbean motumotuna ta dekenai misinari ta be ruma ta ruma ta dekenai ia loaloa neganai, ia ese tau ta mai ena adavana ia davaridia, idia ruaosi be hipi taudia, bona edia ruma ena toana be dika herea, badina be edia dabua bona edia kohu idia atoa namonamo lasi. Danu, ena be idia be mai edia natudia to idia do headava momokani lasi. Bible stadi be idia ruaosi dekenai ia karaia matamaia, bena idia stadi loulou murinai edia ruma ena toana idia hanamoa matamaia, bona sibodia edia toana bona edia natudia edia danu. Nega daudau lasi murinai idia ruaosi ese misinari idia noia, edia headava do ia karaia bena do idia bapatiso diba. Bena dina ta unai tadikaka matamatana ese ena draiva laiseni ia hahedinaraia mai ena moale ida, ia abia laiseni ginigunana unai. Oibe, ia be Iehova ena Witness tauna ai ia do lao lasi neganai, ia laloa headava pepana eiava draiva laiseni ia abia be anina lasi, to hari ia ese Dirava ena taravatu ia badinaia bona Kaisara ena danu.
Dala Dekenai Haroro
11, 12. (a) Dahaka hereva Bible lalonai ese iseda lalona ia hagoadaia dala dekenai ita haroro totona? (b) Unai gaukara ita karaia ena badina namodia haida be dahaka dahaka?
11 Ita ese Dirava bona Keriso be edia heduru dainai ita tanikiu henidia dalana namba 4 be dala dekenai ita haroro. Unai bamona ita haroro neganai, ita ese Hereva Lada-isidia 1:20, 21 ita hamomokania, ia gwau: “Aonega momokani be ariara dekenai ia boiboi noho. Hoihoi gabudia dekenai ena gadona ia habadaia. Magu latadiai ia boiboi noho.”
12 Ita ese Basileia be inai dala amo ita harorolaia loulou be mai ena badina namodia momo. Gabu momo dekenai, taunimanima be edia ruma dekenai ita davaridia be auka. Idia gadara noho, eiava gau haida be sitoa dekenai idia hoia noho, eiava moni davaria gaukarana idia karaia noho. Danu, taunimanima momo be edia magu lalodiai ita raka vareai diba lasi, badina be edia geiti idia lokaia. To nega momo ita ese taunimanima ita davaridia dala dekenai.
13. Dala dekenai haroro gaukarana ese dahaka anina ia havaraia diba? Haheitalai mani oi gwauraia.
13 Elda ta United States dekenai ese taunimanima 4 ia stadi henidia noho, unai taunimanima be guna ia davaridia, dala dekenai ia haroro noho lalonai. Momokani, dala dekenai ia gini kava lasi to ia hereva danu. Idia gini taudia, basi idia naria taudia, eiava idia raka metairametaira taudia be ia ese ia raka kahi henidia mai ena kiri ida bona ia hereva henidia mai ena moale ida. Ia be ‘mai laloa namona bona mai gado namo ia hereva,’ bona idia ta ta ia hereva henidia mai ena lalo-parara danu. (Kolose 4:5, 6; 1 Petro 3:15) Dala dekenai haroro dainai Bible stadi haida ia hamatamaia diba, to unai sibona lasi; ia ese danu buka bona magasin taunimanima momo dekenai ia hariharilaia. Oibe, bema dabua namona oi hadokilaia namonamo bona bema oi gari lasi to mai emu kiri ida taunimanima oi gado namo henidia, dala dekenai do oi haroro neganai, emu gaukara ese anina bada do ia havaraia diba. Vanegai Witness taudia 5 ese buka ladana Life—How Did It Get Here? By Evolution or by Creation? 30 bona ma haida be hoihoi gabudia dekenai idia hariharilaidia. Motuka lalodiai idia helai taudia ese unai buka momo idia abia.
Haroro Daladia Idaudia
14. Dala idaudia amo ita haroro ena namo be dahaka?
14 Dirava bona Keriso be edia lalokau bada dainai ita tanikiu henidia dalana namba 5 be inai: Nega idauidau ai bona gabu idauidau ai ita hedavari henidia kava taudia ita haroro henidia. Inai dala amo kara maoromaoro hitolona idia hitolo bona ranu-masena idia mase taudia momo idia davaridia vadaeni bona buka idia henidia vadaeni! Inai dala amo ita ese Efeso 5:15, 16 ena sisiba ita badinaia diba, ia gwau: “Harihari emui nega namona ia noho Dirava ena kara do umui karaia totona. Emui nega do umui haorea kava lasi.” PMV ta lalonai misinari ta ese gui tauna ta ia hereva henia. Unai tau ia ura kamonai. Misinari ese ia lou henia loulou bona Bible stadi ia hamatamaia. Hari inai negai unai tau be Keristen elda ta. Gabu ma ta ai, elda ta ese hahine ta ia hereva henia neganai, ia davaria ena tomadiho ia haidaua gwauraia badina be ia ura Iuda tauna ta do ia adavaia. Ia ura ia diba daika ia vara guna, Mose eiava Noa eiava David. Elda ese ia hamaoroa, namona be Bible Sivarai bukana do ia abia, badina idia vara guna gaudia be unai buka lalonai idia torea guna bona gabeai idia vara gaudia be gabeai idia torea. Ena be guna unai hahine be unai elda ia diba lasi momokani, to ena ladana bona noho gabuna ia hadibaia bona buka ena davana ia henia danu, gabeai buka be ia dekenai do ia siaia totona.
15. Dahaka ese ita do ia durua, ita hedavari henidia kava taudia ita haroro henidia totona?
15 Nega haida, ita be PMV eiava peleini ai ita gui neganai, ita ura lasi ita badinai ia helai tauna do ita hereva henia matamaia, badina be ita gari ita do ia dadaraia garina. To, bema ita boga-auka, bema ita hereva henia, ita be davana namo hereana do ita abia! Bema Dirava ena kara namo bona taunimanima edia dabu ita laloa namonamo, unai ese iseda lalona do ia hagoadaia. Oibe, mani oi laloa, “Dirava ese gari laumana ita dekenai ia henia lasi, to siahu bona lalokau bona aonega laumana ita dekenai ia henia vadaeni.”—2 Timoteo 1:7.
Idau Taudia Abidia Dae
16. Idau taudia be iseda Kingdom Hall lalonai idia raka vareai neganai, dahaka dainai unai ita diba haraga be namo?
16 Dirava bona Keriso ita tanikiu henidia dalana namba 6 be inai: Idau taudia ita abidia dae, iseda Kingdom Hall lalonai idia vareai neganai. Iseda dekena tauna ita lalokau henia dainai, idau tauna do ita itaia haraga, iseda tomadiho rumana lalonai do ia raka vareai neganai. Namona be ena lalona ita hanamoa toho, bena mamina do ia abia ia be tura bogaragidiai ia noho, lauma dalanai do idia hanamoa dalana idia tahua momokani taudia unai. Reana ia vareai kava lasi, to ia be kara maoromaoro hitolona ia hitolo momokani bona ranu-masena ia ranu mase momokani dainai ia vareai reana. Bema iena namo ita tahua momokani, reana Bible amo do ita stadi henia matamaia, unai amo do ita durua, mauri lao henia dalana dekenai ia raka matamaia totona. (Mataio 5:3, 6; 7:13, 14) Momokani, nega momo unai bamona ia vara vadaeni. Misinari ta Watchtower Bible School of Gilead ena kalasi ginigunana amo ese ia davaria iena Bible stadi taudia namodia ruaosi be Kingdom Hall dekenai ia davaridia taudia.
Revareva amo Haroro
17. Revareva amo haroro gaukarana ena namo be dahaka?
17 Dirava bona Keriso edia lalokau dainai ita tanikiu henidia dalana namba 7 be revareva ita torea. Nega momo, inai dala amo idia haroro taudia ese revareva namodia idia davaria, sibodia edia revareva edia davana unai. Inai dala be pioneer taudia haida ese idia gaukaralaia, gorere eiava bero dainai ruma ta ruma ta dekenai idia loaloa diba lasi neganai. Haheitalai ta be inai: Tau ta be mai ena adavana bona natudia 12 idia noho. Dina ta, ena ruma dekenai ia lou mai neganai, ia davaria ena natuna 5 be ena natuna kekenina ta ena turana ese ia pididia mase vadaeni. Kerisendom ena haroro taudia dekenai ia lao iena lalona do idia hagoadaia totona, to idia durua lasi. Bena dina ta revareva ta davaria; ia diba lasi tauna ta, Witness tauna, ese ia tore henia, badina be iena hisihisi sivaraina be niuspepa dekenai ia duahia vadaeni bona ia ura ena lalona do ia hanamoa, unai dainai Hereva Momokanina bukana ta danu ia siaia ia dekenai. Unai tau ese ia tahua gauna be unai. Hari inai negai ia danu be Witness tauna mai goadana.
Telefon amo Hereva
18, 19. Dahaka sivarai namona harorolaia dalana ma ta ese anina namona ia havaraia vadaeni, bona badina be dahaka?
18 Haroro dalana namba 8 be Basileia sivaraina namona telefon amo ita harorolaia. Inai be haroro dalana mai moalena, bona anina bada ia havaraia. Witness taudia momo be inai haroro dalana namona idia manadalaia noho. Ruma ta ruma ta gaukarana lalonai ita davaridia diba lasi taudia haida be inai dala amo ita hereva henidia diba. Witness taudia haida idia davaridia vadaeni, bema telefon amo idia hereva mai edia hemataurai bona mai edia hebogahisi bona lalo-parara danu, taunimanima ese idia kamonai henidia; edia ruma dekenai idia vadivadi henidia neganai be unai bamona lasi.
19 English gado idia veria taudia edia tano ta dekenai, Japan taudia edia kongregesen ta ese telefon buka ia gaukaralaia iena teritori ena kahana ta bamona. Pablisa taudia ese Japan taudia, idia edia ladadia be telefon buka dekenai idia noho taudia, be telefon amo idia hereva henidia, bona bema idia ura neganai, dala idia karaia idia vadivadi henidia totona. Inai dala amo idia ese stadi momo idia hamatamaia.
Kara Namo amo Haroro
20, 21. Iseda kara namo ese dahaka anina namona ia havaraia diba? Haheitalai ta mani oi gwauraia.
20 Dirava ita hanamoa dalana namba 9 be iseda kara namo amo. Russia ena torea tauna ta ia gwau iseda kara namo be iseda haroro herevana hereadaena. Momokani, nega momo niuspepa lalodiai idia ese Iehova ena Witness taudia edia kara namo herea idia gwauraia. Ta ia gwau: “Taunimanima idia diba Iehova ena Witness taudia be kara maoromaoro taudia; edia kara maoromaoro ese taunimanima oredia edia ia hanaia, Federal Republic of Germany lalonai.” Witness kekenina ta be ia sikuli matamaia neganai, Sikuli buklet ia mailaia iena tisa dekenai. Ia ese ia dadaraia mai ena badu ida, ia gwau ia ura lasi Witness taudia edia hereva do ia kamonai. To, gabeai unai kekeni ena kara namo dainai ia hanamoa bada bona sibona ena lalohadai Witness taudia dekenai ia haidaua vaitani. Unai hegeregerena, Witness taudia rua, tau ta mai ena adavana, be edia natudia edia tisa ese ia tore henidia, ia gwau: “Emui natudia ese idia hamomokania vaitani emui abidadama ia kwalimu noho.”
21 Tanobada taudia ese Iehova ena Witness taudia idia gwauraidia namo neganai, idia ese Dirava bona Keriso idia hanamoa unai. Unai be momokani. Iesu ia gwau, ita ese iseda diari do ita halasia, bema taunimanima ese iseda kara namodia do idia itaia neganai iseda tamana guba dekenai do idia hanamoa, ani? (Mataio 5:16) Momokani, iseda kara namo amo ita ese hereva momokani ita hahairaia. (Tito 2:10) Momokani, iseda kara namo dainai haida ese Dirava bona Keriso do idia hanamoa, bona unai kara ese do ia durudia mauri lao henia dalana idia rakalaia totona; unai dainai namona be nega ibounai iseda kara ita naria namonamo, haida ese ita do idia gwauraia dika garina.
22. Edena tanikiu henidia daladia do oi goadalaia toho, bona badina be dahaka?
22 Vadaeni, ita diba gauna be inai: Iehova bona Iesu Keriso edia lalokau karadia badadia bona ita dainai idia karaia karadia oredia danu dainai ita tanikiu henidia daladia be momo. Unai bamona ita karaia noho lalonai, ita hahedinaraia ita ese iseda dekena taudia ita lalokau henidia.—Mareko 12:30, 31.
23. Dirava bona Iesu oi tanikiu henidia dalana ginigabena be dahaka?
23 Vadaeni, mani inai ita laloa: Idia ruaosi edia lalokau karadia hereadia ruaosi dainai ita tanikiu henidia dalana ma ta be, Lohiabada ena Anibou ita karaia. Hanuaboi ta Iesu be unai anibou ia karaia bena kerukeru ia mase; paraoa bona uaina, iena hidio bona rara idia laulaulaia gaudia, be ia gaukaralaia, bona iena hahediba taudia ia oda henidia, unai kara be lagani iboudiai ta ta do idia karaia ia idia laloa totona. (1 Korinto 11:23-26) Tanobada hegegemadai, Iehova ena Witness taudia idia hebou Iesu ena hahegani hegeregerena. Namona be unai hebou oi reaia lasi!
Henanadai Haida
◻ Iesu be edena bamona ia haroro, bona edeseniai?
◻ Edena dala amo Iesu ita tohotohoa diba, unai amo ita hahedinaraia Dirava ena lalokau bada ita laloa bada?