Iesu ena Mauri bona Gaukara

Isaia ena Peroveta Herevana Ia Hamomokania

IESU ia kamonai, Farisea taudia bona Herod ena orea taudia be idia hamasea dalana idia herevalaia hebou, unai dainai mai ena hahediba taudia ida idia lao Galilea Gohuna dekenai. Hutuma be Iudea bona gabu idauidau amo idia mai Iesu dekenai. Gorere taudia hutuma ia hamauridia vadaeni dainai, gorere taudia iboudiai idia aru mai Iesu idia daua toho totona.

Hutuma idia mai dainai, Iesu ese ena hahediba taudia ia hamaorodia namona be vanagi ta idia atoa hegaegae, bena, bema hutuma dainai ena gaukara dalana idia koua gwauraia, vanagi amo do ia hadibadia diba eiava idau gabuna ta dekenai do idia bara lao diba ma haida hanamodia totona.

Hahediba tauna Mataio ia gwau Iesu ena kara ese ‘Isaia, peroveta tauna ena hereva idia hamomokania vadaeni.’ Bena Iesu ese ia hamomokania peroveta herevana ia gwauraia. Hereva be inai:

“Itaia, lauegu hesiai tauna be inai, lau abia hidi vadaeni, egu lalokau, lau moale ia dekenai. Egu Lauma be ia latanai do lau atoa, ia ese kota maoromaoro karaia dalana be bese ibounai dekenai do ia gwauraia. Do ia heai lasi, do ia boiboi lasi. Hanua edia huanai iena boiboi do idia kamonai lasi. Siriho manokana be ia ese do ia makohia lasi, lahi manokana do ia habodoa lasi, ela bona kota maoromaoro karaia dalana do ia kwalimu momokani. Iena ladana dainai be bese ibounai do idia naria mai laloa namona danu.”

Momokani, Iesu be Dirava ese ia lalo-namo henia hesiai tauna. Bona Iesu ese kota maoromaoro karaia dalana, tomadiho herevadia koikoidia ese idia hunia dalana ia hahedinaraia goevagoeva. Dirava ena taravatu ena anina idia mogea dainai, Sabati dinana ai Farisea taudia ese gorere tauna idia durua diba lasi! Unai dainai, Dirava ena hahemaoro maoromaoro ia gwauraia hedinarai goevagoeva dainai, Iesu ese anina lasi taravatudia edia metau be taunimanima amo ia kokia. Unai dainai tomadiho gunalaia taudia ese Iesu idia hamasea toho.

Inai hereva, “do ia heai lasi, do ia boiboi lasi. Hanua edia huanai iena boiboi do idia kamonai lasi,” ena anina be dahaka? Iesu ese taunimanima ia hamauridia neganai, ia hamaorodia, ‘Lauegu sivarai do umui herevalaia lasi.’ Ia ura lasi ariara dekenai taunimanima be mai gado bada ida ena kara do idia boiboilaia eiava taunimanima ta ta dekenai do idia gwauraia bona do idia mogea.

Iesu ese ena sivarai namona ia gwauraia siriho manokana bamona taudia dekenai, taunimanima ese idia moidia taudia unai. Idia be gida o lahi manokana bamona, haida ese edia mauri ena siahu idia koua, ta ese gida ia habodoa hegeregerena. Iesu be unai bamona taudia ia hadikadia lasi, to mai ena manau bona mai ena lalokau ida unai manau taudia ia hanamodia. Momokani, bese ibounai ese Iesu idia naria diba, ia be edia helaro! Mataio 12:​15-21; Mareko 3:​7-12; Isaia 42:​1-4.

◆ Edena bamona Iesu ese hahemaoro goevagoeva ia gwauraia hedinarai goevagoeva, ia heai lasi bona ia boiboi badabada lasi?

◆ Edena taudia be siriho manokana bona lahi manokana bamona, bona edena dala ai Iesu ese ia kara henidia?