Oiemu Lalohadai Sibona Oi Laloa Bada A?
“DUBU Matamata Taudia Idia Parara Tatau Danu Idia Mahuta Hebou Fada Taudia Edia Dagi Dainai,” unai hereva kwarana be niuspepa ta lalonai. Unai sivarai ma ia gwau Church of England ena dubu taudia be idia parara bada herea unai bamona kara taudia ese fada dagina idia abia ena maoro idia hepapahuahulaia dainai.
Dubu ena haroro taudia matamatadia tahudia gaukarana ia biagua haroro tauna ta ia gwau: “Tatau be tatau danu idia mahuta hebou taudia be dubu ena dagi idia abia diba.” Ia gwau bema unai bamona tauna be ‘kara maoromaoro bona ena maduna ia huaia namonamo’ ia kara henia tauna dekenai, dubu lalonai dagi ia abia be maoro.
To dubu biaguna ma ta ia gwau: “Tatau be tatau danu idia mahuta hebou karana be kara dikana, bona idia karaia taudia ese edia dagi idia rakatania be namo.” Ia laloa haroro taudia edia kara iboudiai do idia namo sibona be gau badana.—The Sunday Times, London, November 8, 1987.
Reana unai taudia rua idia laloa idia sibodia edia lalohadai be maoro. To inai mai anina bada gauna dekenai taunimanima be sibona ena lalohadai ia gwauraia maoro be namo, eiava? Reana oi gwau, oibe, badina “taunimanima iboudiai ese edia lalohadai idia gwauraia diba be maoro.”
Namona be Dirava ena lauma amo idia torea Bible herevadia rua oi laloa: “Unai dainai maino daladia do ita tahua, bona ita ta ta ese iseda bamona ta ta edia abidadama do ita hagoadaia.” “Lauegu varavara taudia e, . . . umui parara lasi. Hereva tamona do umui gwauraia, bona do umui gaukara hebou mai laloa tamona danu.”—Roma 14:19; 1 Korinto 1:10.
Bema oi be Keristen tauna ta, to mai anina bada gauna ta dekenai Keristen kongregesen ia gwauraia herevana oi abia dae be ia auka, a? Dahaka do oi karaia kongregesen lalonai maino bona lalo-tamona karadia idia noho totona?—Mataio 5:9; 1 Petero 3:11.
Keristen ginigunadia edia negai, dahaka ia vara Keristen kongregesen taudia haida ese sibodia edia lalohadai idia laloa bada neganai, mani oi laloa. Unai bamona kara amo dahaka ia vara? Bona sibona dekenai oi henanadai: ‘Bema unuseniai lau noho, dahaka do lau karaia?’
Henanadai Kopina Utua Karana Dainai
Lagani 36 C.E. ai, kopina utua lasi idau bese taudia, be Keristen kongregesen lalonai idia abidia dae hamatamaia. Ena be Dirava ese aposetolo Petro ia hegaegaelaia inai mai anina bada karana do ia vara totona, to Petro bona idia bamoa taudia idia hoa bada lauma helaga ia diho kopina utua lasi taudia dekenai idia itaia neganai. (Kara 10:1-16, 34-48) Iuda Keristen taudia momo ese inai kara idia abia dae be ia auka. Unai Iuda Keristen taudia haida be “kopina utua taravatu idia badinaia” momokani, bona Petro idia maumauraia kopina utua lasi taudia ia bamodia dainai.—Kara 11:2, 3.
Dahaka dainai inai maumau taudia idia lalo-hekwarahi? Badina kahirakahira lagani 2,000 lalodiai, kopina utua karana be Dirava gwauhamata henia ena toana. Iehova Dirava ese Abraham ia hagania neganai ena ruma bese memero iboudiai edia kopina ia utua totona, ia gwau: “Inai gwauhamata oi bona oiemu tubuna do idia karaia . . . lauegu hanaihanai noho gwauhamata umui dekenai ena toana.” (Genese 17:10-13) Lagani sinahu momo murinai, Iuda taudia dekenai kopina utua karana be do mai anina bada. Idia momo idia laloa kopina utua lasi tauna be miro tauna. (Isaia 52:1) Idia be Dirava ena helaga besena dainai, idia laloa kopina utua lasi Idau Bese taudia be mai edia miro, bona idia bamodia be maoro lasi.
Lagani 49 C.E. ai, aposetolo Paulo be Antioka dekenai “kopina utua taravatu” idia badinaia taudia danu idia herevahereva. Ena laolao ginigunana ia haorea neganai, ripoti ia henia kongregesen taudia dekenai, bona ia hamaorodia Dirava ese “abidadama ena iduara [kopina utua lasi] idau bese taudia dekenai ia kehoa vadaeni.” Ia lalo-parara unai idau bese taudia ese kopina utua taravatu idia badinaia be anina lasi. To Iudea taudia haida edia lalohadai be idau. Idia gwau: “Bema kopina utua taravatu umui naria lasi, Mose ena kara hegeregere, mauri dohore umui abia diba lasi.” Idia laloa hahemauri idia abia totona, kopina utua taravatu badinaia karana be mai anina bada, bona Idau Bese taudia be Keristen taudia ai idia lao neganai, kopina utua taravatu idia badinaia be maoro.—Kara 14:26–15:1.
Idia laloa edia hereva be maoro. Unai dainai reana hereva idauidau idia kikilaidia edia lalohadai idia hamomokania totona. Dahaka do idia karaia kongregesen dekenai maino bona lalo-tamona ia noho totona? Inai hereva idia hepapahuahulaia bada, bena murinai Antioka ena kongregesen taudia idia gwau namona be “Paulo bona Banaba bona varavara haida dohore idia lao Ierusalema. Unuseni aposetolo bona kwarana taudia dekenai inai hadibaia hereva do idia herevalaia.” (Kara 15:2) Inai be mai anina bada herevana dainai, idia diba ta ta ese sibodia edia lalohadai idia gwauraia maoro be hegeregere lasi. Unai Keristen taudia be mai edia manau bona Dirava ia gwauraia dalana idia badinaia dainai, edia hakaua oreana dekenai idia lao lalohadai maorona unai hahediba herevana dekenai idia gwauraia totona.—1 Korinto 14:33, 40; Iakobo 3:17, 18; 1 Petero 5:5, 6.
Dala Idia Gwauraia
Aposetolo taudia bona tau badadia Ierusalem dekenai (Iesu ena negai idia be Keristen kongregesen ena hakaua oreana unai) ese lauma siahu amo idia torea Bible sivaraidia idia tahua namonamo, bona idia ore lagani 13 lalonai unai lauma helaga ese orea ia hakaua dalana idia laloa lou. Bena murinai dahaka idia gwau? Idia gwau Idau Bese taudia ese Keristen taudia ai idia lao neganai, hahemauri idia abia totona kopina utua taravatu idia badinaia be gau badana ta lasi. (Kara 15:6-29) Kwarana gabuna amo unai hereva ena anina maorona idia gwauraia, unai dainai idia sibodia edia lalohadai idia gwauraia be maoro lasi.
Kongregesen idauidau taudia ese unai hakaua oreana ena hereva idia abia dae neganai “edia abidadama ena goada ia bada daekau, bona dina ibounai edia hutuma be ia momo daekau.” (Kara 16:4, 5) To, taunimanima ma haida, be hakaua oreana ena hereva idia abia dae lasi. Idia laloa sibodia edia hereva be maoro bona idia gwau Mose ena Taravatu badinaia karana amo sibona taunimanima be hahemauri idia davaria diba. Bema unai nega lalonai oi noho oi ese dahaka oi karaia? Unai taudia edia kara be mai garina, Keristen taudia idia hapararaidia unai. Aposetolo Paulo be lagani 15 lalodiai ia henidia sisibana mani oi laloa, unai nega lalonai kamonai Keristen taudia ia durudia unai hekokoroku taudia, sibodia edia lalohadai idia gwauraia maoro taudia unai, idia hakereredia garina.
Galatia, Asia Minor, lagani 50-52 C.E. ai bamona. Iesu Keriso ese ena mauri ia bouboulaia vadaeni taunimanima ia ruhadia totona, to gau haida ese ia guidia lou diba. Iuda taudia idia dagedage henia taudia garina idia gari dainai, Keristen taudia haida ese ma Keristen taudia idia doridia Mose ena Taravatu haida idia badinadia totona. (Galatia 6:12, 13) Aposetolo Paulo ese Iesu ena hahediba taudia ia hamaorodia bema Iuda taudia edia kara idia badinaia, bona kopina utua taravatu idia badinaia, unai anina be “do idia guia lou.” Idia iboudiai be kara dika taudia dainai unai Taravatu idia badinaia namonamo diba lasi, bona Iuda taudia hegeregeredia unai Taravatu ia hamasedia. Iesu ia henia boubou karana sibona ese ia hagoevadia bona ia hamauridia lou diba. Paulo ia gwau: “Bema kopina utua kara umui abia neganai [Taravatu ibounai idia badinaia be mai taravatuna] Keriso ena gaukara umui dainai be anina lasi.”—Galatia 5:1-4; Kara 15:8-11.
Korinto, Greece, lagani 55 C.E ai bamona. Kopina utua karana ena maoro idia hepapahuahulaia momo dainai kongregesen taudia ia hapararaia. Paulo ia diba kopina utua karana be kara dikana ta lasi. Guna unai be Dirava ena Taravatu goevadaena dainai idia badinaia. (Salamo 19:7; Roma 7:12) Guna Paulo ese dala ia hegaegaelaia ena turana Timoteo (ena sinana be Iuda hahinena), ese kopina utua karana ia abia totona. Paulo be unai ia karaia lasi taravatu badinaia totona, to ia karaia Iuda taudia ese sivarai namona dekenai idia hekwakwanai garina. (Kara 16:3) Ia ese Keristen taudia ia hagoadadia idau hepapahuahu herevadia lalonai idia vareai bona idia parara garina. Ia gwau: “Sedira kopina ia utua vadaeni tauna be Dirava ese ia boiria. Vadaeni iena kopina utua toana do ia kokia gwauraia lasi. Sedira kopina utua lasi tauna be Dirava ese ia boiria. Vadaeni ia be kopina utua kara do ia tahua lasi [ia laloa unai be hahemauri abia dalana dainai].” Dirava ena taravatu badinaia sibona be mai anina bada, Keristen kongregesen lalona amo idia gwauraia taravatudia danu.—1 Korinto 7:18-20; Heberu 13:17.
Filipi, Greece, lagani 60-61 C.E. ai bamona. Ia hedinarai vadaeni Iehova ese Keristen kongregesen ia hanamoa, bona kopina utua lasi idau bese taudia momo be idia vareai, to haida ese unai idia laloa lasi, idia gwau noho taunimanima be Keristen taudia ai idia lao neganai, Iuda taudia edia taravatu idia badinaia be gau badana. Kopina utua taravatu dekenai sibodia edia lalohadai idia gwauraia maoro taudia, ese lauma dalanai taunimanima idia hadikaia. Unai dainai, Paulo ese idia ia sisiba henia auka, ia gwau: “Dika bada idia karaia noho taudia, unai sisia, [Iuda taudia ese sisia idia bouboulaidia lasi idia be miro gaudia dainai] do umui naridia namonamo. Idia ese tauanina idia utua kava.”—Filipi 3:2.
Krete, lagani 61-64 C.E. ai bamona. Aposetolo Paulo ese Tito hanuana ia rakatania bona ia lao Krete dekenai, Keristen taudia edia gaukara ia biagua totona. Tito be Iuda tauna lasi, bona idia doria lasi kopina utua karana ia abia totona. (Galatia 2:3) Hari, Paulo ese Tito ia hagania unai kopina utua karana idia gwauraia maoro taudia, hereva momokani idia inai henia taudia unai, ia sisiba henidia totona. Ia gwau bema taunimanima ese hapararaia herevadia, bona sibodia edia hereva idia gwauraia maoro noho, kongregesen murimurinai do idia atodia. Ia gwau “hereva kavakava dekena amo haida idia hakaua kerere. Iuda taudia momo be inai bamona idia karaia noho. Idia edia kara bona hereva do oi hadokoa. Badina be edia hadibaia koikoi dekena amo iduhu haida dekenai daradara idia havaraia vadaeni.”—Tito 1:10, 11; 3:10, 11; 1 Timoteo 1:3, 7.
Madi, edia kara dainai dika idia davaria unai! Unai taudia be sibodia edia lalohadai idia heagilaia bada dainai, Keristen kongregesen ena hakaua herevana idia dadaraia, haida edia abidadama idia hadikaia, bona edia turana karana Dirava dekenai idia hadikaia danu.—Numera 16:1-3, 12-14, 31-35 oi itaia.
Dahaka do Oi Karaia?
Unai bamona kerere do ita reaia diba, a? Oibe, namona be ita naria namonamo Bible ena hahediba herevadia bona ita sibona ena lalohadai idia tamona totona. Hegeregere, Bible ese tatau be tatau danu idia mahuta hebou karana ia gwauraia inai bamona: ‘Hemarai karadia idia karaia taudia . . . tatau be tatau danu idia mahuta hebou taudia . . . be Dirava ena Basileia do idia davaria lasi.’ (1 Korinto 6:9, 10) Bema Bible ena hereva ena anina idia hedinarai namonamo lasi, bona sibona ena lalohadai unai hereva dekenai ita abia, namona be ita manau bona unai Keristen ginigunadia hegeregeredia, Dirava ena kongregesen idia gwauraia hereva bona hakaua dalana do ita badinaia. Ma danu, bema Bible ese hereva ta ena anina ia gwauraia lasi to maduna ia atoa oi sibona dala maorona oi abia hidi totona, namona be taunimanima dekenai maino oi tahua, bona nega ibounai oi sibona ena lalohadai oi gwauraia maoro lasi, to haida edia lalohadai oi abia dae danu.
Oi ura unai bamona kara namona oi karaia, a? Bema oibe, oi be laloa maoromaoro tauna ta. Oi diba vadaeni maino bona lalo-tamona ese oi sibona emu lalohadai idia hereaia.