Dirava Momokanina ena Witness Tauna ta ai Do Oi Lao A?

“Iehova ia gwau: ‘Umui be lauegu witness taudia, bona lau be Dirava.’ ”​—ISAIA 43:12.

1. Dahaka dainai Dirava momokanina ita matauraia be namo?

IESU ena mase negana be ia kahirakahira neganai, “guba dekenai ia itaia, ia guriguri.” Ia guriguri henia Diravana ia gwauraia “Dirava momokani tamona.” (Ioane 17:​1, 3) Mauri Diravana momokanina be tamona, guba bona tanobada ia havaradia bona ia lohiadia Diravana unai. Dirava momokanina ena ura dainai ita vara, unai dainai ia ita matauraia bada be namo. Apokalupo 4:11 ena hereva hegeregerena: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.”

2. (a) Ita abia dae Dirava momokanina be dahaka do ia karaia? (b) Idia ura do idia tomadiho henia taudia na edena bamona ia hadibadia?

² Dirava momokanina ese tanobada idia hadikaia gaudia do ia haheaukalaidia lasi ela bona hanaihanai. Ia be dahaka do ia karaia be ia ese ia idia tomadiho henia taudia ia hadibalaidia guna, bona ia hadibadia danu, ia ura idia be dahaka do idia karaia, ia be ena hahemaoro herevadia hegeregeredia ia do kara lasi neganai. (Amos 3:7) Hereva momokani tahua taudia edena bamona ia hadibadia? Ia ese ura taudia ia hagaukaradia, iena hereva halasia totona. “Iehova ia gwau: ‘Umui be lauegu witness taudia . . . Dirava ta ese lau ia gunalaia lasi, bona lau murinai danu dirava ta ia hedinarai lasi. Lau inai Iehova, hahemauri tauna be lau sibona.’ ” (Isaia 43:​10, 11) To Dirava ese iena hereva hamomokanidia taudia ai ia halaodia taudia be ta ese edena bamona ia dibadia diba? Idia, bona edia hereva, be edena bamona idia idau, dirava idaudia tomadiho henidia taudia hegeregeredia lasi?

Dirava Idaudia Ia Samanidia

³ Iehova ese ena lauma amo Isaia ia hasiahua, dirava idaudia iboudiai be inai bamona do ia samanidia totona: “Idia [bese idauidau edia dirava] bogaragidiai daika ese inai [peroveta herevana maorona] do ia gwauraia diba? Eiava idia ese [vaira negana lalonai do idia vara gaudia] ginigunadia be ita dekenai do idia gwauraia hedinarai diba a? [Dirava hegeregeredia] edia hereva hamomokanidia taudia do idia mailaidia idia gwauraidia maoro totona, eiava [bese idauidau taudia] do idia kamonai, bena do idia gwau, ‘Hereva momokanina be inai!’ ” (Isaia 43:9) Unai dala amo Iehova ese taunimanima idia tomadiho henidia diravadia iboudiai ia boiridia, do idia hahedinaraia idia be dirava. Namona be edia witness taudia ese idia hamomokania, edia dirava idia abidadama henidia be mai ena badina korikorina, bona idia tomadiho henidia be maoro.

4. Dahaka dainai ita diba idau negai besedia edia dirava be anina lasi?

⁴ To hari dirava bona idia tomadiho henidia taudia ese dahaka idia havaraia? Ita idia hakaua lao maino momokani, noho namo bona mauri dekenai, a? Edia sivarai ese ia hahedinaraia, idau negai besedia edia dirava iboudiai be anina lasi bona siahu lasi. Idia boio vadaeni bona hari inai negai taunimanima ese idia tomadiho henidia lasi. Idau negai besedia, Aigupito, Asuria, Babulono, Medo-Parasa, Greece, Roma bona bese oredia iboudiai edia dirava be koikoi gaudia sibodia. Idau negai idia vara gaudia edia sivarai bukadia lalodiai sibona idia noho, eiava miusiam lalodiai; edia laulau be unuseniai idia itaia taudia ese idia lalodia bada lasi.

5. Hari inai negai diravadia be edena bamona ita henanadailaidia be namo?

⁵ To, hari inai negai diravadia bona idia tomadiho henidia taudia ese unai idau negai gaudia idia hereadia, eiava? Hindu taudia be mai edia dirava milion momo. Buddhist taudia, Katolik taudia, Confucianist taudia, Iuda taudia, Muslim taudia, Protestant taudia, Shintoist taudia, Taoist taudia, bona ma tomadiho oreadia momo be mai sibodia edia dirava. Africa, Asia, bona ma gabu haida dekenai, siahu idauidau, animal idauidau, bona gau idauidau be dirava hegeregeredia idia tomadiho henidia. Taunimanima momo ese sibodia edia bese edia ladana abia isi karana, bona moni bona kohu bona idia sibodia danu be edia dirava ai idia halaoa vadaeni, badina be unai gau idia laloa bada. Dirava momokanina ia gwau: “Lau inai Iehova, idauna ta be lasi; dirava ta be lasi, lau mo sibona.” (Isaia 45:5) Vadaeni, edena tomadiho dalana ese iena ura ia hahedinaraia?

“Edia Kara Toana Dekena Amo Do Umui Diba”

⁶ Iesu ese tomadiho momokanina bona tomadiho koikoina dibadia dalana maorona ia gwauraia. Ia gwau: “Edia kara toana dekena amo do umui diba. . . . au namona ena huahua be ia namo, to au dikana ena huahua be ia dika. . . . Au ibounai huahua namona idia havaraia lasi gaudia be do idia utua, lahi dekenai do idia negea.” (Mataio 7:​16-19) Unai dainai, Dirava momokanina bona dirava koikoidia edia idau ita diba totona, bona tomadiho momokani taudia bona tomadiho koikoi taudia edia idau ita diba totona, namona be edia kara edia anina ita tahua namonamo. Edia kara toana be ia namo eiava ia dika, a?

7. Hanaia lagani 88 lalodiai idia vara gaudia edia sivarai dainai, ita diba inai tanobada ena tomadiho oreadia be edena bamona?

⁷ Hegeregere, tanobada ena tomadiho idauidau bogaragidiai, edena ese ena orea taudia bogaragidiai maino momokanina ia havaraia vadaeni? Momokani, tomadiho momokani taudia, lauma dalanai idia be tadikaka, be idia ala-ala heheni be maoro lasi. To hanaia lagani 88 lalodiai taunimanima 100 milion be tuari lalodiai idia aladia mase, bona unai tuari iboudiai be inai tanobada ena tomadiho oreadia ese idia durudia. Unai dainai, tomadiho taudia ese tomadiho taudia ma haida idia aladia mase. Nega momo idia ese sibodia edia tomadiho oreadia taudia idia aladia mase. Katolik taudia ese Katolik taudia idia aladia mase, Protestant taudia ese Protestant taudia idia aladia mase, Mulsim taudia ese Muslim taudia idia aladia mase, bona tomadiho oreadia ma haida danu be unai bamona idia karaia.

8. Tomadiho oreadia taudia edia kerere idia itaia namonamo taudia ese edena bamona idia gwauraia?

⁸ Mike Royko be niuspepa ena hereva ta ladana “Dagedage Karadia be Dirava ena Ladana ai Idia Karaia,” ia torea, hegeregere Dirava ia hereva henia bamona, ia gwau: “Idia momo herea idia ala-ala heheni, unai amo idia hahedinaraia oi idia badinaia. Reana idia laloa bema edia inai taudia idia hamasedia ore diba, unai ese do ia hahedinaraia edia tomadiho dalana be ia maoro.” Ia gwau, ena be pope be sibona ia gwauraia maino tauna, to “iena orea taudia be idia badu neganai rara bada herea idia bubua.” Danu, United States ena president gunana ta ladana President Carter ia gwau: “Tanobada ia kavakava,” ma ia gwau: “Taunimanima be edia lalona dekenai edia tomadiho idia goadalaia neganai, unai ese lalokau amo ia guidia hebou be namo, to nega momo idia kavakava bona idia ala-ala.”

9. Dahaka dainai “anina lasi diravadia” ita badinadia lasi be namo?

⁹ Dirava momokanina idia tomadiho henia taudia idia havaraia huahuana be unai bamona huahua dikana hegeregerena lasi, to ia idau vaitani. (Galatia 5:​19-23) Unai dainai, idia tuari heheni tomadiho oreadia idia durudia taudia ese tomadiho koikoi idia badinaia, Aigupito taudia, Asuria taudia, Babulono taudia, bona ma haida ese idia badinaia hegeregerena; unai idau negai taudia ese “anina lasi diravadia, idia hereva diba lasi gaudia,” idia abidadama henidia. (Habakuku 2:18) Bona Dirava momokanina ena peroveta herevana be idau negai tomadiho koikoina dekenai ia momokani hegeregerena, hari inai nega lalonai do ia momokani; ia gwau: “Anina lasi diravadia do idia ore vaitani.” (Isaia 2:18) Iena sisiba maorona be inai: “Anina lasi diravadia dekenai umui tabekau lasi.”​—Levitiko 19:4.

Daidia ese Iehova ena Hereva Idia Hamomokania?

¹⁰ Dirava momokanina ena witness taudia ese Ia idia gwauraia hedinarai be namo. Inai tanobada ena tomadiho idauidau idia badinaia taudia be unai bamona idia karaia a? Unai tomadiho taudia be nega hida edia tomadiho idia herevalaia oi dekenai? Edena negai emu ruma dekenai idia mai, edia dirava idia gwauraia hedinarai totona? Dirava momokanina ese dirava koikoidia ia boiridia edia hereva hamomokania taudia do idia mailaidia, to idia kamonai lasi. Inai tanobada ena tomadiho idauidau idia badinaia taudia be unai bamona idia hereva lasi. Oi idia hamaoroa diba lasi daika be Dirava momokanina eiava iena palani be dahaka. Edia haroro taudia ese hereva momokani idia hadibalaidia lasi. “Idia be matakepulu taudia, bona matakepulu taudia idia hakaua lao noho. Bema matakepulu tauna ese matakepulu tauna do ia hakaua, idia ruaosi guri dekenai do idia moru.”​—Mataio 15:14.

11. Daidia mo sibodia be Dirava momokanina ena ladana idia harorolaia noho?

¹¹ Daidia edia lalona idia hegeregere, edia nega, edia moni, bona edia mauri danu do idia halusia, Dirava momokanina ena hereva gwauraia hedinarai totona? Daidia ese taunimanima idia hamaorodia, idia gwau Dirava momokanina ia gwau: “Lau be Iehova, lauegu ladana be unai”? (Isaia 42:8) Daidia idia gwau: “Oiemu ladana be Iehova, oi sibona be Atai Momokani tanobada ibounai ataiai”? (Salamo 83:18) Iesu ese Dirava momokanina ia hereva henia, ia gwau: “Oiemu ladana lau hadibaia vadaeni.” (Ioane 17:6) Hari inai nega lalonai, Iehova ena Witness taudia sibodia be unai bamona idia hereva diba. Unai dainai edia ladana idia hatoa Iehova ena Witness taudia be maoro!

Basileia Idia Harorolaia

¹² Dirava momokanina ena witness taudia ese iena ladana idia harorolaia sibona lasi, to iena palani be edena bamona idia herevalaia danu be namo? Iesu ese edia kara korikori ia haheitalaidia; ena hahediba taudia ia hadibadia, Dirava momokanina be inai bamona do idia guriguri henia, do idia gwau: “Oiemu Basileia do ia mai.” (Mataio 6:10) Dirava ena guba Basileiana be gavamani ta, gabeai tanobada ibounai do ia lohiaia gauna. (Daniel 2:44) Iesu ese Basileia ia hahedibalaia loulou. (Mataio 4:23) Basileia sibona ese taunimanima edia hisihisi bona hekwarahi do ia haorea, unai dainai ia gwau: “Umui be iena Basileia bona iena kara maoromaoro do umui tahua guna.”​—Mataio 6:33.

13. (a) Iehova ena Witness taudia be Dirava ena Basileia idia harorolaia sivaraina ese dahaka ia hahedinaraia? (b) Basileia harorolaia gaukarana ese edena bamona ia hahedinaraia Iehova mo sibona be peroveta herevadia momokanidia halasia Diravana?

¹³ Hari inai negai daidia ese Dirava ena Basileia idia harorolaia? Tanobada ena tomadiho idauidau ia tahua namonamo tauna, Profesa C. S. Braden, ia gwau: “Iehova ena Witness taudia be tanobada ibounai lalonai idia haroro vadaeni. . . . Momokani, Iehova ena Witness taudia ese Basileia ena sivarai namona idia harorolaia toho mai edia goada bona mai edia boga-auka ida; tomadiho oreana ma ta ese idia ia hereadia lasi.” To unai hereva ia torea negana amo ema bona hari, lagani 40 idia ore vadaeni! Basileia harorolaia gaukarana hari inai negai idia karaia, ese unai neganai idia karaia gaukarana ia hanaia momokani, badina be hanaia lagani 40 lalodiai Witness taudia be nega 10 idia momo daekau! Idia milion toi mai kahana, tanobada hegegemadai, kongregesen 54,900 lalodiai idia noho, ese Basileia idia harorolaia noho, bona idia momo daekau haraga noho. Inai huahua namona ese ia hahedinaraia Iehova be peroveta herevadia momokanidia gwauraia Diravana. Ia ese ena Natuna, Iesu na ena lauma helaga amo ia hasiahua, iseda nega be inai bamona do ia gwauraia totona: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”​—Mataio 24:14; Ioane 8:28.

Dirava ena Lalokau Idia Tohotohoa

¹⁴ Namona be Dirava ena Witness taudia momokanidia ese iena kara badana​—lalokau​—idia tohotohoa. “Mai ena lalokau lasi tauna be Dirava ia diba lasi, badina Dirava be lalokau.” (1 Ioane 4:8) Momokani, “Dirava ena natuna taudia be idau, bona Satani ena natuna taudia be ma idau. Edia idau be inai: Kara maoromaoro ia karaia noho lasi tauna be Dirava ena natuna lasi, bona iena tadikakana ia lalokau henia lasi tauna be Dirava ena natuna lasi. . . . ibounai ta ta dekenai do ita lalokau henia. Kain ena kara bamona do ita karaia lasi, ia be Satani ena tau, bona ia ese iena tadina Abela ia alaia mase.”​—1 Ioane 3:​10-12.

15. Dahaka dainai ita gwau diba Iehova ena Witness taudia ese lalokau momokani idia hahedinaraia?

¹⁵ Iehova ena Witness taudia mo sibodia be mai edia lalokau unai bamona. Idia ese tuari bona bese ena ladana abia isi karana diravadia idia kamonai henidia lasi. Inai tanobada ena tuari idia durudia lasi, unai dainai edia orea taudia, tanobada ena gabu idaudia dekenai idia noho taudia, aladia mase karana be nega ta idia durua diba lasi. Iesu ena hereva hegeregerena, idia be “tanobada ena lasi,” bona ‘tuari kaia idia atoa diho’ vadaeni.​—Ioane 17:14; Mataio 26:52.

16. Edena dala amo taunimanima ma haida ese Dirava ena witness taudia momokanidia idia hahedinaraidia?

¹⁶ Ripoti ta ladana “Dagedage Gwauraia Maoromaoro Herevadia Ma Haida” be ia gwau: “Iehova ena Witness taudia edia lalohadai be, idia be Keristen taudia dainai do idia dagedage lasi bona ala-ala amo do idia gini siri . . . Tuari gaukaradia iboudiai idia dadaraia hanaihanai, bona bema gavamani ese gaukara idauna ta, unai ami gaukaradia ta ena gabunai ia henidia gwauraia, unai bamona gaukara danu idia dadaraia hanaihanai; idia ese danu bese edia pepe idia hanamoa diba lasi, unai dainai tano momo lalodiai nega haida idia kota henidia, dibura rumadia ai idia koudia, bona taunimanima hutuma idia hebou idia heai henidia totona . . . To Witness taudia be nega ta dagedage karadia idia karaia lasi, unai dika ena davana idia henidia totona.” Brazil ena niuspepa ena ladana O Tempo ese inai bamona ia gwauraidia: “Ena be tanobada ena gabu iboudiai dekenai tomadiho oreadia badadia ese edia hahediba herevadia idia halasia noho, to tanobada ena kopina ibounai latanai idia ta ese inai bamona lalokau idia hahedinaraia lasi.” Iesu ia gwau inai lalokau momokanina ese ia hahedinaraia daidia be Dirava ena witness taudia momokanidia. Ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​—Ioane 13:35.

Dagedage ese Haroro Gaukara Ia Habadaia

¹⁷ Dagedage ese Basileia harorolaia gaukarana ia habadaia diba. Hegeregere, India dekenai Iehova ena Witness taudia 8,000 sibodia idia noho. To Witness taudia edia natudia 11 ese Keristen taudia ginigunadia edia kara idia tohotohoa neganai, Iehova ena ladana bona ena palani be unai dainai idia harorolaia badabada, unai tano dekenai; unai Keristen taudia ginigunadia ese kota ta idia hereva henia, idia gwau: “Dirava ai kamonai henia be namo, taunimanima ai kamonai henia be dika.” (Kara 5:29) Unai India memerodia bona kekenidia be sikuli amo idia luludia, badina be unai bese ena ladana abia isi anena idia abia lasi dainai. To Bangalore ena niuspepa ta ladana Deccan Herald ena ripoti ese ia hahedinaraia hegeregerena, India ena Kota Badana ia gwau: “Inai tano dekenai ta idia samania diba lasi, Bese ena Ladana Abia Isi Anena ia abia lasi dainai.” Unai Kota ia gwau, unai memero bona kekeni ese “hemataurai maorona idia hahedinaraia vadaeni” bona unai ane idia abia lasi neganai, “unai be gwau-edeede karana lasi.” Kota ia hahegani, unai natu be sikuli lalonai do idia abidia dae lou.

17, 18. Dahaka be vanegai ia vara, ia hahedinaraia dagedage ese Basileia harorolaia gaukarana ia habadaia diba?

¹⁸ Unai niuspepa be ma ia gwau: “Unai memero bona kekeni idia ura lasi Bese ena Ladana Abia Isi Anena do idia abia, badina be Iehova ena Witness taudia idia laloa idia be Keristen taudia, bona Dirava ena Basileia idia badinaia mai edia lalona ibounai ida. . . . Unai dainai Gavamani ena politikol karadia iboudiai amo idia siri.” Danu, Calcutta ena niuspepa ta ladana The Telegraph ia gwau: “Unai sikuli memerodia bona kekenidia edia kara ese Iehova ena Witness taudia ia hahedinaraidia goevagoeva taunimanima vairadiai, iseda tano dekenai unai orea be ia hehuni bamona ema bona vanegai.” Oibe, dokona be ia do ginidae lasi neganai, ‘basileia ena sivarai namona do idia harorolaia, bese iboudiai hadibadia totona.’​—Mataio 24:14, NW..

Dirava Momokanina ena Witness Taudia Idia Gogodia Noho

¹⁹ Hari inai nega lalonai, Dirava momokanina, Iehova ese ena orea taudia ia hagaukaradia, iena lohia siahuna bona palani do idia harorolaia totona. Iena hereva idia harorolaia goadagoada noho lalonai, ia ese lalo-maoro taudia momo bese iboudiai amo ia gogodia, ia idia tomadiho henia taudia edia orea lalonai do idia vareai totona. (Isaia 2:​2-4) Idia ese edia dirava koikoidia idia rakatanidia bona Dirava momokanina idia tomadiho henia matamaia, idia ura Iehova do idia tomadiho henia taudia be idau negai hanuana Babulono amo ia ruhadia nege hegeregerena; unai hanua lalonai dirava koikoidia idia tomadiho henidia badabada.​—Isaia 43:14.

20, 21. Dahaka dainai taunimanima be harihari dirava koikoidia idia rakatanidia bona Dirava momokanina ena orea lalonai idia vareai momokani be namo?

²⁰ Oi be Dirava momokanina ena witness tauna ta ai do oi lao a? Tomadiho momokani do oi badinaia, bona inai tanobada bona ena dirava koikoidia edia kerere rara dekenai bona edia kerere idaudia amo do oi siri a? Dirava ena Hereva ia gwau: “Lauegu orea taudia e, ia [Babulono ena tomadiho koikoina] dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!” (Apokalupo 18:4) Oibe, oi “raka siri,” roho mauri negana ia do ore lasi neganai! Katolik magasin ta torea taudia ese idia nanadaia tauna ena kara oi tohotohoa lasi; idia nanadaia, ia be edena tomadiho ia ura henia, neganai, ia gwau: “Lau laloa lau be Iehova ena Gaukara amo Gini Siri Tauna ta. Iehova ena Witness taudia ese idia abia dae herevadia be lau danu lau abia dae​—to lau ura lasi edia orea lalonai do lau vareai.”

²¹ To nega daudau lasi murinai, Iehova ese inai tanobada ena Dirava koikoidia bona idia tomadiho henidia taudia do ia haoredia neganai, tanobada dekenai idia noho taudia iboudiai ese unai kara ena mamina do idia abia: “Guba bona tanobada idia karaia lasi diravadia be tanobada amo bona guba henuna amo do idia boio.” (Ieremia 10:11) Ta be unai amo do ia gini siri diba lasi. Dirava momokanina ena hereva hamomokania taudia bona ena hereva idia hamomokania lasi taudia sibodia do idia noho. (Mataio 24:​37-39; 2 Petro 2:5; Apokalupo 7:​9-15) Dirava momokanina ena witness tauna ta ai do oi lao a? Namona be unai bamona oi karaia, badina be “Dirava momokanina be ita dekenai hahemauri karadia karaia Diravana; bona mase amo roho mauri daladia be Lohiabada ena.”​—Salamo 68:20.

Henanadai Haida

◻ Dirava momokanina ese dirava koikoidia ia boiridia, dahaka do idia karaia toho totona?

◻ Edena dala amo tomadiho momokanina bona tomadiho koikoina ita dibadia diba?

◻ Dahaka ese ia hahedinaraia inai tanobada ena dirava be anina lasi?

◻ Dirava momokanina ena witness taudia ese dahaka huahua namona idia havaraia be namo, bona daidia ese idia hahedinaraia?

◻ Dahaka dainai taunimanima ese tomadiho koikoi idia rakatania haraga be namo?

3. Iehova ese dirava idaudia iboudiai ia boiridia, dahaka do idia karaia toho totona?

6. Tomadiho momokani bona tomadiho koikoi edia idau be edena bamona ita davaria diba?

10. Inai tanobada ena tomadiho daladia idia badinaia taudia be Dirava momokanina ena witness taudia, a?

12. Witness taudia momokanidia be dahaka hahediba herevana badana na taunimanima ma haida idia hadibalaidia be namo?

14. Dirava ena witness taudia momokanidia ese dahaka kara idia tohotohoa be namo, bona, bema idia tohotohoa lasi, anina be dahaka?

19. Bema lalo-maoro taudia idia ura Dirava momokanina do idia tomadiho henia, dahaka idia karaia be namo?

[Pictures on page 17]

Idau negai besedia edia anina lasi diravadia be hari inai negai taunimanima ese idia tomadiho henidia lasi

[Picture on page 18]

Hanaia lagani 88 lalodiai, inai tanobada ena tomadiho oreadia ese idia durudia tuaridia lalodiai taunimanima 100 milion bamona idia aladia mase vadaeni

[Credit Line]

U.S. Army photo

[Picture on page 19]

Iesu ia gwau witness taudia momokanidia do idia lalokau heheni